An ka lajɛw matarafa “janko” bi bi in na
1 Tuma bɛɛ la, ɲɔgɔn lajɛli kɛra Jehowa ka jama ma ko nafamaba ye. Israɛldenw tun bɛ ni alabatosoba n’u ka alabatosow ye iko bato lakika ni Ala ka ladamuli ni nisɔndiya ɲɔgɔn lajɛ kɛyɔrɔw ye. O dalilu ɲɔgɔnnaw kosɔn, fɔlɔ Krecɛnw tun tɛ ɲɔgɔn lajɛli dabila. Ikomi gɛrɛntɛliw ni kɔrɔbɔliw bɛ cayala nin laban don gɛlɛnw na, an ka jɛkulu ka lajɛw bɛ fanga min di hakili ta fan fɛ, an fana mago bɛ o la, “janko” bi bi in na (Heb. 10:25). A’ ye dalilu saba jateminɛ minnu kosɔn an bɛ lajɛw matarafa.
2 Jɛɲɔgɔnya kama: Sɛbɛnniw bɛ dusu don an na ko an ka “ɲɔgɔn jija ka dɔ fara ɲɔgɔn barika kan”. (1 Tes. 5:11.) Alalandiw ka jɛɲɔgɔnya b’an hakili fa miiri ɲumanw na ani o b’an bila ka baara ɲuman kɛ. Nka, n’an bɛ to an kelen na, an ka teli ka hakilintanya ni ɲɛngoya ani hali kakalaya miiriw sɛnɛ.—Nta. 18:1.
3 Kalan kama: Krecɛnw ka lajɛw bɛ Bibulu kalan bolodalen mɛnta di, o min sigira sen kan walisa ka Ala ka kanuya ɲɛnama mara an dusukunw na. U bɛ kuntilenna nafama di “Ala ka laadilikan bɛɛ” sirataamali ko la (Kɛw. 20:27, NW). Lajɛw b’an dege kibaru duman ni mɔgɔw kalanni kɛcogo ɲuman na, janko nin waati min kɔnɔ mago jɔlen bɛ n’o baara ɲɛdɔn ye walisa ka kɛ ni nisɔndiya ɲɛfɔbali ye, n’o ye ka mɔgɔw sɔrɔ ani k’u dɛmɛ, mɔgɔ minnu bɛna sɔn Bibulu ka tiɲɛ la.
4 Lakanali kama: Nin diɲɛ juguman in na, jɛkulu ye dogoyɔrɔ sɛbɛ ye hakili ta fan fɛ—hɛrɛ ni kanuya yɔrɔ. N’an bɛ jɛkulu ka lajɛw la tuma min na, Ala ka hakili senu nɔ bɛ ye an kan ni barika ye, ka “kanuya ani ɲagali, hɛrɛ, muɲuli, hinɛ, ɲumanya, dannamɔgɔya, sabali, yɛrɛminɛli” denw kɛ (Gal. 5:22, 23, ABM). Lajɛw bɛ barika di an ma walisa an kologɛlɛyalenw ka to ani ka sabati dannaya la. U b’an labɛn kɔrɔbɔli nataw kama.
5 N’an tora ka kɛ lajɛw la tuma bɛɛ, zaburu sɛbɛnbaga ye min ɲɛfɔ Zaburu 133:1, 3nan kɔnɔ, an na o kɔrɔbɔ, ko: “Balimaw bɛnnen ka sigi ɲɔgɔn fɛ, o ye ko ɲuman ɲuman de ye, a ka di.” Jehowa ka jama mana baara kɛ ani a mana ɲɔgɔn lajɛ yɔrɔ o yɔrɔ la bi, “Jehowa y’a fɔ ko duba ka da yen, ɲɛnamaya yɛrɛ abada fo abada”. (An de bɛ sinsi o kan.)