KALANSEN 49
I ka denbaya bɛ se ka hɛrɛ sɔrɔ cogo jumɛn na?—Yɔrɔ 1
Mɔgɔ furulen kuraw b’a fɛ nisɔndiya min bɛ u la u ka furu don na, o ka kɛ yen fo badaa. Wa o bɛ se ka kɛ. Krecɛn minnu bɛ furu kɔnɔ kabini san caman ani u bɛ ka u jija kosɛbɛ ka Bibulu laadilikanw waleya, olu b’a dɔn ko o bɛ se ka kɛ.
1. Bibulu bɛ laadilikan jumɛnw di furucɛw ma?
Jehova ye furucɛ de sugandi ka kɛ denbaya kuntigi ye. (Efesekaw 5:23 kalan.) Jehova b’a ɲini furucɛ fɛ a ka latigɛliw kɛ minnu bɛna denbaya kɔnɔmɔgɔw nafa. Bibulu b’a fɔ furucɛw ye ko: “A’ ye aw musow kanu”. (Efesekaw 5:25) O kɔrɔ ye mun ye? Furucɛ min b’a muso kanu, o b’a muso minɛ ni ɲumanya ye so kɔnɔ, wa a b’o kɛ fana ni u bɛ mɔgɔ wɛrɛw cɛma kɛnɛma. A b’a lakana ko jugu ma ani a b’a seko bɛɛ kɛ walasa ka a magoɲɛfɛnw di a ma farikolo ani dusukunnakow ta fan fɛ. (1 Timote 5:8) Min nafa ka bon n’a bɛɛ ye, o ye ko a b’a muso dɛmɛ a gɛrɛlen ka to Jehova la. (Matiyu 4:4) Misali la, a ni a muso bɛ delili kɛ ani ka Bibulu kalan ɲɔgɔn fɛ. Furucɛ min b’a janto a muso la ni kanuya ye, o bɛ jɛɲɔgɔnya ɲuman maralen to a yɛrɛ ni Jehova cɛ.—1 Piɛrɛ 3:7 kalan.
2. Bibulu bɛ laadilikan jumɛnw di furumusow ma?
Ala ka Kuma b’a fɔ ko muso ka kan “ka a cɛ bonya.” (Efesekaw 5:33) A bɛ se ka o kɛ cogo di? A bɛ se ka miiri a furucɛ jogo ɲumanw la ani a ka cɛsiriw la a bɛ minnu kɛ walasa ka a mago don ale ani u ka denmisɛnw na. Furumuso bɛ se ka a cɛ bonya a kɛtɔ ka a cɛ kɔkɔrɔdon a ka latigɛliw la a bɛ minnu kɛ. A bɛ o kɛ fana a kɛtɔ ka to ka kuma ni ɲumanya ye a cɛ fɛ, ani ka kuma ɲuman fɔ a kan mɔgɔ tɔw ye, a bɛ o kɛ hali ni a cɛ tɛ Jehova batobaga ye.
3. Furuɲɔgɔnmaw bɛ se ka u ka furu barika bonya cogo di?
Bibulu b’a fɔ furuɲɔgɔnmaw ko la ko: “U fila na kɛ farisogo kelen ye.” (Matiyu 19:5) O kɔrɔ ye ko fɛn o fɛn bɛ se ka kanuya barika dɔgɔya u ni ɲɔgɔn cɛ, u ka kan ka o fɛnw kɛlɛ. U b’o kɛ u kɛtɔ ka to ka waati kɛ ni ɲɔgɔn ye tuma bɛɛ ani ka u hakilinataw ani u dusukunnakow fɔ ɲɔgɔn ye ni kɔnɔnajɛya ani kanuya ye. Ni Jehova tɛ, u t’a to fɛn si walima mɔgɔ si nafa ka bonya u bolo ka tɛmɛn u furuɲɔgɔn kan. U bɛ u janto kɛrɛnkɛrɛnnenya la, u kana jɛɲɔgɔnya don u ni mɔgɔ wɛrɛ cɛ jarabi sira la.
DƆ FARA I KA DƆNNIYA KAN
An k’a lajɛ Bibulu sariyakolo minnu bɛ se ka aw ka furu barika bonya.
4. Furucɛw, a’ye aw musow kanu ani ka aw mago don u la ka ɲɛ
Bibulu b’a fɔ ko, cɛw “ka kan ka u musow kanu i ko u yɛrɛw farikolow.” (Efesekaw 5:28, 29) O kɔrɔ ye mun ye? A’ye WIDEYO lajɛ, o kɔ aw ka baro kɛ nin ɲininkali kan:
Sira minnu fɛ furucɛ bɛ se k’a jira ko a b’a muso kanu ani ko a b’a mago don a la, olu dɔw ye jumɛnw ye?
Kolosekaw 3:12 kalan, o kɔ aw ka baro kɛ nin ɲininkali kan:
Furucɛ bɛ se ka o jogow waleya a ka furu kɔnɔ cogo di?
5. Furumusow, a’ye aw cɛw kanu ani ka u bonya
Bibulu bɛ dusu don furumuso kɔnɔ a ka a cɛ bonya, a kɛra ko a cɛ bɛ Jehova bato walima ko a tɛ Jehova bato. 1 Piɛrɛ 3:1, 2 kalan, o kɔ aw ka baro kɛ nin ɲininkaliw kan:
Ni i cɛ ye dannabali ye, siga t’a la ko i b’a fɛ a ka Jehova bato. A dɛmɛni cogo bɛɛ la ɲuman ye jumɛn ye? Yala i hakili la, o ye ka to ka a waaju tuma bɛɛ walima ka kɛ muso ɲuman ye ani ka i cɛ bonya wa? Mun na?
Furucɛ ni a muso bɛ se ka latigɛli ɲumanw kɛ ɲɔgɔn fɛ. O bɛɛ n’a ta, a bɛ se ka kɛ ko furucɛ ka latigɛliw tɛ bɛn a muso ma tuma dɔw la. O la, muso bɛ se ka a hakilinata ɲɛfɔ a cɛ ye sabali ani bonya kɔnɔna na. Nka a ka kan ka a hakili to a la ko Jehova ye jɔyɔrɔ di furucɛ de ma a k’a latigɛ fɛn min ka ɲi denbaya ma. A ka kan ka a seko bɛɛ kɛ walasa ka a cɛ kɔkɔrɔdon o latigɛli la. A kɛtɔ ka o kɛ, a bɛ a ka denbaya kɔnɔmɔgɔw bɛɛ dɛmɛ u ka kɛ hɛrɛ la. 1 Piɛrɛ 3:3-5 kalan, o kɔ aw ka baro kɛ nin ɲininkali kan:
Ni muso b’a cɛ bonya, o bɛ mun kɛ Jehova la?
6. Aw bɛ se ka se sɔrɔ gɛlɛyaw kan aw ka furu kɔnɔna na
Furu si dafalen tɛ. O bɛɛ n’a ta, furuɲɔgɔnmaw ka kan ka baara kɛ ɲɔgɔn fɛ walasa ka se sɔrɔ u ka gɛlɛyaw kan. A’ye WIDEYO lajɛ, o kɔ aw ka baro kɛ nin ɲininkaliw kan:
Wideyo kɔnɔ, taamashyɛn jumɛnw de y’a jira ko furuɲɔgɔnma ninnu tun bɛ ka u cɛ janya ɲɔgɔn na?
U ye mun de kɛ walasa ka u ka furu barika bonya?
1 Kɔrɛntekaw 10:24 ani Kolosekaw 3:13 kalan. Tɛmɛsira kelen-kelen bɛɛ kalannen kɔ, aw ka baro kɛ nin ɲininkali kan:
O laadilikanw waleyali bɛ se ka furu barika bonya cogo di?
Bibulu b’a fɔ ko an ka kan ka ɲɔgɔn bonya. N’a fɔra ko ka mɔgɔ bonya, o kɔrɔ fana ye ka a tigi minɛ koɲuman ani ka o kɛ ni danbe ye. Romɛkaw 12:10 kalan, o kɔ aw ka baro kɛ nin ɲininkaliw kan:
Yala furucɛ ka kan k’a ɲini a muso de fɔlɔ ka ale bonya walima muso ka kan k’a ɲini a cɛ de fɔlɔ ka a bonya wa? Mun na e sɔnnen bɛ o ma walima mun na e ma sɔn o ma?
MƆGƆ DƆW B’A FƆ KO: “Ne ni n’furuɲɔgɔn gɛrɛlen tɛ ɲɔgɔn na sisan iko fɔlɔ.”
I bɛ se k’a ɲɛfɔ cogo di o tigilamɔgɔw ye ko Bibulu bɛ se ka u dɛmɛ?
BAKURUBAFƆLI
Furucɛ ni a muso bɛ se ka kɛ hɛrɛ la ni u bɛ ɲɔgɔn kanu, ka ɲɔgɔn bonya ani ka Bibulu sariyakolow waleya.
Seginnkanni
Furucɛ bɛ se ka mun de kɛ walasa hɛrɛ ka kɛ a ka furu kɔnɔ?
Furumuso bɛ se ka mun de kɛ walasa hɛrɛ ka kɛ a ka furu kɔnɔ?
Ni i bɛ furu kɔnɔ, Bibulu sariyakolo jumɛnw de bɛ se ka i dɛmɛ i k’i ka furu barika bonya?
NINNU LAJƐ
Fɛn kɛrɛnkɛrɛnnen dɔw lajɛ minnu bɛ se ka i dɛmɛ walasa hɛrɛ ka kɛ i ka denbaya kɔnɔ.
Duba minnu bɛ sɔrɔ ni i ye Ala ka laadilikanw waleya i ka furu kɔnɔ, fɔlikan wideyolama dɔ lajɛ min bɛ o dubaw jira.
Ka kolo furucɛ ka kuntigiya ye, o kɔrɔ ye min ye, o sɛgɛsɛgɛ.
Furuɲɔgɔn dow sera ka gɛlɛyabaw ani furusa kunbɛn cogo di?