Limaniya kɛlɛbaga ye jɔni ye?

WAATI jan sani dugukolo ka da, Jehova Ala ye mɛlɛkɛw da sankolo la. Nka mɛlɛkɛ dɔ nana ɲɛbɔ batoli fɛ, k’a sɔrɔ Ala kelenpe de ka kan ka bato. A y’a to o nege jugu k’a bila ka ko dɔ kɛ min y’a kɛ Sitanɛ ye, o kɔrɔ, “Kɛlɛbaga,” min bɛ Ala kɛlɛ. Sitanɛ ye Ala kɛlɛ cogo jumɛn na?

Sitanɛ ye Hawa kɔnɔnasu a ka Ala kan bila. A ye Hawa nɛgɛn ko Jehova Ala bɛ k’a jɛ fɛn ɲuman dɔ la, bawo Jehova tun y’a fɔ Hawa kana jiriden dɔ dun. Sitanɛ y’a ja gɛlɛya k’a fɔ ko Ala ye nkalontigɛla ye, k’a jira ko Hawa ka kan ka ban Ala ka mara ma. A ko: “Ala y’a dɔn ko ni aw ye o jiriden dun don min na, aw ɲɛw na yɛlɛ, aw na kɛ i ko Ala, ka ko ɲuman ni ko jugu dɔn.” (Jenɛse 3:5) Hawa ye nalonmanya kɛ ka da Sitanɛ ka nkalon na. A ye Ala ka sariya sɔsɔ, ka Hadama fana bila k’o ɲɔgɔn kɛ. Kabini o waati la, limaniya lakika bɛ mɔgɔ o mɔgɔ la, Sitanɛ kɛra o jugu ye. A bɛ ka mɔgɔw lafili hali bi. A bɛ o kɛ cogo di?

Limaniya kolon jɛnsɛnna

Sitanɛ ye bolibato ni hadamadenw ka laadaw kɛ ka Israɛl bɔnsɔn ka alabatocogo tiɲɛ. Yesu y’a fɔ u ka diinɛ ɲɛmɔgɔw ye ko u ka bato tun ye fu ye, k’a masɔrɔ “u ka kalan ye mɔgɔw ka ci fɔlenw dama ye.” (Matiyu 15:9) O siya banna Masiya la minkɛ, Ala fana banna u la. Yesu y’a fɔ u ye ko: “Ala ka masaya na bɔsi aw la ka di siya wɛrɛ ma min na den bɛnnen kɛ o masaya ye.” (Matiyu 21:43) O la, Yesu nɔfɛmɔgɔw de labanna ka kɛ Ala ka jamakulu kɛrɛnkɛrɛnnen ye.

Sitanɛ y’a ɲini sisan ka Yesu nɔfɛmɔgɔw ka alabatocogo tiɲɛ. Yali a sera k’o kɛ wa? A ko tun bɛna kɛ cogo min na, Yesu ye misali dɔ fɔ o la. O misali kɔnɔ, cɛ dɔ ye alikama kisɛ seri a ka foro la. O kɔ fɛ, a jugu dɔ nana bin jugu seri alikama cɛ ma. Cɛ y’a to u fila bɛɛ ka kɔgɔ ɲɔgɔn fɛ fo ka taa se sumantigɛ tuma ma. O la, u ye bin jugu bɔ fɔlɔ k’a jeni. Nka alikama lajɛra forotigi ka jigiɲɛ kɔnɔ.

Yesu ye o misali kɔrɔ ɲɛfɔ a ka kalandenw ye ko Ale yɛrɛ de ye sumanserila ye. A ko fana: “Kisɛ ɲuman, o ye sankolo masaya denw ye. Bin jugu, o ye Sitanɛ denw ye. O jugu min ye bin jugu kisɛ seri, o ye Sitanɛ yɛrɛ ye. Suman tigɛ tuma, o ye diɲɛ laban ye. Sumantigɛlaw, olu ye mɛlɛkɛw de ye.” (Matiyu 13:38, 39) Yesu y’a ka kalandenw kɛɲɛ ni alikama ye. Nka Sitanɛ nana kalanden kolonw dan Yesu nɔfɛmɔgɔ sɛbɛw cɛ ma. O kalanden kolonw bɛ iko bin jugu. O de la, san kɛmɛ caman Yesu salen kɔ fɛ, ikomi a yɛrɛ y’a fɔ cogo min na, kalanden kolonw cayara. U ye tiɲɛ kɛlɛ, ka kalansira juguw fɔ, o dɔ ye ko Ala ye saba ye. Kalanden kolonw y’a daminɛ fana ka u sen don bolibato ni politiki la. Mɔgɔ damadɔ dɔrɔn de tora Yesu ka kalansira tilennenw kɔnɔ.

Limaniya lakika bɛ se sɔrɔ

O bɛɛ n’a ta, Yesu y’a fɔ ko kow bɛna tila ka yɛlɛma. Limaniya lakika tɛ mɔgɔ minnu na, Ala ka mɛlɛkɛw bɛna u labɔ ka u halaki. O la, limaniya lakika bɛ minnu na, olu na dɔn ka jɛya. A laban na, Sitanɛ Sendonbaga fana bɛna halaki, ale min ye limaniya kɛlɛbaga fɔlɔ ye. Siga t’a la, limaniya lakika na se sɔrɔ!

Nka bi, limaniya lakika bɛ mɔgɔ minnu na, i bɛ se k’u dɔn cogo di? An ka barokun nata bɛna kɛ o de ye.