An ka Masiya ladege

ALA y’a fɔ ka tɛmɛ ko a bɛna Masiya sugandi ka kɛ siyaw bɛɛ kuntigi ye. Ala b’a dɔn an mako bɛ kuntigi sifaya min na, wa a ye a bɛɛ la ɲuman de sugandi an ye. Masiya dun kɛra kuntigi sugu jumɛn ye? Yali a kɛra kɛlɛkuntigiba dɔ ye wa, wala politiki mɔgɔba dɔ, wala kodɔnnaba dɔ ye wa? Kitabu b’a jira ko Masiya tun ye kira kɛrɛnkɛrɛnnen dɔ ye, danfara caman bɛ a ni kira tɔw cɛ. Kira Yesu don.—Matiyu 23:10.

Ala ye cogo bɛɛ kɛ walisa Yesu dafalen ka bange, a senuman. Sitanɛ ye fɛɛrɛ bɛɛ kɛ walisa ka Yesu ka dafalenya minɛ a la, nka Yesu y’i kologɛlɛya. Ala bɛ baara kɛ ni a ka barika ni a ka tilennenya ni a ka hakilitigiya ni a ka kanuya ye cogo min na, Yesu ye o jira k’a jɛya a ka kuma ni a ka kɛwalew bɛɛ fɛ. An k’a lajɛ sisan, an bɛ se ka Yesu ladege cogo min na.

A ye barika sɔrɔ Ala fɛ ka mɔgɔ wɛrɛw dɛmɛ. Yesu tun b’a jan to mɔgɔ wɛrɛw la kosɛbɛ, a tun bɛ a seko bɛɛ kɛ ka u mako ɲɛ. A ko: “Nin mɔgɔw hinɛ bɛ ne la, k’a masɔrɔ . . . dumunifɛn si tɛ u fɛ.” (Marka 8:2) O kɔ fɛ, a ye kabako kɛ ka dumuni di jamaba ma, min tun nana a lamɛ.

Ka fara o kan, Yesu tun bɛ to ka taa yɔrɔ caman na ka mɔgɔw kalan, “a tun bɛ bana sifa bɛɛ kɛnɛya ani mɔgɔw ka barikantanya bɛɛ.” (Matiyu 4:23) O de y’a to jamaba de tun bɛ a nɔ fɛ, u “bɛɛ tun bɛ u jija ka maga a la, katuguni sebaaya tun bɛ bɔ a la ka u bɛɛ kɛnɛya.” (Luka 6:19) Tiɲɛ na, Yesu ma na walisa “mɔgɔw ka baara kɛ a ye, nka a nana baara kɛ mɔgɔw ye, ka a yɛrɛ ni di ka kɛ mɔgɔ caman kunmabɔsara ye.” (Matiyu 20:28)a Yali i bɛ hadamaden kuntigi dɔn min bɛ sɔn ka o yɛrɛ-saraka ɲɔgɔn kɛ wa?

A ye Ala ka tilennenya ladege. Yesu tun bɛ Ala ka cikanw bɛɛ kelen-kelen mara, wa a tun bɛ baara kɛ ni Ala ka sariyakolow ye a kɛwalew bɛɛ la. A y’a kɛ i n’a fɔ a sɛbɛnnen bɛ Zaburuw kɔnɔ cogo min na, ko: “Ne ka Ala, ne b’a fɛ ka i sago kɛ. I ka sariya bɛ ne dusukun na.” (Zaburu 40:9) Yesu ye mɔgɔw bɛɛ minɛ koɲuman, ka bonya da u kan, a ma mɔgɔ bɔ mɔgɔ la, faantanw fara faamaw kan, cɛw ni musow, denminsɛnw ni mɔgɔkɔrɔbaw. A ye Ala ladege o cogo la. Don dɔ, Yesu ka kalandenw ye bangebaga dɔw kɔrɔfɔ k’u kana na ni u denw ye ka Yesu tɔɔrɔ. Nka Yesu y’a fɔ u ye ko: “A’ y’a to denmisɛnw ka na ne ma, aw kana u bali, katuguni Ala ka masaya ye olu bɔɲɔgɔnkow de ta ye.”—Marka 10:14.

A ye hakilitigiya sɔrɔ Ala fɛ. Yesu tun bɛ mɔgɔw faamu kosɛbɛ. “A yɛrɛ bɛ mɔgɔ kɔnɔna kow bɛɛ dɔn” (Yuhana 2:25) Tuma min na mɔgɔw cira a juguw fɛ ka ta’a minɛ, o mɔgɔw sɔnna a ma ko “mɔgɔ si ma [deli ka] kuma i ko nin cɛ.” Yesu tun bɛ o hakilitigiya sɔrɔ min? A y’o ɲɛfɔ, ko: “Ne bɛ mɔgɔ kalan min na, o tɛ ne ta ye, ne cibaa ta don.”—Yuhana 7:16, 46.

A ye Ala ka kanuya ladege. Yesu ka makari fana tun ka bon. Cɛ dɔ tun bɛ yen, “kuna tun b’a fari yɔrɔ bɛɛ la,” o y’a deli ko: “Matigi, ni i bɛ sɔn, i bɛ se ka ne saniya.” A hinɛ donna Yesu la. “Yesu y’a bolo mɔɔnɔbɔ ka maga a la, a ko: ‘Ne sɔnna, i ka saniya.’ O yɔrɔnin bɛɛ, a ka kuna kɛnɛyara.” (Luka 5:12, 13; Marka 1:41, 42) Tiɲɛ yɛrɛ la, Yesu ye o banabagatɔ dɛmɛ ni a dusukun bɛɛ ye.

Yali Yesu bɛ a jan to i fana la wa? A yɛrɛ bɛ o jaabi, ko: “A’ ye na ne ma, aw minnu bɛɛ sɛgɛnnen bɛ, ni aw doninen bɛ, ne na lafiya di aw ma. A’ ye ne ka tɔnna jiri da aw kan na, ka ne cogo ta, k’a masɔrɔ ne sabalilen bɛ, ne dusu majiginnen bɛ, aw dusuw na lafiya sɔrɔ.”—Matiyu 11:28, 29.

Yesu ye kuntigi ye min ɲɔgɔn tɛ yen. O de la a b’an laadi ko an ka ale “cogo ta.” Yali i bɛna sɔn o welekan ɲumanba la wa? N’o kɛra, o bɛna hɛrɛ lase i ma.