“A’ ye to aw ɲɛna”

¹ Yesu kɛlen kɔ ka kobaw ɲɛfɔ minnu bɛna kɛ nin diɲɛ in don labanw taamasiyɛn ye, a ye dusu don a ka kalandenw kɔnɔ ko: “A’ ye to aw ɲɛna.” (Mar. 13:33) Mun na Krecɛnw ka kan ka to u ɲɛna? Bawo an bɛ waati la min farati ka bon ni waati bɛɛ ye hadamadenw ka tariku kɔnɔ. An tɛ se k’an yɛrɛ to sunɔgɔ bolo hakili ta fan fɛ. O kɔ bɛna kɛ min ye, o ye ko an tɛna baara kɔrɔ dɔn, Jehowa ye baara min di an ma k’a kɛ waati laban in na. O ye baara jumɛn ye?

² Jehowa y’a ka mɔgɔw ci u ka Masaya kibaru duman weleweleda dugukolo yɔrɔ bɛɛ la, k’a jira k’o de ye hadamadenw ka jigiya kelenpe ye. N’an ni Ala ka jɛkuluba bɛ jɛ ka baara kɛ ɲɔgɔn fɛ, o bɛ fɛn fila jira. Fɔlɔ, k’an ye Krecɛn lakikaw ye minnu b’u ɲɛmajɔ u ka waati ko la; filanan, ko mago min bɛ yen ka mɔgɔ wɛrɛ dɛmɛ u ka “ɲɛnamaya banbali” kuma mɛn, k’an b’an hakili to o la fana. (Yuh. 6:68) N’an b’an cɛsiri k’an sen don o baara nafamaba in na, an b’a jira k’an b’an ɲɛna hakili ta fan fɛ.

³ Fɛn min b’an bila ka wajuli kɛ: Ikomi an ye Jehowa Seerew ye, an ka kan ka hakili ɲuman sɔrɔ ka ɲɛsin an ka cidenyabaara ma. Ala kanuya min b’an na, ani an mɔgɔ ɲɔgɔn kanuya, o de b’an bila k’an sen don wajuli baara la. (1 Kɔr. 9:​16, 17) N’an b’o kɛ, an bɛna an yɛrɛw kisi, k’an lamɛnbagaw fana kisi. (1 Tim. 4:16) Ala ka Masaya ye gɔfɛrɛnaman ye min ka fisa hadamadenw ma ka tɛmɛ gɔfɛrɛnaman tɔw bɛɛ kan. O kosɔn, an ŋaniya ka kɛ nin ye: k’an sen don o Masaya wajuli baara la cogo basigilen na ka kɛɲɛ n’an seko bɛɛ ye, ani waati kuntaga fana kɔnɔ min ka kan.

⁴ Fɛn nafama min b’a to cidenyabaara ye kɔrɔtɔko ye an bolo, o ye ko tɔɔrɔba bɛna daminɛ k’an to o baara la. Ikomi an t’a don n’a lɛrɛ dɔn, o b’a wajibiya an ka to an ɲɛna, an labɛnnen ka to tuma bɛɛ la, k’an jigi da Jehowa kan delili sababu fɛ. (Efe. 6:18) Wajuli baara bɛ bonyana ka t’a fɛ. Nka, don dɔ la, o waati ma jan tun, o seereya baara min ka bon ni seereya baara tɔw bɛɛ ye hadamaden ka tariku kɔnɔ, o bɛna se a dan na.

⁵ Yesu ye ci min fɔ an ye ko ka “to an ɲɛna,” an ka tugu o la ni kantigiya ye. O nafa ka bon kosɛbɛ sisan ka tɛmɛn waati bɛɛ kan. O la sa, an k’an teliya k’o kɛ. Ka ɲɛsin Jehowa ka baara ma, an ka to an ɲɛna, an basigilen an’an kisɛyalen ka to hakili ta fan fɛ, bi, ani don o don. Ɔwɔ, “an ɲɛmajɔlen ka to, ani an ka se an yɛrɛ la ko bɛɛ la.”​—⁠1 Tes. 5:6