Gha Ya Egbe Taa “Osanobua Ne Ifuẹko Hia Ke Obọ Ẹre Rre”

1. Vbọzẹ nọ na khẹke ne ima gha fu emwa ọvbehe ẹko rre?

MA HIA wa “rri oya . . . , rhunmwuda ọlọghọmwa ughughan ne [ima] ya egbe miẹn,” rhunmwuda ọni, ugbẹnso, ma wa gualọ ifuẹko kevbe igiọdu. (1 Pit 1:6) Ọ wa yẹẹ ima vbe emwa gha rhie ifuẹko ne ima, erriọ ẹre ọ wa vbe khẹke ne ima gha rhie ifuẹko ne emwa ọvbehe vbobọvbobọ, vbe iran ghaa rre uwu ibavbaro. (Mat 7:12) E Jehova nọ re “Osanobua ne ifuẹko hia ke obọ ẹre rre,” gi ima rẹn vbene ima khian ya “sẹtin vbe gha fu emwa ọvbehe ẹko rre vbe ọlọghọmwa ne iran rhirhi gha ye.” Te ọ khẹke ne ima ya egbe taa e Jehova, ne ima “gha . . . fu egbe ẹko rre.” (2 Kọr 1:​3, 4; 1 Tẹs 4:18) Te ima rhie ifuẹko ne etẹn ima rhunmwuda we ima hoẹmwẹ iran, ẹ i wa re rhunmwuda wẹẹ, emwi nọ khẹke ne ima ru nọ. Vbe ako iruẹmwi na, ma gha guan kaẹn (1) emwi na ya ifuẹko kha vbe Baibol, (2) vbene ima gha ya sẹtin gha fu emwa ọvbehe ẹko rre, kevbe (3) emwi ne ima gha ru vbe ima ghaa gualọ ifuẹko.

EMWI NA YA IFUẸKO KHA VBE BAIBOL

2. De odẹ ughughan na ya loo ẹmwẹ na zedu ẹre ghee “ifuẹko” vbe Baibol?

² Odẹ ughughan ẹre a ya loo ẹmwẹ e Grik na ke zedu “ifuẹko” vbe Baibol, vbene a ya loo ẹre hẹnhẹn egbe yan emwi na guan kaẹn. Ọ sẹtin gha re na rhie “igiọdu” ne ọmwa ra na rhie “ibude” ne ọmwa. (Rom 12:8; ya ghee study note nọ khare wẹẹ, “encourages.”) Emwi na wa gele ya ifuẹko kha vbe Grik ọre “ne ọmwa tie ọmwa nọ do mudia ke irẹn.” Rhunmwuda ọni, te ọ yevbe na ghee ọmwa nọ rhulẹ bu ọsiọre nọ rri oya nọ mieke na ya ru iyobọ nẹẹn. Iyobọ ne ọmwa nii rhirhi ru ne ọsiọre, te ọ khẹke ne iyobọ nii mu ọsiọre orhiọn sẹ otọ, ọ ghi vbe rhie igiọdu nẹẹn.

3. De igiemwi esi ne Banabas rhie ye otọ vbe nọ dekaẹn na gha rhie ifuẹko ne emwa ọvbehe? (Vbe ya ghee efoto.)

³ Gi ima ghee igiemwi ọkpa vbe Baibol. Ọ mwẹ Ovbi Otu e Kristi ọkpa na tie ẹre Josẹf, nọ wa guẹ vbene a ya rhie igiọdu kevbe ifuẹko ne emwa sẹrriọ wẹẹ, avbe ukọ na do gha tie ẹre Banabas, emwi na yae kha ọre “Ovbi Ifuẹko.” (Iwinna 4:36) Eni na hin ẹnrẹn sẹrriọ wẹẹ, a ma ghi gha tie ẹre Josẹf nọ re eni na he ẹre. E Banabas wa rhie ẹre ma vbe ẹghẹ ni bun wẹẹ, eni na mu nẹẹn na wa khẹke ẹre, te ọ wa gha ru iyobọ ne etẹn ne iran gba ga ni gualọ iyobọ. Vbe igiemwi, vbe Sọl da khian Ovbi Otu e Kristi, ọ na gha die Jerusalẹm, nọ mieke na do miẹn Ivbi Otu e Kristi ni rre evba. Sokpan, iran kegha mu ohan rẹn, rhunmwuda nọ na ka gha zẹ Ivbi Otu e Kristi kpokpo. Ọrheyerriọ, e Banabas keghi gba ẹko e Sọl, ọ na gie ẹre ma avbe ukọ nikẹre.​—Iwinna 9:​26-28.

VBENE IMA GHA YA SẸTIN GHA FU EMWA ỌVBEHE ẸKO RRE

4. De ọkpa vbe usun odẹ nọ ghi maan sẹ na ya rhie igiọdu ne emwa ọvbehe? (Rom 1:​11, 12)

⁴ Mu otuẹ gie iran deghẹ u gha sẹtin. E Jehova keghi loo eguọmwadia ẹre ya fu emwa ọvbehe ẹko rre. Vbe igiemwi, vbe ẹghẹ ne iro ya han Ẹlaija ne akhasẹ, e Jehova keghi loo odibo ọkpa ya fu ẹre ẹko rre. (1 Ọba 19:​4-7) Ukọ ighẹ e Pọl wa rẹn vbene ọ ru ekpataki sẹ hẹ na gha mu otuẹ gie etẹn, na mieke na rhie igiọdu ne iran. (Tie Rom 1:​11, 12.) U gha mu otuẹ gie ọmwa ne u ya rhie ifuẹko nẹẹn, ghẹ ya okhirhikhirhi kpa, ne u mieke na miẹn ẹghẹ ya mu orhiọn ọmwa nii sẹ otọ. (1 Kọr 16:7) Sokpan, adeghẹ u ma sẹtin mu otuẹ gie ọmwa ghee mwẹ ghee ruẹ, u gha wa ye sẹtin rhie ifuẹko nẹẹn. U sẹtin tie ọmwa nii vbe efoni, u sẹtin gbẹn elẹta gie ẹre, u sẹtin gbẹnnẹ emwi ye kad ra u ghi gie uhunmwu gie ẹre vbe efoni. U gha gi e Jehova loo ruẹ ya rhie ifuẹko ne emwa ọvbehe ra?

5. Vbọzẹ nọ gha na sẹtin gha lọghọ ima ugbẹnso ne ima sẹtin rhie ifuẹko ne emwa ọvbehe?

⁵ Zẹvbe ne agbọn Esu na ya rhia yọ rhia yọ, ọ sẹtin gha lọghọ ne ima sẹtin mu otuẹ gie emwa ya rhie ifuẹko ne iran. Vbe Pọl rre eghan vbe Rom, Ọnẹsiforọs nọ ke Ẹfisọs rre keghi rhie uhunmwu mwẹ atata obọ, ọ na ya gha gualọ e Pọl, a gha muẹn, a sẹtin muẹn ye eghan, a sẹtin kue gbe ẹre rua. (2 Tim 1:​16-18) Etẹn ni rre Russia wa vbe ya egbe taa igiemwi esi ọghe Pọl, iran wa rhie ifuẹko ne etẹn ọvbehe na zẹ kpokpo rhunmwuda ne iran na ga e Jehova. A gha mu etẹn gha rrie owa ẹzọ, etẹn ọvbehe ghi lele iran gha khian ne iran ya rhie igiọdu ne iran, agharhemiẹn wẹẹ, a sẹtin vbe rhunmwuda ọni mu iran ye eghan. De emwi ne u gha sẹtin ru nian, nọ gha ru iyobọ nuẹn ya sẹtin rhie ifuẹko ne emwa ọvbehe? U sẹtin ya tie okha ọghe eguọmwadia e Jehova nẹdẹ kevbe ni rrọọ vbe ẹghẹ na ni rhie ifuẹko ne emwa ọvbehe, u ghi hia ne u rẹn emwi ne iran ru nọ ya iran gha ghọghọ agharhemiẹn wẹẹ, a zẹ iran kpokpo.

6. Vbe ima khian ya ya egbe taa e Jehova hẹ vbe ima ghaa rhie ifuẹko ne emwa ọvbehe? (Vbe ya ghee efoto.)

⁶ Rhie ehọ ne iran ta yi. Vbe akhasẹ ighẹ Ẹlaija ghaa roro ẹre wẹẹ, ọghe irẹn fo nẹ, ọ keghi fannọ otọ ẹko ẹre ma e Jehova. Agharhemiẹn wẹẹ, e Jehova rẹn emwi nọ kpokpo Ẹlaija vbe orhiọn, ọ na ye gbehọkotọ danmwehọ ọre, uhiẹn, vbe Ẹlaija ghaa ta ẹmwẹ ọkpa yan egbe yan egbe! (1 Ọba 19:​9, 10, 14) E Jehova wa vbe gbehọkotọ danmwehọ e Habakọk vbe ọ ghaa fannọ otọ ẹko ma rẹn, agharhemiẹn wẹẹ, vbe Habakọk ghaa gu e Jehova guan, ọ na yevbe na miẹn we ọ ma rhie ọghọ nẹẹn. (Hab 1:​2, 3) E Jehova wa vbe gbehọkotọ danmwehọ erhunmwu ima vbe ẹdẹnẹrẹ agharhemiẹn wẹẹ, ọ rẹn emwi ne ima gualọ. Ma gha vbe sẹtin ya egbe taa e Jehova adeghẹ ima na gha gbehọkotọ danmwehọ etẹn ima vbe iran ghaa fannọ otọ ẹko iran ma ima. Hia ne u “gha re nọ rherhe danmwehọ ẹmwẹ” vbe iran ghaa gu ruẹ guan, ghẹ gbe eta ye iran unu, ghẹ vbe ya ọkpankpan ye iran egbe adeghẹ iran na gha ta ẹmwẹ nọ ma khẹke ra iran na gha ta ẹmwẹ ọkpa yan egbe yan egbe.​—Jems 1:19; Asan 7:9.

7. Vbe ima khian ya rẹn iyobọ ne ọmwa gualọ?

⁷ Hia ne u rẹn iyobọ ne ọmwa gualọ. Ma rẹnrẹn wẹẹ, ma i khian sẹtin rẹn emwi nọ rre emwa ekhọe vbene Jehova ye, rhunmwuda ọni, ma gha gbehọkotọ danmwehọ ọmwa ne ima khian rhie ifuẹko na, ẹre ima khian na rẹn vbene ima khian ya rhie ifuẹko nẹẹn hẹ. Kọe ye orhiọn wẹẹ, a sẹtin miẹn wẹẹ, ẹ i re emwi nọ khian ru iyobọ nuẹn vbe u ghaa rre egbe ọlọghọmwa nọ ye, ẹre ọ khian vbe ru iyobọ nẹẹn. Rhunmwuda, emwa hia i re ọkpa. Nọnaghiyerriọ, gbehọkotọ danmwehọ ọre, u ghi vbe ya ẹwaẹn nọ rẹn ọta nọ gha ru iyobọ nuẹn ya rẹn emwi nọ rre ọre ekhọe.​—Itan 20:5.

8. De vbene Jesu ya rhie ifuẹko ne Mata vbe Meri vbe ọtẹn iran ighẹ e Lazarọs wu? (Vbe ya ghee avbe efoto.)

⁸ Gi ima guan kaẹn vbene Jesu ya rhie ifuẹko ne Mata vbe Meri vbe ọtẹn iran ighẹ e Lazarọs wu. Emwi ọkpa ẹre ọ sunu daa ikhuo eva na; sokpan odẹ ughughan ẹre Jesu ya rhie ifuẹko ne iran. E Mata ghi gu e Jesu guan fo nẹ, e Jesu na ya ako ebe nọhuanrẹn nọ guan kaẹn arhiọkpaegbe ya fu ẹre ẹko rre, ọna keghi yae gha mwẹ amuẹtinyan nọ wegbe wẹẹ, emwa ni wulo gha gele rhiọ kpaegbe. Sokpan, vbe Meri viẹ bu e Jesu gha dee, ọ gha kẹ, e Jesu ma tama rẹn vbekpa arhiọkpaegbe. Nọghayayerriọ, e Jesu keghi gu e Meri gha viẹ, ọ na nọ rẹn eke na ree Lazarọs yi. (Jọn 11:​20-35) Vbe ima miẹn ruẹ vbe ọna? Ma ghaa rhie ifuẹko ne emwa ọvbehe, ẹ i re obẹlẹ ọkpa ẹre ọ khẹke ne ima wa gha la, te ọ khẹke ne ima hia ne ima rẹn emwi nọ gha gele fu edọmwadẹ emwa ẹko rre.

9. Vbe ima khian ya sẹtin loo e Baibol ya rhie ifuẹko ne emwa ọvbehe hẹ? (Rom 15:​4, 5)

⁹ Gha loo e Baibol. U gha ya “ifuẹko ne Ebe Nọhuanrẹn rhie ne ọmwa” ya ru iyobọ ne ọmwa, ọ ghi do gha mwẹ emwi nọ ya aro yi. (Tie Rom 15:​4, 5.) Emwi nọ ya aro yi nii ẹre ọ khian ghi fu ẹre ẹko rre. (Aiz 40:31) Vbua khian ya miẹn ako ọghe ebe nọhuanrẹn ne u gha sẹtin loo ya rhie ifuẹko ne ọmwa? Emwa eso keghi gbẹnnẹ ọnrẹn ye otọ ako ebe nọhuanrẹn eso ne iran gha sẹtin ya ru iyobọ ne emwa ọvbehe, vbe na ghee ako eso ni rre ototọ uhunmwuta nọ khare wẹẹ, “Ifuẹko” vbe ebe na tie ẹre, Avbe Ako Ọghe Ebe Nọhuanrẹn Ni Ru Iyobọ Ne Ivbi Otu E Kristi. Nọ e Jehova nọ ru iyobọ nuẹn ya sẹtin loo Ẹmwẹ ọnrẹn ya rhie ifuẹko ne emwa. Orhiọn nọhuanrẹn ọghẹe gha sẹtin ru iyobọ nuẹn ya ye ẹre rre avbe ako ọghe ebe nọhuanrẹn ne u gha sẹtin loo ya ru iyobọ ne emwa ọvbehe.​—Jọn 14:26.

10. Vbọzẹ nọ na khẹke ne ima gha ta ẹmwẹ nọ rhie igiọdu ne ọmwa vbe ima ghaa fu ọmwa ẹko rre?

¹⁰ Gha ta ẹmwẹ nọ rhie igiọdu ne ọmwa. Emwi ọvbehe na vbe ya ẹmwẹ e Grik na ke zedu “ifuẹko” kha ọre na rhie “ibude” ne ọmwa. Ugbẹnso, a sẹtin miẹn wẹẹ, te ọ khẹke ne ima rhie ibude ne ọmwa ne ima fu ẹre ẹko rre, nọ mieke na fi iziro ọghẹe werriẹ. Ọ gha de vberriọ, te ọ khẹke ne ima ka roro ẹmwẹ ne ima khian ta nẹ ima ke tae, ne ẹmwẹ ne ima khian ta mieke na mu orhiọn ọnrẹn sẹ otọ, ẹ i re nọ ya ẹmwẹ nọ rre otọ tua sayọ. (Itan 12:18) Igiemwi esiesi ẹre Jehova wa rhie ye otọ vbe ọ gu Ẹlaija guan. Ẹlaija kegha roro ẹre wẹẹ, irẹn ma musọe zẹvbe akhasẹ, ọ na vbe gha roro ẹre wẹẹ, irẹn ọkpa ẹre ọ ghi ga e Jehova vbe otọ Izrẹl. Iziro nọ ma gba ẹre ọna wa gha khin. E Jehova keghi fẹko dia iziro ọghe Ẹlaija, sokpan, ọ ma wa ya unu kaẹn ako nọ na ba ẹre ku. (1 Ọba 19:​15-18) U gha vbe sẹtin ru vberriọ adeghẹ u na gha ta ẹmwẹ nọ rhie igiọdu ne ọmwa kevbe deghẹ u na gha roro ẹmwẹ nẹ u ke tae. U ghaa ya ọta guan vbe iko, ra vbe u ghaa zẹ ewanniẹn, hia ne u gha ta ẹmwẹ nọ rhie igiọdu ne ọmwa ne u mieke na sẹtin rhie igiọdu ne etẹn ni rre iko.

11. De emwi ne emwa ni rre uwu ibavbaro mobọ gualọ? (1 Jọn 3:18)

¹¹ Ru iyobọ nọ khẹke ne iran. Ẹ i re ẹmwẹ igiọdu ọkpa ẹre emwa ni rre uwu ibavbaro gualọ. (Tie 1 Jọn 3:18.) E Banabas wa rhie igiemwi esi ye otọ ne ima; ọ khiẹnnẹ emwi ewe eso, ọ na ya igho nọ miẹn vbọ ya ru iyobọ ne etẹn ni da dinmwiamẹ ni ghaa gualọ iyobọ. (Iwinna 4:​36, 37) Etẹn ima ni bun wa vbe lele igiemwi esi na, iran keghi ru iyobọ ne etẹn ni gualọ iyobọ. Ọ mwẹ ọtẹn nokhuo ọkpa na tie ẹre Gabriela, nọ ke Poland rre. Iro keghi han rẹn vbe ẹghẹ ne amẹ ya mu owa ẹre. Ọ khare wẹẹ: “Te osi wa gha si mwẹ, orhiọn mwẹ ma zẹdẹ sẹ otọ, erriọ ẹre ọ wa vbe gha ye ne evbibiẹ mwẹ, rhunmwuda, owa mwẹ ẹre iran ghaa ye. I na gha nọ egbe mwẹ wẹẹ, ‘Vbia khian ya miẹn uhunmwu hẹ vbe ọna?’ Sokpan, etẹn ni rre avbe iko nọ sikẹ eke ne ima ye kegha dee do ru iyobọ mẹ, ẹ i re avbiẹ iwinna ẹre iran ru vbe owa mwẹ vbe ẹdẹ ọkpa kẹkan. Ọna keghi ya mwẹ do gha mwẹ ilẹkẹtin nọ wegbe wẹẹ, e Jehova wa gele ya emwa rẹn ru iyobọ ne emwa ni rre uwu ibavbaro.”

12. U gha rhikhan mu e Jehova vbe u ghaa rre uwu ọlọghọmwa, vbọ khian ya ru iyobọ ne etẹn ọvbehe hẹ?

¹² Rhikhan mu e Jehova vbe u ghaa rre uwu ọlọghọmwa. E Pọl keghi tama etẹn ni rre Tẹsalonaika wẹẹ, odẹ ne iran ya rhikhan mu e Jehova agharhemiẹn wẹẹ, a zẹ iran kpokpo wa fu irẹn ẹko rre, erriọ ẹre ọ wa vbe ya rhie aguakpa ne irẹn. E Pọl bẹghe ẹre wẹẹ, iyobọ ne irẹn ru ne iran ma dihoi rua. (1 Tẹs 3:​5-8) Rhunmwuda ọni, e Pọl na vbe gha hoo ne irẹn zin egbe ukpokpo ne irẹn werriẹ aro daa ne igiemwi ọghe irẹn mieke na rhie igiọdu ne etẹn ọvbehe, ya sẹ egbe etẹn nọ ma he ka miẹn ẹdẹ. (Kọl 2:​1, 2) Erriọ ẹre ọ wa vbe ye, etẹn ima gha bẹghe vbene Jehova ya ru iyobọ ne ima ya sẹtin zin egbe ọlọghọmwa ne ima ye, ọ ghi rhie igiọdu ne iran.

13. De emwi ọvbehe nọ khẹke ne ima ru ne ima mieke na sẹtin fu emwa ọvbehe ẹko rre?

¹³ Gha mwẹ ẹbo izinegbe. Ugbẹnso ma gha ya rhie ifuẹko ne emwa ne iro han rẹn, ọ sẹtin wa yevbe na miẹn wẹẹ, ma ma ru emwi rhọkpa, emwi i ye deyọ ne iran. Sokpan e Baibol khare wẹẹ, “wa ye gha rhie igiọdu ne egbe.” Ne Baibol na kha wẹẹ, “wa ye gha rhie igiọdu ne egbe,” rhie ẹre ma wẹẹ, emwi na khian gha ru khian nọ. (1 Tẹs 5:11) Gha mwẹ ẹbo izinegbe zẹvbe ne u ya hia ne u rhie ifuẹko ne emwa ọvbehe. (1 Tẹs 5:14) Ẹmwata nọ rrọọ ọre wẹẹ, ọ mwẹ ẹghẹ eso ne dọmwadẹ ima ya gualọ ọmwa nọ khian fu ima ẹko rre. Ọ ghaa yerriọ, vbọ khẹke ne ima ru?

MA GHAA GUALỌ ỌMWA NỌ GHA FU IMA ẸKO RRE

14-15. De emwi nọ khẹke ne ima ru vbe ima ghaa rre uwu ibavbaro?

¹⁴ Na erhunmwu gie Jehova. U ghaa rre uwu ibavbaro, u ghi rinmwian e Jehova nọ fu ruẹ ẹko rre. (Psm 94:19) Sunu ye emwi ne u hoo nọ ru nuẹn vbe u ghaa fannọ otọ ẹko ruẹ hia ma rẹn. (Psm 62:8) Ẹmwata nọ wẹẹ, e Jehova rẹn emwi ne ima gualọ uhiẹn vbene ima te na erhunmwu gie ẹre. Sokpan, ma gha ye fannọ otọ ẹko ima ma rẹn, te ima rhie ẹre ma wẹẹ, ma mu ẹtin yan rẹn. E Jehova wa họn erhunmwu vbenian, sokpan ọ sẹtin gha re odẹ ne ima ma te ya aro yi. (Mak 11:24) Ebe Filipai 4:​6, 7 khare wẹẹ: “Wa gha nọ emwi hia ne uwa gualọ vbe obọ Osanobua vbe erhunmwu, . . . ẹghẹ nii, ọfunmwegbe ọghe Osanobua nọ gberra ne ọmwa gha sẹtin rẹn otọ re, gha gbogba ga ekhọe uwa kevbe iziro ọghe uwa.”

¹⁵ We ne emwa ọvbehe ru iyobọ nuẹn. Fannọ otọ ẹko ruẹ ma ọse nọ rẹn enegbe ra ọdiọn ne u gba ẹko ẹre. Etẹn gha sẹtin fu ruẹ ẹko rre, sokpan, iran i khian wa rẹn emwi nọ rrọ ruẹ ekhọe ra iyobọ ne u gualọ adeghẹ u ma tama iran. (Itan 14:10) U sẹtin tama iran ne iran gbehọkotọ danmwehọ ruẹ vbe u ghaa fannọ otọ ẹko ruẹ ma iran, ra u sẹtin vbe we ne iran tama ruẹ ako ebe nọhuanrẹn ra uhunmwuta eso ne iran rẹnrẹn wẹẹ, ọ gha sẹtin fu ruẹ ẹko rre.

16. De emwi eso nọ gha sẹtin sunu vbe etẹn ghaa fu ruẹ ẹko rre, sokpan vbọ khẹke ne u kọ ye orhiọn?

¹⁶ Gha mwẹ ẹbo izinegbe, u ghi vbe gha yabọ. Etẹn sẹtin ru abakuru eso vbe iran ghaa rhie igiọdu nuẹn. Vbe igiemwi, iran sẹtin ta emwi eso ra iran sẹtin ru emwi eso nọ gha da ruẹ sẹ ugboloko. Ọ gha sunu vberriọ, gha mwẹ izinegbe. (1 Kọr 13:​4, 7) Ghẹ vbe mianmian emwi nọ rre ebe Jems 3:​2, ọ khare wẹẹ: “Adeghẹ ọmwaikọmwa ma ba emwi ku vbe ẹmwẹ nọ ta, ọni rhie ma wẹẹ, te ọ wa gba ne ọmwa nii fo.” Gha mwẹ ọnrẹn vbe orhiọn wẹẹ, te etẹn hoo ne iran ru iyobọ nuẹn. U ghi vbe yerre wẹẹ “orhiọn te hoo, sokpan, egbe vburriẹ.”​—Mat 26:41.

17. Vbọ khẹke ne ima gha ru nian?

¹⁷ Te emwi khian gha rhia yọ rhia yọ vbe ẹdẹ okiekie ne ima ye na, erriọ ẹre ukpokpo nọ ke obọ eghian ọghe Osanobua rre khian vbe ya gha tua yọ tua yọ, rhunmwuda ọni, ma hia wa gualọ ifuẹko. Nọnaghiyerriọ, wa gi ima hia vbe odẹ ke odẹ ne ima gha rhie igiọdu ne egbe.