An bɛ se ka hakilijakabɔ kɛ ka ɲɛ cogo min na
1 “Hakilijakabɔ” daɲɛ kɔrɔ dɔ ye “ka kuma mɔgɔ wɛrɛ fɛ walasa ka se sɔrɔ a ka kɛtaw kan walima a fɛtaw kan.” Walasa i k’i ka cidenyabaara kɛ ka ɲɛ kosɛbɛ, i ka kan ka se ka hakilijakabɔ kɛ koɲuman mɔgɔw fɛ, e ni minnu bɛ bɛn. (Kɛw. 17:2-4) Nka, i bɛ se k’o kɛ ka ɲɛ cogo di?
2 A bɛ daminɛ ni taasi ye: I bɛ Bibulu tiɲɛkumaw kalan tuma min na, i bɛn’a ye ko nafa b’a la i k’i miiri o kalan kan. Ni yɔrɔ dɔw ka gɛlɛn, i ka waati ta ka ɲinini kɛ, ka taasi jaabiw kan. I k’a ɲini ka ɲɛfɔli dilenw faamu ka jɛya. Sɛbɛnniw bɛ dalilu minnu di o ɲɛfɔliw kan, i k’a ɲini k’olu fana faamu ka jɛya.
3 Cidenyabaara labɛnni sen b’a la: I bɛna tiɲɛkuma ɲɛfɔ mɔgɔ sifa caman ye cogo min na, i k’i miiri o la. I ka ɲininkali kɛ, ɲininkali min b’a to i ka mɔgɔw fɛta dɔn ani ka lamɛnni diya don u la. Hakilina min bɛ o ɲininkali ni tɛmɛsiraw cɛ, i k’o dajira. Fɔtakɔkarikuma (objections) minnu bɛ se ka lawuli, i ka kɔn u ma. Baro bɛ se ka kɛ u kan cogo min na, i k’i miiri o la. Sɛbɛn jirata yɔrɔ koloma min bɛnnen don o ma kosɛbɛ, i k’o da kɛnɛ kan.
4 I ka tugu Yesu ka misali kɔ: Fɛn min ye ka mɔgɔ bila hakilijakabɔ la Sɛbɛnniw kan, Yesu ye misali bɛɛ la ɲuman ye o ko la. Walasa k’a sɛgɛsɛgɛ a ye mɔgɔw kalan cogo min na, o jateminɛ Luka 10:25-37 ka maana kɔnɔ. Nin kɛcogo kɔlɔsi: 1) Ka mɔgɔw hakili sin Sɛbɛnniw ma u ka ɲininkaliw jaabi tuma na. 2) Ka kuma di mɔgɔw ma, k’u tanu u ka jaabi ɲumanw na. 3) Ka jɛya a la ko ɲininkali ni Sɛbɛnniw cɛ hakilina faamuyara ka ɲɛ. 4) Ka kɔrɔmasurunw di minnu bɛ don dusukun na walasa ka jɛya a la ko jaabi kɔrɔ jɔnjɔn faamuyara.—San 1986 Marisikalo tile fɔlɔ La Tour de Garde lajɛ, ɲ. 27-28, d. 8-10.
5 Minɛn min dira an ma, an ka baara kɛ n’o ye: Comment raisonner à partir des Ecritures (Hakilijakabɔ kɛcogo Sɛbɛnniw kan) gafe dabɔra forobaara kama. A ɲɛbilakumaw bɛ kuma tigɛlaw jaabi; a bɛ hakilijakabɔ kɛ cogo min na, o b’an dɛmɛ k’an ka hakilijakabɔ kɛcogo ɲɛ. Raisonner gafe ye minɛn nafama ye an ka kan ka min bila an kun tuma bɛɛ cidenyabaara waati la. Foyi kana an bali ka baara kɛ n’a ye n’an bɛ baro kɛ Bibulu kan tuma min na. I ka segin gafe ɲɛ 7 ni 8 kan k’a lajɛ i bɛ se ka nafa bɔ a la kosɛbɛ cogo min na.
6 An mana se hakilijakabɔ kɛcogo la mɔgɔw fɛ, o na dɔ fara an ka wajuli ni mɔgɔ kalan baara kɛcogo kan. (1 Kɔr. 9:23) O na duba caman fana lase anw ma ani mɔgɔw ma, an ni minnu bɛ bɛn cidenyabaara la.