Limaniya lakika jiracogo

MƆGƆ caman b’a fɔ ko limaniya bɛ u la bi. Nka Yesu y’a fɔ ko limaniya lakika bɛna kɛ mɔgɔ damadɔ dɔrɔn de la. A ko: “Sira min bɛ taa halaki yɔrɔ la, o donda ni a kɔnɔ bɛɛ ka bon, a taabaaw ka ca. Nka sira min bɛ taa ɲɛnamaya la, o donda ni a kɔnɔ bɛɛ ka dɔgɔ, a sɔrɔbaaw man ca.”—Matiyu 7:13, 14.

Mɔgɔw b’a jira cogo di bi ko limaniya lakika bɛ u la? Yesu ko: “Aw na u dɔn u ka kɛwalew de fɛ . . . Jiri ɲuman bɛ den ɲumanw kɛ, nka jiri jugu bɛ den juguw de kɛ.” (Matiyu 7:16, 17) O la, limaniya lakika bɛ “den ɲumanw” de kɛ. A bɛ mɔgɔw bila ka walew kɛ minnu ka di Ala ye. U b’o kɛ cogo di?

U bɛ sebaaya minɛ ka ɲɛ

Limamiya lakika bɛ mɔgɔ minnu na, u bɛ u ka sebaaya ni u ka jɔyɔrɔ kɛ ka Ala bonya ani ka mɔgɔ wɛrɛw nafa. Yesu ye nin kalansira fɔ, ko: “Ni dɔ b’a fɛ ka kɛ mɔgɔba ye aw cɛma, o ka kɛ tɔw ka baaraden ye.” (Marka 10:43) O cogo kelen na, limaniya lakika bɛ cɛ min na, a tɛ fanga digi tɔw kan, so kɔnɔ walima kɛnɛma. A b’a muso kanu kosɛbɛ, ka bonya da a kan ani k’a mako bɛɛ ɲɛ. Kitabu ko: “Cɛw, a’ ye aw musow kanu, aw kana juguya u ma.” (Kolosekaw 3:19) “Aw ka aw musow minɛ ni hakilitigiya ye. Musoya cogo bɛ i n’a fɔ minɛn min barika ka dɔgɔ aw ta ye. Aw ka u bonya, k’a masɔrɔ aw ye ɲɛnamaya nilifɛn ciyɛntaɲɔgɔnw ye ka bɔ Ala fɛ, walisa aw ka Ala deliliw kana tigɛ.”—1 Piɛrɛ 3:7.

Muso fana, ni limaniya lakika b’a la, a bɛ “a cɛ bonya.” (Efesekaw 5:33) Musow ka kan ka “u cɛw ni u denw kanu.” (Tite 2:4) Limaniya lakika b’a to fa ni ba bɛ waati ta ka u denw kalan Ala ka kalansiraw ni a ka sariyakolow la. U bɛ mɔgɔ wɛrɛw minɛ ka ɲɛ k’u bonya, u ka so kɔnɔ, u ka barayɔrɔ la ani yɔrɔ wɛrɛw la. U bɛ Kitabu kɔnɔ laadilikan in sira taama, ko: “Aw ka ɲɔgɔn dan ɲɔgɔn bonyali la.”—Romɛkaw 12:10.

Ala ka baarakɛlaw bɛ a ka cikan in labato, ko: “I kana surɔ fɛn minɛ.” (Ekisode 23:8) U tɛ u ka jɔyɔrɔ kɛ ka u yɛrɛ nafa dɔrɔn ɲini. Nka, u bɛ cogow ɲini ka tɔw dɛmɛ, kɛrɛnkɛrɛnnenya la, dɛsɛbaatɔw. U ye nin laadilikan kɛ u ta ye, ko: “Ka ko ɲuman kɛ, ka dɔ bɔ aw bolofɛnw na ka o di, aw kana ɲinɛ o kɔ, katuguni o bɔɲɔgɔnko sarakaw ka di Ala ye.” (Heburuw 13:16) O la, u bɛ to k’a ye ko Yesu ye tiɲɛ de fɔ nin na, ko: “Duba bɛ nili la ka tɛmɛn sɔrɔli kan.”—Kɛwalew 20:35.

U bɛ tilennenya mara

Limaniyatigiw b’a bɔ u yɛrɛ la ka Ala kan minɛ, wa u bolo, “a ka ci fɔlenw man gɛlɛn.” (1 Yuhana 5:3) U b’a dɔn ko: “Matigi ka sariya dafalen bɛ . . . Matigi ka ko latigɛlenw ye tiɲɛ ye, u bɛ mɔgɔ dusukun ɲagali. Matigi ka ci fɔlenw ye kɛnɛyeelen de ye, u bɛ yeelen bɔ mɔgɔ ɲɛw ye.”—Zaburu 19:8, 9.

Limaniya lakika b’a to u tɛ mɔgɔ bɔ mɔgɔ la sira si fɛ. U tɛ mɔgɔ si fisaya ni tɔw ye a ka siya kosɔn, walima a ka jamana kosɔn, walima a ka sɔrɔ kosɔn, nka u bɛ Ala de ladege. “Ala tɛ mɔgɔ bɔ mɔgɔ la, nka siya o siya la, mɔgɔ min bɛ siran a ɲɛ ka ko tilennen kɛ, o de ko ka di a ye.”—Kɛwalew 10:34, 35.

Limaniya lakika bɛ mɔgɔ min na, a bɛ “sira tilennen taama ko bɛɛ la.” (Ebrew 13:18, LK) A tɛ naafigiya kɛ, a tɛ mɔgɔ wɛrɛ kɔrɔfɔ a kɔ. Dawuda y’a sɛbɛn ko, min ko ka di Ala ye, o tigi ‘tɛ mɔgɔ si tɔgɔ jugu fɔ a nɛnkun na, a tɛ ko jugu kɛ a sigiɲɔgɔn na.’—Zaburu 15:3.

U bɛ hakilitigiya ɲini Ala fɛ

Limaniya lakika bɛ minnu na, u bɛ u ka dannaya sinsin Ala ka Kuma dɔrɔn de kan. U dalen b’a la ko “Kitabu kuma bɛɛ kɛra a sɛbɛnnikɛlaw kɔnɔ Ala dafiɲɛ fɛ. Nafa b’a la kalanni ni kɔrɔfɔli ni latilenni kama, ani kololi, tilennenya ko la.” (2 Timote 3:16) U bɛ hakilitigiya jira u ni tɔw ka jɛɲɔgɔnya la, ‘hakilitigiya min bɛ na ka bɔ sankolo la, a hɛrɛma don, a sumalen bɛ. A bɛ bɛn ɲini, a falen bɛ hinɛ ni kɛwale ɲumanw la.’ (Yakuba 3:17) U b’u yɛrɛ tanga jinɛweleli ma, ani laada minnu bɛ alako kɛlɛ. Ka fara o kan, u b’u “yɛrɛw kɔlɔsi boli batoli la.”—1 Yuhana 5:21.

Kanuya jɔnjɔn bɛ u la

Kira Musa ye nin kuma fɔ, ko: “I ka Matigi i ka Ala kanu ni i dusukun bɛɛ ni i ni bɛɛ ani i barika bɛɛ ye.” (Dutɛrɔnɔmɛ 6:5) Limaniyatigiw bɛ o kanuya ɲɔgɔn de kɛ ka ɲɛsin Ala ma. U bɛ Jehova Ala tɔgɔ bonya. U bɛ “barika da Jehova ye,” ka “a tɔgɔ wele” ni limaniya ye. (Zaburu 105:1, BS) Ala ka baarakɛlaw bɛ nin cikan lamɛ, ko: “I ka i mɔgɔ ɲɔgɔn kanu i ko i yɛrɛ.” (Levitike 19:18) U bɛ farinyakow haramu, wa u b’a kɛ cogo bɛɛ la ‘hɛrɛ ka to u ni mɔgɔw bɛɛ cɛ’ (Romɛkaw 12:18) Kuma kɔrɔma la, u bɛ “u ka npanw faga ka kɛ misidabaw ye, ka u ka tamaw kɛ wɔlɔsɔw ye.” (Esayi 2:4) O de b’a to u “bɛ ɲɔgɔn kanu”, wa balimaya tin bɛ u ni ɲɔgɔn cɛ diɲɛ fan bɛɛ la. (Yuhana 13:35) Yali i bɛ se ka o mɔgɔ sifayaw dɔn bi wa?