ƝIninkali Jaabi

◼ Ala-ka-Marako cidenyabaara kalanso ni Baara ka Lajɛ la, yala a bɛnnen don lamɛnbagaw ka tɛgɛrɛ fɔ jɛmu kelen-kelen bɛɛ kɔfɛ wa?

An Dabaga Jehowa ye dugukolo da tuma min na, ‘dugujɛ dolow ye dɔnkili da ɲɔgɔn fɛ, Ala denkɛw bɛɛ ye ɲagalikanba bɔ.’ (Job 38:7, Bibulu senuma 1961) O mɛlɛkɛ minnu ye Ala denkɛw ye, olu tun b’a fɛ ka Jehowa tanu a ka dakabanadali baara la, n’o tun ye cogo kura dɔ ye Jehowa y’a ka hakilitigiya, a ka ɲumanya n’a ka setigiya jira min fɛ.

A ka ɲi an k’a jira ko an balimaw bɛ cɛsiriw ni jɛmuw ni ɲɛjirali minnu kɛ, olu nafa ka bon an bolo tiɲɛ na. Misali la, an bɛ deli ka tɛgɛrɛ fɔ jɛmuw ni ɲɛjiraliw kɔfɛ jamalajɛ kɛrɛnkɛrɛnnenw na i n’a fɔ kafo ni kafoba ka jamalajɛw la. Jɛmuw ni ɲɛjirali minnu bɛ kɛ o jamalajɛw la, u b’an balimakɛw bila u ka waati wɛrɛ ta ani ka cɛsiri wɛrɛw kɛ walisa k’o baaraw labɛn. An ka tɛgɛrɛkan b’an ka waleɲumandɔn de jira jɛmukɛla ka baara gɛlɛn kɛlen ko la, nka a b’an ka waleɲumandɔn fana jira dɔnniya ko la Jehowa ye min lase an ma a ka Kuma ni a ka jɛkuluba sababu fɛ.—Esa. 48:17; Mat. 24:45-47.

Mun dun bɛ se k’a fɔ jɛmuw ko la minnu bɛ kɛ Ala-ka-Marako Cidenyabaara Kalanso ni Baara ka Lajɛ la? Sariya tɛ yen min b’a jira ko tɛgɛrɛ tɛ se k’a fɔ n’a y’a sɔrɔ o de ye an ka waleɲumandɔn jiracogo ye, i n’a fɔ kalanden dɔ ka jɛmu fɔlɔ kɛlen kɔfɛ kalanso la. Nka, tɛgɛrɛfɔ ka teli ka kɛ ko ye min bɛ kɛ a yɛrɛma ten, ka mɔgɔ hakili bɔ a kun kɔ. O de y’a to tuma caman na an tɛ tɛgɛrɛ fɔ ɲɛjirali kelen-kelen bɛɛ kɔfɛ.

Nka, hali n’a y’a sɔrɔ ko tuma caman na an tɛ tɛgɛrɛ fɔ Ala-ka-Marako Cidenyabaara Kalanso ni Baara ka Lajɛ jɛmu fanba la, cogo wɛrɛw bɛ yen an bɛɛ bɛ se ka an ka waleɲumandɔn jira min fɛ kalan ko la, ani cɛsiriw ko la minnu bɛ kɛ an balimaw fɛ minnu bɛ o yɔrɔw kɛ. An bɛ se k’an ka waleɲumandɔn jira u la n’an ɲɛmajɔlen bɛ to kalan kɛtuma na ani n’an b’an tulomajɔ jɛmukɛlaw ka kumaw fɛ. Lajɛ kɔfɛ fana, tuma caman na an bɛ se ka gɛrɛ jɛmukɛbaga la k’an ka waleɲumandɔn jira u ka cɛsiri kɛlen ko la.—Efe. 1:15, 16.