Yali i ye Masaya weleweledala basigilen ye wa?
1 An bɛɛ nisɔndiyara k’a mɛn ko Senegali jamana ye weleweledalaw hakɛ cayalenba 863 sɔrɔ san 1999 Utikalo la. Tiɲɛ na, bɛɛ ŋaniya ni bɛɛ ka cɛsiri faralen ɲɔgɔn kan de y’a to o sera ka kɛ. A jɛlen don ko kalo minnu tugura o la, a gɛlɛyara weleweledala dɔw bolo ka kɛ weleweledala basigilenw ye, bawo kabini o kalo la weleweledalaw hakɛ kɛra 842 ɲɔgɔn de ye kalo o kalo. O b’a jira ko n’i ye weleweledala 40 ta, weleweledala kelen m’i labɛn walasa ka wajuli kɛ kalo o kalo. An dalen b’a la ko dusulamin min filɛ nin ye, k’o bɛna u dɛmɛ k’o ko ɲɛnabɔ.
2 Bonya min b’i bolo, i ka nafa don o la: Bonya min b’an bolo ka se ka taa Masaya kibaru duman fɔ mɔgɔw ye, an ka kan ka nafaba don o la. O baara in bɛ Jehowa nisɔndiya, ka mɔgɔ dusukun jɛlenw dɛmɛ u ka ɲɛnamaya sira ye. (Nta. 27:11; 1 Tim. 4:16) N’an bɛ wajuli kɛ tuma bɛɛ, o bɛ dɔ fara an dɔnkow kan wajuli la. An bɛ nisɔndiya ani wasa sɔrɔ, wa, an b’an ka baara kɛ k’a dafa fana.
3 An k’an ka baara dantigɛli sɛbɛn lafa: Mɔgɔ minnu bɛ baara kɛ foro la, a kɛra bolokɔfɛko ye olu dɔw bolo k’u ka baara dantigɛli sɛbɛnni kɛ a waati la. An man kan ka miiri abada k’an bɛ cɛsiri minnu kɛ k’olu nafa man bon walasa an k’u sɛbɛn. (A suma ni Marka 12:41-44 ye.) An bɛ baara min kɛ, an ka kan k’o sɛbɛn tigitigi. Ni cogo dɔ b’i bolo i ka so, i n’a fɔ donjatelan, i bɛ baara min kɛ wajuli la, i k’o sɛbɛn o kan. O bɛna kɛ i bolo fɛn ye min b’i hakili jigin tuma bɛɛ walasa i ka teliya k’i ka dantigɛli jɔnjɔn sɛbɛn kalo sa kelen kelen bɛɛ la.
4 Mɔgɔw mago bɛ dɛmɛ min na, i k’o di: Labɛn minnu bɛ kɛ sigida la, olu bɛ se ka ɲɛ ka t’a fɛ. O b’a to mɔgɔ minnu mago bɛ dɛmɛ na walasa ka se ka wajuli kɛ tuma bɛɛ cidenyabaara la, o mɔgɔw k’o dɛmɛ sɔrɔ. Jɛkulu sɛbɛnnikɛla ni gafe kalan ɲɛminɛbaga ka kan ka labɛnw kɛ walasa weleweledala minnu bɛ se kosɛbɛ, olu ka dɛmɛ don. Ni denw, walima Bibulu kalandenw b’i bolo minnu ye weleweledalaw ye minnu ma batise fɔlɔ, u dege u k’u ka baara dantigɛli sɛbɛn kɛ kalo o kalo.
5 An k’an hakili to barokun na min kumakun ye “Reconnaissante à Jéhovah pour une longue vie à son service” (Waleɲumandɔn ka ɲɛsin si jan ma Jehowa ka baara la) ye, n’o bɛ sɔrɔ san 1997 Ɔkutɔburukalo tile fɔlɔ La Tour de Garde kɔnɔ. O bɛ an balimamuso Ottilie Mydland de kan ka bɔ Nɔrwɛji jamana na. A kɛra kibaru duman weleweledala basigilen ye sanni a ka batise san 1921 na. San biwolonwula ni wɔɔrɔ tɛmɛnen kɔfɛ, k’a si to san 99 na, a ko: “Ne nisɔn ka di ko n bɛ se ka kɛ weleweledala basigilen ye hali bi.” Nin ye hakilina ɲuman ye min ka kan ka ladege Jehowa ka baarakɛlaw bɛɛ fɛ.