TILAYƆRƆ 6

Ala sagonata ye mun ye ka ɲɛsin dugukolo ma?

ALA ye dugukolo da walisa a ka kɛ hadamadenw sigiyɔrɔ dafalen ye. A ka Kuma b’a fɔ ko: “Sankolow ye Matigi ta ye, nka a ye dugukolo di Hadamadenw ma.”—Zaburu 115:16.

Sani Ala ka cɛ fɔlɔ Hadama da, a ye dugukolo yɔrɔ dɔ labɛn k’a kɛ nakɔ cɛɲumanba ye. O yɔrɔ tun bɛ wele ko Edɛn. Kitabu b’a fɔ ko Ufrate ni Tigire bajiw tun bɛ ju minɛ Edɛn kɔnɔ.a Jateminɛw b’a jira bi ko Edɛn nakɔ tun bɛ Tiriki jamana kɔrɔn yanfan fɛ. O b’a jira tiɲɛ yɛrɛ la ko Edɛn nakɔ tun bɛ dugukolo kan.

Ala ye Hadama da tuma min na, a y’a bila Edɛn nakɔtu la ko “a ka a sɛnɛ ka a kɔlɔsi.” (Jenɛse 2:15) O kɔ fɛ, Ala ye muso da Hadama ye, ko Hawa. Ala ye nin ci fɔ u ye, ko: “Aw ka bange ka caya ka dugukolo fa ka a kolo.” (Jenɛse 1:28) A jɛlen don ko Ala “ma [dugukolo] da ka a lankolon bila, nka a ye a da walisa mɔgɔw ka sigi a kan.”—Esayi 45:18.

O n’a ta bɛɛ, Hadama ni Hawa y’a dabɔ a kama ka Ala ka sariya kɛlɛ. O de la Ala ye u gɛn ka bɔ Edɛn nakɔ kɔnɔ. U bɔnɛna alijinɛ na. Nka Hadama ka jurumu nana ni bɔnɛ wɛrɛ ye. Kitabu b’a fɔ an ye ko: “Jurumu donna diɲɛ la mɔgɔ kelen barika la, saya fana donna jurumu barika la. Saya sera Hadamadenw bɛɛ ma ten, k’a masɔrɔ u bɛɛ ye jurumu kɛ.”—Romɛkaw 5:12.

Jehova sagonata fɔlɔ min ye ka dugukolo kɛ alijinɛ ye hadamadenw ye, yali a ye o bila wa? Abada! A ko: “ne ka kuma min bɛ bɔ ne da la, . . . o tɛna kɔsegin ne ma sani a ka ne sago kɛ k’a dafa, ka ne ka ci fɔlenw kɛ.” (Esayi 55:11) O b’a jira ko dugukolo bɛna segin ka kɛ alijinɛ ye.

Alijinɛ-kɔnɔ ɲɛnamaya bɛna kɛ cogo di? Kitabu bɛ ladiyu minnu fɔ o ko la, i ka u lajɛ kalansen nata la.

a A fɔlen bɛ Kitabu kɔnɔ ko “baji dɔ bɔra Edɛn na ka nakɔtu sɔn. A farala ka kɛ ba bolo naani ye o yɔrɔ la. Ba fɔlɔ tɔgɔ ko Pisɔn. . . . Ba filanan tɔgɔ ko Gihɔn. . . . Ba sabanan tɔgɔ ko Tigire. O bɛ woyo ka taa Asiri jamana kɔrɔn yanfan fɛ. Ba naaninan ye Ufrate de ye.” (Jenɛse 2:10-14) Pisɔn ni Gihɔn bajiw yɔrɔ kɔni ma dɔn hali bi.

Dugukolo bɛna kɛ alijinɛ ye

Mɔgɔ salenw bɛna lakunun: “Mɔgɔ salen minnu bɛ kaburuw kɔnɔ, olu n’a kan mɛn. U na bɔ yen.”—Yuhana 5:28, 29.

Kɔrɔ, bana ani saya tɛna kɛ tun: “O dugu mɔgɔw si tɛna a fɔ ko ale man kɛnɛ.” (Esayi 33:24, BS) Ala “na ɲɛji bɛɛ cɛ ka bɔ u ɲɛ la. Saya tɛna kɛ tun, su kasi fana tɛna kɛ tun, wala kasikan wala dimin, k’a masɔrɔ fɛn fɔlɔw tɛmɛnna.”—Jirali 21:4.

Dumuni na caya: Ala “na fɛn ɲuman di, an ka dugukolo sɛnɛ na ɲɛ.”—Zaburu 85:13, BS.

So ɲuman ni baara ɲuman: Ala ko: “Ne ka mɔgɔw na sow jɔ ka sigi olu kɔnɔ . . . Ne ka mɔgɔw na nisɔndiya u baara nɔw la.”—Esayi 65:21, 22.

Kɛlɛ ni kojugu ni farinyakow bɛ ban: Jehova “bɛ kɛlɛ ban fo ka taa se dugukolo dan na.” (Zaburu 46:10) “Mɔgɔ juguw na ban ka bɔ jamana kɔnɔ.”—Ntalenw 2:22.