San 1999 Ala-ka-marako Cidenyabaara Kalan bolodasira nafa
1 Yesu tun ye Karamɔgɔ Ŋana ye. Jama tun “kabakoyara a ka kalan na.” (Mar. 1:22) Hali ni an dɔ la kelen si tɛ se ka kuma wala ka mɔgɔw kalan iko Yesu y’a kɛ cogo min na, an bɛ se k’an gɛlɛya k’a ladege. (Kɛw. 4:13) Walisa k’o kuntilenna sɔrɔ, an niyɔrɔ kɛli Ala-ka-marako Cidenyabaara Kalan bolodasira la, o n’an dɛmɛ ka taa’ fɛ k’an kuma cogo ni mɔgɔw kalan cogo dɔnniya fisaya.
2 San 1999 kɔnɔna na, tuma caman na Kalansen Fɔlɔ bɛna bɔ san 1997 ka La Tour de Garde ni Réveillez-vous! sɔn-ni-sɔn gafeninw sigidaw kɔnɔ. An ka alako kalan faamuyali na bonya kosɛbɛ n’an bɛ kɔn ka o kunnafoniw kalan ka tila k’u lamɛn kalan bolodasira jira tuma la. Mɔgɔ min bɛ dɔnniya-lase jɛmu di, o ka kan ka kalan waleya cogo bɛn jama ma ani ka kalan di cogo duman ni cogo ɲɛnama na. Kalansen 3nan bɛna bɔ Bonheur familial gafe kɔnɔ ani Kalansen 4nan na kɛ Bibulu kɔnɔ mɔgɔ dɔ kan, hali ni o kalansenw bɔyɔrɔ na to ka falen-falen. Kalan lakɔlɔsibaga ka kan ka kalan jateminɛ ni ɲɛmajɔ ye sanni ka kalansenw tila. Kalandenw bɛɛ minnu bɛ ta ka kalan di Bonheur familial gafe kan, olu ka kan ka kɛ ɲɛjirabagaw ye u yɛrɛw ka ɲɛnamaya la denbaya kɔnɔ.
3 Laadilikanw sirataama, i k’i labɛn koɲuman: Mɔgɔ bɛɛ bɛ se ka ɲɛtaa caman sɔrɔ kuma ni kalan seko la. (1 Tim. 4:13) O kosɔn, an ka kan ka laadilikanw ɲini ani an man kan abada k’u filɛ iko mɔgɔ b’i jɛngɛ fɛn min ma. (Nta. 12:15; 19:20) Ka tiɲɛ jira cogo nafama na lajɛw la ani foro cidenyabaara la, o bɛ fɛn wajibiya min bɛ tɛmɛ kow lakali dama wala tɛmɛsiraw kalanni gansan kan. An b’a fɛ ka dusukunw lasɔrɔ ani ka wale kɛ kun di an lamɛnbagaw ma. An bɛ se k’o kɛ an kɛtɔ ka kuma tiɲɛ ko la n’an dusukun ye, ka jɛya’ la. ( A sanga ni Kɛwalew 2:37 ye.) An bɛ laadilikan minnu sɔrɔ kalan senfɛ, u n’an dɛmɛ k’o kɛ.
4 I mana i tɔgɔla kalansen sɔrɔ tuma min na, i k’i miiri kuma cogo ɲɛ ma min ka kan ka baara e fɛ, n’a ɲɛfɔlen don Manuel pour l’école gafe kɔnɔ. Laadilikan minnu dira i ma ka tɛmɛ, i b’a fɛ ka min kɛ walisa ka u waleya, i k’o jateminɛ. I k’i hakilijakabɔ i ka kumakun kan ani kɛyɔrɔ kan n’o wajibiyalen don, ani cogo min na i bɛna tɛmɛsiraw bɛn lamɛnbagaw ma, tɛmɛsira minnu bɛ sɔrɔ i tɔgɔla kalansen dilen na. I miiri cogo bɛɛ la fisaman na min b’a to i ka kunnafoniw kɛ ka mɔgɔw kalan ani ka wale kɛ kun di u ma.—1 Tim. 4:15, 16.
5 N’i jɔrɔlen bɛ i tɔgɔ sɛbɛnni na kalan na, delili kɛ o ko la, o kɔ e ni kalan lakɔlɔsibaga ka kuma i dusukunnataw kan. Mɔgɔ bɛɛ bɛ se ka nafa sɔrɔ a kɛtɔ ka bolodasira diya bɔ fo a dan na, bolodasira min bɛna jira Ala-ka-marako Cidenyabaara Kalan senfɛ, san 1999 kɔnɔna na.