Funankɛw bɛ se ka bonya min sɔrɔ

¹ Mɔgɔ caman minnu ye bangebagaw ye sisan, u mɔna tiɲɛ kɔnɔ. U ye bonya min sɔrɔ sɔn-ni-sɔn gafeninw don ta fan fɛ, u hakili b’o la ni nisɔndiya ye. O baara in sigira sen kan jɛkulu bɛɛ kɔnɔ san 1949 na. Don kelen dɔgɔkun kɔnɔ, mɔgɔ kelen-kelen bɛɛ tun ka kan k’a ɲɛdon La Tour de Garde ni Réveillez-vous! tila-tilali baara la, nbɛdaw la, du ni du, bitiki ni bitiki, ani cogo wɛrɛw la. Funankɛninw kɔrɔtɔlen tun b’o don makɔnɔ walasa k’u sen don o baara la, bawo o tun bɛ cogo di u ma u ni jɛkulu balikuw ka baara kelen kɛ. Yali a tun bɛ ten fana e bolo tuma min na i tun ka dɔgɔ wa?

² I denw sen don a la: Denmisɛn fitinin minnu tɛ se ka baro daminɛ Bibulu kan, da dɔ la, u bɛ se ka sɔn-ni-sɔn gafeninw di. O bɛ min wajibiya, o ye ka kuma ɲɛjiracogo nɔgɔn dɔ dɔrɔn dege, kumasen surun damadɔw bɛ min na. Ka ɲɛfɔli surun dɔ kɛ sɔn-ni-sɔn gafenin ɲɛ fɔlɔ ja kan, laala, o bɛ bɔli kɛ. Mɔgɔ caman ka teli ka sɔn sɔn-ni-sɔn gafeninw na denmisɛnninw bolo. Tuma caman u bɛ kuma o dɛnmisɛnninw ka kɔnɔnajɛya n’u taamacogo ɲuman kan. N’an ye denmisɛnninw dɛmɛ dɔɔnin dɔrɔn, u bɛ se k’o baara kɛ ka ɲɛ. O cogo la u bɛ baara ɲuman kɛ Masaya cikan jɛnsɛnni na. A jɛlen bɛ ko ni denmisɛnninw bɛ ka kɔrɔbaya, u bangebagaw bɛna u dɛmɛ ka ɲɛtaa kɛ ka t’a fɛ u ka seereya kɛcogow la.

³ Manuwɛli y’a daminɛ ka wajuli kɛ da ni da tuma min na, a si tun ye san saba ye. A bangebagaw y’a kalan ɲɛjirali dɔ la, a tun ka kan k’o min ta a kun fɛ. A tun bɛ wajuli kɛ u fɛ ni timinandiya ye, ka sɔn-ni-sɔn gafeninw, gafeninw ni sɛbɛndennin caman bila mɔgɔw bolo. A tun bɛ senfɛ seereya fana kɛ u fɛ. Don dɔ la, tuma min na a bangebagaw taara n’a ye jirimayɔrɔ dɔ la walasa u k’u lafiyɛn, Manuwɛli y’a bɔ a yɛrɛ la ka sɛbɛndenninw di mɔgɔ wɛrɛw ma minnu tun b’o yɔrɔ la. Hali k’a sɔrɔ a tun ka dɔgɔ kosɛbɛ, Manuwɛli tun b’a cɛsiri cogo min na cidenyabaara la, o kɛra sababu ye k’a bangebagaw ni jɛkulu mumɛ bɛɛ dusu lamin kosɛbɛ.​—⁠Nta. 22:⁠6.

⁴ Calendrier des Témoins de Jehovah 2000 (Jehowa Seerew ka san 2000 donjatelan) kan, Sibiridon bɛɛ bilara “Sɔn-ni-sɔn gafeninw don” kama. Bangebagaw, an b’a gɛlɛya aw ma aw ka mago don ko kura o baara in na, k’aw ka denmisɛnninw dɛmɛ u k’u sen don tuma bɛɛ o baara la, baara min ye bonyako ye an bolo.