Kibaru duman waajuli negeba ka kɛ i la
1 ‘Ne b’a fɛ kosɛbɛ ka aw ye. Ne b’a fɛ kosɛbɛ ka kibaru duman fɔ aw fana ye.’ Pol yɛrɛ kumana nin cogo de la a ka bataki daminɛ na ka ɲɛsin a balimakɛw ma minnu tun bɛ Romɛ. Mun na a negeba tun bɛ Pol la ka taa bɔ u ye? A ko: ‘Walisa ne ka ne ka baara nɔ [“mɔ”, NW] dɔ sɔrɔ aw cɛma. Kibaru duman maloya tɛ ne la fewu; o ye Ala ka sebagaya ye ka dannabagaw bɛɛ kisi.’ Rom. 1:11-16.
2 Pol ye o negeba kelen de jira tuma min na a kumana Efese maakɔrɔw fɛ. A y’u hakili lajigin ko: “Kabini don fɔlɔ min na ne sen donna Asi jamana na . . . ne ma n yɛrɛ minɛ ka mɔgɔw kalan jama na ani so ni so. Nka, ne ye seereya kɛ k’a dafa Yahutuw ni Gɛrɛkiw ye.” (Kɛw. 20:18-21, NW) Pol sago tun ye ka kibaru duman jɛnsɛn kisili ko la a ka danyɔrɔ bɛɛ la, ani ka Masaya mɔ dɔ sɔrɔ. Nin ye hakilina ɲuman ye min ka kan ka ladege dɛ!
3 An bɛ se k’an yɛrɛ ɲininka ko: ‘Tuma min na ne bɛ kibaru duman waajuli kɛ, yali ne bɛ o negeba kelen de jira wa? Sanni ka waajuli baara ye ikomi ni ci dɔrɔn don, yali a negeba bɛ ne na ka kibaru duman fɔ mɔgɔ camanba ye n’o bɛ se ka kɛ wa? Yali delili la ne bɛ n ka cogoyaw jateminɛ wa? Cogo minnu b’an ka danyɔrɔ la, yali ne b’olu bɛɛ sɛgɛsɛgɛ, i n’a fɔ ka waajuli kɛ da ni da la, nbɛdaw la, jagokɛyɔrɔw la, nɛgɛjuru fɛ ani senfɛ cogo fɛ wa?’
4 K’i ni don a la Awirilikalo la, o negeba ka kɛ i la: Awirilikalo ye waati ɲuman de ye ka dɔ fara an yɛrɛ niyɔrɔ kan waajuli baara la. Ikomi dɔ bɔra lɛrɛ wajibiyalen na, a dɔ rɔ mɔgɔ caman bɛna se ka kɛ tutigɛbaga farankanw ye. Laala, cogoyaw bɛna to i ka kɛ tutigɛbaga farankan ye Awirili ni Mɛ kalow la. Ikomi yɛlɛmaliw donna lɛrɛ wajibiyalen na, a dɔ rɔ i bɛ se ka don tutigɛbaga basigilen baara la. N’i ye jɛkulu weleweledala dɔ ye, yali nin kalo in na ani kalo nata la, i bɛ se ka waati kɛ min ka ca ni kɔrɔlen ye walisa ka tutigɛbagaw kɔkɔrɔmadondo wa? O bɛna Jehowa dusu diya dɛ!
5 Iko Pol, Masaya weleweledalaw bɛɛ ka kan ka taa’ fɛ ka negeba dakɛnɛmaya walisa ka Masaya baara yiriwa. N’an b’an seko bɛɛ kɛ cidenyabaara la, o bɛna nisɔndiya lakika lase an ma. Pol tun bɛ ni o nisɔndiya ye a ka baara senuman na. An bɛ koɲuman de kɛ n’an bɛ tugu a ka misali ɲuman na.—Rom. 11:13; 1 Kɔr. 4:16.