Sɔn-ni-sɔn gafeninw bɛ Masaya kofɔ
1 Anw Jehowa Seerew dɔnnen don kosɛbɛ an ka cɛsiri waajuli fɛ Ala ka Masaya ko la. An bɛ sɔn-ni-sɔn gafenin minnu jɛnsɛn n’o ye La Tour de Garde ani Réveillez-vous! ye, olu bɛ jɔyɔrɔba ta mɔgɔ miliyɔn yirika dɛmɛni na walisa u ka Ala ka ko latigɛlenw dɔn. Cikan min bɛ u kɔnɔ, o ye kibaru duman ye, siga si t’o la, bawo u bɛ Ala ka sankolo Masaya kofɔ iko jigiya kelenpe min bɛ hadamadenw bolo.
2 Sɔn-ni-sɔn gafeninw bɛ kuma mɔgɔw mago jɔnjɔnw kan: dusukunnataw ni diɲɛnatigɛ ani hakili ta fan fɛ. Yɔrɔ bɛɛ la, jama la jogo ɲumanw ka fara denbaya kɔnɔ taw kan, olu bɛ ka tunun, nka La Tour de Garde ani Réveillez-vous! b’u kalanbagaw dɛmɛ k’u ka diɲɛnatigɛ ɲɛ u kɛtɔ ka Bibulu sariyakolow taama cogo jira u la. An na diya sɔrɔ sɔn-ni-sɔn gafeninw bakurubasanni kofɔli la Awirili ni Mɛ kalow la.
3 Nafa bɛrɛ b’u la: La Tour de Garde ani Réveillez-vous! bɛ sɔrɔ diɲɛ kanw bɛɛ la, dɔɔnin k’o jɛ. O de kama u dɔnnen don koɲuman. U ka di mɔgɔw ye kun minnu na, u dɔw filɛ ninnu ye:
◼ Ikomi laadiriya ni tiɲɛ de bɛ donkibarubɔla ninnu faranfasi, u bɛ danfara jira ɲuman ni juguman cɛ k’a jɛya.
◼ Tilennenya na sigi alijinɛ nata min kɔnɔ, u b’o jigiya di, jigiya min sinsinen don Ala ka layidu kan, n’o ye ka dugukolo kolo a ka Masaya ye.
◼ Bi ko danfaralenw caman ɲɛfɔlen bɛ u kɔnɔ, ka ɲɛsin yɔrɔw bɛɛ ni dɔnkow bɛɛ mɔgɔw ma.
◼ Kalanbolow ka surun, u bɛ hakili di mɔgɔ ma, u sɛgɛsɛgɛlen don, u hɔrɔnyalen don ka bɔ ɲɔgɔnbisigiw ma ani nanbarakow ma.
◼ Ja cɛɲiw bɛ mɔgɔ nege wuli o yɔrɔnin bɛɛ la, wa kalanbolow sɛbɛnnen don kumalabɛncogo jɛlen na min b’u kalan nɔgɔya.
4 An k’u jɛnsɛn fan bɛɛ: Sɔn-ni-sɔn gafeninw jɛnsɛnni baara ɲɛli fanba bɛ bɔ an ka timinandiya maganw na walisa ka kuma kunta cogow labɛn, ka waati bolodacogo ani k’an ka waajuli baara kolabɛn. San 1995 Setanburukalo ani san 1996 Ɔkutɔburukalo Ministère du Royaume tun ye magoɲɛ hakilina dɔw di. A ka ɲi an k’u mafilɛ ko kura ani k’u waleya.
5 An ka sɔn-ni-sɔn gafeninw dɔn: An kɛtɔ ka denkelen o denkelen kalan, an ka miiri mɔgɔ dɔ ma a na diya min ye ka denkelen sɔrɔ. An ka hakilinaw wala Bibulu tɛmɛsira pereperelatigɛlenw ɲini an na se ka minnu fɔ an ka kuma kunta cogo senfɛ. An ka miiri ɲininkali kelen ma an na se ka min kɛ walisa ka baro daminɛ ani ka masala nege don lamɛnbaga la.
6 An ka kuma kunta cogo bɛn mɔgɔw ma: An ka kuma kunta cogo labɛn min ka nɔgɔn, n’a ka magan, n’a bɛ se ka bɛn cɛ ma, wala muso ma, wala mɔgɔ kɔrɔba ma, wala denmisɛnnna mɔgɔ ma, a kɛra an dɔnmɔgɔ ye wo wala dunan.
7 An hakili ka to La Tour de Garde ni Réveillez-vous! la: Ikomi sɔn-ni-sɔn gafeninw bɛ se ka don sakɔsi wala bolola bɔrɛ wala jufa kɔnɔ ni nɔgɔya ye, an bɛ se k’u bila an kun n’an bɛ taa dugu kɔnɔ wala n’an bɛ taa sugu la. N’an ni an baramɔgɔw, wala an sigiɲɔgɔnw, wala an baarakɛɲɔgɔnw, wala an kalankɛɲɔgɔnw, wala an karamɔgɔw bɛ baro la, an k’u kofɔ u ye. An ka don kelen bila dɔgɔkun o dɔgɔkun sɔn-ni-sɔn gafeninw jɛnsɛnni kama kɛrɛnkɛrɛnnenya la.
8 An ka sɔn-ni-sɔn gafeninw kɛ an diyanyefɛnw ye: U nafa tɛ ban abada. Waati tɛmɛta tɛ u kɔnɔ cikan barika dɔgɔya. An bɛ sɔn-ni-sɔn gafenin minnu sɔrɔ, a jɛlen don ko n’an bɛ magan kerɛnkɛrɛnnen kɛ walisa ka u bɛɛ jɛnsɛn, u bɛɛ la kɔrɔmanw tɛna ton ɲɔgɔn kan etajɛri kɔnɔ.
9 Nafa bɛ sɔrɔ bɔlɔn na seereya la: Nin ye cogow bɛɛ la fisamaw dɔ la kelen ye walisa ka sɔn-ni-sɔn gafeninw jira mɔgɔ caman na. Weleweledala dɔw bɛ waajuli kɛ sɔn jagokɛ bɔlɔnw na baarakɛ donyaw fɛ.
10 Nafa bɛ sɔrɔ jagokɛyɔrɔ kinw na: An bɛ waajuli kɛ bitikiw kɔnɔ tuma min na, an tɛ fɔ mɔgɔw kɔ ka caya. Jagokɛlaw caman bɛ mɔgɔ bonya, wa u caman bɛ sɔn sɔn-ni-sɔn gafeninw na ni diyanye ye. An ka kalanbolow jira minnu bɛ bɛn jagokɛla kelen-kelenna bɛɛ ka baara ma.
11 Mɔgɔ minnu bɛ sɔn-ni-sɔn gafeninw ta sɔn, olu bɛ se ka kɛ kalandenw ye: Komi sɔn-ni-sɔn gafeninw bɛ bɔ kalo o kalo, a bɛ bɛn ka segin ka ta bɔ mɔgɔw ye minnu b’u kalan walisa ka kuraw kofɔ u ye. An ka kan ka segin-ka-bɔnyew kɛ sɔn, walisa ka sɔn-ni-sɔn gafeninw di ani fana ka Bibulu nege sɛnɛ mɔgɔw la. Minnu bɛ sɔn-ni-sɔn gafeninw ta sɔn, olu bɛ se ka kɛ Bibulu kalanden ɲuman caman ye.
12 An k’an seko damajira kɛ Awirili ni Mɛ kalow la: Kalanbaga miliyɔn caman dalen bɛ La Tour de Garde ani Réveillez-vous! la, o minnu ka di u ye kosɛbɛ. Ikomi u bɛ Masaya kofɔ ka ɲɛ, an ka kan k’a jate bonyako ye ka dɔw bila an kun ani k’u kofɔ yɔrɔ bɛɛ la. Awirili ani Mɛ ka kɛ kalo kɛrɛnkɛrɛnnenw ye sɔn-ni-sɔn gafeninw jɛnsɛnni kama!