I ka denbaya bɛ se ka hɛrɛ sɔrɔ cogo jumɛn na?​—Yɔrɔ 2nan

Denmisɛnw ye nilifɛn ye ka bɔ Jehova yɔrɔ. Jehova b’a ɲini bangebagaw fɛ u ka u janto o nilifɛn na ka ɲɛ. Jehova bɛ laadilikan ɲumanw di u ma minnu bɛ u dɛmɛ o kɛli la. A ka laadilikanw bɛ denmisɛnw fana dɛmɛ u ka u sen don denbaya ka hɛrɛ sɔrɔli la.

1. Jehova bɛ laadilikan jumɛnw de di bangebagaw ma?

Jehova b’a fɛ bangebagaw ka u denw kanu ani ka waati ta ni u denw ye ka kɛɲɛ ni u seko ye. A fana b’a fɛ bangebagaw ka u denw lakana ko jugu ma ani u ka u sinsin Bibulu sariyakolow kan ka u lamɔ. (Ntalenw 1:8) A b’a fɔ denfaw ye ko: “Aw ka [aw denw] lamɔ ni Matigi [Jehova] . . . ka laadili ye.” (Efesekaw 6:4 kalan.) Jehova bɛ nisɔndiya ni bangebagaw bɛ tugu a ka laadilikanw kɔ walasa ka u denw lamɔ ani ni u tɛ o jɔyɔrɔ di mɔgɔ wɛrɛw ma.

2. Jehova bɛ laadilikan jumɛnw de di denmisɛnw ma?

Jehova b’a fɔ denmisɛnw ye ko: “A’ ye aw bangebaaw kan minɛ”. (Kolosekaw 3:20 kalan.) Ni denmisɛnw bɛ u bangebagaw bonya ani ka u kan minɛ, u bɛ Jehova ani u bangebagaw nisɔndiya. (Ntalenw 23:22-25.) Yesu denmisɛn tuma na, a ye misali ɲuman di denmisɛnw ma. Hali k’a sɔrɔ Yesu tun dafalen don, a ye a bangebaga dafabaliw kan minɛ ani ka u bonya.​—Luka 2:51, 52.

3. Aw ka denbaya bɛ se ka gɛrɛ Ala la kosɛbɛ cogo di?

Ni i ye bangebaga ye, siga t’a la ko i b’a fɛ i denw ka Jehova kanu kosɛbɛ iko i yɛrɛ b’o kɛ cogo min na. I bɛ se ka u dɛmɛ cogo di u ka o kɛ? I bɛ se ka o kɛ i kɛtɔ ka Bibulu ka nin kumaw waleya: “I ka i jija ka i denw kalan [Jehova ka kumaw] la. Ni i bɛ i sigi i ka so kɔnɔ, ni i bɛ taama la . . . i ka kuma olu ko la.” (Dutɛrɔnɔmɛ 6:7) N’a fɔra ko ka mɔgɔ “kalan”, o kɔrɔ fana bɛ se ka kɛ ko, i bɛ ka a tigi dege fɛn minnu na, i ka to ka segin-segin o fɛnw kan. O la, aw b’a dɔn ko aw ka kan ka to ka segin-segin fɛnw kan siɲɛ caman walasa u ka to aw denw hakili la. Nin tɛmɛsira b’a jira ko aw ka kan ka cogoyaw ɲini tuma bɛɛ walasa ka kuma aw denw fɛ Jehova ko la. A bɛ kɛ hakilina ɲuman ye aw ka denbaya ka waati dɔ boloda min na aw bɛ Jehova bato ɲɔgɔn fɛ dɔgɔkun o dɔgɔkun. Hali ni denw tɛ aw bolo, ni aw bɛ waati ta dɔgɔkun o dɔgɔkun ka Ala ka Kuma kalan, o bɛna aw nafa.

DƆ FARA I KA DƆNNIYA KAN

4. A’ye aw denw lamɔ ni kanuya ye

Den lamɔli bɛ se ka gɛlɛya tuma dɔw la. Bibulu bɛ se ka aw dɛmɛ cogo di? Yakuba 1:19, 20 kalan, o kɔ aw ka baro kɛ nin ɲininkaliw kan:

• Bangebagaw bɛ se ka kanuya jira u denw la cogo di ni u bɛ ka kuma u denw fɛ?

• Ni bangebaga diminnen don,a mun na a man kan abada ka a den kolo o waati la?

5. A’ye aw denw lakana

Walasa ka aw denw lakana, a nafa ka bon kosɛbɛ aw ka kuma aw denw kelen-kelen bɛɛ fɛ cɛnimusoya ko la. O kɛli bɛ se ka gɛlɛya aw ma. A’ye WIDEYO lajɛ, o kɔ aw ka baro kɛ nin ɲininkaliw kan:

WIDEYO: Aw ye aw denw lakana ko jugu ma (2:​58)

• Mun na a ka gɛlɛn bangebaga dɔw ma ka kuma u denw fɛ cɛnimusoya ko la?

• Bangebaga dɔw sera ka cɛnimusoya kow ɲɛfɔ u denw ye cogo jumɛn na?

Iko kiraya kumaw tun kɔnna k’a fɔ cogo min na, Sitanɛ ka nin diɲɛ bɛ ka juguya ka ta’a fɛ. 2 Timote 3:1, 13 kalan, o kɔ aw ka baro kɛ nin ɲininkaliw kan:

• Mɔgɔ jugu minnu kofɔra tilayɔrɔdennin 13nan kɔnɔ, olu dɔw bɛ to ka bin denmisɛnw kan cɛnimusoya sira kan. O la, mun na a nafa ka bon bangebagaw ka u denw kalan cɛnimusoya ko la? Denw bɛ se ka u yɛrɛ tanga cogo min na binkannikɛlaw ma, mun na a nafa ka bon fana u bangebagaw ka u kalan o la?

I tun bɛ nin dɔn wa?

Jehova Seerew bɛ fɛn caman dilan minnu bɛ bangebagaw dɛmɛ u ka u denw kalan cɛnimusoya ko la ani ka u lakana binkannikɛlaw ma. Misali la, olu dɔw filɛ nin ye:

• A’ye aw denw lakana (wideyo)

• Écoute le grand Enseignant (I tulo majɔ karamɔgɔba ka kumaw la), tilayɔrɔba 10 ani 32

• “Parler de sexualité à son enfant” (I den kalan cɛnimusoya ko la) (Réveillez-vous ! n^o 5 2016)

6. A’ye aw bangebagaw bonya

WIDEYO: Ne bɛ se ka kuma ni ne bangebagaw ye cogo di? (2:​19)

• Denmisɛn walima funankɛnin ka kuma a bangebagaw fɛ bonya kɔnɔna na, o bɛ nafa jumɛn lase a ma?

• Cogo jumɛn na denmisɛn bɛ se ka kuma a bangebagaw fɛ cogo la min b’a jira ko a bɛ u bonya?

Ntalenw 1:8 kalan, o kɔ aw ka baro kɛ nin ɲininkali kan:

• Denmisɛn ka kan ka mun de kɛ ni a bangebagaw y’a jira a la a ka kan ka min kɛ?

7. A’ye Jehova bato ɲɔgɔn fɛ aw ka denbaya kɔnɔ

Jehova Seere denbayaw bɛ waati kɛrɛnkɛrɛnnen boloda dɔgɔkun o dɔgɔkun walasa ka Jehova bato ɲɔgɔn fɛ denbaya kɔnɔ. O denbaya ka Alabato bɛ kɛ cogo di? A’ye WIDEYO lajɛ, o kɔ aw ka baro kɛ nin ɲininkaliw kan:

WIDEYO: Denbaya ka Alabato​—Gɛlɛyaw ani nisɔndiya min bɛ sɔrɔ o la (8:​04)

• Denbaya bɛ se ka mun de kɛ walasa u ka to ka denbaya ka Alabato kɛ dɔgɔkun o dɔgɔkun?

• Bangebaga bɛ se ka mun de kɛ walasa denbaya ka Alabato ka denbaya kɔnɔmɔgɔw nafa ani ka u nisɔndiya?​—Nin kalansen in ja fɔlɔ lajɛ.

• Ka denbaya ka Alabato kɛ ɲɔgɔn fɛ, mun de bɛ se ka o gɛlɛya aw bolo?

Israɛl-kɔrɔ la, Jehova tun b’a ɲini denbayaw fɛ u ka to ka kuma Sɛbɛnniw kan tuma caman. Dutɛrɔnɔmɛ 6:6, 7 kalan, o kɔ aw ka baro kɛ nin ɲininkali kan:

• Aw bɛ se ka o sariyakolow waleya cogo di?

Hakilina dɔw denbaya ka Alabato kama:

• A’ye jɛkulu ka lajɛw labɛn ɲɔgɔn fɛ.

• Bibulu maana dɔ, min ko bɛ diya aw ka denbaya kɔnɔmɔgɔw ye, a’ye o kalan ani ka baro kɛ o kan ɲɔgɔn fɛ.

• Ni den fitininw bɛ aw bolo, a’ye denmisɛnw ka baarakɛta dɔ ta walima k’a ɛnprime jw.org kan.

• Ni funankɛninw bɛ aw bolo, a’ye baro kɛ barokun dɔ kan min bɛ kuma funankɛninw kan jw.org kan.

• A’ye Bibulu maana dɔ kɛ theatiri ye ka aw yɛrɛ bila o kɔnɔmɔgɔw nɔ na.

• A’ye wideyo dɔ lajɛ jw.org kan ani ka baro kɛ o kan.

BAKURUBAFƆLI

Jehova b’a fɛ bangebagaw ka u denw kanu, ka u kalan ani ka u lakana. A b’a fɛ denmisɛnw ka u bangebagaw bonya ani ka u kan minɛ. A b’a fɛ fana denbayaw ka ale bato ɲɔgɔn fɛ.

Seginnkanni

• Bangebagaw bɛ se ka u denw lamɔ ani ka u lakana cogo di?

• Denmisɛnw bɛ se ka u bangebagaw bonya cogo di?

• Ka waati dɔ boloda denbaya ka Alabato kama dɔgɔkun o dɔgokun, o nafaw ye jumɛnw ye?

NINNU LAJƐ

Kalansira jumɛnw bɛna i denw dɛmɛ u ka kɛ mɔgɔkɔrɔba ɲumanw ye?

“Kalansira wɔɔrɔ, denmisɛnw mago b’a la ka minnu dɔn” (g19.2)

Cɛ dɔ, min tun tɛ se denw lamɔcogo la, o labanna ka kɛ fa ɲuman ye cogo min na, o lajɛ.

An ka kan ka an denw lamɔ cogo min na, Jehova ye an kalan o la (5:​58)

A lajɛ denfaw bɛ se ka u ni u denkɛw cɛ jɛɲɔgɔnya barika bonya cogo min na.

“Denfaw gɛrɛlen bɛ se ka to u denkɛw la cogo di?” (wp11 01/11)