Jehova bɛ jurumukɛlaw jate cogo min na, jɛkulu kɔnɔmɔgɔw bɛ se ka o ladege cogo di?

1. Jehova b’a fɛ mɔgɔw bɛɛ ka mun de kɛ?

JEHOVA y’an dan ka see di an ma walisa an ka koow latigɛ an yɛrɛ ma. I be baara kɛ n’o setigiya ye tuma o tuma ka desizɔnw ta. K’a latigɛ k’an yɛrɛkun di Jehova ma ani ka kɛ a ka denbayamɔgɔ dɔ ye, o ye an ka desizɔnw bɛɛ la kɔrɔtaninba lo ye. Jehova b’a fɛ an kelen kelen bɛɛ k’o lo kɛ. Mun na do? Sabu a be adamadenw kanu ani min ka fisa u ma, a b’o lo fɛ. A b’a fɛ u ka teriya kɛ n’ale ye ani ka ɲɛnamaya kɛ fɔɔ abada.—Deter. 30:19, 20; Gal. 6:7, 8.

2. Jehova bɛ mun de ɲini jurumukɛla nimisabaliw fɛ? (1 Yuhana 2:1)

² Nka, Jehova tɛ mɔgɔ si waajibiya a k’ale bato. A b’a to mɔgɔ kelen kelen bɛɛ k’a latigɛ a bena min kɛ. Nka ni kerecɛn batizenin dɔ ye jurumuba dɔ kɛ, diinan mɔgɔkɔrɔw ka ɲi ka mun lo kɛ do? N’a ma nimisa, u ka ɲi k’a bɔ kafo kɔnɔ (1 Kor. 5:13). O bɛɛ n’a ta, Jehova b’a fɛ sɔbɛ la o jurumukɛla ka kɔsegi ale ma. Kuun jɔnjɔn minw kama Jehova ye kunmabɔsara di, u la dɔ ye ko jurumukɛla min nimisanin lo, a ka jurumuw ka se ka yafa (1 Zan 2:1 kalan). Jehova ye Ala kanutigi ye minkɛ, a be jurumukɛlaw jija u ka nimisa.—Zak. 1:3; Ɔrɔm. 2:4; Zaki 4:8.

3. An bɛna mun de ye nin kalansen kɔnɔ?

³ Jehova be jurumu ani jurumukɛlaw jati cogo min na, a b’a fɛ an fana k’u jati o cogo kelen na. An bena a ye an be se k’o kɛ cogo min na. Barokun nin na, an bena a ye Pol ko Korɛnti kafomɔgɔw ka min kɛ, tuma min na u dɔ ye jurumuba kɛ. O kɔ, an bena a filɛ a ko u ka min kɛ fana tuma min na o cɛɛ nimisara. A laban, mɔgɔ minw be jurumuba kɛ, an bena a ye Jehova b’u jati cogo min na.

SAN KƐMƐ KULU FƆLƆ LA, JURUMUBA DƆ KO ƝƐNABƆRA COGO MIN NA

4. San kɛmɛ kulu fɔlɔ la, mun de tun bɛ ka kɛ Kɔrɛnte jɛkulu la? (1 Kɔrɛntekaw 5:​1, 2)

⁴ Vɛrise nunu kalan: 1 Korɛntikaw 5:1, 2. Pol ka voyazi sabanan na a ka misɔndenya baara sen fɛ, a y’a mɛn ko kojuguba dɔ be kɛra Korɛnti kafo kura kɔnɔ. Balimacɛ dɔ tun be kakalaya kɛ n’a facɛ ka muso ye. O tun ye kojuguba yɛrɛ lo ye “min ɲɔgɔn te sɔrɔ Alalɔnbaliw yɛrɛ fɛ”! Kafodenw tun be u ɲɛɛ tugu o koo kan ani a be komi u tun be u yɛrɛ bonya o kosɔn. N’a sɔrɔ u dɔw tun b’a miiri ko Jehova be mɔgɔ dafabaliw faamu ani a be makari u la cogo min na, u be o lo ladegira ten. Nka, ni Jehova sagokɛla ye koo jugu kɛ, a t’a ɲɛɛ tugu o kan. O cɛɛ tun be kafodenw tɔgɔ tiɲɛna a ka kɛwale juguw fɛ. Kafoden minw tun be jɛn n’a ye, a tun be se ka nɔɔ jugu to olu kan fana. O la, Pol ye o kafodenw jija u ka mun lo kɛ?

5. Ciden Paul ko Kɔrɛnte krecɛnw ka mun de kɛ, ani o kɔrɔ ye mun de ye? (1 Kɔrɛntekaw 5:​13) (Ja fana lajɛ.)

⁵ Vɛrise nin kalan: 1 Korɛntikaw 5:13. Hakili senu ye ciden Pol lasun a ye cikan di a ka lɛtɛrɛ kɔnɔ ko jurumukɛla min ma nimisa, u k’a bɔ kafo kɔnɔ. Kerecɛn kantigiw tun ka ɲi k’o tigi minɛ cogo di? Pol ko u “kana jɛn n’o tigi ye fewu, hali ka dumuni yɛrɛ kɛ n’a ye.” (1 Kor. 5:11). Mun na do? Sabu n’i be dumuni kɛra ni mɔgɔ dɔ ye, i ka teli ka wagati ni baro diiman kɛ n’o tigilamɔgɔ ye. Pol ka kuma kɔrɔ ko kafodenw man ɲi ka ɲɛnagwɛkow n’a ɲɔgɔnnaw kɛ n’o tigi ye. O la, a tɛna nɔɔ jugu to u kan (1 Kor. 5:5-7). Ka fara o kan, n’u tɛ jɛnɲɔgɔnya kɛ n’o tigi ye, o bena a to a b’a faamu ko a ye kojuguba lo kɛ. O be se ka maloya bila a la ani k’a lasun ka nimisa.

6. Paul ka lɛtɛrɛ ye nɔ jumɛn de bila Kɔrɛnte krecɛnw la ani jurumukɛla la?

⁶ O lɛtɛrɛ cinin kɔ Korɛnti kafodenw ma, Pol y’a daminɛ k’a yɛrɛ ɲininga u bena o ta cogo min na. Kɔfɛ, Titi nana kibaro diiman fɔ Pol ye Korɛnti balimaw koo la. O kafodenw ye o lɛtɛrɛ ka cikanw sira tagama ani ka jurumukɛla bɔ kafo kɔnɔ (2 Kor. 7:6, 7). Dɔɔni o kɔ, o jurumukɛla nimisara. A y’a sɔɔn n’a ka kɛwalew yɛlɛma ani k’a daminɛ ka tugu Jehova ka sariya tilenninw kɔ (2 Kor. 7:8-11). O la, ciden Pol ko kafodenw ka mun lo kɛ?

JƐKULU KƆNƆMƆGƆW KA KAN KA JURUMUKƐLA NIMISALEN MINƐ COGO MIN NA

7. Ka jurumukɛla bɔ jɛkulu kɔnɔ, o ye a dɛmɛ cogo di? (2 Kɔrɛntekaw 2:​5-8)

⁷ Vɛrise nunu kalan: 2 Korɛntikaw 2:5-8. Pol ko “jama ye min kɛ a la ka ban, o b’a bɔ.” O kɔrɔ ko u ye jurumukɛla bɔ kafo kɔnɔ minkɛ, a y’a faamu ko a ka ɲi ka nimisa. O la, kuun t’a la u ka to k’a kolo tugun.—Eburuw 12:11.

8. Paul y’a ɲini Kɔrɛnte jɛkulu fɛ u ka mun de kɛ tuguni?

⁸ O cɛɛ nimisara minkɛ, Pol ko diinan mɔgɔkɔrɔw k’a to a be segi ka kɛ kafoden dɔ ye. A y’a fɔ u ye fana ko u “ka yafa a ma k’a jigi tugu” ani ka banba k’a yira a la ko ‘a koo ka di u ye.’ Pol tun b’a fɛ kafodenw k’a yira u ka kumaw n’u ka kɛwalew fɛ ko u yafara o cɛɛ ma sɔbɛ la ani ko u b’a kanu. U tun bena a yira ka gwɛ o cogo la ko u ninsɔn ka di k’a ye ko a kɛra kafoden dɔ ye kokura.

9. Mun na mɔgɔ dɔw tun bɛ sigasiga ka yafa jurumukɛla dɔ ma min nimisara?

⁹ Yala a gwɛlɛyara dɔw ma ka o cɛɛ bisimila kafo kɔnɔ wa? Bibulu t’o fɔ an ye, nka a be se ka kɛ. N’a sɔrɔ dɔw bele tun diminin be o cɛɛ kɔrɔ sabu a tun ye min kɛ, o ye kafodenw tɔgɔ tiɲɛ. N’a sɔrɔ dɔ wɛrɛw fana tun diminin lo sabu o cɛɛ donna u gasi la. Kafoden tɔɔw tun b’u jijara kosɔbɛ ka Jehova ka sariyaw labato. O la, u dɔw tun be se k’a miiri ko a bɛnnin tɛ u ka segi k’o cɛɛ kɛ kafoden dɔ ye, k’a sɔrɔ a tun ye o kojuguba ɲɔgɔn kɛ (Luka 15:28-30 lajɛ). N’o lo, mun na a tun kɔrɔtanin lo kafodenw k’a yira o cɛɛ la ko u b’a kanu sɔbɛ la?

10-11. Mun de tun bɛ se ka kɛ ni diinɛ maakɔrɔw ma yafa jurumukɛla ma min nimisara?

¹⁰ O cɛɛ tun nimisanin lo sɔbɛ la. Miiri k’a filɛ ni diinan mɔgɔkɔrɔw tun banna o cɛɛ ka kɔsegi kafo kɔnɔ. Wala a kɔseginin kɔ kafo kɔnɔ ni kafodenw tun banna k’a yira a la ko u b’a kanu. A dusu tun be se ka kasi “fɔɔ a hakili be ɲagami ka dama tɛmɛ.” A jigi tun be se ka tigɛ pewu. A yɛrɛ tun be jijali minw kɛra walisa ka segi ka jɛnɲɔgɔnya ɲuman kɛ ni Ala ye, a tun be se k’o dabila.

¹¹ Min yɛrɛ ka jugu, o ye ko ni kafodenw tun banna ka yafa a ma, o tun be se ka olu yɛrɛ ni Jehova ka jɛnɲɔgɔnya nagasi. Mun na do? Sabu u tun tɛna Jehova ka yafali ladegi jurumukɛla ta fan fɛ. Nka, u tun bena Sutana lo ladegi, ale min ka jugu ani a tɛ makari. Sutana tun bena tɛmɛ u fɛ ka o cɛɛ ka Alako nagasi pewu!—2 Kor. 2:10, 11; Efɛz. 4:27.

12. Jɛkulu mɔgɔw tun bɛ se ka Jehova ladege cogo di?

¹² Sanni u ka Sutana ladegi, Korɛnti kafodenw tun be se ka Jehova ladegi cogo di? Jurumukɛla minw nimisanin lo, Jehova be olu minɛ cogo min na, u kɛtɔ k’a ladegi o la. A kɔrɔsi Bibulu sɛbɛbaga dɔw ye min fɔ Jehova koo la. Misali la, Dawuda ko: “Matigi, e ka ɲi, e be yafa.” (Zab. 86:5). Mise ko: “Ala, i ɲɔgɔn te batofɛnw cɛma, ele min be hakɛ yafa.” (Mise 7:18). Ani Ezayi y’a fɔ ko: “Mɔgɔjugu k’a ka juguya dabila. Mɔgɔ min kɔnɔ ka jugu, o tigi k’a ka miirijugu dabila. A ka kɔsegi Masaba ma, ale bena makari a la. A ka kɔsegi an ka Ala ma, ale bena yafa a ma tiɲɛ na.”—Ezayi 55:7.

13. Ni jurumukɛla nimisara a ka jurumu la, mun na diinɛ maakɔrɔw man kan ka o tigi kɔseginni bila ka sumaya? “Korɛnti balima min tun ye jurumuba kɛ, tuma juman lo la u segira k’a kɛ kafoden dɔ ye?”).

¹³ Walisa ka Jehova ladegi, cɛɛ min nimisara, Korɛnti kafodenw tun ka ɲi ka yafa a ma ani k’a yira ko u b’a kanu. Kafodenw y’a yira ko u be Pol “ka kuma bɛɛ bato,” u kɛtɔ k’a ka cikan sira tagama ani k’a to o cɛɛ kɛra kafoden dɔ ye tugun (2 Kor. 2:9). O cɛɛ nimisara hali k’a sɔrɔ a kalo damanin dɔrɔn ye nin ye diinan mɔgɔkɔrɔw tun y’a bɔ kafo kɔnɔ. O la, kuun tun t’a la u ka kɔnɔni kɛ tugun ka sɔrɔ k’a kɛ kafoden dɔ ye kokura.

AN BƐ SE KA JEHOVA KA TILENNENYA NI A KA MAKARI LADEGE COGO MIN NA

14-15. An bɛ kalan jumɛn de sɔrɔ ka bɔ jurumuba dɔ ɲɛnabɔcogo la Kɔrɛnte jɛkulu kɔnɔ an kumana min kan? (2 Piɛrɛ 3:9) (Ja fana lajɛ.)

¹⁴ U tun ye jurumukɛla dɔ ka koo ɲɛnabɔ cogo min na Korɛnti kafo kɔnɔ galen, Jehova y’a to u y’o sɛbɛ Bibulu kɔnɔ walisa “ka hakili d’an ma.” (Ɔrɔm. 15:4). O maana b’a yira ko minw be jurumuba kɛ ani u tɛ nimisa, Jehova tɛ sɔn u ka to kafo kɔnɔ. Dɔw be se k’a miiri ko komi Jehova ye makaritigi ye, jurumukɛla minw tɛ nimisa, a be sɔn olu ka to kafo kɔnɔ. Nka, Jehova t’a ka makari yira o cogo la. Hali ni Jehova ye makaritigi ye, a tɛ sɔn kɛwale sifa bɛɛ ma. A ye sariya minw sigi ɲuman ani juguman koo la, o tɛ yɛlɛma (Zude 4). Jurumukɛla minw tɛ nimisa, ni Jehova tun be sɔn u ka to kafo kɔnɔ, a tun tɛna a yira ko a ye makaritigi ye. Mun na do? Sabu o be se ka kɛ farati ye kafoden tɔɔw bɛɛ ma.—Talenw 13:20; 1 Kor. 15:33.

¹⁵ An b’a lɔn ko Jehova t’a fɛ mɔgɔ si ka halaki. A b’a fɛ mɔgɔ caamanba ka kisi n’a be se ka kɛ. Mɔgɔ minw b’u ka miiriya n’u ka kɛwalew yɛlɛma ani u b’a fɛ ka kɛ a teriw ye kokura, a be makari olu la (Ezek. 33:11; 2 Piyɛri 3:9 kalan). Korɛnti kafoden min tun ye jurumuba kɛ, a nimisara ani k’a ka koo juguw dabila. O tuma na, Jehova tɛmɛna ciden Pol fɛ k’a ɲɛfɔ kafodenw ye ko u ka ɲi ka yafa a ma ani ka sɔn a ka kɔsegi kafo kɔnɔ.

16. Jehova tun b’a fɛ jurumukɛla ko ka ɲɛnabɔ cogo min na Kɔrɛnte jɛkulu la, o ye nɔ jumɛn de bila i la?

¹⁶ U ye jurumukɛla dɔ ka koo ɲɛnabɔ cogo min na Korɛnti kafo kɔnɔ, o b’a yira an na ko Jehova ye kanutigi ye ani a be koow kɛ tilenninya la (Zab. 33:5). Yala o t’i lasun ka Jehova tando bɛrɛbɛrɛ wa? Siga t’o la. An be Jehova waleɲuman lɔn kosɔbɛ a ka makari kosɔn sabu an bɛɛ ye jurumukɛlaw ye minkɛ, an mako be yafali la. An be Jehova waleɲuman lɔn fana sabu a ye kunmabɔsara di walisa an ka jurumuw ka se ka yafa. K’a lɔn ko Jehova b’a sagokɛlaw kanu sɔbɛ la ani ko min ka fisa u ma a b’o lo fɛ, o b’an dusu saalo yɛrɛ le!

17. An bɛna mun de ye kalansen nataw la?

¹⁷ Bi, an be jurumukɛlaw ka koo ɲɛnabɔ cogo di do? Jehova b’a fɛ ka jurumukɛla dɛmɛ a ka nimisa. Diinan mɔgɔkɔrɔw be se k’a yira cogo di ko u b’a ladegi? Ni diinan mɔgɔkɔrɔw y’a latigɛ ka mɔgɔ dɔ bɔ kafo kɔnɔ wala k’a kɛ kafoden dɔ ye tugun, kafoden tɔɔw ka ɲi k’o koo ta cogo di? An bena o ɲiningaliw jaabi barokun nataw la.