Ɲininkaliw Jaabi

◼ Tuma min na mɔgɔ dɔ kɔseginni (réintégration) kuma bɛ fɔ, yali a bɛnnen don ka tɛgɛrɛ fɔ o la wa?

A ka kanuya n’a ka ɲumanya kɔnɔ, Jehowa Ala ye cogo jira Kitabuw kɔnɔ, cogo min b’a to a k’a ka nɛɛma di kojugukɛla nimisabagatɔ ma ani k’a lasegin Krecɛnw ka jɛkulu kɔnɔ. (Zab. 51:​14, 19) N’o bɛ kɛ tuma min na, a ɲininen b’an fɛ, an k’an ka kanuya jira ko kura o mɔgɔ suguw la minnu nimisara ni kɔnɔnajɛya ye.​—2 Kɔr. 2:​6-8.

O bɛɛ n’a ta, an mana nisɔndiya cogo o cogo an somɔgɔ walima an dɔnmɔgɔ dɔ kɔseginni ko la, o fɔ tuma la jɛkulu kɔnɔ, bonya ka kan ka jira k’a sɔrɔ mankan t’a la. San 1998 Ɔkutɔburukalo tile fɔlɔ La Tour de Garde, ɲɛ 17nan bɛ nin fɔ o koɲɛ la, ko: “O bɛɛ n’a ta, an ka kan k’an hakili to a la ko jɛkulu kɔnɔ mɔgɔ fanba t’a dɔn ko kelen min ye mɔgɔ lase gɛnni ma, walima ko min y’a lasegin ka na. Ka fara o kan, dɔw bɛ se ka kɛ yen minnu tɔɲɔna walima minnu tɔɔrɔla nimisabagatɔ ka kojugu kɛlen fɛ; o bɛ se yɛrɛ ka waati jan ta. O la sa, nin koɲɛ suguw la, ni mɔgɔ kɔseginni kuma bɛ fɔ, an ka kan k’a faamuyali kɛ k’an ka nisɔndiya jira walew to an kɔnɔ fo tuma min na u bɛ se ka kɛ a tigilamɔgɔ kelenpe ɲɛ na.”

Hali n’an nisɔndiyalen don ka mɔgɔ kɔsegintɔ ye ka na tiɲɛ sira la, a bɛnnen tɛ ka tɛgɛrɛ fɔ o tuma la.