I ka limaniya lakika jira kɛnɛ kan

ALA bɛ a sagokɛlaw lasɔmi ko u ka limaniya bɛna kɔrɔbɔ. A ko: “A’ ye aw hakili sigi ka to aw ɲɛ na! K’a masɔrɔ aw jugu Sitanɛ bɛ yaalayaala i ko waraba konbotɔ. A bɛ se ka min sɔrɔ k’a dun, a bɛ o de ɲini.” (1 Piɛrɛ 5:8) Sitanɛ bɛn’a ɲini cogo di ka i ka limaniya tiɲɛ?

Sitanɛ bɛ se ka mɔgɔ wɛrɛ su k’i bali ka Ala ka Kuma kalan, hali mɔgɔ minnu ka ko ka gɛlɛn i ma kosɛbɛ. O de kosɔn Yesu ko: “Mɔgɔ so mɔgɔw yɛrɛ na kɛ a juguw ye.” (Matiyu 10:36) I somɔgɔ dɔ walima i teri dɔ bɛ se k’o kɛ, k’a sɔrɔ ŋaniya jugu tɛ, bawo tiɲɛ-kuma nafamaba minnu bɛ Ala ka Kuma kɔnɔ, u ma o dɔn. A bɛ se ka kɛ fana u bɛ siran mɔgɔ wɛrɛw ka kuma ɲɛ. A mana kɛ cogo o cogo la, Kitabu ko: “Mɔgɔ ɲɛsiran bɛ binni jan da mɔgɔ ɲɛ, nka min bɛ i jigi da Matigi kan, o lakanalen na to.” (Ntalenw 29:25) N’i ye mɔgɔw ka kuma mɛn ka Ala ka Kuma kalan dabila, yali o bɛ diya Ala ye wa? Cogo si la! Nka mɔgɔ min bɛ limaniya lakika jira, Ala bɛ o tigi dɛmɛ. “Minnu bɛ segin kɔ ka halaki, an kɔni tɛ olu dɔw ye, nka minnu bɛ dannaya kɛ ka u niw kisi, an ye olu dɔw de ye.”—Heburuw 10:39.

I hakili jigi Dumas la, cɛ min ka kuma fɔra nin gafenin daminɛ na. A muso tun bɛ a ɲagaribɔ a la. Nka kɔ fɛ, a farala Dumas kan ka Ala ka Kuma kalan. O cogo kelen na fana, n’i taara a fɛ ka ko bɛnnen kɛ, o bɛ se ka i somɔgɔw ni i teriw bila ka o ɲɔgɔn kɛ. Tuman caman na, mɔgɔ dɔw ye limaniya lakika jira, wa u ka “taama cogo senuma ni bonyali ye”, o ye u somɔgɔ dɔ bila ka ‘sɔn ka dannaya kɛ k’a sɔrɔ kuma tɛ.’—1 Piɛrɛ 3:1, 2.

Sitanɛ b’a ɲini fana ka mɔgɔw nɛgɛn u k’a miiri ko waati tɛ u bolo ka Ala ka Kuma kalan. Diɲɛnatigɛ gɛlɛyaw, a haminakow ni a wariko gɛlɛya, o bɛ se k’a kɛ Ala ka Kuma kana baara kɛ mɔgɔ la fo a ka limaniya bɛ tiɲɛ. Sitanɛ b’a fɛ o ɲɔgɔn k’i sɔrɔ. (Marka 4:19) Kana sɔn o hakilina jugu ma dɛ! Kitabu b’a fɔ ko: “E min ye Ala sɛbɛ kelenpe ye, ani i ye Yesu Krisita min ci, ka e ni o dɔn, o de ye ɲɛnamaya banbali ye.” (Yuhana 17:3, BS) Tiɲɛ na, ka ta’a fɛ ka Ala dɔn, ani Yesu fana, o min ye Masiya ye, o nafa ka bon ɲɛnamaya banbali sɔrɔli la Alijinɛ kɔnɔ.

E ka miiri Musa la, o min tun ye Misira masaso mɔgɔ dɔ ye. A tun bɛ se k’a ɲini ka nafolo sɔrɔ, walima ka kɛ tɔgɔtigi ye, walima fangatigi. Nka a y’a latigɛ ko “a ni Ala ka mɔgɔw ka tɔɔrɔ ɲɔgɔn fɛ, o ka fisa jurumu ɲɛnajɛ ye, o min tɛ mɛn.” A sera k’o kɛ cogo di? “A ye muɲuli kɛ, i ko a ɲɛ bɛ Ala yebali la.” (Heburuw 11:24, 25, 27) A jɛlen don ko Musa ka limaniya tun ka bon kosɛbɛ. A ye Ala sagonakow bila a yɛrɛ sagonakow san fɛ, Ala fana dubara a ye kosɛbɛ. N’i fana ye o ɲɔgɔn kɛ, Ala na duba i ye.

Sitanɛ na tɛmɛ sira caman fɛ walisa k’i minɛ a ka jan na. Nka kana sɔn dɛ! Ala ka Kuma b’a fɔ an ye ko: “A’ ye jɔ Sitanɛ ɲɛ ka a kɛlɛ, n’o kɛra, a na boli k’i mabɔ aw la.” (Yakuba 4:7) Mun bɛ se k’i dɛmɛ ka jɔ Sitanɛ ɲɛ?

Taa ɲɛ Ala ka Kuma kalan na. Ala ka Kuma kalan don o don. A ɲini k’a ka kalansiraw faamu. A ka laadilikanw sira taama. N’i ye o kɛ, i na “Ala ka kɛlɛkɛ minɛnw bɛɛ ta,” o na i dɛmɛ ka Sitanɛ ka fɛɛrɛw kunbɛn.—Efesekaw 6:13.

Gɛrɛ limaniyatigiw la. Mɔgɔw ɲini minnu bɛ to ka Ala ka Kuma kalan ka o sira taama. O mɔgɔ suguw bɛ u “janto ɲɔgɔn na walisa ka ɲɔgɔn jija kanuya ni kɛwale ɲumanw kɛli la.” O na i dɛmɛ i ka limaniya ka kɔgɔ.—Heburuw 10:24, 25.

Gɛrɛ Jehova la. To ka Ala deli a k’i dɛmɛ. I jigi da a kan. Tuma bɛɛ, kana ɲinɛ ko a b’a fɛ k’i dɛmɛ. “A’ ye aw hami kow bɛɛ da ale kan, katuguni a bɛ a janto aw la.” (1 Piɛrɛ 5:6, 7) “Ala ye kantigi ye. A tɛna sɔn aw kɔrɔbɔli ka tɛmɛn aw barika dan yɔrɔ kan. Nka kɔrɔbɔli mana se, a na bɔ yɔrɔ jira walisa aw ka se ka o kɔrɔbɔli muɲu.”—1 Kɔrɛntekaw 10:13.

Sitanɛ bɛ Ala laɲini, a kɛtɔ k’a fɔ ko mɔgɔ si tɛna to Ala sago kɛli la kɔrɔbɔli kɔnɔ. Nka o ye cogo ye i bolo k’a jira ko Sitanɛ ye nkalontigɛla ye! Ala ko: “I ka hakili sɔrɔ ka ne dusu nisɔndiya, ni o kɛra, ne na se ka ne tɔgɔ jugu fɔbaa jaabi.” (Ntalenw 27:11) O la, i cɛsiri k’a jira ko limaniya lakika b’i la.