I ka nabaliya tɛ kɛ tɔw ɲinɛ ma
1 Tuma ni tuma jɛkulu ka lajɛ kelen wala lajɛ dama dɔw bɛ se ka fɔ an kɔ, bawo an ka miiri la, ‘Mɔgɔ si tɛ bɔ ne nabaliya kala ma; mɔgɔ tɛna ne ka nabaliya yɛrɛ kɔlɔsi.’ O tɛ tiɲɛ ye! An farikolo yɔrɔw cogo la, an kelen-kelen bɛɛ bɛ jɔda nafamaba la jekulu ka baara la. (1 Kor. 12:12) An ka nabaliya dɔgɔkun lajɛw la, o bɛ se ka fiɲɛ bila nabagaw ka nɛɛma la, hakili ta fan fɛ. N’i ma na, da a la ko: i ka nabaliya tɛ kɛ tɔw ɲinɛ ma!
2 I bɛ jɔda nafamaba min na: A nege tun bɛ Pol la a n’a balimaw ka ɲɔgɔn lajɛ. Romɛkaw 1:11 ani 12 b’o kun fɔ, ko: “Walisa ne ka (. . .) nilifɛn dɔ lase aw ma. (. . .) O kɔrɔ k’an to ɲɔgɔn fɛ, an ja ka gɛlɛya an ka dannaya fɛ, aw ka dannaya ni ne ta.” O cogo kelen na, an ka jaabiw ani an sen donni lajɛ la, ka fara an nali kan, nin bɛɛ fɛ, an bɛ caman kɛ ka tɔw sabati u ka taa ɲɛ limaniya siratigɛ la.—1 Tes. 5:11.
3 Tɔw yeli jɛkulu ka lajɛw senfɛ, yali o nisɔndiya tɛ k’i la wa? I b’u ka jaabiw lamɛn koɲuman ani ka diya sɔrɔ u ka limaniya kumaw la. Hakili senu y’u sɔn nilifɛn minnu na, o b’i dɛmɛ ka sabati. Ni u ma na lajɛ la, i n’a miiri ko fɛn nafama y’i jɛ. I balimakɛw an’i balimamusow b’o ɲɔgɔnna de miiri i ko la n’i ma na lajɛ la.
4 Lajɛw bɛ jɔda nafamaba min na: Lajɛw nafa ka bon an kisili ko la hakili ta fan fɛ, ka se hakɛ min na, siɲɛ dɔ la, La Tour de Garde y’o fɔ, ko: “Bi diɲɛ in na, min farafaralen bɛ kɛlɛw fɛ, ani min falen don jatɔya la, Krecɛnw ka jɛkulu ye kundogoyɔrɔ sɛbɛ ye, hakili ta fan fɛ (. . .), lafiya ni kanuya yɔrɔ don. O kama, a’ ye a lajɛw bɛɛ matarafa.” (w93 15/8 11) Don o don, an bɛ kow ye minnu b’an barika dɔgɔya, alako ta fan fɛ. N’an man janto, an bɛ se k’an ta an yɛrɛw ka jɔrɔnankow fɛ fɔ ko nafamabaw, alako ta fan fɛ, olu ka ɲɛmatunun an ma. An bɛɛ de mago bɛ ɲɔgɔn na walisa ka dusu don ɲɔgɔn na, ani ka to kelenya ni cɛsiri la Ala ka baara la.—Heb. 10:24, 25.
5 Lajɛw matarafali nafa ka bon. Bana wala ko balalen bɛ se k’an bali ka na siɲɛ dɔw la. N’o bɔra a la, an k’a latigɛ ka ye jama lajɛlenw cɛma, o minnu bɛ Jehowa tanu ɲɔgɔn fɛ.—Zab. 26:12.