Kana dɛsɛ ka segin ka na!

¹ “Nin kɛra baro duman ye sa! Ne ka kan ka n hakili to a la walasa ka segin ka na bɔ a ye.” Yali i ma deli k’o kuma fɔ ka tila k’a ye k’o tigi sigilen bɛ yɔrɔ min na, k’i ɲinɛna o yɔrɔ kɔ wa? N’o ɲɔgɔn y’i sɔrɔ i b’a faamu ko cogo kelenpe min dɔrɔn b’a to i tɛna dɛsɛ ka segin ka na, o ye ka kunnafoniw sɛbɛn.

² I ka kunnafoniw bɛɛ sɛbɛn: N’i ye baro kɛ mɔgɔ dɔ fɛ min ye mago jira kɛ, tuma min na o ko b’i hakili la, i ka waati dɔ ta ka kunnafoni nafamaw bɛɛ sɛbɛn o tigi ko la. A tigi tɔgɔ, an’i tɛna fili a ma cogo min na, olu sɛbɛn. A ka ladɛrɛsi fana sɛbɛn. I kana ɲini k’o dɔn i kunfɛ. A lajɛ n’i ye min sɛbɛn n’o don tigitigi. Aw ye baro kɛ fɛn min kan, i ye Bibulu tɛmɛsira minnu kalan, ani i ye sɛbɛn minnu to a bolo, olu sɛbɛn.

³ Sanni i ka taa, n’i ye ɲininkali dɔ lawuli min ka kan ka jaabi i ka segin ka bɔnye nata la, i k’o sɛbɛn. Yali i ye fɛn dɔ dɔn a tigi kan, walima a ka denbaya n’a ka diinɛ kan wa? N’a bɛ ten, olu fana sɛbɛn. O la sa, n’i seginna ka na o kɔfɛ, n’i kumana o fɛnw kan, o bɛn’a jira k’i b’i mago don o tigi la. A laban na, don min na, ani lɛrɛ min na i y’i ka bɔnyeli fɔlɔ kɛ, ani i y’a fɔ a ye k’i bɛ segin ka na don min na, olu fana sɛbɛn. N’i ye kunnafoni jɔnjɔnw sɛbɛn, o bɛna kɛ fɛn jɛlenw ye minnu bɛna to i tɛna ɲinɛ joona i ka layidu kɔ, n’o ye ka segin ka na.​—⁠ 1 Tim. 1:⁠12.

⁴ N’i y’i ka fɛnw bɛɛ sɛbɛn kaban sɛbɛnfura kan, i bɛ baara kɛ ni fɛn minnu ye foro baara la, n’olu ye bololabɔrɛ, Bibulu, Comment raisonner (Hakilijakabɔ kɛcogo) gafe, ani sɛbɛn wɛrɛw ye, i k’olu bɛɛ bila ɲɔgɔn fɛ. O cogo la, a bɛna sɔrɔ i kun tuma bɛɛ. Mɔgɔ minnu tɛ sɔrɔ so, a ka ɲi i k’olu ka ladɛrɛsiw kɛ u danma sɛbɛnfuraw kan. I k’i ka segin-ka-bɔnyew kɛ sɛbɛn wɛrɛw kan. I mana fɛn o fɛn sɛbɛn segin-ka-bɔnyew ko la, fɛn min nafa ka bon, o ye k’i kana dɛsɛ ka segin ka na.

⁵ I ka miiri a tigi ma: N’i bɛ k’i labɛn tuma min na cidenyabaara kama, i k’i ka fɛn sɛbɛnnenw lajɛ segin-ka-bɔnyew ko la. I ka miiri u kelen-kelen bɛɛ ma. N’i bɛna segin ka na bɔ u ye, i bɛ se ka baara kɛ ni kuma daminɛ cogo ɲuman min ye, i ka miiri o fana na. O tigi ye mago min jira, a lajɛ i bɛ se ka dɔ fara o kan cogo min na walasa ka se k’o kɛ Bibulu kalan ye. Ikomi i ye kibaru duman cidenyabaarakɛla ye, n’i y’o jateminɛ sugu kɛ, o bɛ se ka dɔ fara i ka baara nafa kan, wa o bɛ dɔ fara i yɛrɛ ka nisɔndiya kan.​—⁠ Nta. 21:⁠5.

⁶ Siɲɛ wɛrɛ sa, n’i ye mɔgɔ dɔ sɔrɔ min b’i lamɛn, i kan’a miiri k’i hakili bɛna se ka to o tigi la nɔgɔya la. I ka kunnafoniw sɛbɛn a ko la, i ka tila k’u lajɛ. I ka miiri a tigi la. I kana dɛsɛ ka segin ka na.​—⁠ Fil. 1:​10, 11.