San 2002 ka Ala-ka-marako Cidenyabaara Kalan
1 Mɔgɔ fanba tɛ kuma dɔnniya jate fɛn ye. Nka o ye nilifɛn ye ka bɔ Jehowa yɔrɔ. O b’a to an ka se ka kuma mɔgɔ wɛrɛw fɛ, k’an miiriw n’an dusukunnataw fɔ tɔw ye. Ka tɛmɛ o bɛɛ kan, an da bɛ se k’an ka Ala tanu.—Zab. 22:23; 1 Kɔr. 1:4-7.
2 Cɛw, musow, ani denmisɛnw, olu bɛɛ bɛ kalan Ala-ka-marako Cidenyabaara Kalan fɛ walasa u ka se ka Jehowa tɔgɔ kofɔ mɔgɔw ye. (Zab. 148:12, 13) Bibulu kɔnɔko caman bɛ san 2002 ka kalan bolodasira la an bɛ se ka nafa sɔrɔ min na, ani ka baara kɛ ni min ye cidenyabaara la. N’an bɛ ko kalanta labɛn, k’an sen don kalan na, an bɛ se ka dɔ fara an ka dɔnniya kan, ani an ka mɔgɔ kalan dɔnniya kan Ala ka Kuma na.—Zab. 45:2.
3 An ka Bibulu kalan don o don: Ni Bibulu b’an bolo kɔrɔ tuma bɛɛ, an tɛ fɔsi kɛ waati min na, an bɛ se ka nafa bɔ o waati la ka Bibulu kalan. Waati kunkurunnin b’an caman bolo tile kɔnɔna na k’o kɛ. N’an bɛ Bibulu furaɲɛ kelen dama kalan don o don, o bɛna bɔli kɛ walasa an ka se ka tugu Bibulu kalan yɔrɔ bolodalenw na min bɛ sɔrɔ Ala-ka-marako Cidenyabaara Kalan bolodasira kɔnɔ. O bɛn’an nafa dɛ!—Zab. 1:1-3.
4 N’an bɛ se Bibulu kalan na, o bɛ se k’an dɛmɛ k’an lamɛnbagaw dusukun lasɔrɔ, k’u bila Jehowa tanuni na. Kalansen filanan kalifara balimakɛ min ma kalan kɔnɔ, o ka kan ka segin a ka yɔrɔ kalanta kan siɲɛ caman na a kan kɔrɔtalen. Kalan lakɔlɔsibaga bɛna kalanden tanu, ka hakililataw d’a ma walasa a ka se ka kalan kɛ ka ɲɛ.
5 An ka baara kɛ ni Raisonner gafe ye: Kalansen sabanan ani naaninan sinsinnen bɛ Raisonner (Hakilijakabɔ) gafe kan. A ka c’a la, an caman bɛ se k’an jija ka t’a fɛ ka baara kɛ n’ o gafe nafamaba ye cidenyabaara la. Balimamusow ka kan ka hukumuw sugandi minnu bɛ bɛn wajulikɛyɔrɔ ma. U bɛ lamɛnbaga kalan cogo min na, ka baara kɛ ni Bibulu ye cogo min na fana, lakɔlɔsibaga bɛna o kɔlɔsi kɛrɛnkɛrɛnnenya la.
6 Kuma dɔnniya ye Ala ka nilifɛn ye. An k’a to Ala-ka-marako Cidenyabaara Kalan k’an dɛmɛ ka to ka baara kɛ n’o nilifɛn ye tuma bɛɛ walasa ka kibaru duman fɔ mɔgɔw ye, k’an ka Alaba Jehowa tanu!—Zab. 34:2; Efe. 6:19.