Masalakun 3

Ala lakika ye jɔni ye?

1. Mun na mɔgɔ caman sɔnna Bibulu ka kuma fɔlɔw la?

N’I BƐ sankolo lajɛ su jɛlen dɔ fɛ, yali i tɛ kabakoya ka dolo camanbaw ye wa? E b’u nacogo ɲɛfɔ cogo jumɛn na? Ayiwa, dugukolo kan fɛn ɲɛnamaw dun: feerew ni u ɲɛ caman, kɔnɔw n’u ka dɔnkili dumanw, balɛniba minnu bɛ pan kɔgɔjiba la? Dan tɛ u jateli la. O fɛn ninnu si tun tɛ se ka kɛ tenni nɔ. Balannako tɛ ni mɔgɔ caman bɛ sɔn Bibulu ka kuma fɔlɔw la ko: “Fɔlɔ fɔlɔ Ala ye sankolow ni dugukolo da”!—Jenɛse 1:1.

2. Bibulu bɛ mun fɔ Ala ko la, ani a b’an dusu lamin ka mun kɛ?

² Hadamadenw fara-faralen don kosɛbɛ Ala ko la. Mɔgɔ dɔw b’a miiri ko Ala ye fanga de ye, ko mɔgɔ tɛ. Mɔgɔ miliyɔn caman b’u bɛnba salenw bato. U miiri la Ala yɔrɔ ka jan kosɛbɛ walisa ka se ka gɛrɛ a la. Nka, Bibulu b’a jira ko Ala lakika ye mɔgɔ ye tigitigi, mɔgɔ min b’a mago don an kelen-kelen bɛɛ la ni dusu ɲumanya ye. O kosɔn a b’an dusu lamin ka “Matigi ɲini” a kɛtɔ k’a fɔ ko: “K’a sɔrɔ a yɔrɔ man jan an si la.”—Kɛwalew 17:27.

3. Mun na ka Ala ja dilan, o ye ko kɛbali ye?

³ Ala bɔlen bɛ mun fɛ? A ka maganna dɔw y’a sigiyɔrɔ nɔɔrɔman ye yeli dɔw la. Olu la, a bisigilama tun sigilen bɛ masa sigilan kan, nɔɔrɔ kabakoma mɛnɛ-mɛnɛtɔ bɛ woyo ka bɔ ale yɔrɔ. Nka, mɔgɔ minnu ye o yeli suguw mafilɛ, u ma deli ka ɲɛda dɔ faranfasi (Daniɛl 7:9, 10; Jirali 4:2, 3). A bɛ ten, bawo “Ala ye hakili ye;” farisogo t’a la (Zan 4:24, Layidu Kura ). Tiɲɛ na, mɔgɔ tɛ se cogo si la k’an Dabaga farisogolama ja lakika dilan, bawo “mɔgɔ si ma Ala ye abada”. (Yuhana 1:18; Ekisode 33:20.) O bɛɛ n’a ta, Bibulu b’an kalan fɛn caman na Ala ko la.

TƆGƆ BƐ ALA LAKIKA LA

4. Mankutu kɔrɔmaba jumɛnw dira Ala ma Bibulu kɔnɔ?

⁴ Bibulu kɔnɔ, Ala lakika faranfasiyara ni fɔcogow ye iko “Ala Sebaaya Bɛɛ Tigi”, “Kɔrɔtalenba”, “Dabagaba”, “Karamɔgɔba”, “Matigiw la Masaba”, ani “Abada Masakɛ”. (Jenɛse 17:1; Zaburu 50:14; Ekilesiaste (Waajulikɛla) 12:3, NW; Esayi 30:20, NW; Kɛwalew 4:24, NW; 1 Timote 1:17, NW.) N’an b’an hakilijakabɔ nin mankutu suguw kan, o bɛ se k’an dɛmɛ k’an ka Ala dɔnniya jiidi.

5. Ala tɔgɔ ye mun ye, ani siɲɛ joli a bɛ ye Heburukan Sɛbɛnniw kɔnɔ?

⁵ Nka, tɔgɔ kelenpe de bɛ Ala la. O bɛ ye siɲɛ 7 000 ɲɔgɔn Heburukan Sɛbɛnniw dɔrɔn kɔnɔ, tuma caman na ka tɛmɛ a ka mankutuw bɛɛ kan. A bɛ san 1 900 ɲɔgɔnna bɔ dannako kunntanw kosɔn, Yahutuw tun ye Ala tɔgɔ fɔli dabila. Bibulu sɛbɛnna Heburukan min na, o tun tɛ sɛbɛn ni dafalenw ye. O kosɔn, cogo si tɛ yen k’a faranfasiya cogo min na Musa, Dawuda ani fɔlɔ mɔgɔ tɔw tun bɛ dafata naani ninnu (י ה ו ה) fɔ, o minnu kɛra ka Ala tɔgɔ dilan. Bibulu dɔnbaga dɔw b’a fɔ ko Ala tɔgɔ tun bɛ fɔ “Yahweh”, nka u tɛ se ka da o la ten tigitigi. A tubakukan fɔcogo “Jéhovah” bɛ fɔ a san kɛmɛ caman filɛ nin ye, ani bi bi in na, sɔn kɛra o fɔcogo ma kan caman na.—Ekisode 6:3 ani Esayi 26:4 lajɛ.

MUN NA I KA KAN KA ALA TƆGƆ FƆ?

6. Zaburu 83:19 nan bɛ mun fɔ Jehowa ko la, ani mun na an ka kan k’a tɔgɔ fɔ?

⁶ Ala tɔgɔ kelenpe min ye Jehowa ye, o b’a faranfasi ka bɔ ala tɔw bɛɛ la. O de kosɔn, a tɔgɔ in bɛ ye Bibulu kɔnɔ siɲɛ caman na, kɛrɛnkɛrɛnnenya la Heburu masalabolo kɔnɔ. Bayɛlɛmabaga caman ye Ala tɔgɔ bɔ yen, nka Zaburu 83:19 nan b’a fɔ k’a jɛya ko: “E min tɔgɔ ko Jehowa ko e kelenpe ye kɔrɔtalenba ye dugukolo bɛɛ kunna.” O la sa, a bɛnnen bɛ an ka Ala halala tɔgɔ fɔ tuma min na an bɛ kuma ale ko la.

7. Jehowa tɔgɔ kɔrɔ b’an kalan mun na Ala ko la?

⁷ Jehowa tɔgɔ ye Heburukan wale dɔ ye n’a kɔrɔ ye “ka kɛ a ye”. O la sa, Ala tɔgɔ kɔrɔ ye “A b’a Kɛ a Ye”. O cogo la, Jehowa Ala b’a yɛrɛ jira iko Kuntilennaba Tigi. Tuma bɛɛ la, a bɛ kɛ sababu ye k’a kuntilenna bɛɛ timɛ. Dalilu bɛ Ala lakika kelen de bolo k’o tɔgɔ ta bawo hadamadenw tɛ se abada ka d’a la k’u ka ko labɛnnenw bɛna sira sɔrɔ (Yakuba 4:13, 14). Jehowa kelenpe bɛ se k’a fɔ ko: “Ne ka kuma min bɛ bɔ ne da la, o na kɛ ten . . . Ne y’a ci ko min na, a na o kɛ k’a dafa.”—Esayi 55:11.

8. Jehowa y’a kuntilenna jumɛn jira Musa sababu fɛ?

⁸ Heburu cɛmɔgɔbaw Ibrahima, Isaka ani Yakuba, u kelen-kelen bɛɛ ye “Jehowa tɔgɔ wele”, nka u ma Ala tɔgɔ kɔrɔ bɛɛ dɔn (Jenɛse 21:33; 26:25, NW; 32:9; Ekisode 6:3). Kɔfɛ, tuma min na Jehowa y’a kuntilenna jira k’u bɔnsɔnw, Israɛldenw kunmabɔ jɔnya la Misira kɔnɔ, ani ka “jamana” di u ma, jamana min “falen bɛ nɔnɔ ni di la fo ka woyo”, o kuntilenna tun bɔlen bɛ fɛn kɛbali fɛ (Ekisode 3:17). O bɛɛ n’a ta, Ala y’a tɔgɔ kɔrɔ banbali jira, a kɛtɔ k’a fɔ kira Musa ye ko: “I k’a fɔ Israɛl bɔnsɔn ye tan, ko: ‘Jehowa u bɛnbaw ka Ala, Ibrahima ka Ala, Isaka ka Ala, Yakuba ka Ala, o ye i ci u ma’. O ye ne tɔgɔ ye fo abada, u bɔnsɔn mɔwolow bɛna u hakili to ne la ten.”—Ekisode 3:15, NW.

9. Faraɔn tun bɛ Jehowa mafilɛ cogo di?

⁹ Musa y’a ɲini Faraɔn fɛ, Misira masakɛ, a ka Israɛldenw bila u ka taa Jehowa bato kungokolo kɔnɔ. Nka, Faraɔn min yɛrɛ tun bɛ filɛ iko ala, n’a tun bɛ Misira ala tɔw bato, a y’a jaabi ko: “Jehowa ye jɔni ye, fo ne ka a kan minɛ ka Israɛl bila ka taa? Ne tɛ Jehowa dɔn, ne tɛna Israɛl bila ka taa fewu.”—Ekisode 5:1, 2.

10. Misira kɔrɔ kɔnɔ, Jehowa ye wale jumɛn kɛ walisa k’a kuntilenna timɛ ka ɲɛsin Israɛldenw ma?

¹⁰ Jehowa ye ɲɛtaawale dɔ dabɔ walisa k’a kuntilenna timɛ, a walekɛtɔ ka bɛn n’a tɔgɔ kɔrɔ ye. A ye tɔɔrɔ ko tan bin Misira mɔgɔ fɔlɔw kan. A tɔɔrɔ laban ye Misira den fɔlɔw bɛɛ faga, Faraɔn yadalen denkɛ tun b’olu la. O tuma na sa, Misirakaw kɔrɔtɔra Israɛl ka taa. Nka, Misiraka dɔw kabakoyara kosɛbɛ Jehowa ka setigiya ko la, fo u y’u fara Israɛldenw kan ka bɔ Misira kɔnɔ.—Ekisode 12:35-38.

11. Jehowa ye kabako jumɛn kɛ Kɔgɔji Bilen na, ani a juguw diyagoyara ka mun dɔn?

¹¹ Faraɔn katigɛlen n’a ka kɛlɛbolo ni kɛlɛ wotoro kɛmɛ caman bɔra ka taa u ka jɔnw minɛ ko kura. Ikomi Misirakaw tun bɛ ka surunya, Ala ye Kɔgɔji Bilen cɛ tila walisa Israɛldenw ka se k’a tigɛ geren kan. Tuma min na u gɛnbagaw donna kɔgɔji boli dingɛ kɔnɔ, Jehowa “ye u ka wotorow senw bɔ, u taama gɛlɛyara”. Misira kɛlɛdenw kulela: “An ka boli Israɛl ɲɛ, katuguni Jehowa bɛ u dɛmɛ ka Misirakaw kɛlɛ.” Nka, o tun taara ka dan kɛ. Ji kogobaw binna ani ‘ji segira wotorow ni sotigiw ni Faraɔn ka kɛlɛbolo’ kan. (Ekisode 14:22-25, 28). O cogo de la, Jehowa yɛrɛ y’a tɔgɔ bonya. Fo ka na se bi ma, ɲinɛ ma kɛ o ko kɔ.—Josue 2:9-11.

12, 13. a) Ala tɔgɔ bɛ ni kɔrɔ jumɛn ye an bolo bi? b) Mɔgɔ bɛɛ wajibiyalen bɛ ka mun dɔn teliya la ani mun kosɔn?

¹² Ala yɛrɛ y’a tɔgɔ bonya cogo min na, o kɔrɔ ka bon an bolo bi. A tɔgɔ, Jehowa, b’a sɛmɛntiya k’a ye fɛn minnu bɛɛ ŋaniya, a yɛrɛ bɛna u timɛ. A kuntilenna fɔlɔ timɛli n’o ye k’an ka dugukolo kɛ alijinɛ ye, o sen bɛ olu la (Jenɛse 1:28; 2:8). O kosɔn, mɔgɔ minnu b’a ka masabaya kɛlɛ bi bi in na, Ala bɛna olu bɛɛ bɔ yen, bawo a y’a fɔ ko: “U n’a dɔn ko ne ye Jehowa de ye.” (Ezekiɛl 38:23). Ala bɛna a ka layidu timɛ k’a batobagaw kisi, k’u ladon diɲɛ kura tilennen kɔnɔ.—2 Piɛrɛ 3:13.

¹³ Ka Ala tɔgɔ wele ni limaniya ye, o ka kan ka dege mɔgɔw bɛɛ fɛ minnu b’a kanu ka Ala ka mandiya sɔrɔ. Bibulu bɛ layidu ta ko: “Mɔgɔ o mɔgɔ min bɛ Jehowa tɔgɔ wele, o bɛna kisi.” (Romɛkaw 10:13, NW ). Ɔwɔ, Jehowa tɔgɔ kɔrɔ ka bon. Ka Jehowa tɔgɔ wele iko i ka Ala n’i Kunmabɔbaga, o bɛ se k’i lase hɛrɛ banbali la.

ALA LAKIKA KA MANKUTUW

14. Bibulu bɛ Ala ka mankutuba jumɛnw jɛya?

¹⁴ N’i y’a kalan Israɛl kisira cogo min na ka bɔ Misira, i bɛn’a ye k’o bɛ Ala ka mankutu naani bila kɛnɛ kan, mankutuba minnu damakɛnyɛnen don ni dafalenya ye. A ni Faraɔn cɛsiraw bɛ a ka setigiya kabakoman jira (Ekisode 9:16). Ala ye o ko gɛlɛn in ɲɛnabɔ ni sebaaya min ye, o b’a ka hakilitigiya sangabali jira (Romɛkaw 11:33). A y’a ka tilennenya jira a kɛtɔ ka ɲangili bin a ka jamakulu kɛlɛbaga katigɛlɛnw n’a tɔɔrɔbagaw kan (Dutɛrɔnɔmɛ 32:4). Ala ka mankutu min bɛ a bɛɛ ɲɛ o ye kanuya ye. Jehowa y’a ka kanuya ɲɔgɔnyebali jira a kɛtɔ k’a ka layidu timɛ ka ɲɛsin Ibrahima bɔnsɔnw ma (Dutɛrɔnɔmɛ 7:8). A ye kanuya fana jira tuma min na a jɛnna n’a ye Misiraka dɔw k’u ban ala nkalonmanw na ani ka kodumanbaw sɔrɔ u kɛtɔ ka tugu Ala lakika la.

15, 16. Ala y’a ka kanuya jira sira jumɛnw fɛ?

¹⁵ Ikomi i bɛ Bibulu kalan, i bɛn’a kɔlɔsi ko kanuya de ye Ala jogo bɛɛ la belebeleba ye ani k’a b’o jira sira caman na. Misali la, a ka kanuya de kosɔn a kɛra Dabaga ye. A fɔlɔla ka ɲɛnamaya nisɔndiya tila ni danfɛn hakilimaalamaw ye. O mɛlɛkɛ miliyɔn caman ninnu bɛ Ala kanu ani u b’a tanu (Job 38:4, 7; Daniɛl 7:10). Ala ye kanuya jira fana a kɛtɔ ka dugukolo da ani k’a labɛn walisa hadamadenw ka ɲɛnamaya kɛ hɛrɛ la a kan.—Jenɛse 1:1, 26-28; Zaburu 115:16.

¹⁶ An bɛ kodumanw sɔrɔ Ala ka kanuya la siraw fɛ minnu bɛɛ tɛ se ka fɔ. O dɔ la kelen ye ko Ala y’an farikolo dilan ni kanuya ye, dakabana cogo la, walisa an ka se ka ɲɛnamaya diyabɔ (Zaburu 139:14). A ka kanuya jirala sira dɔ wɛrɛ fɛ. O ye k’a bɛ ‘sanji di ka bɔ sankolo la ka sɛnɛ ɲɛ, ka dumuni fɛnw caman di an ma, ka an dusu fa ɲagali la’. (Kɛwalew 14:17.) Ala bɛ hali “a ka tile bɔ mɔgɔ juguw ni mɔgɔ ɲumanw ye, ka sanji di mɔgɔ tilennenw ni mɔgɔ tilenbaliw ma”. (Matiyu 5:45.) Kanuya fana de ye an Dabaga bila k’an dɛmɛ ka Ala dɔnniya sɔrɔ ani ka baara kɛ a ye ni nisɔndiya ye, iko a batobagaw. Tiɲɛ na, “Ala ye kanuya de ye”. (1 Yuhana 4:8.) Nka, a jogo ɲɛ tɔw ka ca kosɛbɛ.

“ALA MAKARIMA HINƐMA”

17. An bɛ mun kalan Ala ko la Ekisode 34:6, 7 kɔnɔ?

¹⁷ Kɔgɔji Bilen tigɛlen kɔ Israɛldenw fɛ, u mago tun b’a la ka Ala dɔn koɲuman ka taa’ fɛ tun. Musa ye o mago dɔn a yɛrɛ la, wa a ye delili kɛ ko: “Ne bɛ i deli sa, ni ne ye nɛɛma sɔrɔ i ɲɛkɔrɔ, i ka i cogo jira ne la, walisa ne ka i dɔn, ne ka nɛɛma sɔrɔ i ɲɛkɔrɔ.” (Ekisode 33:13). Musa nana Ala dɔn kosɛbɛ, a kɛtɔ ka Ala yɛrɛ kumakan mɛn: “Jehowa Jehowa Ala makarima hinɛma. A tɛ dimi joona. A ka ɲumaya ni a ka kantigiya ka bon. A bɛ a ka kanuya mara bɔnsɔn mɔwolo wa caman ye. A bɛ tilenbaliya ni hakɛmako ni jurumu yafa. A tɛna jo di jalaki tigi ma fewu [“nka, o kɔrɔ tɛ k’a bɛ mɔgɔ tanga ɲangili ma”, NW ].” (Ekisode 34:6, 7). Ala b’a ka kanuya bɛn n’a ka tilennenya ye. Mɔgɔ minnu b’a dabɔ a kama ka jurumu kɛ, a t’u tanga u ka kojugu nɔfɛtaw ma.

18. Jehowa ye makari jira cogo jumɛn na?

¹⁸ Iko Musa y’a dege cogo min na, Jehowa bɛ makari jira. Makaribaga bɛ hinɛ mɔgɔ la min bɛ tɔɔrɔ. A b’a ɲini k’a lafoni. O cogo la, Ala y’a ka makari jira hadamadenw na a kɛtɔ ka fɛɛrɛw tigɛ lafonini banbali kama walisa k’an bɔ tɔɔrɔ ni bana ni saya la (Jirali 21:3-5). Ala batobagaw bɛ se ka bɔnɛ sɔrɔ nin diɲɛ juguman in cogoyaw kosɔn. Walima u bɛ se ka hakilintanya wale dɔ kɛ ani ka don kunbalanw na. Nka, n’u b’u ɲɛsin Jehowa ma ni majigilenya ye, dɛmɛ dɔ kama, a bɛna u dusu saalo ani k’u dɛmɛ. Mun na? Bawo, a ka makari kɔnɔ, a b’a ɲɛsin a batobagaw ma ni hinɛ mandiya ye.—Zaburu 86:15; 1 Piɛrɛ 5:6, 7.

19. Mun na an bɛ se k’a fɔ ko Ala bɛ hinɛ?

¹⁹ Kuntigiw caman bɛ mɔgɔ tɔw minɛ ni farinya ye. Nka, ikomi Jehowa bɛ hinɛ a ka maganna majigilenw na sa! K’a sɔrɔ ale ye kuntigiya bɛɛ la kɔrɔtalen ye dunuya kɔnɔ, tuma caman na, a bɛ ɲumanya ɲɔgɔnyebali jira hadamadenw na (Zaburu 8:4, 5; Luka 6:35). Jehowa b’a ka hinɛ jira fana mɔgɔw la minnu b’a deli walisa k’a ka nɛɛma sɔrɔ a kɛtɔ k’u ka welekan kɛrɛnkɛrɛnnenw jaabi (Ekisode 22:26, 27; Luka 18:13, 14). Tiɲɛ don, Ala wajibiyalen tɛ ka nɛɛma walima makari jira mɔgɔ bɛɛ la (Ekisode 33:19). O kosɔn, an ka kan ka waleɲumandɔn dunba jira Ala ka makari n’a ka hinɛ ko la.—Zaburu 145:1, 8.

A KA SUMA DIMI FƐ, A TƐ MƆGƆLAWOLOMA KƐ, A TILENNEN DON

20. Mun b’a jira ko Jehowa ka suma dimi fɛ ani k’a tɛ mɔgɔlawoloma kɛ?

²⁰ Jehowa ka suma dimi fɛ. Nka, o kɔrɔ tɛ k’a tɛ wale kɛ i n’a fɔ a ye min kɛ a kɛtɔ ka Faraɔn katigɛlɛn n’a ka kɛlɛbolo halaki Kɔgɔji Bilen na. Jehowa tɛ mɔgɔlawoloma fana kɛ. O de la, a ka jamakulu mandi, n’o tun ye Israɛldenw ye, u labanna ka bɔnɛ a ka nɛɛma na k’a sababu kɛ u ka tulokun gɛlɛya ye kojugu sira kan. Jamanaw bɛɛ mɔgɔw bɛ se ka kɛ Ala batobagaw ye, nka, a bɛ sɔn dɔrɔn mɔgɔw la, mɔgɔ minnu b’u taamacogo bɛn a ka sariya tilennenw ma.—Kɛwalew 10:34, 35.

21. a) Jirali 15:2-4 b’an kalan mun de la Ala ko la? b) Mun bɛna Ala ka fɔta tilennenw kɛli nɔgɔya an ma?

²¹ Nafa min bɛ Ala ka “sariya tilennenw” degeli la, Jirali, Bibulu ka kitabu dɔ, y’o jɛya. A b’a fɔ an ye ko danfɛn minnu bɛ sankolo la, u bɛ dɔnkili da ko: “I ka kɛwalew ka bon, kabakow don, o Matigi Ala, Sebaaya Bɛɛ Tigi. I ka sira tilennenw don, sira sɛbɛw don, siyaw ka Masakɛ. Jɔni tɛna siran i ɲɛ, Matigi, ka i tɔgɔ bonya? I kelenpe ka senu, siyaw bɛna u biri i ɲɛkɔrɔ, katuguni i ka kɛwale [“sariya”, NW ] tilennenw y’u jira.” (Jirali 15:2-4). An b’a jira k’an bɛ siran Jehowa ɲɛ cogo ɲuman na ani ni karama ye, n’an b’an kolo a ka fɔta tilennenw ye. O bɛ nɔgɔya ka taa’ fɛ, n’an b’an hakili to Ala ka hakilitigiya n’a ka kanuya la. A ka cikanw bɛɛ kɛra an ka daamu kama.—Esayi 48:17, 18.

‘JEHOWA AN KA ALA YE KELENPE YE’

22. Mun na mɔgɔ minnu bɛ sɔn Bibulu la, u tɛ Sabaya dɔ bato?

²² Misira mɔgɔ fɔlɔw tun bɛ ala caman bato, nka, Jehowa ye Ala ye min “b’a wajibiya nɔrɔ ka kɛ ale kelenpe la”. (Ekisode 20:5, NW.) Musa ye Israɛldenw hakili jigin ko “Jehowa an ka Ala ye Jehowa kelenpe ye”. (Dutɛrɔnɔmɛ 6:4; an de b’an sinsi o kan.) Yesu Krista seginna o kumaw kan (Marka 12:28, 29). O de kosɔn, mɔgɔ minnu bɛ sɔn Bibulu la iko Ala ka Kuma, u man kan ka Sabaya bato, o min ye mɔgɔ walima ala saba ye kelen na. Tiɲɛ na “Sabaya” daɲɛ yɛrɛ tɛ ye Bibulu kɔnɔ. Ala lakika ye mɔgɔ kelen de ye, danfara bɛ Yesu Krista ni min cɛ (Yuhana 14:28; 1 Kɔrɛntekaw 15:28). Ala ka hakili senu tɛ mɔgɔ ye. O ye Jehowa ka barika walekɛbaatɔ ye, Sebaaya Bɛɛ Tigi bɛ min kɛ k’a kuntilennaw timɛ.—Jenɛse 1:2; Kɛwalew 2:1-4, 32, 33; 2 Piɛrɛ 1:20, 21.

23. a) I ka Ala kanuya bɛ se ka bonya cogo jumɛn na? b) Yesu ye mun fɔ Ala ka kanuya ko la, ani an mago b’a la ka mun kalan Krista ko la?

²³ Jehowa ye Ala dakabanama sugu min ye, n’i y’o jateminɛ, yali i tɛ sɔn a ma k’a ka kan n’i ka bato ye wa? Ikomi i b’a ka Kuma kalan o min ye Bibulu ye, i bɛna se k’ale dɔn kosɛbɛ ka taa’ fɛ; an’a bɛ min wajibiya i ma, i bɛna o dege i ka daamu n’i ka hɛrɛ banbali kama (Matiyu 5:3, 6). Ka fara o kan, i ka Ala kanuya bɛna bonya. O bɛnnen bɛ, bawo Yesu y’a fɔ ko: “I ka i Matigi Ala kanu ni i dusukun bɛɛ ye, ani i ni bɛɛ, ni i hakili bɛɛ ni i barika bɛɛ.” (Marka 12:30). A jɛlen don ko Yesu tun bɛ n’o kanuya sugu ye ka ɲɛsin Ala ma. Nka, Bibulu bɛ mun jira Yesu ko la? A jɔyɔrɔ ye mun ye Jehowa kuntilenna la?

I KA DƆNNIYA KƆRƆBƆ

Ala tɔgɔ ye mun ye ani siɲɛ joli a kofɔlen bɛ Heburukan Sɛbɛnniw kɔnɔ?

Mun na i ka kan ka Ala tɔgɔ fɔ?

Jehowa Ala ka mankutu jumɛnw de ka di i ye kɛrɛnkɛrɛnnenya la?

[Sɛbɛn ɲɛ 29nan ja]

I bɛ dunuya Dabaga dɔn fo ka se hakɛ jumɛn na?