“Ɲɛnamaya banbali latigɛra minnu ye”, olu sɔnna kibaru duman ma

1. Yala mɔgɔ bɛɛ de bɛ sin ka sɔn Kibaru Duman ma yɔrɔnin kelen wa? (Kɛwalew 13:47, 48; 16:14, 15)

SAAN kɛmɛkulu fɔlɔ la, mɔgɔ caaman sinna ka kɛ kerecɛnw ye tuma min na u ye kibaro diiman mɛn (Kɛwaliw 13:47, 48; 16:14, 15 kalan).a Bi fana, mɔgɔ dɔw be ninsɔn diya kosɔbɛ u siɲɛ fɔlɔ ka kibaro diiman mɛn. Hali minw banna ka kibaro diinan lamɛn u siɲɛ fɔlɔ la, n’a sɔrɔ loon nataw la, u bena a ɲini ka Ala lɔn ani k’a bato. Mɔgɔ minw “labɛnnin lo ka sɔn ɲɛnamaya banbali ma,” an ka ɲi ka mun lo kɛ n’an y’u dɔw kunbɛn waajuli la?

2. Ka mɔgɔw kɛ kalandenw ye, mun na o baara bɛ se ka sanga ni nakɔ baara ye?

² An ka misali dɔ lajɛ. Ka mɔgɔw dɛmɛ u ka kɛ Krista ka kalandenw ye, o be komi zaradɛn baara. Yiriden dɔw be mɔ joona ka tɛmɛ dɔ wɛrɛw kan. Minw mɔnna, sɛnɛkɛla bena sin k’olu tigɛ. Nga yiri minw deen ma mɔ fɔlɔ, a bena to k’olu sɔn jii la ani k’u ladon. O cogo kelen na, n’an y’a ye ko mɔgɔ dɔ sɔnna tiɲɛnkalanw ma, an k’o tigi dɛmɛ joona a ka kɛ Yezu ka kalanden ye. Nga minw labɛnnin tɛ fɔlɔ, an ka to k’olu dɛmɛ u k’a ye ko a kɔrɔtanin lo u k’a ɲini ka Ala lɔn ani ka Bibulu faamu (Zan 4:35, 36). N’an be koow kɛ ni hakilitigiya ye, o bena an dɛmɛ k’a lɔn an be se ka mɔgɔw dɛmɛ cogo fisaman min na. Sisan, an k’a filɛ an be se ka min kɛ ni mɔgɔ dɔ sɔnna kibaro diiman na an ka ɲɔgɔnyeko fɔlɔ la. An bena a ye fana an be se k’o mɔgɔw dɛmɛ cogo min na u ka to ka ɲɛtaga kɛ.

NI MƆGƆW Y’U MAGO DON KIBARU DUMAN LA

3. An ka kan ka mun de kɛ ni mɔgɔ dɔ y’a jira ko Kibaru Duman ka di a ye? (1 Kɔrɛntekaw 9:26)

³ Ni mɔgɔ dɔ y’a mako don kibaro diiman na, an ka sin k’a dɛmɛ a k’a daminɛ ka tagama ɲɛnamaya sira kan. O la, an ka ɲɔgɔnyeko fɔlɔ la, an man ɲi ka sigasiga ka bibulukalan kofɔ a ye ani k’a weele ka na an ka lajɛnw na.—1 Korɛntikaw 9:26 kalan.

4. Mɔgɔ dɔ ka misali fɔ min sɔnna Bibulukalan ma yɔrɔnin kelen.

⁴ Bibulukalan kofɔ u ye. Mɔgɔ dɔw labɛnnin lo ka sin ka bibulukalan daminɛ. Misali la, lamisalon dɔ la Kanada jamana na, muso dɔ gwɛrɛla waajulikɛ wotoro dɔ la ani ka kitabunin nin dɔ ta: Ɲɛnamaya kɛ hɛɛrɛ la fɔɔ abada! Balimamuso min tun b’o yɔrɔ la, ale y’a ɲɛfɔ a ye ko a be se ka bibulukalan kɛ n’a ye gwansan o kitabunin sababu fɛ. O muso y’a mako don ani a y’a ka telefɔni nimɔrɔ di balimamuso ma. Kɔfɛ o loon bɛɛ la, a ye mesazi ci balimamuso ma k’a ɲininga u be se ka bibulukalan daminɛ loon min na. Tuma min na balimamuso y’a fɔ a ye ko u be se k’a daminɛ wikɛni na, o muso y’a ɲininga ko: “Mun na an t’a daminɛ sini? N’ labilanin lo.” O loon dugusagwɛ bɛɛ, u ye bibulukalan daminɛ. O muso tagara lajɛn na o wikɛni bɛɛ la ani a tora ka ɲɛtaga kɛ joona joona.

5. An bɛ se ka hakilitigiya jira cogo di ni an ye Bibulukalan kofɔ mɔgɔ dɔ ye? (Jaw fana lajɛ.)

⁵ Minw b’an lamɛn, an kana a miiri ko u bɛɛ lo bena sin ka sɔn bibulukalan ma i ko o muso. Tuma dɔw la, an ka ɲi k’u dɔw dɛmɛ u k’u mako don bɛrɛbɛrɛ kibaro diiman na. An be se k’a daminɛ ka baro kɛ koo dɔ kan min bena diya a tigi ye. A mana kɛ min o min ye, n’an tora ka koow filɛ ni ɲɛɛ ɲuman ye ani n’an be to k’an mako don a tigi la, n’a sɔrɔ a tɛna mɛɛn ka sɔn bibulukalan ma. N’an be bibulukalan kofɔra mɔgɔw ye an be se ka mun lo fɔ do? O ɲiningali lasera balima caaman ma minw be se ka bibulukalan daminɛ ni mɔgɔw ye cogo nɔgɔman na.

6. Mɔgɔ min y’a jira ko baro diyara a ye, i bɛ se ka mun kɛ walasa ka baro wɛrɛw nege don o tigi la?

⁶ An ye weleweledala ni piyɔniye minw ɲininga bibulukalanw daminɛcogo koo la, olu y’a fɔ ko jamana dɔw la, n’i be bibulukalan kofɔra, a ka fisa i kana a fɔ ko “kalan,” “bibulukalan” wala ka “kalan kɛ n’i ye.” U y’a kɔrɔsi ko mɔgɔw ka teli ka sɔn bibulukalan ma n’i b’a fɔ ko “baro,” “kumaɲɔgɔnya” wala “k’a ɲini ka Bibulu lɔn.” Walisa ka taga ɲɛ ni baro ye siɲɛ wɛrɛ, i be se k’a fɔ ko: “A bena bari aw la k’a lɔn ko ɲiningali minw be mɔgɔ dabali ban, u jaabili be sɔrɔ Bibulu kɔnɔ.” Wala i be se k’a fɔ ko: “ Bibulu tɛ kuma diinankow dɔrɔn lo la, nga a b’an dɛmɛ cogo nafaman dɔw la fana.” I be se k’a fara a kan ko: “A tɛ wagati caaman ta, miniti 10 wala 15 kɔnɔ i be se ka koo nafaman dɔ lɔn.” A ka fisa i kana a fɔ ko “rendez-vous” wala “lɔgɔkun o lɔgɔkun.” N’o tɛ, a tigi bena a miiri ko waajibiko lo.

7. Waati jumɛn de la mɔgɔ dɔw y’a faamu ko u ye tiɲɛ sɔrɔ? (1 Kɔrɛntekaw 14:23-25)

⁷ U weele ka na lajɛn dɔ la. Ciden Pol ka wagati la, a be komi dɔw y’a faamu ko u ye tiɲɛn diinan sɔrɔ u siɲɛ fɔlɔ ka taga kerecɛnw ka lajɛn dɔ la (1 Korɛntikaw 14:23-25 kalan). O kelen lo fana bi. Makodonmɔgɔw fanba be ɲɛtaga kɛ joona joona n’u y’a daminɛ ka na an ka lajɛnw na. N’o lo, i ka ɲi k’u weele ka na lajɛn na tuma juman na do? Gafe Ɲɛnamaya kɛ hɛɛrɛ la fɔɔ abada! ka kalansen 10nan na, u be kalanden jija a ka na an ka lajɛn dɔ la. Nga, waajibi tɛ i ka kɔnɔni kɛ fɔɔ o kalansen na ka sɔrɔ k’o kɛ. Kabi aw ka ɲɔgɔnyeko fɔlɔ la, i be se k’i lamɛnbaga weele ka na an ka lajɛn na min be kɛ wikɛni na. N’a sɔrɔ i be se ka forobakalan barokun kofɔ a ye wala o lɔgɔkun ka Kɔrɔsili Sangaso ka hakilinata dɔ.

8. N’i ye mɔgɔ dɔ wele a ka na an ka lajɛw la, i bɛ se ka mun de ɲɛfɔ a ye? (Esayi 54:13)

⁸ N’i be mɔgɔ dɔ weelela ka na an ka lajɛnw na, a ɲɛfɔ a ye fɛɛn minw b’a to an ka lajɛnw be dan na a ka diinan ka batoli la. Kɔrɔsili Sangaso kalan be kɛ lajɛn min na, Bibulu kalanden dɔ siɲɛ fɔlɔ ka taga o lajɛn na, a y’a ka kalanfa ɲininga ko: “Cɛɛ min be kalan ɲɛminɛna, a be bɛɛ tɔgɔ lɔn wa?” Balimamuso y’a ɲɛfɔ a ye ko an bɛɛ b’an jija k’an ka kafomɔgɔw tɔgɔ lɔn i ko an b’an denbaya mɔgɔw tɔgɔ lɔn cogo min na. Bibulu kalanden y’a fɔ ko koow be dan na pewu a ka legilizi la. Mɔgɔ caaman fana t’a lɔn an be ɲɔgɔn lajɛn kuun min kama (Ezayi 54:13 kalan). An be ɲɔgɔn lajɛn ka Jehova bato, ka dɔ lɔn a koo la ani ka ɲɔgɔn jija (Eburuw 2:12; 10:24, 25). O kama, an ka lajɛnw labɛnna cogo dɔ la min be mɔgɔw nafa ani landako si tɛ kɛ yen (1 Kor. 14:40). An ka Masaya Boonw labɛnna cogo nɔgɔman na ani o b’a to a ka nɔgɔ mɔgɔw fɛ ka faamuyali kɛ. Komi an t’an niin don politikikow la, an tɛ politiki jɛnkulu dɔ lafasa ani an tɛ sɔsɔlikow kɛ. Walisa ka kalanden dɛmɛ a k’a lɔn min be kɛ Masaya Boon na, i be se ka kɔn ka videwo nin yira a la: Mun lo be kɛ an ka Masaya boonw kɔnɔ?

9-10. Ni an ye mɔgɔ dɔ wele ka na an ka lajɛw la, an bɛ se ka mun de fɔ a ye walisa k’a hakili sigi? (Ja fana lajɛ)

⁹ Mɔgɔ dɔw be sigasiga ka na an ka lajɛn na sabu u be siran ko u bena a ɲini u fɛ u ka tuubi. Ni mɔgɔ dɔ nana, a hakili sigi ko a ka di an ye ni mɔgɔw nana an ka lajɛnw na ani ko an t’u waajibiya u ka tuubi wala u k’u daa don baro la. An be denbaya mɔgɔw bisimila, hali denmisɛn be minw fɛ. An ka lajɛnw na, an tɛ denmisɛnw kalan dan na. Nga, bangebagaw n’u deenw be sigi ɲɔgɔn fɛ ani u be kalan kelen nin lo sɔrɔ. O cogo la, bangebagaw b’a lɔn u deenw be ni mɔgɔ minw ye ani u b’u kalan min na (Deter. 31:12). An tɛ wari deli mɔgɔw fɛ wala an tɛ enwelɔpuw tɛmɛ tɛmɛ walisa mɔgɔw ka wari don a kɔnɔ. Nga, an be tugu Yezu ka cikan nin kɔ: “Aw y’a sɔrɔ gwansan, aw fana k’a di gwansan.” (Mat. 10:8, Bible senuma). Ni mɔgɔ dɔ nana lajɛn na, i be se k’a fɔ a ye fana ko a mako t’a la ka fani sɔngɔ gwɛlɛw don ka na sabu Ala be mɔgɔ dusukun lo filɛ, a tɛ mɔgɔ sawura filɛ.—1 Sam. 16:7.

¹⁰ N’a tigi nana, i seko kɛ k’a bisimila ka ɲɛ. A yira diinan mɔgɔkɔrɔw ni weleweledala wɛrɛw la. N’a y’a ye ko mɔgɔw y’a minɛ teriya la, a ka teli ka na siɲɛ wɛrɛ. Ni Bibulu t’a fɛ, a to a ka tugu vɛrisew kalan kɔ i ka Bibulu kɔnɔ. A yira a la fana an be kalan kɛra sɛbɛ min kɔnɔ walisa a ka se ka tugu kalan kɔ n’i ye wala a yɛrɛ ka sɛbɛ kɔnɔ.

NI MƆGƆ SƆNNA BIBULUKALAN MA

11. An ye waati min sigi ni an lamɛnbaga ye, an bɛ se k’a jira cogo di ko an bɛ o bonya?

¹¹ An ka ɲi ka mun lo to an hakili la bibulukalan koo la? I janto a tigi ka porogramu na. N’i y’a fɔ ko i bena na wagati tigitigi dɔ la, banba ka kɛ lɛri la, hali n’aw ka mara la mɔgɔw man teli ka kɛ lɛri la. A ka ɲi fana aw ka kalan fɔlɔ kana mɛɛn. Weleweledala ŋana dɔw y’a ye ko nafa b’a la ka kalan fɔlɔ surunya hali ni kalanden b’a fɛ ka caaman lɔn. Ani fana kana kuma caaman nga a to a tigi k’a dusukunnakow fɔ.—Talenw 10:19.

12. An ka kuntilenna ka kan ka kɛ mun de ye n’an ye Bibulukalan daminɛ ni mɔgɔ dɔ ye?

¹² Kabi bibulukalan daminɛ na, i ka laɲinita ka ɲi ka kɛ ka kalanden dɛmɛ a ka Jehova ni Yezu lɔn ani k’u kanu. I be se k’o kɛ cogo min na, o ye ka sinsin Ala ka Kuma kan sanni ka sinsin i yɛrɛ ani i ka lɔnniya kan (Kɛw. 10:25, 26). Ciden Pol ka kalanw na, a tun be to ka sinsin Yezu Krista lo kan. Jehova y’ale lo ci ka adamadenw dɛmɛ u k’ale lɔn ani k’a kanu (1 Kor. 2:1, 2). Pol y’a yira ka gwɛ fana ko a kɔrɔtanin lo kosɔbɛ an ka Bibulu kalandenw dɛmɛ u ka kɛ ni jogo ɲuman dɔw ye. O jogow be se ka suma ni sanu, warigwɛ ani kabakuru sɔngɔ gwɛlɛ ye (1 Kor. 3:11-15). O jogo nafaman dɔw ye limaniya, hakilitigiya, faamuyali hakili ani Jehova ɲɛsiran ye (Zab. 19:10, 11; Talenw 3:13-15; 1 Piyɛri 1:7). An be ciden Pol ladegi, n’an be kalanden dɛmɛ a ka kɛ ni limaniya barikaman ye ani a ka jɛnɲɔgɔnya ɲuman sigi n’a sankolola Faa kanutigi ye.—2 Kor. 1:24.

13. Mɔgɔ minnu bɛ a jira ko Bibulukalan ka di u ye, an bɛ se k’a jira cogo di ko an bɛ muɲu u kɔrɔ ani ko an bɛ u faamu? (2 Kɔrɛntekaw 10:4, 5) (Ja fana lajɛ)

¹³ Yezu ka kalankɛcogo ladegi i kɛtɔ ka muɲu kalanden kɔrɔ ani k’a yira ko i b’a faamu. Kana ɲiningali dɔw kɛ minw bena maloya bila a la. A ka gwɛlɛ a ma ka kalan minw faamu, u to yen fɔlɔ ani segi u kan kɔfɛ. Kana a ɲini k’a waajibiya walisa a ka sɔn kalan dɔ ma k’a sɔrɔ a labɛnnin tɛ o kama fɔlɔ. Nga wagati to a ye walisa o kalan k’a dusukun sɔrɔ (Zan 16:12; Kɔlɔs. 2:6, 7). An b’a ɲinina k’a yira ko kalan minw tɛ tiɲɛn ye, Bibulu b’u suma ni “kɛlɛ kunbɛn kogow” ye (2 Korɛntikaw 10:4, 5 kalan).b Sanni i ka kalanden ka kɛlɛkunbɛn kogo ci, o kɔrɔ sanni i k’a waajibiya a k’a ka lannakow to yen k’a sɔrɔ a labɛnnin tɛ o kama fɔlɔ, kɔn k’a dɛmɛ a ka Jehova kɛ a ka “kɛlɛ kunbɛn kogo” wala a dogoyɔrɔ ye.—Zab. 91:9.

NI MƆGƆ KURA DƆ NANA LAJƐ LA

14. Ni mɔgɔ kura dɔ nana lajɛ la, an ka kan k’a minɛ cogo di?

¹⁴ Mɔgɔw ka siya, u ka kokɛcogo ani u lɔyɔrɔ mana kɛ min o min ye, Jehova b’a fɛ an kana mɔgɔ bɔ mɔgɔ la (Zaki 2:1-4, 9). O la, mɔgɔ minw be na an ka lajɛnw na, an be se k’a yira cogo di ko an b’u kanu?

15-16. Mɔgɔ kura minnu nana lajɛ la, an bɛ se ka olu kunbɛn ka ɲɛ cogo jumɛn na?

¹⁵ Mɔgɔ dɔw be na an ka lajɛnw na sabu u b’a fɛ k’a lɔn le dɔrɔn koow be kɛ cogo min na. Wala u lɔnbaga dɔ min be mara wɛrɛ la, ale lo y’u jija u ka na. O la, an man ɲi ka sigasiga ka kuma u fɛ. An k’u bisimila koɲuman, nga an kana maloya bila u la. A ɲini u fɛ u ka na sigi n’i ye ani a to u ka tugu kalan kɔ i ka Bibulu n’i ka kalankɛ gafe kɔnɔ wala u dɛmɛ k’o gafew sɔrɔ. Ka fara o kan, i janto u dusukunnakow la. Cɛɛ dɔ nana Masaya Boon na ani balimacɛ dɔ y’a bisimila. Kɔfɛ, a y’a fɔ o balimacɛ ye ko a hakili tun siginin tɛ sabu a ka faniw tun labilanin lo. Balimacɛ y’a fɔ a ye ko Jehova Seerew be i ko mɔgɔ tɔɔw ani o y’a hakili sigi. Kɔfɛ, o cɛɛ ye ɲɛtaga kɛ ani ka batize. Nga, balimacɛ ye min fɔ a ye, a ma ɲinɛ o kɔ abada. O la, a ka ɲi an k’an mako don mɔgɔ kuraw la ka kɔn lajɛnw ɲɛ ani lajɛnw bannin kɔ. Nga, koo minw t’an ka sira la, an man ɲi ka ɲiningali kɛ o koo la.—1 Piyɛri 4:15.

¹⁶ Mɔgɔ minw tɛ Jehova Seerew ye, n’an be kumana olu wala u ka lannakow koo la an ka baro, an ka lakalitaw ani an ka kalanw na, an ka ɲi ka bonya la u kan. O la, an tɛna maloya bila mɔgɔ kuraw la. An man ɲi ka kumaden dɔw fɔ minw be se k’u kɔnɔ gwan wala minw be se ka jati nɛni kumaw ye (Titi 2:8; 3:2). Misali la, minw ka lannakow be dan na an taw la, an t’a fɛ k’u ka lannakow mafiɲɛya (2 Kor. 6:3). Balimacɛ minw be forobakalanw kɛ, olu yɛrɛ lo ka ɲi k’u janto o la kosɔbɛ. Mɔgɔ minw tɛ Jehova Seerew ye, o balimacɛw b’a yira fana ko u b’u janto u la n’u be kumaden dɔw kɔrɔ ɲɛfɔ, jama tɛna minw faamu.

17. An ka waajulibaara la, “ɲɛnamaya banbali latigɛra minnu ye”, n’an ye olu sɔrɔ, an ka kuntilenna ka kan ka kɛ mun ye ka ɲɛsin u ma?

¹⁷ Loon o loon mana tɛmɛ, kɔrɔtɔko lo ka mɔgɔw kɛ Krista ka kalandenw ye ani an bele be to ka mɔgɔw sɔrɔ minw “labɛnnin lo ka sɔn ɲɛnamaya banbali ma.” (Kɛw. 13:48, NW). N’an y’o mɔgɔw sɔrɔ, an man ɲi ka sigasiga ka bibulukalan kofɔ u ye, ani k’u weele ka na an ka lajɛnw na. N’an y’o kɛ, an bena u dɛmɛ u k’a daminɛ ka tagama sira kan min “be taga ni mɔgɔ ye hɛrɛ [wala ɲɛnamaya banbali] yɔrɔ la.”—Mat. 7:14.