Hia Ne Uwẹ Vbe Ọdafọn Ra Ọvbokhan Gha Re Ọse Nọ Ghi Sikẹ Egbe Sẹ

1. Vbọzẹ ne avbe ọse ni maan na re ẹse ọhẹ nọ ke obọ e Jehova rre?

ẸSE ọhẹ nọ ke obọ e Jehova rre ẹre avbe ọse ni maan khin. (Jems 1:17) Iran hoẹmwẹ Osanobua, iran vbe hoẹmwẹ ima. Iran gu ima ghọghọ vbe ima ghaa ghọghọ, iran vbe rhie ifuẹko ne ima vbe ima ghaa rre uwu ọlọghọmwa. Erriọ ẹre iran vbe ya rhie ibude nọ khẹke ne ima vbene iran i na kpe ima ye ewọwọ. Ọse nọ gia mu ẹtin yan kevbe nọ mu egbe nọ ya ru iyobọ ne ima vbe ẹghẹ hia ẹre iran khin. Egbe avbe ọse vbenian “keghi ya ẹko rhiẹnrhiẹn ọmwa”!​—Itan 27:9.

2. Vbọzẹ nọ na ru ekpataki ne ọdọ vbe amwẹ gha ru emwi nọ gha ya iran sikẹ egbe sayọ? (Matiu 19:6)

² Te ọ wa kakabọ ru ekpataki ne ọdọ vbe amwẹ gha re ọse nọ ghi sikẹ egbe sẹ. Te ọ khẹke ne iran ye gha ru emwi nọ gha ya iran sikẹ egbe sayọ. Adeghẹ iran ma na ru vberriọ, iran i khian ghi gha ghọghọ, iran ghi do gha rre uwu ohioro, vbe deba ọni, ohu ohu sẹtin kue do gha mu iran. Sokpan, adeghẹ iran na ye gha ru emwi nọ gha ya iran sikẹ egbe sayọ, emwi rhọkpa i khian sẹtin wannọ iran. (Tie Matiu 19:6.) Vbe ako iruẹmwi na, ma gha guan kaẹn emwi ne ọdọ vbe amwẹ gha ru nọ gha ya iran sikẹ egbe sayọ. Sokpan, ma gha ka guan kaẹn vbene Ivbi Otu e Kristi ni hoo ne iran ru orọnmwẹ khian ya sẹtin miẹn ọmwa nọ khian gha re ọse nọ ghi sikẹ iran sẹ.

VBENE U KHIAN YA MIẸN ỌMWA NE UWA KHIAN GBA GHA RE ỌSE NỌ GHI SIKẸ EGBE SẸ

3-4. Vbọ khian ru iyobọ ne ọmwa ya miẹn ọdọ esi ra okhuo esi? (Itan 18:22)

³ Vbene ima te ru azẹ nọ ru ekpataki, te ọ khẹke ne ima ka muẹn roro nẹ, ẹbe kevbe afiangbe nọ rrọọ. Avbe azẹ ni ru ekpataki gha sẹtin ya ima gha mwẹ alaghodaro vbe ẹdagbọn ima, ọ sẹtin vbe si ima digiẹn, rhunmwuda ọni, te ọ khẹke ne ima ka muẹn roro nẹ ma ke ru ẹre.

⁴ Ọkpa vbe usun azẹ nọ ghi ru ekpataki sẹ ne ima gha ru vbe ẹdagbọn ima, ọre vbe ima gha khian zẹ okhuo ne ima khian rhie ra okpia ne ima khian rọnmwẹ, rhunmwuda, iran ẹre ọ khian gha re ọse nọ ghi sikẹ ima sẹ. Ugbẹnvbe a miẹn wẹẹ, e Jehova ẹre ọ mu orọnmwẹ gbọọ, te ọ khẹke ne ima gualọ adia vbe obọ ọre vbe ima gha khian zẹ okhuo ne ima khian rhie ra okpia ne ima khian rọnmwẹ. E Jehova hoo ne okpia rhie okhuo esi, ọ vbe hoo ne okhuo rọnmwẹ ọdọ nọ rẹn enegbe. E Jehova ẹre ọ rẹn emwi nọ maan sẹ nọ gha ya agbọn maan ima. (Tie Itan 18:22; Aiz 48:​17, 18) Avbe ilele ni rre Baibol gha sẹtin ru iyobọ ne Ovbi Otu e Kristi ya gualọ okpia ra okhuo nọ rẹn enegbe ne iran gha gba rọnmwẹ egbe sẹ ota.

5. Adeghẹ u hoo ne u ru orọnmwẹ, vbọzẹ nọ na khẹke ne u gha gu ọmwa nọ dinmwiamẹ nẹ si egbe obọ?

⁵ Ma gha dinmwiamẹ nẹ, ma ghi do gha re ọsie Osanobua. (Psm 25:14) Adeghẹ u hoo ne u ru orọnmwẹ, ọmwa nọ re ọsie Jehova ẹre ọ khẹke ne u rọnmwẹ. (1 Kọr 7:39) U gha ru vberriọ, te u rhie ẹre ma wẹẹ, u gbọyẹmwẹ ye ilele ọghe Jehova, u ghi vbe do bẹghe ẹre wẹẹ, ẹse ọhẹ nọ ke obọ e Jehova rre ẹre ọdọ ruẹ ra ọvbokhan ruẹ khin. (Itan 19:14) U i khian vbe werriẹ aro daa ọlọghọmwa na lae miẹn vbe a gha “ya egbe ba emwa ni ma yayi, rhunmwuda, wa i khian sẹtin gua egbe ro.” (2 Kọr 6:14) Emwi ukọnmwẹ wa nọ ne ọmwa ya gha gu ọmwa nẹi re Osẹe Jehova si egbe obọ, rhunmwuda wẹẹ, irẹn ma miẹn ọmwa vbe otu e Jehova. Ọ ma vbe khẹke ne u gha roro ẹre wẹẹ, u ghaa gu ọmwa nẹi re Osẹe Jehova si egbe obọ, ọ gha do ga e Jehova vbe ẹdẹ ọkpa.

6-7. De inọta eso nọ khẹke ne u rhie ewanniẹn yi vbe uwẹ vbe ọmwa ghaa si egbe obọ?

⁶ Ẹmwata nọ rrọọ ọre wẹẹ, ẹ i vbe re emwa hia nọ dinmwiamẹ nẹ ẹre u khian sẹtin gua obọ ẹre. Adeghẹ u miẹn ọmwa ne ẹmwẹ ọnrẹn yẹẹ ruẹ, inọta eso nọ khẹke ne u nọ egbuẹ ọre wẹẹ: ‘De obọ nọ ya mu emwa rẹn vbe uwu ẹgbẹe? Ọ mu ẹmwẹ emwa ọvbehe roro ra, ọ vbe rhie ọghọ ne emwa ra? De aro emwa nọ gu mu obọ? De aro nọ ya ghee emwi ne emwa ọvbehe ta, adeghẹ ọ na lughaẹn ne emwi nọ te rre ọre ekhọe? Ọmwa nọ hoo nọ gha ta ẹmwẹ nọ sẹ nọ ra, ra ọ rhie emwi ne emwa ọvbehe ta adeghẹ ọ ma na gbodan ghee ilele ni rre Baibol? De aro nọ ya ghee igho?’

⁷ U sẹtin vbe nọ egbuẹ wẹẹ: ‘Ọ hoẹmwẹ e Jehova ẹsẹsẹmwẹse ra? Ọ mu “akpa ọghe ọgbọn yọ” ra? Ọ gha ru iyobọ mẹ ya rhiegba ye ugamwẹ e Jehova sayọ ra? Emwi ọkpa ẹre ima hoo ne ima ya ẹdagbọn ima ru vbe ugamwẹ e Jehova ra? Ma gha sẹtin do gha re ọse nọ ghi sikẹ egbe sẹ ra?’ (Kọl 3:​9, 10) Adeghẹ ọtẹn nokhuo ẹre u khin, u ghee ẹre wẹẹ, ọtẹn nokpia ne u gu si egbe obọ gha sẹtin do gha re ọse ruẹ ne kankankan kevbe uhunmwuta ẹgbẹe nọ maan ra? (1 Kọr 11:3) Adeghẹ ọtẹn nokpia ẹre u khin, u ghee ẹre wẹẹ, ọtẹn nokhuo ne u gu si egbe obọ mu egbe nọ ya gha rhie ọghọ nuẹn zẹvbe uhunmwuta ẹgbẹe, ọ gha khọnrẹn wẹẹ, ọ mwẹ ako eso ne u i na hia ra? Ọ gha rhie ẹghẹ u ke sẹtin do rẹn ena hia vbekpa ọmwa ne uwa gba si egbe obọ. Nọnaghiyerriọ, ẹghẹ ne uwa ya si egbe obọ ẹre ọ khẹke ne u ya gbarokotọ ne u mieke na gele rẹn aro ọmwa nọ khin.

8-9. Vbọ khian ru iyobọ ne emwa ni si egbe obọ ya sẹtin ru azẹ nọ khẹke? (Vbe ya ghee efoto.)

⁸ Adeghẹ u na hia ne u rẹn aro ọmwa ne uwa gba si egbe obọ, ọ gha ru iyobọ nuẹn ya ru azẹ nọ khẹke. Hia ne u rẹn aro ne emwa ọvbehe ya ghee ọmwa ne uwa gba si egbe obọ. U sẹtin we ne iran tama ruẹ aro ọmwa nọ khin kevbe vbene ọ ya yin hẹ. Vbe igiemwi, a rẹn ọnrẹn ye ọmwa nọ mu egbe rrie otọ, nọ ya obọ esi mu emwa kevbe nọ mu ẹmwẹ emwa ọvbehe roro ra? Ọ mwẹ ọtẹn nokhuo ọkpa na tie ẹre Sarah nọ rre French Guiana, nọ rọnmwẹ ọtẹn nokpia ọkpa na tie ẹre Daniel. Ọtẹn nokhuo na khare wẹẹ: “I nọ emwa ni bun ọta vbekpa e Daniel, I nọ ọmwa ne iran gba rre owa ọkpa, ne iran vbe gba gha ru iwinna arọndẹ, I nọ ọdiọn ọkpa ne iran gba rre iko, I nọ emwa eso ni re ọsie ima eva, I vbe nọ etẹn nikhuo eso ne iran gba rre iko.” U sẹtin vbe nọ ọmwa ne uwa gba si egbe obọ deghẹ ọ mwẹ emwi eso nọ khẹke nọ tama ruẹ, ọ sẹtin kue gha re emwi nọ sunu vbe ẹghẹ nọ gberra, rhunmwuda, emwi eso sẹtin gha rrọọ nọ gha sẹtin si ọlọghọmwa ne uwa vbe uwa gha ru orọnmwẹ nẹ.

⁹ Adeghẹ ifuanro ẹre ma bọ ruẹ, ra adeghẹ etẹn na gu ruẹ rẹn uyinmwẹ eso nẹi maan nọ mwẹ, ghẹ biabia rua, ra ne u rhie aro gberra ẹre. Rhunmwuda, ọna gha ru iyobọ nuẹn ya rẹn deghẹ ọ khẹke ne uwa ye gha si egbe obọ ra ne dọmwadẹ ọghẹe khian ọghẹe.a Nian, etẹn ni ru orọnmwẹ nẹ ẹre ima khian ghi guan kaẹn vbe ako iruẹmwi na.

WA GHA RU EMWI NỌ GHA YA UWA GHA SIKẸ EGBE SAYỌ

10. Vbọzẹ nọ na khẹke ne ọdọ vbe amwẹ gha mwẹ ẹghẹ ne egbe?

¹⁰ Ọdọ vbe amwẹ ghaa hoo ne iran sikẹ egbe sayọ, te ọ khẹke ne iran gha mwẹ ẹghẹ ne egbe, ọ gha khọnrẹn ne iran gha mwẹ emwi ni bun ne iran ru vbe obọ. Ọna gha ru iyobọ ne iran ya gha mu iro ma egbe, ya sẹ egbe emwi ne iran werriẹ aro daa vbe ẹdẹgbegbe, ọ ghi vbe kie ẹkpotọ ne iran ya rhie ẹre ma wẹẹ, iran hoẹmwẹ egbe, iran ghi vbe sẹtin gba gha ru emwi ne iran ya rọkhọ egbe.

11. De emwi nọ gha sẹtin si ọlọghọmwa ye uwu ẹkpo ọdọ vbe amwẹ?

¹¹ Ọdọ vbe amwẹ ni gele sikẹ egbe keghi hoo ne iran gha gu egbe rrọọ vbe ẹghẹ hia. Ẹmwata nọ rrọọ ọre wẹẹ, a sẹtin miẹn wẹẹ, iran i khian gha gu egbe rrọọ vbe ẹghẹ eso. Ọrheyerriọ, ọ ma khẹke nọ gha re ẹghẹ nọ kpẹẹ vbe otọ, rhunmwuda, ọ sẹtin zẹ ẹbe. Vbe igiemwi, ọ mwẹ ikpia eso ra ikhuo eso ni sẹ ẹgbẹe ọghe iran rae, iran na ya gha winna vbe ẹvbo ọvbehe vbe uki ni bun. Iran sẹtin wa gha khuan igho ọrhẹnrhẹn, sokpan, ọna sẹtin si ọlọghọmwa ye orọnmwẹ ọghe iran.

12-13. (a) De emwi eso ne ọdọ vbe amwẹ eso he ru ne iran mieke na gha mwẹ ẹghẹ ne egbe? (Vbe ya ghee efoto.) (b) De vbene ọ khẹke ne uwẹ vbe ọdafẹn ruẹ ra ọvbokhan ruẹ sikẹ egbe sẹ hẹ? (Ya ghee ẹkpẹti nọ khare wẹẹ, “Aro Nọ Khẹke Ne U Ya Gha Ghee Ọdafẹn Ruẹ Ra Ọvbokhan Ruẹ.”)

¹² Gia guan kaẹn emwi eso ne ọdọ vbe amwẹ eso he ru ne iran mieke na gha mwẹ ẹghẹ ne egbe. Ọtẹn nokhuo ọkpa na tie ẹre Leah nọ rre Guam khare wẹẹ: “Mẹ vbe ọdafẹn mwẹ wa ru emwi ni bun kugbe. Mẹ vbe ọdafẹn mwẹ ẹre ọ mobọ yo ehe, ọre te ima rrie orere ne ima ya sọyẹnmwẹ egbe ra emwa ẹre ọ tie ima ne ima do deba iran sọyẹnmwẹ egbe.” Roxanne nọ rre United State khare wẹẹ: “Rhunmwuda ne ima na ru emwi ni bun nọ rhie ima ẹghẹ, ma keghi ru emwamwa nọ gha ru iyobọ ne ima ya gha mwẹ ẹghẹ ne egbe, zẹvbe ne ima vbe ru emwamwa, ne ima mieke na sẹtin ru avbe emwi ọvbehe ni ru ekpataki.” (Yae taa Emọs 3:3.) E Damien nọ rre France khare wẹẹ: “Ma do bẹghe ẹre nẹ wẹẹ, te ọ khẹke ne ima rẹn emwi nọ yẹẹ ọvbokhan ima ra ọdafẹn ima, ma ghi vbe hia ne emwi nii gha yẹẹ ima.” (Mat 7:12) E Katie nọ vbe rre United State khare wẹẹ: “Ugbẹnso, ma ghi viọ efoni ọghe ima ye otọ, ne ima mieke na gha mwẹ ẹghẹ ne egbe.”

¹³ Nọ ghi wa sẹ ehia, te ọ khẹke ne ọdọ vbe amwẹ gha ru emwi kugbe vbe ugamwẹ e Jehova. E Myriam nọ rre France khare wẹẹ: “Vbene ima te kpa hin owa rre vbe owiẹ ma ghi koko tie Baibol, ma ghi vbe zẹ iro yan emwi ne ima miẹn ruẹ vbọ kevbe vbene ima khian ya loo ẹre hẹ vbe ẹdagbọn ima. Te emwi ne ima ru na wa yẹẹ mwẹ.” Ọ na vbe kha wẹẹ: “Ọ wa vbe yẹẹ mwẹ vbe ima ghaa koko na erhunmwu, rhunmwuda, ẹmwẹ ne ọdafẹn mwẹ ta vbe ọ ghaa na erhunmwu wa ya mwẹ rẹn wẹẹ, ọ kakabọ hoẹmwẹ e Jehova.” E Katie na ka guan kaẹn ban khare wẹẹ: “Ẹghẹ ne ima ya ru emwi kugbe nọ ghi wa yẹẹ mwẹ sẹ, ọre ẹghẹ ne ima ya winna kugbe vbe iwinna ikporhu. Ma wa miẹn emwi ruẹ vbe obọ egbe vbe ima ghaa kporhu, ọ wa vbe ya ima sikẹ egbe sayọ.”​—Itan 27:17.

WA GHẸ SẸ EGBE RAE VBE ỌLỌGHỌMWA GHA DE RRE

14-15. Vbọzẹ nọ na khẹke ne ọdọ vbe amwẹ hia vbe odẹ ke odẹ ne iran sọfurre ye ọlọghọmwa ne iran werriẹ aro daa? Ru igiemwi yọ.

¹⁴ Ọ ma gba ne ọdọ vbe amwẹ fo, rhunmwuda ọni, ẹ i mwẹ iran ma werriẹ aro daa ọlọghọmwa eso. Uhiẹn, e Baibol khare wẹẹ, emwa ni ru orọnmwẹ nẹ “gha họẹn vbe egbe.” (1 Kọr 7:28) E study note nọ rre ako na khare wẹẹ, emwi na ya ẹmwẹ na kha ọre “ọlọghọmwa ne ọdọ vbe amwẹ mobọ werriẹ aro daa.” Ọlọghọmwa vberriọ gha de rre, vbọzẹ nọ na khẹke ne iran hia vbe odẹ ke odẹ ne iran sọfurre yọ?

¹⁵ Gia kha wẹẹ, u mwẹ owa ne u ya igho ọrhẹnrhẹn bọ, adeghẹ emwi eso vbe owa nii na rhia, u i khian sẹrae vberriọ, ẹ i mwẹ u ma dọlọe yi. Ọ sẹtin wa gbe ruẹ igho, ọ sẹtin vbe rhie ẹghẹ u ke dọlọe yi fo. Sokpan vbọzẹ ne u khian na ru ena hia? Rhunmwuda aro nọ ghaan ẹre u ya ghee owa nii. Erriọ ẹre ọ vbe ye, orọnmwẹ i re emwi na ya ku. Uhiẹn, ọdọ vbe amwẹ ni kakabọ sikẹ egbe ye gui. Vbọrhirhighayehẹ, zẹvbe na dọlọ owa yi, u gha vbe sẹtin dọlọ orọnmwẹ ruẹ yi. Ọna i re iwinna ẹdẹ ọkpa, sokpan, ọ wa ya ẹko rhiẹnrhiẹn e Jehova deghẹ ọdọ vbe amwẹ na hia vbe odẹ ke odẹ ne iran ru adọlọ, ne iran mieke na gha sikẹ egbe sayọ. (Mal 2:16) Iran gha ru vberriọ te iran rhie ẹre ma wẹẹ, iran hoẹmwẹ egbe kevbe wẹẹ, iran rhie ọghọ ne egbe. Nọ ghi wa sẹhia te iran vbe rhie ẹre ma wẹẹ, iran hoẹmwẹ e Jehova kevbe wẹẹ, iran rhie ọghọ nẹẹn zẹvbe Osa nọ mu orọnmwẹ gbọọ.

16. Zẹvbe nọ rre ebe 1 Kọrint 13:​4-8a, vbọ khian ru iyobọ ne ọdọ vbe amwẹ vbe ọlọghọmwa nọ wegbe gha de rre vbe orọnmwẹ ọghe iran? (Vbe ya ghee efoto kevbe ẹkpẹti nọ khare wẹẹ, “Emwi Eso Nọ Gha Ru Iyobọ Ne Uwa Ya Sikẹ Egbe Sayọ.”)

¹⁶ Adeghẹ ọlọghọmwa na de rre vbe orọnmwẹ ruẹ, wa ghẹ wa rherhe wannọ egbe. (1 Kọr 7:​10, 11) Nọghayayerriọ, nọ egbuẹ wẹẹ, ‘I gha sẹtin hia ne ima sikẹ egbe sayọ ra?’ Hia ne u dọlọgbe ya tie emwi ne Baibol tae vbekpa ahoẹmwọmwa, u ghi vbe muẹn roro vbene u khian ya sẹtin gha rhie ẹre ye uyinmwẹ emwi ughughan nọ rre ebe 1 Kọrint 13:​4-8a. (Tie ẹre.) Ne uwa gha te ya gha gualọ vbene uwa khian ya sẹ egbe rae hẹ, wa hia ne uwa ru emwi nọ gha ya uwa hoẹmwẹ egbe sẹ ota. Hia ne u gha ru emwi nọ gha ya uwa dọlegbe do gha ghọghọ vbe orọnmwẹ ọghe uwa. Na erhunmwu ne Jehova ru iyobọ nuẹn. Gualọ adia vbe avbe ebe kevbe vidio ọghomwa, u sẹtin vbe nọ iyobọ vbe obọ avbe ediọn kevbe etẹn ni wẹro. Wa gha mu ẹtin yan e Jehova nọ re ọkpa vbe “irri na gba ẹre eha kugbe” vbe orọnmwẹ ọghe uwa, orọnmwẹ ọghe uwa “i rherhe fian,” ọni nọ wẹẹ, ọ gha lọghọ emwi ke zagha orọnmwẹ ọghe uwa.​—Asan 4:12.

17. De emwi nọ khian ya emwa ni hoo ne iran ru orọnmwẹ kevbe emwa ni ru orọnmwẹ nẹ gha ghọghọ?

¹⁷ E Jehova hoo ne eguọmwadia ẹre hia gha sọyẹnmwẹ, ya sẹ egbe emwa ni hoo ne iran ru orọnmwẹ kevbe emwa ni ru orọnmwẹ nẹ. Nọnaghiyerriọ, adeghẹ u gha hoo ne u ru orọnmwẹ, gbarokotọ gualọ ọmwa ne uwa khian gba gha re ọse ne emwi rhọkpa i sẹtin wannọ. Adeghẹ u ru orọnmwẹ nẹ, hia ne u ye gha ru emwi nọ gha ya uwa sikẹ egbe sayọ. Hia vbe odẹ ke odẹ ne uwa sọfurre ye ọlọghọmwa nọ rhirhi de rre vbe orọnmwẹ ọghe uwa, sokpan uwa ghi gualọ iyobọ e Jehova. U ghaa ru ena hia, u ghi sẹtin gu ọvbokhan ruẹ ra ọdafẹn ruẹ rri orhiẹnrhiẹn agbọn!​—Asan 9:9.