Kuma Jehowa kan don o don
1 Fɛn o fɛn bɛ mɔgɔw ni kan, u bɛ nisɔndiya sɔrɔ ka kuma o kan, katuguni mɔgɔ dusukun falen bɛ fɛn min na, a da bɛ o de fɔ. (Luk. 6:45b) Fɛn jumɛn b’an ni kan? Zaburu sɛbɛnbaga ko: “Ne nɛnkun na kuma i ka tilennenya ko la ka i tanu don o don.” (Zab. 35:28) Jehowa ka ko tun ka bon a bolo kosɛbɛ, ani ka kuma Ala kan ani k’a tanu ko kelen-kelen bɛɛ la, a tun b’o jate bonyaba de ye. Ikomi zaburu sɛbɛnbaga tun bɛ Jehowa dɔn koɲuman, fɛn ɲuman caman tun b’a bolo, a tun b’i nisɔndiya o minnu ko la. (Zab. 35:9) An bɛ se k’a ka misali ɲuman ladege cogo jumɛn na?
2 Kuma Jehowa kan i ka du kɔnɔ: An ka du kɔnɔ, Jehowa ka kan ka kɛ an ka baro kun ye don o don. Jehowa kanuyaba bɛ bangebaga minnu na, a ka nɔgɔ u bolo ka kuma a kan u ka baara bɛɛ senfɛ. (Dut. 6:5-7) N’u b’o kɛ, denmisɛnninw b’a kɔlɔsi k’u fa n’u ba ka ɲɛnamaya kɛcogo bɛ bɛn n’u ka limaniya ye, ani k’u bɛ Ala ka sariya kanu. O la sa, denmisɛnninw bɛna denbaya ka Bibulu kalan mafilɛ i n’a fɔ u bangebagaw ka alalandiya taamasyɛn jɔnjɔn ye.—2 Piɛ. 3:11.
3 Kuma Jehowa kan i balimakɛw ɲɛ na: Dɔgɔkun kɔnɔna na, an ka ala-ka-marako baara senfɛ, cogo caman b’an bolo k’an hakiliw n’an dusukunw labalo ni ala-ka-miiriko dumuni ye. An tɛ dɛsɛ fɛn ɲuman fɔtaw la. (Luk. 6:45a) Yali i ye miiriya dɔ tɔmɔ ka bɔ i ka yɛrɛkalan na walima dɔgɔkun Bibulu kalan na, i ye nisɔndiya kɛrɛnkɛrɛnnen sɔrɔ o min na wa? O tila n’i balimaw ye, k’u dɛmɛ o cogo la ka dɔ fara u ka kanuya kan ka ɲɛsin Jehowa ma.—Zab. 35:18; Heb. 10:24.
4 Kuma Jehowa kan tɔw ɲɛ na: Don o don an ni mɔgɔw cɛsiraw la—baarakɛyɔrɔ la, kalanso la, ani n’an somɔgɔ dannabaliw ye—a ka kan ka ye nɔgɔya, la k’an ka ɲɛnamaya kuntilenna fɔlɔ ye ka seereya kɛ Jehowa ko la. Sanni k’an yɛrɛ lanɔgɔ ni diɲɛ ka malobaliya kumaw ni kuma nɔgɔlenw ye, an ka kumafɔta ka kan ka Ala tanu. Don o don, ko bɛɛ la, i ka kuma tɔw fɛ kibaru duman ko la, o min waajuli ci b’an kan.—Kɛw. 5:42; Kol. 4:6.
5 Iko Jehowa batobaga lakikaw, don o don, an ka kuma ni timinandiya ye Jehowa Ala kan, o min ɲɔgɔn tɛ.—Zab. 106:47.