U wele ka na
1 Wele min bɔra a san kɛmɛ caman de filɛ nin ye, o bɛ ka fɔ sisan jamana 233 la diɲɛ yɔrɔ bɛɛ la: ‘A’ ye na, an ka yɛlɛ ka taa Jehowa ka kulu kan. A na an kalan a ka siraw ko la, an na a ka siraw taama.’ (Esa. 2:3) Ka mɔgɔw kunsin Jehowa ka jamakulu kolabɛnnen ma, o ye siraw bɛɛ la ɲuman dɔ la kelen ye min fɛ an bɛ se ka mɔgɔw dɛmɛ u ka ɲɛtaa sɔrɔ hakili ta fan fɛ, n’o bɛ na ni ɲɛnamaya banbali ye.
2 Weleweledala dɔw bɛ se ka siga-siga ka mɔgɔw wele u ka na Masaya So la fo n’u ye ɲɛtaaba jira u ka so kɔnɔ Bibulu kalan na. Nka, tuma dɔw la, mɔgɔ dɔw b’a daminɛ ka na jɛkulu ka lajɛw la sanni yɛrɛ Bibulu kalan ka se ka daminɛ u kun. An man kan ka mɛn k’a sɔrɔ ka mɔgɔw wele ni nisɔndiya ye, k’u dusu lamin u ka na lajɛw la.
3 Mun de ka kɛ: An ka mɔgɔw ladɔnniya an ka lajɛw ko la. A fɔ ko sara tɛ bɔ lajɛw la, wa ko wari dalajɛlen ko si tɛ yen abada. A ɲɛfɔ lajɛw bɛ ɲɛminɛ cogo min na. A jira k’u ye Bibulu kalan yɛrɛ-yɛrɛw de ye. Kalan bɛ kɛ sɛbɛn minnu kan, bɛɛ bɛ se k’olu sɔrɔ walisa u k’u lajɛ kalan kɛtuma na. Mɔgɔ minnu bɛ na lajɛw la, u bɔyɔrɔ ka ca cogo min na, ani u ka hadamadenya taabolo cogo tɛ kelen ye cogo min na fana, olu jira a la. A fɔ k’u ye sigida mɔgɔw ye, wa ko denmisɛnw si kɛra fɛn o fɛn ye, u bɛɛ welelen don ka na. An bɛ kalan kɛ mɔgɔ minnu kun, an ka kan k’olu wele dɔgɔkun o dɔgɔkun. An k’a fɔ u ye k’a cogo kɛra fɛn o fen ye, an b’a fɛ k’u dɛmɛ walisa u ka na.
4 Fɛnw laban dɔ la kelen min ɲɛfɔlen bɛ Bibulu kɔnɔ, o ye nisɔndiya wele dɔ ye k’an niyɔrɔ sɔrɔ Jehowa ka fɛɛrɛw la ka ɲɛsin ɲɛnamaya ma: “Hakili senu ni kɔɲɔmuso b’a fɔ: Na. . . . Minnɔgɔ bɛ min na, o ka na. Ni min sɔnna, o ka ɲɛnamaya ji min gansan.” (Jir. 22:17, NW) Ka mɔgɔ wɛrɛw wele u ka na an ka lajɛw la, wa ka segin o weleli kan siɲɛ caman na, fɛn si tɛ se ka bila o nɔ na.
5 Kiraya la, Jehowa tanubaga kura waa kɛmɛ caman minnu bɛ ka na Ala ka jama ka jɛkuluw kɔnɔ, Esayi 60:8 ABM bɛ olu cogo fɔ iko jɛnɛntuban minnu bɛ “pan i n’a fɔ sankaba, ka pan iko jɛnɛntuban kɔsegintɔ u ka flo wow kɔnɔ.” An bɛ se ka mɔgɔ kuraw wele u ka na an ka lajɛw la, k’u bisimila. O cogo la, an ni Jehowa bɛna baara kɛ ɲɔgɔn fɛ, ale min bɛ mɔgɔw dalajɛli baara lateliya.—Esa. 60:22.