Mun na Ala ɲɔgɔn tɛ yen?

KITABU bɛ ko ɲumanba caman fɔ Ala ko la, minnu b’an dɛmɛ k’a dɔn. O ko ɲumanw la kunbaba naani ye ninnu ye: A ka setigiya, a ka tilennenya, a ka hakilitigiya ani a ka kanuya. An ka u kelen-kelen lajɛ.

Dan tɛ a ka fanga la

Jehova tun y’a fɔ Ibrahima ye ko: “Ne ye Ala Sebaayabɛɛtigi ye.” (Jenɛse 17:1) Jehova ka barika ɲɔgɔn tɛ yen, dan t’a la, a tɛ ban fana. A ye diɲɛ da ni o barika de ye.

Ala bɛ baara kɛ ni a ka fanga ye cogo ɲuman na ka ko bɛnnen kɛ tuma bɛɛ. A y’a latigɛ ka min kɛ, a bɛ o dɔrɔn de kɛ. A bɛ a ka fanga boli cogo la min tɛ nɔ bila a ka tilennenya ni a ka hakilitigiya ni a ka kanuya la.

Jehova labɛnnen don k’a ka baarakɛla kantigiw dɛmɛ ni a ka barika ye. A b’a “ɲɛ yaala ka dugukolo yɔrɔw bɛɛ filɛ minnu bɛɛ bɛ a ɲini ni u dusukun bɛɛ ye, walisa a ka olu dɛmɛ.” (2 Tilew Kibaru 16:9) Ala ka fanga ka bon, wa a b’a ɲini ka i dɛmɛ fana. Yali o dɔnni tɛ i bila k’a ɲini ka gɛrɛ a la wa?

Tilennenya Ala don

“Jehova bɛ tilennenya kanu” (Zaburu 37:28, MN) A bɛ ko o ko kɛ, o bɛnnen don, wa o tilennen don tuma bɛɛ ka kɛɲɛ ni a yɛrɛ ka sariya dafalenw ye.

Ala bɛ tilenbaliya haramu. “A tɛ mɔgɔ bɔ mɔgɔ la, a tɛ surɔ fɛn minɛ.” (Dutɛrɔnɔmɛ 10:17) Mɔgɔ minnu bɛ fanga digi mɔgɔ wɛrɛ la, a bɛ olu kɛlɛ. Ala bɛ dɛsɛbaatɔw dɛmɛ, “muso cɛ salen” ni “falatɔ” b’o la. (Ekisode 22:22) A tɛ mɔgɔ kiri tigɛ a yeko dɔrɔn ma “nka siya o siya la, mɔgɔ min bɛ siran a ɲɛ ka ko tilennen kɛ, o de ko ka di a ye.”—Kɛwalew 10:34, 35.

Jehova ka tilennenya dafalen don, wa a ka kirikow bɛnnen don tuma bɛɛ. A tɛ mɔgɔ kolobali to, nka a b’i kolo tuma min na, a t’a kɛ ni juguya ye. Kojugukɛla minnu t’a fɛ ka yɛlɛma, a bɛ olu kɛlɛ. Jehova ye “makaritigi hinɛma ye. A tɛ dimin joona, a ka ɲumaya ka bon. A tɛna jalakili kɛ tuma bɛɛ, a diminnen tɛna to kudayi. A ma an tɔɔrɔ ka kɛɲɛ ni an ka jurumuw ye, a ma an kolo ka kɛɲɛ ni an ka tilenbaliya kow ye.” (Zaburu 103:8-10) Ala b’a hakili to a ka baarakɛla kantigiw ka tilennenyakow la, k’u sara o bɛɛ la. O tilennenya sugu min bɛ Ala la, yali o man kan k’i bila k’i ka dannaya tɔ bɛɛ da a kan wa?

Hakilitigiya Ala don

Jehova de ye hakilitigiya bɛɛ ju ye. “Ala ka nafolotigiya ni a ka hakilitigiya ni a ka dɔnniya ka dun kosɛbɛ haali!” (Romɛkaw 11:33) A ka hakilitigiya ɲɔgɔn tɛ yen, dan tɛ o la.

Ala ka hakilitigiya bɛ ye kosɛbɛ a ka fɛn dalenw la, fo Zaburu sɛbɛnbaga ɲagalila k’a fɔ ko: “Matigi, i ka kɛwalew ka ca kosɛbɛ, i ye u bɛɛ kɛ ni hakilitigiya ye. Dugukolo fara i ka fɛntigiya la.” —Zaburu 104:24.

Ala ka hakilitigiya bɛ sɔrɔ Kitabu kɔnɔ fana. Masakɛ Dawuda y’a sɛbɛn ko: “Matigi ka kalanw ye tiɲɛ de ye, u bɛ hakilitigiya di mɔgɔ ko dɔnbali ma.” (Zaburu 19:8) E k’i miiri bani! E bɛ se ka nafa sɔrɔ Ala ka hakilitigiyaba la! Yali i tɛn’a ɲini ka o nafa sɔrɔ wa?

“Ala ye kanuya de ye”

Koba fɔlɔ min bɛ Jehova la, o ye kanuya de ye. Kitabu b’a fɔ ko “Ala ye kanuya de ye.” (1 Yuhana 4:8) A mana ko o ko latigɛ walima k’a kɛ, a b’o kɛ ni kanuya ye.

Ala b’a ka kanuya jira an na cogo caman na. A bɛ fɛn ɲumanw di an ma. Kitabu ko: “A y’a yɛrɛ cogo jira a ka ko ɲumanw fɛ. A bɛ sanji di aw ma ka bɔ sankolo la, ka suman di a waati la, ka dumunifɛn caman di aw ma ka aw dusuw fa ɲagali la.” (Kɛwalew 14:17) Tiɲɛ na, “fɛn ɲuman minnu bɛ di an ma ani nilifɛn dafalenw, olu bɛɛ bɛ na ka bɔ san fɛ. U bɛ jigin ka bɔ kɛnɛ bɔlanw Fa Ala la.” (Yakuba 1:17) Ala ka Kuma ye nilifɛn ɲumanba ye, k’a masɔrɔ a bɛ tiɲɛ fɔ an ye Ala yɛrɛ ko la, ka an kalan a ka sariyaw ni a ka sariyakolo ɲumanbaw la. Yesu y’a fɔ Ala ye delili kɔnɔ, ko: “I ka kuma ye tiɲɛ ye.”—Yuhana 17:17.

Ala b’an dɛmɛ an ka kunkow la fana. “I ka i hamina kow bɛɛ da Matigi kan, ale na i mara. A tɛna sɔn mɔgɔ tilennen ka lamaga abada.” (Zaburu 55:23) A bɛ an ka jurumuw yafa. Zaburuw b’a fɔ Jehova ye ko: “E ka ɲi, i bɛ sɔn ka yafali kɛ. I ka makari ka bon i tɔgɔ welebaaw bɛɛ la.” (Zaburu 86:5) Ka fara o kan, a bɛ ɲɛnamaya banbali sɔrɔcogo jira an na. ‘A na ɲɛji bɛɛ cɛ ka bɔ mɔgɔw ɲɛ la. Saya tɛna kɛ tun, sukasi fana tɛna kɛ tun, wala kasikan, wala dimin, k’a masɔrɔ fɛn fɔlɔw tɛmɛnna.’ (Jirali 21:4) Ala bɛ a ka kanuya jira i la cogo min na, yali i fana tɛna a kanu wa?

I magɛrɛ Ala la

Ala b’a fɛ i ka a dɔn ka ɲɛ. A ka Kuma b’a fɔ ko: “A’ ye gɛrɛ Ala la, ale fana na gɛrɛ aw la.” (Yakuba 4:8) Kira Ibrahima tun ye Ala batobaga kantigi ye, o la Ala y’a wele ko a “terikɛ.” (Esayi 41:8) Jehova b’a fɛ e fana ka kɛ a teri ye.

Ni i ka Ala-dɔnniya bɛ bonya ka ta’a fɛ, o bɛ i gɛrɛ a la ka ta’a fɛ, wa dɔ bɛ fara i ka hɛrɛ kan fana. “Matigi ka sariya ko ka di” mɔgɔ min ye haali, fo “a bɛ miiri o sariya la su fara tile kan, o ye dubaden ye.” (Zaburu 1:1, 2) O la sa, i kana Ala ka Kuma kalan dabila. Koba minnu bɛ Ala la, i ka to k’i hakili jakabɔ olu kan, ani a ka fɛn dalenw fana. I bɛ ka min kalan, o sira taama. O b’a jira ko i bɛ Ala kanu. “Ka Ala kanu, o ye nin de ye, ka a ka ci fɔlenw mara. A ka ci fɔlenw man gɛlɛn.” (1 Yuhana 5:3) I bɛ se ka Zaburuw sɛbɛnbaga ka nin kuma kɛ i ka delili ye, ko: “I ka siraw jira ne la, o Jehova. Ne kalan i ka sira misɛnw la. I ka ne ɲɛminɛ i ka tiɲɛ la ka ne kalan.” (Zaburu 25:4, 5, BS) I bɛn’a ye ko Ala “yɔrɔ man jan an si la.”—Kɛwalew 17:27.