Mu Ẹtin Yan E Jehova Nọ Re Osa Nọ Yo Sẹ Vbe Agbọn Vbe Ẹrinmwi

1. De ọlọghọmwa nọ wegbe ne Job werriẹ aro daa?

ỌLỌGHỌMWA ne Job miẹn i re ne kherhe, ivbi ẹre hia wulo ye ọre aro, emianmwẹ dekun ẹnrẹn, emwi ewe nọ mwẹ na vbe wii ẹre. Vbe deba ọni, emwa ma ghi gha rhie ọghọ nẹẹn. Te emwa ni tie egbe iran ọsiọre wa vbe yae tua sayọ, rhunmwuda te ẹmwẹ ne iran ghaa ta wa ya iro han e Job. Uhiẹn egbe wọọ ọvbokhan rẹn sẹrriọ wẹẹ, ọ na tama e Job wẹẹ, “Tie ihẹn ne Osanobua ne u wu.” (Job 2:9; 15:​4, 5; 19:​1-3) Emwi nọ sunu na gha te ya e Job gha roro ẹre wẹẹ, e Jehova i gbogba ga emwa ni hoẹmwẹ ọnrẹn kevbe ni gae, rhunmwuda ọni, esa i rrọọ ne irẹn ya mu ẹtin yan rẹn.

2-3. De iziro nọ gha sẹtin la ima ekhọe, de emwi ne ima gha miẹn ruẹ vbe ebe Job?

² Ugbẹnso ma wa vbe werriẹ aro daa ọlọghọmwa nọ wegbe nọ gha sẹtin ya ima gha roro ẹre wẹẹ, e Jehova i zẹyọ ima re. “Ẹghẹ nọ wegbe” ẹre ima wa ye na. (2 Tim 3:1) Ma ghaa ke ọlọghọmwa ọkpa la ọvbehe, ọ sẹtin ya osi gha si ima, ọ ghi vbe do gha lọghọ ne ima sẹtin zin egbe. Egbe emwi vbenian keghi ya emwa eso roro ẹre deghẹ e Jehova gele zẹyọ iran re.

³ Adeghẹ iziro vbenian he ka la ruẹ ekhọe, ghẹ gi egbe wọọ ruẹ. E Job keghi do bẹghe ẹre wẹẹ, e Jehova i sẹ nọ re ọghẹe rae. Ma gha vbe sẹtin mu ẹtin yan Erha ima nọ rre ẹrinmwi vbene Job ru ẹre. Ne ima mieke na sẹtin ru ọnọna gi ima zẹ iro yan emwi eva ne kpataki ne ima gha miẹn ruẹ vbe ebe Job: Nokaro, e Jehova ọre Osa Nọ Yo Sẹ vbe agbọn vbe ẹrinmwi. Nogieva, Osanobua gha sẹtin ru ẹre ne emwi hia sunu vbene irẹn gualọ ọre yi ne ahoo ọghẹe mieke na sẹ. Ọ gbogba ga emwa rẹn, erriọ ẹre ọ vbe ya kpemehe emwi nọ ru iyobọ ne iran ya sikẹ ọre sayọ.

E SETAN NA GHA RRE UWU ẸBU IRAN

4. Vbọ sunu vbe Jehova gu avbe odibo ọghẹe do iko vbe ẹrinmwi?

⁴ Ebe Job 1:6 gi ima rẹn wẹẹ, “avbe odibosa” keghi gbẹbu vbe odaro e Jehova vbe ẹrinmwi. Ako nii vbe kha wẹẹ: “E Setan na vbe gha rre uwu ẹbu iran.” Ọna ọre ẹghẹ okaro na ya sunu ye eni na ighẹ e “Setan,” vbe Baibol, emwi ne eni na demu ọre “Ọmwa Nọ Gbe Ọmwa Odan,” rhunmwuda nọ na gbodan ghee Osanobua. Vbe ẹghẹ na kha na, Esu sọtẹ daa Osanobua nẹ. Esu na ghi do khian oghian e Jehova, oghian avbe odibosa kevbe oghian emwa hia ni ga Osanobua. Ẹmwẹ ne Jehova tae vbe ebe Gẹnẹsis 3:15 rhie ẹre ma wẹẹ, e Jehova kpe Setan hin ọmọ rre nẹ vbe ẹghẹ na kha na. Nọnaghiyerriọ, e Setan i re ọkpa vbe ẹgbẹe ọghe Jehova nọ rre ẹrinmwi nọ mudia ye ihe “okhuo nii” nọ khian do biẹ “ọmọ” nii.

5. Vbe ima miẹn ruẹ vbe emwi nọ sunu vbe ẹrinmwi?

⁵ E Jehova keghi gia miẹn wẹẹ, a gbẹn emwi nọ sunu vbe iko nii ye Baibol. Ẹmwẹ ne Setan tae wa gele rhie ẹre ma wẹẹ, ọmwa dan ẹre wa nọ, kevbe wẹẹ, ohoghe ẹre emwi hia nọ tae vbekpa emwa ni ga e Jehova khin. (Job 1:9; yae taa Arhie Maan 12:10.) Ne Jehova na we na gbẹn emwi nọ sunu na ye otọ keghi ya ima mwẹ ilẹkẹtin wẹẹ, Osa nọ ru emwi nọ gbae ẹre Jehova khin. Ọ vbe ya ima rẹn wẹẹ, Osa nọ mwẹ asẹ nọ ya ta emwi ne emwa gha sẹtin ru kevbe ne iran i khian sẹtin ru ẹre Jehova khin.

E JEHOVA ẸRE Ọ TA EMWI NE EMWA GHA SẸTIN RU KEVBE NE IRAN I KHIAN SẸTIN RU

6. De vbene Jehova ya rhie ẹre ma wẹẹ, irẹn ẹre ọ ta ẹmwẹ nọ sẹ vbe iko ne iran do vbe ẹrinmwi? (Job 1:​7, 8)

⁶ Tie Job 1:​7, 8. E Jehova ẹre ọ ta ẹmwẹ nọ sẹ vbe iko ne iran do vbe ẹdẹrriọ. Ọ keghi nọ e Setan wẹẹ: “U ma miẹn ọguọmwadia mwẹ ighẹ e Job?” E Jehova rẹn nẹ vbe ẹghẹ na we Esu hoo nọ danmwẹ e Job ghee. Nian gi ima guan kaẹn vbene Jehova ya loo ẹtin ọghẹe ya ru iyobọ ne Job.

7. Zẹvbe nọ rre ebe Job 1:​10, 11, de emwi ne Setan ghaa hoo nọ ta?

⁷ Tie Job 1:​10, 11. E Jehova ọre Osa Nọ Yo Sẹ vbe agbọn vbe ẹrinmwi, rhunmwuda ọni, ọ mwẹ asẹ kevbe ẹtin nọ khian ya ru emwi ke emwi nọ hoo nọ ru, emwi nọ maan ẹre ọ ru vbe ẹghẹ hia. (Jer 32:17; Dan 4:35) Ọrheyerriọ, e Setan na kha wẹẹ, e Jehova ma loo ẹtin ẹnrẹn vbe odẹ nọ khẹke. Emwi ne Setan ya ọna kha ọre wẹẹ, te Osanobua kpemehe ne emwa nagbọn zẹvbe nọ kpemehe ne Job, ne iran mieke na gha gae. Emwi ọvbehe ne Setan ghaa hoo nọ ta ọre wẹẹ, emwa nagbọn keghi ga e Jehova rhunmwuda emwi ne iran miẹn vbe obọ ọre. De emwi ne Jehova ghi ru?

8-9. De emwi ne Jehova tama e Setan nẹ ghẹ ru, kevbe wẹẹ, vbọzẹ? (Job 1:12) (Vbe ya ghee efoto.)

⁸ Tie Job 1:12. E Jehova keghi kie ẹkpotọ ne Esu ya danmwẹ e Job ghee, sokpan ọ na gbe uhi nẹẹn, nẹ ghẹ rhie obọ gberra emwi ne irẹn tama rẹn. Osanobua na tama Esu wẹẹ: “Ghẹ ya obọ kaẹn [Job]!” Odaro avbe odibo ni ghaa rre evba ẹre Jehova na gbe uhi na ne Setan. E Setan i khian sẹtin rhie obọ gberra ẹmwẹ ne Jehova tama rẹn, rhunmwuda ọni, ọ keghi ru vbene Jehova khare. Erriọ ẹre ọ wa vbe ye vbe ẹdẹnẹrẹ. Te Jehova wa gele loo asẹ ọghẹe kevbe ẹtin nọ mwẹ ya gbogba ga e Job, ọ na vbe rhie ẹre ma wẹẹ, Osa nọ bu ohiẹn ata kevbe nọ mwẹ ahoẹmwọmwa ẹre irẹn khin.

⁹ Sokpan, vbene Setan hia sẹ vbe ẹghẹ okaro nii, ọ ma gba ẹre nẹẹn. E Job na ye rhikhan mu e Jehova. (Job 1:22) Sokpan, e Setan ma ye zẹ ọre obọ vbe ẹkun.

10. Vbọzẹ ne Jehova na kue ne Setan dọlegbe danmwẹ e Job ghee? (Job 2:​2-6)

¹⁰ Tie Job 2:​2-6. E Setan khian ghi dọlegbe danmwẹ e Job ghee, ọ kegha hoo nọ ru ẹre emwi nọ wa kakabọ wegbe nọ mieke na sẹ e Jehova rae. E Setan na gha hoo nọ rhie ẹre ma wẹẹ, e Job ghaa rre agbamwẹ idin, ọ ghi sẹ e Jehova rae, nọ mieke na da arrọọ ọghẹe yi ye agbọn. Ne Jehova mieke na rhie ẹre ma wẹẹ, ohoghe ẹre Esu ta, ọ na kue yọ nọ mu emianmwẹ ku e Job. Sokpan, e Jehova na dọlegbe gbe uhi nẹẹn wẹẹ: “Ghẹ gbe ẹre rua!” Ọna rhie ma wẹẹ, e Setan ma gha mwẹ asẹ nọ khian ya gbe Job rua, rhunmwuda Osanobua ma kue yọ ọre. Ma bẹghe ẹre wẹẹ, e Jehova dọlegbe rhie ẹre ma vbe emwa wẹẹ, irẹn ọre Osa Nọ Yo Sẹ vbe agbọn vbe ẹrinmwi, rhunmwuda e Setan ma sẹtin rhie obọ gberra emwi ne Jehova tama rẹn.

E JEHOVA KEGHI SỌFURRE YE ỌLỌGHỌMWA NE JOB GHAA YE

11. E Jehova ghi sọfurre ye ọlọghọmwa ne Job ghaa ye, de vbene ọ ghi ya fiangbe Job hẹ? (Job 42:​10-13)

¹¹ Tie Job 42:​10-13. Vbene Esu hia sẹ, e Job ma ye sẹ e Jehova rae, e Jehova ma ghi kue ne Esu dọlegbe danmwẹ ọnrẹn ghee. E Jehova keghi sọfurre ye ọlọghọmwa ne Job ghaa ye. E Setan ma ghi miẹn emwi ru, e Jehova keghi dọlegbe rhie ẹre ma we irẹn ẹre ọ ta ẹmwẹ nọ sẹ.

12. De igiemwi nọ rhie ẹre ma, vbene Jehova ya ru iyobọ ne eguọmwadia ẹre ni mu ẹtin yan rẹn.

¹² E Jehova wa vbe gbaroghe eguọmwadia ẹre vbe ẹdẹ okiekie ne ima ye na. Vbe igiemwi, vbe ukpo 1945, avbe ivbiyokuo ọghe Germany keghi we ne etẹn ni re 230 ya owẹ khian la ehe nọ kakabọ taan vbe otọ, ọni ọre ke eghan nọ rre Germany gha rrie eke ne okun ye, ne iran mieke na ya gbe iran rua vbe evba. Sokpan etẹn hia keghi miẹn uhunmwu. Etẹn na ghi guan kaẹn emwi ne iran miẹn, iran na kha wẹẹ: “Ẹ i re ukpokpo nekherhe ẹre ima werriẹ aro daa, te Jehova wa miẹn ima fan zẹvbe nọ vbe ya miẹn Ivbi e Hibru eha fan vbe uwu ogidi erhẹn, uhiẹn, ighogho ma wia lele iran. . . . Vbene Jehova ya rhie ẹtin ne iran, erriọ ẹre Jehova vbe ya rhie ẹtin ne ima.” Iran na vbe kha wẹẹ: “Te ọ wa vbe yevbe na miẹn wẹẹ, te a fi ima fi uwu uvun oduma . . . sokpan emwi ọkpa ne ima wa gha gualọ, ọre ne ima sẹtin ga e Jehova . . . sẹ ufomwẹ, vbe ima gha [ghi] ladian vbe evba nii nẹ. Afiangbe nọ sẹ ọna i rrọọ.”​—Yae taa Daniẹl 3:27; 6:22.

13. De ilẹkẹtin ne ima mwẹ vbe ima ghaa rre uwu ọlọghọmwa? (Vbe ya ghee avbe efoto.)

¹³ Ugbẹnso, ma ghaa rre uwu ọlọghọmwa, ọ ghi yevbe na miẹn we te a fi ima fi uwu uvun oduma. (1 Pit 5:​8-10) Ẹghẹ eso, egbe sẹtin wa wọọ ima, ma ghi do gha roro ẹre deghẹ ọlọghọmwa ne ima ye gha kue fo vbe otọ. Vbe ẹghẹ vbenian, igiemwi ọghe Job gha sẹtin ru iyobọ ne ima. Ma mwẹ ilẹkẹtin wẹẹ, e Jehova gha sọfurre ye ọlọghọmwa ọghe ima. Adeghẹ ọ ma na sọfurre yọ vbe ẹghẹ na, ọ gha ru ẹre vbe agbọn nọ dee. E Jehova bu ẹdẹ yọ nẹ nọ khian ya mu agbọn dan na sẹ ufomwẹ, ẹ i khian kue nọ ya ẹdẹ ọkpa gberra!

E JEHOVA HOẸMWẸ EGUỌMWADIA ẸRE NI MWẸ ẸKOATA

14-15. De emwi ne Jehova khian ru ne eguọmwadia ẹre ni mwẹ ẹkoata daa ẹre, kevbe wẹẹ, vbọzẹ? (Job 14:15) (Vbe ya ghee efoto.)

¹⁴ Tie Job 14:15. E Jehova i ya ẹmwẹ eguọmwadia ẹre ni mwẹ ẹkoata ku. Ọ hoẹmwẹ iran sẹrriọ wẹẹ, ọ gha khọnrẹn we iran wu, ọ gha huẹn iran kpaegbe. Obalọ ne uwu si ye eguọmwadia ẹre egbe i khian ghi gha rrọọ.​—Aiz 65:17.

¹⁵ Agharhemiẹn wẹẹ, agbọn Esu na ẹre Job ye gha ye, e Baibol gi ima rẹn wẹẹ, e Jehova keghi muẹn egbe rran, ọ na vbe fiangbe ẹre sẹrriọ wẹẹ, emwi nọ ghi gha mwẹ keghi sẹ nọ ka gha mwẹ vbene Esu te danmwẹ ọnrẹn ghee. Ọrheyerriọ, afiangbe nọ kakabọ sẹ ena hia, ẹre ọ khian miẹn vbe obọ e Jehova vbe odaro. E Jehova rhie ẹre ma nẹ we irẹn hoo ne emwa ni ya ẹkoata gae gha mwẹ ọyẹnmwẹ nọ sẹ otọ ẹko kevbe ne iran vbe gha sọyẹnmwẹ ẹdagbọn iran. Uhiẹn, e Jehova gha fiangbe emwa hia ni ya ẹkoata gae, iran ghi do gha re emwa ni gbae, iran ghi vbe rri orhiẹnrhiẹn agbọn vbe paradais vbe etẹbitẹ. (Arhie 21:​3, 4) Zẹvbe Osa Nọ Yo Sẹ vbe agbọn vbe ẹrinmwi, e Jehova wa hoo nọ ru vberriọ. Ọna wa fu ima ẹko rre, vbe ima ghaa rre uwu ọlọghọmwa!

16. De emwi ọvbehe nọ si ẹre nọ na khẹke ne ima mu ẹtin yan e Jehova zẹvbe Osa Nọ Yo Sẹ vbe agbọn vbe ẹrinmwi?

¹⁶ Agharhemiẹn wẹẹ, e Job ye wu, te ọ wa gele tọ ẹsẹse. E Jehova ọre Osa Nọ Yo Sẹ vbe agbọn vbe ẹrinmwi, irẹn ẹre ọ vbe re Osa ne Udazi, rhunmwuda ọni, ọ mwẹ ẹtin nọ khian ya huẹn emwa ni wulo kpaegbe. (Diut 32:39) Rhunmwuda ọni, ọmwa rhọkpa i khian sẹtin da ẹre obọ yi nẹ ghẹ huẹn emwa nọ hoẹmwẹ ọnrẹn kpaegbe vbe uwu, ọ gha vbe ru ẹre vbe ẹghẹ nọ hoo nọ ya ru ẹre.​—Rom 8:​38, 39.

YA EKHỌE HIA MU ẸTIN YAN E JEHOVA

17. Vbọ ya ima rẹn wẹẹ, obọ Esu i khian sẹtin gba eguọmwadia e Jehova?

¹⁷ Ebe Job gi ima rẹn emwi ni bun nọ si ẹre nọ na khẹke ne ima ya ekhọe hia mu ẹtin yan e Jehova. Ma wa ghọghọ we Jehova ma kue ne Esu wabọ eguọmwadia ẹre hia rua! Vbe ẹdẹnẹrẹ, emwa ni ga e Jehova gberra ẹbo ihinhin, ọna so igiẹ yọ wẹẹ, Osa Nọ Yo Sẹ vbe agbọn vbe ẹrinmwi ẹre ima gele ga. Osẹ ni bun rhie ẹre ma nẹ wẹẹ, ẹ i mwẹ vbene Esu gha hia sẹ hẹ, obọ ọre i khian sẹtin gba ima. (Aiz 54:17) Agbẹnvbo ni bun ni wegbe kevbe avbe otu ugamwẹ te wa hia ne iran mu idobo ye ugamwẹ ne ima rhie ne Jehova, iran wa vbe hia ne iran dobọ iwinna ikporhu ọghe ima yi, sokpan, ọ ma gba ẹre ne iran rhunmwuda, e Jehova rre ima iyeke. Emwi rhọkpa i khian vbe sẹtin da ima obọ yi ne ima ghẹ ta ẹmwata vbekpa e Jehova kevbe ne ima ghẹ gi emwa rẹn wẹẹ, ọmwa ohoghe kevbe izigha ẹre Esu khin. Uhiẹn, ọ gha khọnrẹn we ima wu, e Jehova gha huẹn ima kpaegbe adeghẹ ima na rhikhan muẹn sẹ ufomwẹ.​—Hos 13:14.

18. Vbọzẹ nọ ma na khẹke ne ima gha mu ohan emwi ni khian sunu vbe odaro?

¹⁸ Ma ghaa mu okha ọghe Job roro, ọ ghi ya ima gha mwẹ ilẹkẹtin wẹẹ, e Jehova gha ru iyobọ ne ima ya la ọlọghọmwa ne ima rhirhi gha ye gberra. Vbe ẹghẹ orueghe nọkhua, ọ ghi yevbe na miẹn wẹẹ, eguọmwadia e Jehova i mwẹ iyobọ, ọ ghi vbe yevbe na miẹn wẹẹ, obọ Esu kevbe ekpayẹ ọre khian ke ukhunmwu ne ima. Sokpan, zẹvbe nọ ghaa ye ne Job, e Jehova i khian sẹ ima rae, ẹ i khian kue ne Esu wabọ ima rua. Vbe nẹi khian ghi kpẹẹ gbe, e Jehova gha sọfurre ye ọlọghọmwa hia ne Esu he si ye ima egbe. A gha fi Esu kevbe avbe ekpayẹ ọre fi uwu uvun nẹi mwẹ otọ vbe ọwara ukpo 1,000. (Luk 8:31; Arhie 20:​1-3) Ọ gha sẹ ẹghẹ, a ghi fuẹn Esu kevbe emwa hia ni ye ẹre ike. (Arhie 20:10) Zẹvbe ne Jehova tae ye otọ, a gha lọkọ uhunmwu e Setan. A i ghi vbe dọlegbe miẹn ọnrẹn.​—Gẹn 3:15; Rom 16:20.

19. De afiangbe ne emwa hia ni ya ekhọe hia mu ẹtin yan e Jehova khian miẹn? (Vbe ya ghee efoto.)

¹⁹ Te eguọmwadia e Jehova wa ya aro ye agbọn ọgbọn ne emwa hia khian na gha re emwa ni gbae, kevbe ne emwa hia khian na gha ghọghọ. Agbọn ọgbọn gha rre, emwi ghi kue maan sẹ vbene ima te ya aro yi. E Jehova yan rẹn wẹẹ: “Ghee oo! I ya emwi hia khian ọghe ọgbọn.” (Arhie 21:5) Vbe ọ ya ọna kha? Ke ẹghẹ Adam vbe Ivi gha dee, ọna ẹre ọ khian gha re ẹghẹ okaro ne Esu kevbe ekpayẹ ọre i khian na sẹtin ya emwa nagbọn ru emwi nọ ma gba. Te egbe khian gele rọkhọ ima! Te ima khian gha vbiẹ fanran rhunmwuda, emwi rhọkpa i ghi kpokpo ima vbe orhiọn. Emwa hia ni miẹn uhunmwu vbe okuo Amagẹdọn gha miẹn emwi ọyunnuan ọghe vbene egbe khian ya rran emwa hia hẹ. Vbe deba ọni, emwa ima hia ni wulo ghi suẹn gha rhiọ kpaegbe. Ma ghi do gha sọyẹnmwẹ ẹdagbọn ima zẹvbe ne Jehova mwamwaẹn ke otọ gha dee!

20. De emwi nọ khẹke ne ima ru?

²⁰ Vbe ẹdẹ okiekie ne ima ye na, ẹ i mwẹ ma ma werriẹ aro daa ọlọghọmwa ughughan, sokpan te ọ khẹke ne ima rhikhan mu e Jehova, ma ghi ya ekhọe hia mu ẹtin yan ẹnrẹn, ma ghi vbe gha họn ẹmwẹ nẹẹn zẹvbe Osa Nọ Yo Sẹ vbe agbọn vbe ẹrinmwi. Wa gi ima gha rhie ẹre ma wẹẹ, ma hoẹmwẹ e Jehova kevbe wẹẹ, ọmwa ohoghe ẹre Esu khin. Ma gha sẹtin gha mwẹ ilẹkẹtin wẹẹ, e Jehova nọ re Osa Nọ Yo Sẹ vbe agbọn vbe ẹrinmwi wa hoo nọ tue afiangbe ne wọrhọwọrhọ yan ima, adeghẹ ima na rhikhan muẹn sẹ ufomwẹ!