Limaniya lakika ye mun ye?

LIMANIYA lakika kɔrɔ tɛ ka da a la dɔrɔn ko Ala bɛ yen. Mɔgɔ miliyɔn caman dalen b’a la ko Ala bɛ yen, nka o n’a ta bɛɛ, u b’a dabɔ a kama ka kojugu kɛ. U ka limaniya bɛ iko wari kolon. A bɔlen don ɲuman fɛ, nka nafa t’a la. O la, limaniya lakika ye mun ye?

Limaniya lakika sinsinnen bɛ dɔnniya jɔnjɔn kan ka bɔ Ala ka Kuma kɔnɔ. Ala ka Kuma de bɛ tiɲɛ fɔ an ye Ala ko la, o bɛ an dɛmɛ ka Ale dɔn, k’a ka sariyaw ni a sagonataw ni a ka kalansiraw dɔn fana. O kalansiraw dɔw ye ninnu ye:

• Ala ye kelen ye. A ɲɔgɔn tɛ yen.

• Yesu ni Sebayabɛɛtigi Ala tɛ kelen ye. Ala ka ciden don.

• Ala bɛ bolisɔn sifaya bɛɛ haramu.

• Hadamadenw kiri bɛna tigɛ don dɔ.

• Mɔgɔ camanba suw bɛna lakunun Alijinɛ kɔnɔ.

Limaniya lakika bɛ an bila ka wale ɲumanw kɛ. O walew bɛ bonya da Ala kan, u bɛ an nafa, ka mɔgɔ wɛrɛw fana nafa. O wale ɲumanw dɔw ye ninnu ye:

• ka Ala bato.

• ka jogo ɲumanw don an na minnu ka di Ala ye, kɛrɛnkɛrɛnnenya la, kanuya.

• ka ban hakilina juguw ni nege juguw la.

• ka limaniya mara, kunkow ni gɛlɛya mana an sɔrɔ cogo o cogo.

• ka mɔgɔ wɛrɛw kalan Ala ko la.

I ka kan ka mun kɛ?

Dɛmɛ ɲini Ala fɛ. Kira Musa ye Ala deli ko: “I ka i cogo jira ne la, walisa ne ka i dɔn, ne ka nɛɛma sɔrɔ i ɲɛ kɔrɔ.”a Ala ye a ka delilikan mɛn, k’a jaabi. Musa kɛra misali ɲumanba ye limaniya sira kan. Ala bɛna e fana dɛmɛ ka o limaniya ɲɔgɔn sɛnɛ i la.

I jija ka waati sɔrɔ ka Ala ka Kuma kalan. Tawureta, Zaburuw ani Linjila bɛɛ ye Ala ka Kuma ye. U bɛ sɔrɔ Bibulu Senuman kɔnɔ. O kitabu bayɛlɛmana kan minnu na ani a jɛnsɛnna fo ka se hakɛ min ma, gafe si ma o hakɛ sɔrɔ fɔlɔ. Yali o kitabu dɔ bɛ e bolo wa?

Ala ka Kuma sira taama don o don. Farikolo bɛ kɔgɔ cogo min na k’a to baara gɛlɛn kɛli la, limaniya fana bɛ tɛn. I yɛrɛ ka limaniya bɛ bonya n’i bɛ to k’a waleya. I bɛn’a ye ko Ala ka laadilikanw bɛnnen don. Tiɲɛ na, mɔgɔ caman ye laadilikanw sɔrɔ ka bɔ Ala ka Kuma kɔnɔ, o ye u dɛmɛ ka ko caman labɛn u ka ɲɛnamaya kɔnɔ. Nin gafenin tɔ kalan walisa ka o misali dɔw ye.