Vbọ Khian Ru Iyobọ Nuẹn Ya Mu E Jehova Karo Vbe Ẹdagbọn Ruẹ?

1-2. De vbene emwi nọ te ru ekpataki gha ya sẹtin rhie ima ekhọe hin emwi nọ khẹke ne ima ru rre?

GIA kha wẹẹ, u fi imọto khian, ọmwa na tie ruẹ vbe efoni. U sẹtin gha roro ẹre deghẹ ọmwa nọ tie ruẹ nii wa gualọ iyobọ ruẹ ọghe ẹgiẹgiẹ, sokpan, u vbe rẹn wẹẹ, te ọ khẹke ne u mu aro ye imọto ne u fi, ne u ghẹ mieke na miẹn odekun. Erriọ ẹre ọ wa vbe ye, ọ mwẹ ẹghẹ eso vbe ẹdagbọn ima nọ ya khẹke ne ima zẹ emwi nọ ru ekpataki sẹ, ne ima khian mu karo.

² Emwi ni bun rrọọ ni ru ekpataki ne ima ru vbe ẹdẹgbegbe. Sokpan, ma rẹnrẹn wẹẹ, ugamwẹ ne ima rhie ne Jehovaa ẹre ọ ru ekpataki sẹ. (Mat 6:33) Vbe na ghee ọmwa nọ mu aro ye imọto nọ fi, te eguọmwadia e Jehova wa begbe ne emwi rhọkpa ghẹ rhie iran ekhọe hin ugamwẹ e Jehova rre.​—Itan 4:25; Mat 6:22.

3. Vbe ima khian zẹ iro yan vbe ako iruẹmwi na kevbe wẹẹ, de vbene ako iruẹmwi na khian ya ru iyobọ ne ima hẹ?

³ Ma rhọkpa i rrọọ nọ hoo ne emwi rhie ẹre ekhọe hin ugamwẹ e Jehova rre. Ọrheyerriọ, ma hia wa werriẹ aro daa emwi nọ gha sẹtin rhie ima ekhọe hin ugamwẹ e Jehova rre. (Luk 21:​34-36) Rhunmwuda ọni, ne ima mieke na sẹtin mu ugamwẹ e Jehova karo, gi ima zẹ iro yan (1) emwi eso nọ gha sẹtin rhie ima ekhọe hin ugamwẹ e Jehova rre, (2) emwi ne Jesu ru nọ ru iyobọ nẹẹn ya mu ugamwẹ e Jehova karo, kevbe (3) emwi nọ gha ru iyobọ ne ima ya mu ugamwẹ e Jehova karo vbe ẹdagbọn ima.

DE EMWI ESO NỌ GHA SẸTIN RHIE IMA EKHỌE HIN UGAMWẸ E JEHOVA RRE?

4-6. De emwi eso nọ gha sẹtin rhie ima ekhọe hin ugamwẹ e Jehova rre?

⁴ Emwi bun nọ gha sẹtin rhie ima ekhọe hin ugamwẹ e Jehova rre. Vbe igiemwi, te ima gha gbaroghe egbe ima vbe ima ghaa khuọnmwi, te ima gha kpemehe ne ẹgbẹe ọghe ima, ọghe obọ ima vbe rre evba. Ọghe ne ẹmwata, emwi nọ ru ekpataki nọ khẹke ne ima ru ẹre ena hia khin. Sokpan, iran gha sẹtin rhie ima ekhọe hin ugamwẹ e Jehova rre ra? Ẹẹn, iran gha sẹtin adeghẹ a na miẹn wẹẹ, avbe emwi na ọkpa ẹre ima ghi mu roro vbe ẹghẹ hia, kevbe wẹẹ, ẹre ima ghi vbe loo ẹghẹ ima yi.

⁵ Vbe deba ọni, ma ni bun sẹtin gha rre otọ ẹvbo ne emwa na khọn, a sẹtin miẹn wẹẹ, ọ lọghọ a ke miẹn iwinna vbe eke ne ima ye, a sẹtin vbe miẹn wẹẹ, emianmwẹ nọ wegbe wa vẹwae vbe ẹdogbo nii. (2 Tim 3:1) Adeghẹ ima na gha rre eke ne egbe avbe emwi vbenian na sunu, ọ sẹtin do ya ima gha si osi gberra egbe.

⁶ Ọ gha kẹ, ma rẹn emwa eso ne ẹdagbọn iran fi werriẹ rhunmwuda ne iran na werriẹ aro daa egbe avbe emwi vbenian. Ma rẹnrẹn wẹẹ, egbe avbe emwi vbenian wa ya iro han ọmwa. E Jehova ma te yi ima ne ima gha si osi. Ẹ i khabe ne emwa eso i na sọyẹnmwẹ ẹdagbọn iran rhunmwuda ọlọghọmwa ne iran ye. Rhunmwuda ọni, eso keghi gualọ emwi ne iran khian ya gha rọkhọ egbe vbe ẹghẹ hia, ne orhiọn iran mieke na sẹ otọ. Vbọ khẹke ne ima ru vbe emwi vbenian gha sunu daa ima? Gi ima guan kaẹn emwi ne ima gha miẹn ruẹ vbe obọ e Jesu nọ gha ru iyobọ ne ima ya mu ugamwẹ e Jehova karo.

DE EMWI NE JESU RU NỌ RU IYOBỌ NẸẸN YA MU UGAMWẸ E JEHOVA KARO?

7. De emwi eso nọ gha te sẹtin rhie ekhọe Jesu hin ugamwẹ e Jehova rre?

⁷ Emwi eso nọ gha te sẹtin rhie ekhọe Jesu hin ugamwẹ e Jehova rre ọre ẹmwẹ arriọba agbọn na ra emwi nọ sunu vbe ẹvbo. Vbe ẹghẹ e Jesu ivbiogue ẹre emwa ni bun ghaa khin, eso vbe gha khuọnmwi. (Mat 14:14; Mak 14:7) Te Ivbi e Rom kevbe Ivbi e Ju ne ihua iran wa gha ya agbọn lọghọ iran. Vbe emwa ghi bẹghe ẹre wẹẹ, Jesu mwẹ ẹtin nọ ya ru emwi ọyunnuan, iran na gha hoo ne iran ma ẹre ọba. (Jọn 6:​14, 15) Vbe deba ọni, Esu keghi danmwẹ e Jesu ghee, ọ na tama rẹn wẹẹ, irẹn gha mu uhunmwu otagbọn nẹẹn nọ gha kha yan rẹn. (Mat 4:​8, 9) Uhiẹn, ukọ ighẹ e Pita nọ re ọkpa vbe usun emwa ni ghi sikẹ Jesu sẹ, kegha bu e Jesu ude dan, ọ na tama rẹn wẹẹ: “Wẹ vbe gha tohan egbuẹ, Enọyaẹnmwa.”​—Mat 16:​21, 22.

8. De emwi ne Jesu ru nọ ru iyobọ nẹẹn ya mu ugamwẹ e Jehova karo?

⁸ De emwi ne Jesu ghi ru nọ ru iyobọ nẹẹn ya mu ugamwẹ e Jehova karo? Emwi eha ẹre ọ ru iyobọ nẹẹn. Okaro, ọ kegha roro emwi vbene Jehova vbe ya roro emwi. (Jọn 8:28; 14:9) Nogieva, ọ rhiegba ye ugamwẹ e Jehova. (Mat 9:35) Nogieha, ọ rẹn emwi nọ ru ekpataki sẹ. (Jọn 4:34) Ọ keghi mudia gbain, ọ ma de ye edanmwẹ ọghe Esu. Vbe deba ọni, agharhemiẹn wẹẹ, ekhọe nọ maan ẹre Pita te ya ta ẹmwẹ nọ tae, Jesu ma kue ne iziro nọ ma gba ọghe Pita mu irẹn ekhọe rhia. (Mat 4:10; 16:23) E Jesu ma kue ne iziro ọghe emwa, ẹmwẹ ne iran ta ra emwi ne iran ru mu idobo ye irẹn egbe nẹ irẹn ghẹ ru emwi ne Jehova gualọ. A sẹtin miẹn wẹẹ, emwi ni gha sẹtin rhie ima ekhọe hin ugamwẹ e Jehova rre vbe ẹdẹnẹrẹ lughaẹn ne emwi ne Jesu werriẹ aro daa. Sokpan ma gha ya egbe taa e Jesu ma gha sẹtin gban egbe ne emwi ke emwi nọ gha sẹtin rhie ima ekhọe hin ugamwẹ e Jehova rre.

EMWI NỌ GHA RU IYOBỌ NE IMA YA MU UGAMWẸ E JEHOVA KARO VBE ẸDAGBỌN IMA

9. Vbe a yae kha vbe a gha we ne ima “rẹn emwi ne Jehova hoo”? (Ẹfisọs 5:17)

⁹ Hia ne u gha roro emwi vbene Jehova vbe ya roro emwi. Ọna gha ru iyobọ ne ima ya “rẹn emwi ne Jehova hoo.” (Tie Ẹfisọs 5:17.) Adeghẹ ima na gha tie Baibol, ma na vbe gha mu emwi ne ima tie roro, ọ gha ru iyobọ ne ima ya rẹn emwi nọ ya ẹko rhiẹnrhiẹn e Jehova, ọ gha khọnrẹn nọ gha re emwi ne Baibol ma wa gbe uhi yi. Odẹ vbo? Ma ghi hia ne ima rẹn emwi ne Jehova hoo ne ima ru, ma ghi vbe zẹ owẹ lelẹe.

10. Vbe ima khian ya sẹtin rẹn odẹ ne Jehova ya roro emwi hẹ?

¹⁰ Adeghẹ ima na gha tie Baibol, ma na vbe gha muẹn roro obọ ne Jehova ya mu emwa vbe ẹghẹ nọ gberra, ọ ghi ru iyobọ ne ima ya rẹn vbene Jehova ya roro emwi hẹ. (Jer 45:5) Zẹvbe ne ima ya tie Baibol, ma sẹtin nọ egbe ima wẹẹ: ‘De emwi ne ọna ma mwẹ re vbekpa e Jehova? Vbọ khian ya ru iyobọ mẹ ne I sẹtin gha roro emwi vbe na ghee Jehova?’ Ẹmwata nọ rrọọ ọre wẹẹ, odẹ ne Jehova ya roro emwi sẹ ọghe ima ẹ i re nekhere. (Aiz 55:9) Ọni ẹre ọ si ẹre ne ima na hoo nọ ru iyobọ ne ima ya sẹtin gha ru ahoo ọghẹe. (Psm 143:10) Ma ghi vbe gha nọ rẹn vbe erhunmwu nọ ru iyobọ ne ima ya gha roro emwi vbene irẹn vbe ya roro emwi.​—1 Jọn 5:14.

11. De emwi ne Jehova hoo nọ ru ne ima?

¹¹ Zẹvbe ne ima ya hia ne ima gha roro emwi vbe na ghee Jehova ma ghi do bẹghe ẹre wẹẹ, e Jehova ma hoo ne emwi rhọkpa rhie ima ekhọe hin ugamwẹ ọnrẹn rre, ne ima mieke na sẹtin mudia ẹse sẹ ufomwẹ. (Mat 24:44) Ọ ma hoo ne ima gha si osi gberra egbe. (Mat 6:​31, 32) Ọna ẹre ọ si ẹre ne Jehova na rhie ibude esiesi ne ima, ne ima mieke na rẹn emwi nọ khẹke ya ru vbe ima ghaa si osi vbekpa ẹmwẹ egberranmwẹ, iwinna, ẹgbẹe ọghe ima ra emwi ọvbehe. Ma ghaa rre uwu ọlọghọmwa, te ọ khẹke ne ima nọ e Jehova nọ rhie ẹtin kevbe ẹwaẹn ne ima ya sẹtin zin egbe, e Jehova wa vbe mu egbe nọ ya ru vberriọ.​—Psm 55:22; Itan 3:​5-7.

12. Vbọ khian ru iyobọ ne ima, ne ima ghẹ gha si osi rhunmwuda emwi dan ni sunu? (Matiu 5:3)

¹² Rhiegba ye ugamwẹ e Jehova. Ma hia zẹdia si osi rhunmwuda emwi dan ni sunu vbe agbọn na, sokpan, ma i mwẹ ẹtin ne ima khian ya dobọ ọre yi. Rhunmwuda ọni, te ọ khẹke ne ima rhiegba ye ugamwẹ e Jehova, ma gha ru vberriọ, ma i khian gha si osi vbekpa emwi ne ima i khian sẹtin fi werriẹ. Te Jehova yi ima ne ima gha hoo ne ima sikẹ irẹn, rhunmwuda ọni, ma ghaa hia ne ima gha ru emwi nọ gha ya ima sikẹ ọre sayọ, te ọyẹnmwẹ khian gha sẹ ima. (Tie Matiu 5:3.) De vbene ima khian ya ru ọnọna? Te ọ khẹke ne ima gha tie Baibol vbe ẹghẹ hia ne ima mieke na gha sikẹ e Jehova sayọ, ma ghi vbe hia ne ima ru emwi ke emwi ne ima gha sẹtin ru vbe ugamwẹ e Jehova. Odẹ vberriọ, te ima ya ẹko rhiẹnrhiẹn e Jehova, rhunmwuda ma loo ẹghẹ ima ẹse.​—Itan 23:15.

13. Vbe ima khian ya “gha loo ẹghẹ ọghe [ima] ẹse” hẹ?

¹³ Zẹvbe Ivbi Otu e Kristi, te ọ khẹke ne ima “gha loo ẹghẹ ọghe [ima] ẹse.” (Ẹfis 5:​15, 16; ya ghee study note nọ khare wẹẹ, “making the best use of your time.”) Ma rẹnrẹn wẹẹ, ẹ i wa re vbene ima ya loo ẹghẹ ima ye dọmwadẹ emwi ne ima ru vbe ẹdẹgbegbe ẹre Baibol guan kaẹn mwa. Sokpan, emwi nọ guan kaẹn ọre ne ima hia ne ima loo ẹghẹ ima ya ru emwi nọ khẹke a te miẹn wẹẹ, ọ sẹ ẹghẹ ne Jehova khian ya mu agbọn dan na sẹ ufomwẹ. Vbe ima khian ya ru ọna hẹ? Adeghẹ ẹghẹ hia ẹre ima ya danmwehọ avbe iyẹn dan nọ ladian vbe ughae iyẹn, egbe sẹtin do wọọ ima sẹrriọ wẹẹ, ma i ghi sẹtin rhiegba ye ugamwẹ e Jehova. Ọna ẹre ọ si ẹre nọ ma na khẹke ne ima wa gha danmwehọ egbe avbe iyẹn na vbe ẹghẹ hia! Ẹghẹ nii, iro i khian han ima, ma ghi vbe sẹtin rhiegba ye ugamwẹ e Jehova. Te ọ vbe khẹke ne ima hia ne ima ru sayọ vbe iwinna ikporhu, vbe igiemwi, ma sẹtin hia ne ima gha mwẹ emwa ni bun ne ima gu ruẹ e Baibol. Gi ima hia ne ima loo ẹkpotọ nọ rhirhi kie ya ru iyobọ ne emwa, ne iran mieke na “miẹn fan, ne iran vbe gha mwẹ irẹnmwi nọ gbae ọghe ẹmwata,” rhunmwuda, ọkpa vbe usun emwi nọ kakabọ ru ekpataki ẹre na khin.​—1 Tim 2:4.

14. Adeghẹ ima na rhiegba ye ugamwẹ e Jehova, de vbene ọ khian ya ru iyobọ ne ima hẹ? (Vbe ya ghee efoto.)

¹⁴ Ma gha rhiegba ye ugamwẹ e Jehova, ọ ghi ru iyobọ ne ima ya gha ye ẹre rre evbọzẹe ne emwi dan na sunu vbe ẹghẹ ne ima ye na. Ẹ i kpa ima odin vbe ima ghaa bẹghe okhọn nọ rre ehe hia, vbene ọ lọghọ emwa hẹ ne iran sẹtin kpemehe ne egbe iran kevbe emianmwẹ nọ vẹwae lele ehe hia. Rhunmwuda, ma rẹnrẹn wẹẹ, emwi ne Baibol tae ye otọ ẹre ọ sunu. Ne ima gha te ya gha mu ohan, te ọ khẹke ne ima gha mwẹ ilẹkẹtin wẹẹ, e Jehova gha mu emwamwa rẹn sẹ. Ma gha mu ẹtin yan e Jehova, ọ ghi ru iyobọ ne ima, ne ima ghẹ gha si osi.​—Psm 16:8; 112:​1, 6-8.

15. Ma ghaa re “emwa ni roro emwi ẹse” vbọ khian ya ru iyobọ ne ima hẹ? (1 Pita 4:7)

¹⁵ Rhie aro tua emwi ni ru ekpataki sẹ. Emwa ni bun vbe ẹdẹnẹrẹ i zẹdẹ roro ẹre wẹẹ, agbọn na gha rherhe sẹ ufomwẹ, emwi ughughan ne iran ya rọkhọ egbe ẹre iran wa mu yan uhunmwu. Agharhemiẹn wẹẹ, irọkhegbe i re emwi dan, ọ khẹke ne ima gha begbe ne ima ghẹ do gha ru emwi vbe na ghee emwa ni rre uwu agbọn, sokpan ma ghi hia ne ima gha re “emwa ni roro emwi ẹse.” (Tie 1 Pita 4:7.) Ọna gha ru iyobọ ne ima ya gha ya aro nọ khẹke ghee ẹmwẹ irọkhegbe kevbe ne ima sẹtin gha ru azẹ nọ maan. Ma ghaa loo ẹghẹ ima ẹse te ima rhie ẹre ma wẹẹ, ma roro emwi vbene Jehova vbe ya roro emwi kevbe wẹẹ, ma gele rẹn emwi nọ ru ekpataki sẹ.​—2 Tim 1:7.

16. De emwi ne Jesu ru vbọ ghi bu ẹghẹ nọ khian ya wu?

¹⁶ E Jesu ma mianmian emwi nọ ru ekpataki sẹ. Ọ ghi bu ẹghẹ ne Jesu khian ya wu, ọ keghi kakabọ rhikhan mu Osanobua, ọ na vbe rhie aro tua vbene ọ khian ya ru emwi ne Osanobua gie ẹre. Rhunmwuda ọni, e Jesu na rhiegba ye erhunmwu na na. Sokpan, ẹ i re erriọ ẹre ọ ghaa ye ne erhuanegbe Jesu, te iran wa gha vbiẹ. Rhunmwuda, “egbe wọọ iran nẹ, ne iran ya gha khiẹ.”​—Luk 22:​39-46; Jọn 19:30.

17. Vbọzẹ ne emwa ni bun na loo intanẹt, sokpan, de ẹbe nọ rrọọ? (Vbe ya ghee efoto.)

¹⁷ Vbe na ghee erhuanegbe Jesu, egbe sẹtin vbe wọọ ima vbe ugbẹnso, rhunmwuda emwi ughughan ni sunu vbe ẹdẹnẹrẹ. Intanẹt ẹre emwa ni bun ghi wa loo ya gbe iro vbe ẹdẹnẹrẹ. Intanẹt na ẹre iran ya gu avbe ọse kevbe ẹgbẹe ọghe iran ni rre ehe ughughan guan, iran vbe yae sẹnd avbe efoto, iyẹn ughughan kevbe avbe emwi ọvbehe. Iran vbe ghee vidio ughughan vbe intanẹt, erriọ ẹre iran vbe ya gbe gem vbe intanẹt. Rhunmwuda ne emwi ọgbọn na wa ladian vbe intanẹt vbe ẹghẹ hia, ẹ i re ẹghẹ kherhe ẹre iran gbe vbe intanẹt. Ne ima mieke na gha ya aro nọ khẹke ghee intanẹt, te ọ khẹke ne ima nọ egbe ima wẹẹ, ‘Emwi ne I ghee ra emwi ne I ru vbe intanẹt gele mu mwẹ orhiọn sẹ otọ ra, ra te ọ ghi ya mwẹ mianmian emwi nọ gele ru ekpataki sẹ?’

18. Vbọzẹ nọ na khẹke ne ima gha loo ẹwaẹn vbe ima gha khian zẹ emwi ne ima ya rọkhọ egbe?

¹⁸ Ọ vbe khẹke ne ima gha loo ẹwaẹn vbe ima ghaa ghee avbe ikueta vbe intanẹt, avbe vidio ne kuẹi kuẹi ra vbe ima ghaa gbe vidio gem. Avbe emwi vbenian ma de emwi nọ rhiae, rhunmwuda, te ima yae rọkhọ egbe. Sokpan, te ọ vbe khẹke ne ima gha begbe vbe emwi ne ima ghee vbe intanẹt kevbe inu ẹghẹ ne ima loo yọ. Ẹghẹ hia ẹre a ya mu e vidio ọgbọn ladian vbe intanẹt ne emwa gha ghee, avbe vidio na sẹtin gha re ne emwa na gbinna ra ne emwa na yin uyinmwẹ alama oghẹ. Ọna ọre emwi nọ sunu daa ọtẹn ima nokpia ọkpa nọ rre Asia. Ọ na ka suẹn gha ghee avbe abọ ne kuẹi kuẹi ọghe ikueta na mu ladian vbe intanẹt. Zẹvbe nọ ya gha ghee avbe vidio na ne iran mu ladian vbe ẹghẹ hia, ọ na do suẹn gha ghee ikueta ne emwa na yin uyinmwẹ alama oghẹ. Vbene ẹghẹ ya khian, ughe ne emwa na bannọ ruan ra ne iran na ru emwi ọdọ vbe amwẹ ẹre ọ ghi gha ghee. Ma ghọghọ wẹẹ, ediọn kevbe avbe ọsiọre ru iyobọ nẹẹn​—ọ na ghi dilit avbe app nọ na ghee avbe vidio na, ọ na vbe mwamwa ẹghẹ ne irẹn khian gha loo ya piẹn efoni. Okha ọghe ọtẹn na ya ima rẹn evbọzẹe nọ na khẹke ne ima gha loo ẹwaẹn vbe ima ghaa zẹ emwi ne ima ya rọkhọ egbe.

19. De emwi nọ gha sẹtin sunu adeghẹ a na miẹn we ẹmwẹ irọkhegbe ẹre ima ghi wa mu yan uhunmwu?

¹⁹ Ma gha rhie ẹdẹ ne ima ya rọkhọ egbe, ọ vbe khẹke ne ima gha loo ẹwaẹn. Te ọ wa khẹke ne ima zẹdia gha rọkhọ egbe rhunmwuda, irọkhegbe wa maan vbe egbe. Sokpan, adeghẹ a na miẹn wẹẹ, avbe emwi ne ima ya rọkhọ egbe ẹre ima ghi wa mu yan uhunmwu, ma i khian ghi miẹn ẹghẹ ya gha ru emwi ni ru ekpataki sẹ. (Fil 1:10) Dọmwadẹ ima ẹre ọ khian zẹ ne egbe ẹre, emwi nọ khian ya rọkhọ egbe kevbe inu ẹghẹ nọ khian loo yọ. Ma gha khian ru azẹ vberriọ, te ọ khẹke ne ima nọ egbe ima wẹẹ: ‘Ẹghẹ ne I loo ye emwi ne I ya rọkhọ egbe rhie ẹre ma wẹẹ, I roro emwi ẹse ra? Ọ rhie ẹre ma wẹẹ, emwi ni ru ekpataki sẹ ẹre I mu karo ra, kevbe wẹẹ, I mu egbe khẹ “ufomwẹ ọghe emwi hia” ra?’

20. De ere ne ima gha miẹn adeghẹ ima ma gi emwi rhọkpa rhie ima ekhọe hin ugamwẹ e Jehova rre?

²⁰ Adeghẹ ima ma gi emwi rhọkpa rhie ima ekhọe hin ugamwẹ ne ima rhie ne Jehova rre, ma gha wa miẹn ere vbọ. (Aiz 48:17) E Jehova gha ru iyobọ ne ima ya sẹtin zin egbe ọlọghọmwa ne ima rhirhi miẹn. Ma i khian gha si osi rhunmwuda emwi dan ni sunu vbe ẹdẹnẹrẹ. Ma ghi vbe hia ne ima ghẹ mu ẹmwẹ irọkhegbe ye okaro vbe ẹdagbọn ima. Rhunmwuda ọni, wa gi ima gha roro emwi vbene Jehova ya roro emwi, ne ima rhiegba ye ugamwẹ e Jehova, ma ghi vbe hia ne ima rhie aro tua emwi ni ru ekpataki sẹ. Ma gha ru vberriọ, ma ghi sẹtin gban egbe ne emwi ke emwi ni gha sẹtin rhie ima ekhọe hin ugamwẹ e Jehova rre, ma ghi vbe “dobọ mu arrọọ ọghe ẹmwata.”​—1 Tim 6:19.