Ikomi laban bɛ ka surunya, an ka dɔ fara seereya kan
1 Sumantigɛ waati ye nisɔndiya waati de ye. Baara gɛlɛn waati don fana. Waati dɔrɔn de dan sigilen bɛ walisa ka suman dalajɛ. Baarakɛlaw man kan ka sumaya u ka baaraw fɛ.
2 Yesu kumatɔ misali la, a ye “kow sigicogo laban” suma ni sumantigɛ waati ye. (Mat. 13:39, NW) An bɛ balo la diɲɛ in laban de la, wa waati dan sigilen de tora walisa ka seereya kɛ “dugukolo yɔrɔ bɛɛ la.” (Mat. 24:14) Ikomi laban bɛ ka surunya iko a ma deli k’a kɛ ban, an ka kan ka dɔ fara an niyɔrɔ kan cidenyabaara la. Mun na? Yesu y’a ɲɛfɔ ko: “Suman tigɛta ka ca, nka baarakɛlaw ka dɔgɔ.”—Mat. 9:37, 38; Rom. 12:11.
3 Ikomi kɔrɔtɔko don, baara kɛ ni o miiriya ye: Tuma min na Yesu y’a ka waajuliba baara in daminɛ, san saba ni tila dɔrɔn de tun b’a bolo walisa k’a ka baara timɛ. A ye waajuli kɛ ni kɔrɔtɔ miiriya ye. A ko: “Wajibi don ne ka Ala ka masaya kibaro duma fɔ dugu tɔw fana la, katuguni o de ye ne ci kun ye.”—Luk. 4:43.
4 Yesu ye kɔrɔtɔ miiriya don a ka kalandenw hakili la. (Mar. 13:32-37) O de kosɔn, “don o don, ka u to Alabatosoba kɔnɔ, ani mɔgɔw ka duw kɔnɔ, u ma mɔgɔw kalanni ni Krista Yesu kibaru duman fɔli dabila.” (Kɛw. 5:42) Ka ɲɛsin baaraw ma, baara minnu nafa man bon kosɛbɛ, olu tun ma jɔyɔrɔ fɔlɔ sɔrɔ u ka ɲɛnamaya kɔnɔ. Hali ni kalandenw tun man ca, u ye taɲɛ sɔrɔ kibaru duman weleweledali la “sankolo jukɔrɔ danfɛn bɛɛ ye.”—Kol. 1:23.
5 Ikomi “fɛn bɛɛ laban surunyara”, daliluba wɛrɛ b’an bolo k’o hakilina ɲɔgɔn sɛnɛ sisan. (1 Piɛ. 4:7) Jehowa ye don ni lɛrɛ sigi walisa ka dan bila nin kow sigicogo in na. (Mat. 24:36) Waajuli baara na ban waati tɔ tolen kɔnɔna na. O kosɔn, an bɛ taa’ fɛ ka dɔ fara an ka cɛsiriw kan walisa ka mɔgɔ caman-caman lasɔrɔ ni kibaru duman ye.
6 Ikomi laban bɛ ka surunya, n’an bɛ dɔ fara an niyɔrɔ kan seereya baara la, an bɛna nisɔndiya sɔrɔ k’a fɔ Jehowa ye, i n’a fɔ Yesu y’a fɔ cogo min na ko: ‘I ye baara min di ne ma k’a kɛ, ne ye o kɛ k’a dafa.’—Yuh. 17:4.