KALANSEN 51
I bɛ se ka Jehova nisɔndiya cogo di i kumacogo fɛ?
Tuma min na Jehova ye an da, a ye nilifɛn cɛɲumanba dɔ di an ma, ni o ye kuma kɛli se ye. An bɛ baara kɛ ni o nilifɛn ye cogo min na, yala nafa b’o la Jehova bolo wa? Siga t’a la ko nafa bɛ o la a bolo! (Yakuba 1:26 kalan.) O la, kuma kɛli se min dira an ma, an bɛ se ka baara kɛ ni o ye cogo di walasa ka Jehova nisɔndiya?
1. An ka kan ka baara kɛ ni o nilifɛn ye cogo di?
Bibulu b’a fɔ an ye ko, “aw ka ɲɔgɔn jija ka dɔ fara ɲɔgɔn barika kan”. (1 Tesalonikekaw 5:11) Yala i hakili bɛ mɔgɔ dɔw la minnu mago b’a la dusu ka don u kɔnɔ wa? I bɛ se ka mun de kɛ walasa ka dusu don u kɔnɔ? A fɔ u ye ko u ko ka bon i bolo. Fɛn min ka di i ye u ko la, i bɛ se ka o fɔ u ye. Yala i hakili bɛ tɛmɛsira dɔ la min bɛ se ka dusu don i dɔnbaga dɔ kɔnɔ? Tɛmɛsira caman bɛ yen i bɛ se ka minnu sugandi. I hakili to a la ko i bɛ kuma fɔ mɔgɔ ye cogo min na, o bɛ se ka nɔ bila a la kosɛbɛ, hali o bɛ se ka nɔ bila a la ka tɛmɛn i ka kuma fɔtaw kan. O la sa, i ka kuma tuma bɛɛ ni ɲumanya ani sabali ye.—Ntalenw 15:1.
2. An ka kan ka an yɛrɛ tanga kuma sugu jumɛnw ma?
Bibulu b’a fɔ ko: “Kuma jugu si kana bɔ aw da la”. (Efesekaw 4:29 kalan.) O kɔrɔ ye ko, kuma nɔgɔlenw walima kuma minnu bɛ mɔgɔ jogin, an man kan ka olu fɔ mɔgɔ ma walasa ka ko jugu kɛ a tigi la. An ka kan ka an yɛrɛ tanga fana mɔgɔw kɔrɔfɔli ma u kɔ, ani u tɔgɔ tiɲɛni ma.—Ntalenw 16:28 kalan.
3. Mun de bɛ se ka an dɛmɛ an ka kumaw fɔ minnu bɛ dusu don mɔgɔ kɔnɔ?
Tuma caman na, an bɛ kuma minnu fɔ, olu bɛ an miirinataw ani an dusukunnataw jira tiɲɛ yɛrɛ la. (Luka 6:45) O la, fo an ka an yɛrɛ kolo walasa an sinsinnen ka to miiri ɲumanw kan, ni olu ye, ko minnu tilennen bɛ, ko minnu jɛlen don, ko minnu ka di ani ko minnu ka kan ni tanuli ye. (Filipekaw 4:8) Walasa an sinsinnen ka to o fɛnw kan, an ka kan ka an ka ɲɛnajɛkow ani an teriw sugandi ni hakilitigiya ye. (Ntalenw 13:20) O fana bɛ an dɛmɛ an ka waati ta ka an hakili jagabɔ fɔlɔ sani an ka kuma. I ka kumaw bɛna nɔ min bila tɔw la, i hakili jagabɔ o kan. Bibulu b’a fɔ ko: “Mɔgɔ dalafiɲɛ ka kuma bɛ joginni kɛ i ko tɛlɛ da duman, nka hakilitigi da bɛ kɛnɛyali kɛ.”—Ntalenw 12:18.
DƆ FARA I KA DƆNNIYA KAN
Mɔgɔ kumacogo bɛ se ka Jehova nisɔndiya ani ka dusu don tɔw kɔnɔ cogo min na, an ka fɛn wɛrɛ sɛgɛsɛgɛ o kan.
4. An ka an kumacogo kɔlɔsi
Tuma dɔw la, an bɛɛ bɛ fɛn dɔw fɔ an bɛ tila ka nimisa minnu fɔli la. (Yakuba 3:2) Galasikaw 5:22, 23 kalan, o kɔ aw ka baro kɛ nin ɲininkaliw kan:
I bɛ se ka Jehova deli a ka nin jogo jumɛnw di i ma walasa ka i dɛmɛ i ka i kumacogo kɔlɔsi? O jogow bɛ se ka i dɛmɛ cogo di?
1 Kɔrɛntekaw 15:33 kalan, o kɔ aw ka baro kɛ nin ɲininkali kan:
I teriw ani i ka ɲɛnajɛ sugandilenw bɛ se ka nɔ jumɛn bila i kumacogo la?
Mun de bɛ se ka nɔ bila i kumacogo la?
Waajulikɛla 3:1, 7 kalan, o kɔ aw ka baro kɛ nin ɲininkali kan:
Tuma jumɛn de la a bɛ fisaya i ka i makun walima ka waati ɲuman makɔnɔ ka sɔrɔ ka kuma?
5. Kuma ɲumanw fɔ mɔgɔ tɔw kan
Nenili walima kuma minnu bɛ mɔgɔ jogin, an bɛ se ka an yɛrɛ tanga olu fɔli ma cogo di? A’ye WIDEYO lajɛ, o kɔ aw ka baro kɛ nin ɲininkaliw kan:
Wideyo kɔnɔ, mun na balimakɛ y’a ɲini ka a kumacogo yɛlɛma ka ɲɛsin tɔw ma?
A ye mun de kɛ walasa ka o yɛlɛma kɛ?
Waajulikɛla 7:16 kalan, o kɔ aw ka baro kɛ nin ɲininkali kan:
Ni an y’a ye ko an b’a fɛ ka fɛn min fɔ mɔgɔ wɛrɛ kan ko o fɛn man ɲi, an ka kan ka an hakili jigin mun de la?
Waajulikɛla 7:21, 22 kalan, o kɔ aw ka baro kɛ nin ɲininkali kan:
Nin tɛmɛsira ninnu bɛ i dɛmɛ cogo di i kana dimin ni mɔgɔ dɔ ye kuma jugu dɔ fɔ i ko la?
6. To ka kuma ni ɲumanya ye i ka denbaya kɔnɔmɔgɔw fɛ
Jehova b’a fɛ an ka to ka kuma an ka denbaya kɔnɔmɔgɔw fɛ ni ɲumanya ani kanuya ye. A’ye WIDEYO lajɛ, o kɔ aw ka baro kɛ nin ɲininkali kan:
Mun de bɛna i dɛmɛ i ka kuma ni ɲumanya ye aw ka denbaya kɔnɔmɔgɔw fɛ?
Efesekaw 4:31, 32 kalan, o kɔ aw ka baro kɛ nin ɲininkali kan:
Kuma sugu jumɛnw de bɛ denbaya barika bonya?
Jehova bɛ min miiri a Denkɛ ko la, a ye o fɔ. Matiyu 17:5 kalan, o kɔ aw ka baro kɛ nin ɲininkali kan:
I bɛ se ka Jehova ladege cogo di i kumacogo ani i ka kuma fɔtaw la aw ka denbaya kɔnɔmɔgɔw fɛ?
Cogoyaw ɲini ka mɔgɔ tɔw tanu
MƆGƆ DƆW B’A FƆ KO: “Min bɛ ne kɔnɔ, ne bɛ o de fɔ. Ni o man diya mɔgɔ min ye, o y’o tigi kunko ye, ne ka sira t’o la.”
Yala e sɔnna o ma wa? Mun na e sɔnnen bɛ o ma walima mun na e ma sɔn o ma?
BAKURUBAFƆLI
An bɛ min fɔ, o bɛ se ka mɔgɔ wɛrɛw dɛmɛ walima ka u jogin. An bɛ kuma minnu fɔ, an ka kan ka an hakili jagabɔ koɲuman o kumaw, u fɔ waati ani u fɔcogo kan.
Seginnkanni
An bɛ se ka baara kɛ ni kumaw ye sira minnu fɛ walasa ka mɔgɔ wɛrɛw dɛmɛ, olu dɔw ye jumɛnw ye?
I b’a fɛ ka i yɛrɛ tanga kuma sugu jumɛnw de fɔli ma?
Mun de bɛ se ka an dɛmɛ walasa tuma bɛɛ an ka kuma ni ɲumanya ye ani ka dusu don tɔw kɔnɔ?
NINNU LAJƐ
A lajɛ fɛn min bɛ se ka i dɛmɛ i ka i yɛrɛ tanga kuma jugu fɔli ma.
“Yala kuma juguw fɔli man ɲi tiɲɛ yɛrɛ la wa?” (jw.org barokun dɔ)
A lajɛ i bɛ se ka i yɛrɛ tanga cogo min na walasa i kana bin mɔgɔ kɔrɔfɔli jan kɔnɔ.
A lajɛ Jehova ye cɛ dɔ dɛmɛ cogo min na walasa a ka kuma jugu fɔli dabila.
“Ne y’a daminɛ ka miiri kosɛbɛ n’ka ɲɛnamaya taabolo la” (wp13 01/08)