Ala ye layidu minnu ta kiraw sababu fɛ

KIRAW ye u ka limaniya jira Ala la. U dara a ka layiduw talenw na, wa u ye u ka ɲɛnamaya bɛɛ kɛ ka kɛɲɛ ni o layiduw ye. An ka o layiduw dɔw lajɛ.

Tuma min na Hadama ni Hawa ye Ala kan bila Edɛn nakɔ kɔnɔ, o yɔrɔnin bɛɛ, Ala ye layidu ta ko a bɛna mɔgɔ dɔ sugandi ka “sa” kunkolo ɲɔɲɔ k’a halaki ka bɔ yen pewu. O “sa” ye “dragon kunbaba” de ye, “sa kɔrɔ, min tɔgɔ ko sendonbaa ni Sitanɛ.” (Jenɛse 3:14, 15; Jirali 12:9, 12) O Mɔgɔ Sugandilen tun bɛna kɛ jɔni ye?

San 2000 ɲɔgɔn o kirayakuma kɔ fɛ, Jehova ye layidu ta kira Ibrahima ye ko o Mɔgɔ Nata bɛna kɛ a bɔnsɔn dɔ ye. Ala y’a fɔ Ibrahima ye ko: “Dugukolo kan siyaw bɛɛ na duba sɔrɔ i bɔnsɔn de la, k’a masɔrɔ i ye ne kan minɛ.”—Jenɛse 22:18.

San 1473 ka kɔn an tile ɲɛ, Ala ye kunnafoni wɛrɛ di nabila Musa ma o “bɔnsɔn” ko la. Musa y’a fɔ Israɛl bɔnsɔn ye ko: “Matigi i ka Ala na ne bɔɲɔgɔnko kira lawuli i ye ka bɔ i balimaw cɛma. Aw ka o lamɛn.” (Dutɛrɔnɔmɛ 18:15) Ola, iko Musa cogo, o kira nata tun bɛna bɔ Ibrahima bɔnsɔn de la.

Ka fara o kan, o kira tun bɛna kɛ Masakɛ Dawuda bɔnna dɔ ye, wa a yɛrɛ na kɛ Masakɛba ye. Ala ye layidu ta Masakɛ Dawuda ye ko: “Ne na i yɛrɛ denkɛ dɔ ɲɛnatɔmɔ ka o sigi i nɔ na ka kɛ masakɛ ye. Ne na a ka masaya sabati.” (2 Samuɛl 7:12, 13) Ala y’a jira fana ko Dawuda bɔnna in tun bɛna wele ko “Hɛrɛ Kuntigi,” k’a fɔ fana ko: “A ka kuntigiya na jiidi, a ka hɛrɛ tɛna ban Dawuda ka masasigilan kan ani a ka masaya la. Ala na a sabati ka a banba ni tiɲɛ ni tilennenya ye kabini sisan fo badaa.” (Esayi 9:5, 6) Tiɲɛ na, o Kuntigi tilennen na hɛrɛ ni tilennenya sigi diɲɛ yɔrɔw bɛɛ la. Nka a tun bɛ na tuma jumɛn?

Mɛlɛkɛ Gabriɛl nana a fɔ kira Daniɛl ye ko: “I k’a dɔn k’a jɛya ko kabini Jerusalɛm dugu sigili ni a jɔli ko fɔra fo ka taa se Kuntigi Munnen [walima Masiya] ka waati ma, o na kɛ dɔgɔkun wolonwula ni dɔgɔkun biwɔɔrɔ ni fila ye.” (Daniɛl 9:25) O dɔgɔkun biwɔɔrɔ ni kɔnɔntɔn tile o tile bɛ jate san ye, wa o bɛɛ bɛ bɛn san 483 hakɛ ma. O waati bɛ daminɛ san 455 la ka kɔn an tile ɲɛ, ka n’a bila san 29 na an tile la.a

O Kuntigi Munnen walima Masiya, o min ye Musa ɲɔgɔnna kira ye, mɔgɔw ye “bɔnsɔn” min makɔnɔ kabini tuma jan, yali o nana tigitigi san 29, an tile la wa? An k’o lajɛ.