Ala sagonata ye mun ye ka ɲɛsin dugukolo ma?

1. Mun na Ala ye dugukolo da?

Jehova ye dugukolo da cɛw ani musow de kama. An ka so don. O la cɛ fɔlɔ ni muso fɔlɔ, Hadama ni Awa tun ma da ka denw sɔrɔ ka sankolo fa—Ala tun ye mɛlɛkɛw da kaban walasa u ka ɲɛnamaya kɛ sankolo la. (Job 38:4, 7) Nka Ala tun ye cɛ fɔlɔ ta k’a bila Alijɛnɛ dumanba kɔnɔ min tun tɔgɔ ye ko Edɛn nakɔtu. (Jenɛse 2:15-17) Jehova tun ye jigiya di Hadama ni a bɔnsɔn nataw ma u ka ɲɛnamaya banbali diyabɔ dugukolo kan.—Zaburuw 37:29; 115:16 kalan.

A daminɛ na, Edɛn nakɔtu dɔrɔn de tun ye Alijɛnɛ ye. Cɛ fɔlɔ ni muso fɔlɔ tun ka kan ka dugukolo fa ni u bɔnsɔnw ye. Ka fara o kan, u tun ka kan ka dugukolo bɛɛ kolo ani k’a kɛ Alijɛnɛ ye. (Jenɛse 1:28) Dugukolo tun tɛ halaki fewu. Ale de ye hadamadenw sigiyɔrɔ ye fɔ abada.—Zaburu 104:5 kalan.

Wideyo lajɛ min tɔgɔ ye ko Mun na Ala ye dugukolo da?

2. Mun na sisan dugukolo tɛ Alijɛnɛ ye?

Hadama ni Awa ye Ala kan bila, o kama Ala ye u gɛn ka bɔ Alijɛnɛ kɔnɔ. Alijɛnɛ tununa, wa mɔgɔ si ma se ka a sigi kokura. Bibulu b’a fɔ ko: “Dugukolo donna mɔgɔ jugu bolo”.—Job 9:24.—Jenɛse 3:23, 24 kalan..

Yali Jehova sagonata tun ye min ye ka ɲɛsin hadamadenw ma, a ye o bila wa? Ayi. Ale ye sebaayabɛɛtigi ye. A tɛ dɛsɛ o la. (Esayi 45:18) A bɛna hadamadenw segin kokura u cogo kɔrɔ la.—Zaburu 37:11, 34 kalan.

3. Alijɛnɛ bɛna sigi kokura cogo di?

Alijɛnɛ bɛna sigi kokura dugukolo kan, Yesu ka mara kɔnɔna na, o min kɔnɔ Ala bɛna Yesu sigi i n’a fɔ Masakɛ. Harmagedɔn kɛlɛ la, Yesu bɛna Ala ka mɛlɛkɛw ɲɛminɛ ani u bɛna mɔgɔ bɛɛ halaki minnu bɛ Ala kan sɔsɔ. Yesu bɛ sɔrɔ ka Sitanɛ siri san 1 000 kɔnɔ. Ala ka mɔgɔw bɛna kisi o halakili la ka d’a kan Yesu bɛna u ɲɛminɛ ani ka u lakana. U bɛna ɲɛnamaya diyabɔ badaa Alijɛnɛ kɔnɔ dugukolo kan.—Jirali 20:1-3; 21:3, 4 kalan.

4. Tɔɔrɔ bɛna ban tuma jumɛn?

Tuma jumɛn Ala bɛna kojugu bɔ dugukolo kan? Yesu ye “tamashyɛn” di min bɛ a jira ko laban waati surunyara. Bi diɲɛ kɛcogo kɛlen bɛ ka hadamaden ka sigi gɛlɛya, ani o kɛcogo bɛ a jira an na fana ko an bɛ “Diɲɛ laban” na.—Matiyu 24:3, 7-14, 21, 22 kalan.

Yesu ka san 1 000 kɔnɔ, a bɛna a to sankolola ka dugukolo mara ani a bɛna tɔɔrɔ bɛɛ ban. (Esayi 9:5, 6; 11:⁠9) Ka fara Masakɛya baara kan, Yesu bɛna kɛ i n’a fɔ sarakalasebaaw kuntigi, walasa mɔgɔ minnu bɛ Ala kanu, ka olu ka jurumuw bɔ yen. Yesu sababu la, Ala bɛna bana, kɔrɔya ani saya bɔ yen.—Esayi 25:8; 33:24 kalan.

5. Jɔni bɛna ɲɛnamaya kɛ Alijɛnɛ nata kɔnɔ?

Mɔgɔ minnu bɛ Ala kan minɛ, olu bɛna ɲɛnamaya kɛ Alijɛnɛ kɔnɔ. (1 Yuhana 2:17) Yesu ye a ka kalandenw ci u ka taa mɔgɔ majigilenw ɲini ani k’u kalan kɛcogo la min bɛ u kodiya Ala ye. Bi bi in na, Jehova bɛ ka mɔgɔ miliyɔn caman de labɛn ɲɛnamaya nata kama Alijɛnɛ kɔnɔ dugukolo kan. (Sofoni 2:3) Jehova Seerew ka Masayaso kɔnɔnaw na, mɔgɔw bɛ ka kalan ka kɛ furu cɛw ani fa ɲumanw ye ani furumusow ani ba ɲumanw ye. Denmisɛnninw ni u bangebagaw bɛ jɛ ka bato kɛ ɲɔgɔn fɛ, ani u b’a ɲini k’a dɔn u bɛ nafa bɔ kibaru duman na cogo min na.—Mise 4:1-4 kalan.