Vbene U Khian Ya Sẹtin Rẹn Otọ Igiemwi Na Loo Ro Vbe Baibol

Te igiemwi wa kpọ vbe Baibol. Sokpan, emwa ni bun ma rẹn emwi ne avbe igiemwi na demu. (Mat 13:13) De emwi nọ khian ru iyobọ nuẹn ya gele rẹn otọ avbe igiemwi ughughan na loo ro vbe Baibol? Hia ne u ru emwi eso na sunu yi vbe ototọ mwa:

• Hia ne u rẹn uhunmwu ẹmwẹ na hoo na rhie ladian vbe emwi na ya ru igiemwi. Vbe igiemwi, ebe Arhie Maan 3:3 khare wẹẹ, e Jesu gha rre vbe na ghee oyi. Uhunmwu ẹmwẹ na hoo na rhie ladian vbe igiemwi na ọre wẹẹ, te a ya vbene Jesu khian ya rre hẹ ya gie vbene oyi ya do gha rra ọmwa.

• Hia ne u rẹn vbene uhunmwu ẹmwẹ nọ rrọọ ya rhilo ginna emwi na ya ru igiemwi. U ghi hia ne u rẹn emwi nọ si ẹre na na ya emwi ọkpa gie emwi ọvbehe, kevbe vbene emwi na yae gie ya rhilo ginna egbe hẹ.

• U ghi hia ne u rẹn emwi ne igiemwi nii gele demu. Ugbẹnso, a sẹtin miẹn wẹẹ, ọmwa i khian wa rẹn otọ evbọzẹe na na ya emwi ọkpa gie emwi ọvbehe. Vbe igiemwi na ru odukhunmwu ban, ẹ i re te Jesu dee nọ do rra vbe na ghee oyi. Nọghayayerriọ, ẹmwẹ na ta sẹ evba rhie ẹre ma wẹẹ, te urremwẹ ọghe Jesu khian gha yevbe na ghee ọghe oyi, nọ rhie ma wẹẹ, ẹghẹ ne emwa ma ya aro yi ẹre ọ khian ya rre.