Ẹghẹ Hia Ẹre “Osa Ọghe Ẹmwata” Ya Mu Eyan Rẹn Sẹ

1. De emwi nọ fu ima ẹko rre vbe agbọn na ne Esu na ya ohoghe mu emwa rẹrẹ? (Psalm 31:​2-5)

VBE agbọn Esu ne ima ye na, emwa ni bun keghi ta ohoghe, iran mu emwa rẹrẹ, erriọ ẹre iran vbe ya ya emwa dẹ. Rhunmwuda ọni, te a ghi ghee egbe vbirhivbirhi. Avbe ọduẹki keghi mu emwa ru. Erriọ ẹre emwa vbe ya ta ohoghe vbekpa emwi ne iran khiẹn. Emwa eso vbe bẹghe ẹre nẹ wẹẹ, iran i khian sẹtin gba ẹko avbe ọse ni sikẹ iran, rhunmwuda a i ya amẹ iran kọ ọka. Ọrheyerriọ, ma ghọghọ wẹẹ, ma gha sẹtin ya ekhọe hia mu ẹtin yan e Jehova! Irẹn ọre “Osa ọghe ẹmwata.” (Tie Psalm 31:​2-5.) E Jehova i sẹtin ta ohoghe, ẹmwata ẹre emwi hia nọ ta khin. Rhunmwuda ọni, ma gha sẹtin ya ekhọe hia yayi wẹẹ, ẹdẹ i mwẹ ẹdẹ nẹi khian ya mu eyan rẹn sẹ.

2. Vbe ima khian zẹ iro yan vbe ako iruẹmwi na?

² Vbe ako iruẹmwi na, ma gha ka guan kaẹn emwi eso nọ si ẹre ne ima gha na sẹtin ya ekhọe hia mu ẹtin yan e Jehova. Iyeke ọni, ma ghi do guan kaẹn vbene Osa ọghe ẹmwata khian ya mu agbọn Esu na sẹ ufomwẹ hẹ, kevbe emwi ne Osanobua ru nian nọ mieke na sẹtin mu emwamwa rẹn sẹ. Avbe emwi ne ima khian zẹ iro yan na gha ru iyobọ ne ima ya gha mwẹ udinmwẹ zẹvbe ne ima ya sẹ osẹ ne Jehova.

MU ẸTIN YAN OSA ỌGHE ẸMWATA

3. Vbọzẹ ne ima gha na sẹtin ya ekhọe hia mu ẹtin yan e Jehova?

³ Ma gha sẹtin mu ẹtin yan e Jehova rhunmwuda, irẹn ọre Ayi nọ yi emwi hia. Irẹn ẹre ọ yi agbọn yi ẹrinmwi, irẹn ẹre ọ vbe yi emwi hia ni mwẹ arrọọ. (Gẹn 1:1; Psm 36:9; Arhie 4:11) Irẹn ẹre ọ vbe yi emwi hia fẹẹrẹ ni da arrọọ yi ye agbọn. Te ọ wa yi uhunmwu otagbọn na ẹse ne emwi ni mwẹ arrọọ mieke na sẹtin dia ẹre ya. Irẹn ẹre ọ vbe dia emwi hia nọ sunu vbe uhunmwu otagbọn na, erriọ ẹre ọ khian gha ye ke etẹbitẹ ya sẹ etẹghori. Rhunmwuda ọni, ma gha sẹtin gha mwẹ ilẹkẹtin wẹẹ, ọ rẹn emwi nọ gha ya agbọn maan ima rhunmwuda, irẹn ẹre ọ yi ima kevbe wẹẹ, irẹn ẹre ọ ghi mwẹ ẹwaẹn sẹ vbe agbọn vbe ẹrinmwi.

4. Vbe ima ya rẹn hẹ we Jehova hoẹmwẹ ima?

⁴ Ma gha sẹtin mu ẹtin yan e Jehova rhunmwuda, ọ hoẹmwẹ ima. Te Jehova ya arrọọ wee emwa nagbọn rhunmwuda, ọ hoo ne iran gha rrọọ vbe etẹbitẹ, ne iran vbe gha rri orhiẹnrhiẹn agbọn vbene irẹn vbe ye. Vbe omuhẹn, e Jehova ghi guan kaẹn emwi nọ hoo nọ ru, ọ na kha wẹẹ: “Gi ima do yi ọmwa nọ yevbe ima, ọ ghi khọ ima.” (Gẹn 1:26) Vbe Jehova yi ma, ọ na ru ẹre ne ima sẹtin gha zẹ ne egbe ima. Ọ na viọ ima ye uhunmwu otagbọn ne mose mose ne irẹn yi. (Psm 115:16) Ọ na vbe mu iwinna ne kpataki ne Adam vbe Ivi ni re evbibiẹ ima nokaro, ọni ọre ne iran ya uhunmwu otagbọn na khian e Paradais. (Gẹn 1:28; 2:15) Ọ na ya emwi hia fẹẹrẹ na ya hin agbọn wee iran. Ena hia rhie ẹre ma wẹẹ, “ahoẹmwọmwa rẹn nẹi beghe rrọọ ẹdẹdẹmwẹdẹ.”​—Psm 103:17.

5. (a) De vbene Jehova ya mu eyan rẹn sẹ agharhemiẹn wẹẹ, Esu te hia nọ mu idobo yọ? (b) De emwi eso ne Jehova ta nọ he sẹ? (Ya ghee ẹkpẹti nọ khare wẹẹ, “Osẹ Ni Rhie Ẹre Ma Wẹẹ Ẹmwẹ Osanobua I De Fua.”)

⁵ Ma gha sẹtin mu ẹtin yan e Jehova rhunmwuda, ẹmwẹ ọnrẹn i de fua. E Jehova ma yi agbọn na “nọ gha re ehe nọ dihoi rua. Sokpan te ọ yi ẹre ne emwa gha yin ẹnrẹn.” (Aiz 45:​18, 19) A keghi bu ohiẹn uwu gbe Adam vbe Ivi vbe iran sọtẹ daa e Jehova. Rhunmwuda ọni, ọ na yevbe na miẹn wẹẹ, emwamwa ọghe Osanobua i khian ghi mwẹ uhunmwu. Sokpan e Jehova gha ta ẹmwẹ nẹ, te ọ muẹn sẹ. (Aiz 46:​10, 11) Ọ ye hoo ne emwa esi yin agbọn na vbe etẹbitẹ. Ọna ẹre ọ si ẹre nọ na kue yọ ne Adam vbe Ivi biẹ. Ọ na ghi ya arrọọ ọghe Ovbi ẹre ya dẹ ivbi Adam werriegbe, ne iran mieke na sẹtin gha rrọọ vbe etẹbitẹ.​—Jọn 3:16.

OSA ỌGHE ẸMWATA KEGHI MU EYAN RẸN HIA SẸ

6. De emwi ne Jehova ta ye otọ vbe Adam vbe Ivi ghi sọtẹ nẹ?

⁶ Ọmwa nọ ya Adam vbe Ivi sọtẹ daa Osanobua, ọre “ẹyẹn nẹdẹ nii na tie ẹre Esu kevbe Setan.”a (Arhie 12:9; Gẹn 3:​4, 5; Jọn 8:44) E Jehova keghi bu ohiẹn gbe ẹre, nọ rhie ma wẹẹ, a gha fuẹn ọnrẹn rua vbe ẹghẹ gha sẹ. (Gẹn 3:15) Vbene ọ te sẹ ẹghẹ nii, emwa eso gha deba Esu gha ru emwi dan. Vbọrhirhighayehẹ, emwa eso gha rhikhan mu e Jehova.

7. De emwa ni lele ukpowẹ ọghe Esu, kevbe wẹẹ, de emwi nọ khian sunu daa iran?

⁷ Avbe odibo dan kevbe emwa nagbọn eso ẹre ọ lele ukpowẹ Esu vbe ẹdẹnẹrẹ. Rhunmwuda ne iran na gbodan ghee emwamwa Osanobua, ọ gha gia na kha wẹẹ, ivbi Esu ẹre iran khin zẹvbe ne Baibol tae. Sokpan ọ gha sẹ ẹghẹ ne Osanobua khare, ke Esu nọ gua kevbe ekpayẹ ọre nọ wuo; te obọ ehia khian viọ ekẹn, te a khian guọghọ iran hia rua.​—Dan 2:44; Rom 16:20.

8. De emwi ne Jesu ru vbe ukpo 1914? (Vbe ya ghee avbe efoto.)

⁸ De emwi nọ ya ima mwẹ ilẹkẹtin wẹẹ, Osanobua gha gele fuẹn e Setan kevbe ekpayẹ ọre rua zẹvbe nọ yan rẹn? Vbe ukpo 1914, okuo keghi sa kua vbe ẹrinmwi, Jesu keghi khu Esu kevbe avbe odibo dan ni ya egbe ba Esu gha die uhunmwu otagbọn na. (Arhie 12:​7-9) Agharhemiẹn wẹẹ, ẹrinmwi ẹre a na khọn okuo nii, te emwa ni rre agbọn na wa họẹn vbe egbe. E Baibol khare wẹẹ: “Ọ gha baa su uhunmwu otagbọn kevbe okun gbe, rhunmwuda, Esu tuorre bu uwa gha dee nẹ, ohu dan wa vbe muẹn, rhunmwuda, ọ rẹnrẹn wẹẹ ovbi ẹghẹ kherhe ẹre irẹn ghi mwẹ.” (Arhie 12:12) Ke ukpo 1914 gha dee, uhunmwu otagbọn na ẹre Esu ghi na lomi, rhunmwuda ọni, te emwi hia ghi wa rhia yọ rhia yọ. Ọghe ne ẹmwata, ọ gele wa “baa su uhunmwu otagbọn”! Sokpan, vbe nẹi khian ghi kpẹẹ gbe Jesu gha “khọnmiotọ fo fẹfẹfẹ,” a ghi wabọ Esu kevbe emwa ni ye ẹre ike rua. (Arhie 6:2) Jesu ghi kpe eni e Jehova huan, ọ ghi do vẹ ne agbọn vbe ẹrinmwi rẹn wẹẹ, ọkaẹrhia kevbe ọmwa ohoghe ẹre Esu khin. (Psm 45:​4-6) Emwa hia ghi vbe do rẹn wẹẹ, e Jehova ọre Osa ọghe ẹmwata!​—Ẹzik 38:23.

Okuo Ọgbagbọn Nokaro: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

OSA ỌGHE ẸMWATA KEGHI SI EMWA NE ẸMWATA YẸẸ KOKO

9. De emwa ne Jehova si koko vbe ẹdẹnẹrẹ?

⁹ Ke otọ gha dee ẹre Jehova ke “si emwi hia koko ne iran do ya egbe ba e Kristi, ke emwi ni rre ẹrinmwi kevbe ni rre agbọn.” (Ẹfis 1:10) “Emwi ni rre ẹrinmwi” ne ako na guan kaẹn ọre etẹn ne Jehova hannọ zẹ ni khian deba e Jesu kha vbe ẹrinmwi. Emwi “ni rre agbọn” ne ako na vbe guan kaẹn ọre emwa ni khian gha rre uhunmwu otagbọn na vbe Paradais vbe etẹbitẹ. Iran na ni ga e Jehova wa rhiegba ye iwinna ikporhu ne iran mieke na gi emwa ni mwẹ ekhọe ata rẹn ẹmwata vbekpa Osanobua, kevbe ne iran vbe rẹn wẹẹ, ọmwa ohoghe ẹre Esu khin.

10. De vbene Jehova ya ru iyobọ ne emwa ya rẹn wẹẹ, ohoghe ẹre ugamwẹ ohoghe ta vbekpa irẹn? (Arhie Maan 14:​6, 7)

¹⁰ E Jehova keghi loo iwinna ikporhu na ma he miẹn egbe ọre ẹdẹ ya si emwa ne ẹmwata yẹẹ koko. (Tie Arhie Maan 14:​6, 7.) Agharhemiẹn wẹẹ, emwa nagbọn ẹre Jehova loo ya kporhu iyẹn nọ maan, ọ vbe loo avbe odibo ọghẹe ya ru iyobọ ne emwa ne ẹmwata yẹẹ ne iran mieke na do rẹn irẹn. Iwinna ikporhu na ẹre ọ ya emwa ni bun rẹn wẹẹ, Esu ẹre ọ loo e Babilọn Nọkhua nọ re ugamwẹ ohoghe hia, ya ta ohoghe vbekpa e Jehova ke otọ gha dee. (Arhie 18:​2, 4) Vbe nẹi khian ghi kpẹẹ gbe, a gha guọghọ ugamwẹ ohoghe hia rua, ẹghẹ nii, emwa hia ne ẹmwata yẹẹ ghi gha rhie uyi nọ khẹke ne Jehova, rhunmwuda ọ sẹ na rhie uyi na.​—Arhie 17:16.

11. Vbe ima khian ya rẹn emwa ni gele ga e Jehova vbe odẹ ọghe ẹmwata?

¹¹ Ehe ughughan vbe uhunmwu otagbọn hia ẹre emwa ne ẹmwata yẹẹ ke rre. (Arhie 7:​9, 10) Vbe iran họn “iyẹn nọ maan” vbe ẹghẹ okaro, iran na wa ya ekhọe hia yayi wẹẹ, ọna ọre odẹ ẹmwata, rhunmwuda ọni, iran na deba emwa ni ga e Jehova. (Mak 13:10) Vbe ẹdẹnẹrẹ, te ọ ghi wa dewarorua emwa ni gele ga Osanobua vbe odẹ ọghe ẹmwata kevbe emwa nẹi gae. E Malakai ne akhasẹ khare wẹẹ: “Emwa gha dọlegbe miẹn alughaẹn nọ rre uwu ẹkpo ọmwa ata kevbe ọmwa dan kevbe uwu ẹkpo ọmwa nọ ga Osanobua kevbe nẹi gae.” (Mal 3:18) Uyinmwẹ eguọmwadia e Jehova kevbe ikporhu ne iran kpee keghi rhie ẹre ma wẹẹ, Osa ọghe ẹmwata ẹre iran ga.

12. De vbene iwinna ikporhu ya mu ahoo ọghe Jehova sẹ hẹ?

¹² Ne ima na “kporhu iyẹn nọ maan ọghe Arriọba,” rhie ẹre ma wẹẹ, ima họn ẹmwẹ ne Jesu, te ima vbe mu ẹmwẹ akhasẹ nọ rre Baibol sẹ. (Mat 24:14; 28:​18-20) Iwinna ikporhu na keghi ru iyobọ ne emwa vbe uhunmwu otagbọn hia ya do khian ọrhuanegbe Kristi, iran vbe ya aro yọ wẹẹ, iran gha sẹtin ga Osa ọghe ẹmwata, ke ẹghẹ na ya fi etẹbitẹ. Egie nọkhua ẹre ima wa ye ne Jehova na ya ima ru ahoo ọghẹe!

GHA MWẸ ILẸKẸTIN WE JEHOVA GHA MU EYAN RẸN SẸ

13. De emwa ne Esu wa mobọ zẹ kpokpo kevbe wẹẹ, vbọzẹ?

¹³ Ohu wa kakabọ mu Esu nian, rhunmwuda ọ rẹnrẹn wẹẹ, “ovbi ẹghẹ kherhe” ẹre ọ ghi kẹ na wabọ irẹn rua. (Arhie 12:​12, 13) Emwa ne Esu wa mobọ zẹ kpokpo ọre emwa ne Osanobua hannọ zẹ ni khian gha kha vbe Arriọba ọghẹe, iran na ọre “emwa ni ya uhi Osanobua ru emwi, kevbe ni daeyi gbain ighẹ amuẹtinyan ọghe Jesu.” (Arhie 12:17; 14:12) Esu wa vbe zẹ emwa ni ru iyobọ ne iran kpokpo.

14. Vbọ khian sunu vbe Esu gha werriẹ aro nọ khọọ daa emwa ni ga e Jehova? (Vbe ya ghee efoto.)

¹⁴ A gha ghi guọghọ e Babilọn Nọkhua nẹ, Esu kevbe ekpayẹ ọre ghi werriẹ aro nọ khọọ daa eguọmwadia e Jehova, iran ghi gha hoo ne iran wabọ iran rua. Ọna ẹre ọ khian ya okuo Amagẹdọn suẹn. (Arhie 16:​13, 14, 16) E Jesu kevbe avbe odibosa ni rre ẹrinmwi ghi miẹn emwa ni ga e Jehova fan, iran ghi wabọ Esu kevbe arriọba emwa nagbọn rua. (Arhie 19:​19-21) Ẹghẹ nii, a i ghi miẹn emwa ni ta ohoghe, emwa dan kevbe emwa ni mu emwa rẹrẹ. (Arhie 21:8) Agbọn hia ghi do rẹn wẹẹ, e Jehova ọre Osa ọghe ẹmwata kevbe wẹẹ, ẹ i ru emwi nọ ma gba.

15. Vbọzẹ ne ima na mwẹ ilẹkẹtin wẹẹ, e Jehova gha mu eyan rẹn hia sẹ? (Aizaia 65:​16, 17) (Vbe ya ghee efoto.)

¹⁵ Akugbe i ghi zẹdẹ rre agbọn na hiehie. Sokpan, e Jehova keghi ru iyobọ ne emwa rẹn ya gha mwẹ akugbe. E Jehova wa ye si emwa ne ẹmwata yẹẹ koko. Emwi rhọkpa i khian sẹtin mu idobo yọ ne Jehova ghẹ fiangbe emwa rẹn kevbe iwinna ne iran ru nẹẹn. (Tie Aizaia 65:​16, 17.) Ma wa mwẹ ilẹkẹtin wẹẹ, e Jehova gha mu eyan rẹn hia sẹ. Ẹmwẹ ne ukọ ighẹ e Pọl tae vbe ebe Rom 8:​38, 39 keghi fu ima ẹko rre, ọ khare wẹẹ: “Ọre uwu nọ, ra arrọọ, ra avbe odibosa, ra arriọba, ra emwi ni rrọọ nian, ra emwi ni dee vbe odaro, ra ẹtin, ra uyomwẹ, ra udinmwimwẹ, ra emwi ke emwi na ghi yi nẹ. Ena rhọkpa i khian sẹtin wannọ ima hin ahoẹmwọmwa ọghe Osanobua rre, nọ lekpa Enọyaẹnmwa e Kristi Jesu mwẹ ghee ima.”

16. Vbọzẹ ne u na ya ekhọe hia mu ẹtin yan e Jehova?

¹⁶ Emwi wa bun nọ si ẹre ne ima na ya ekhọe hia mu ẹtin yan e Jehova. Irẹn ọre Ayi nọ yi emwi hia. Ọ vbe hoẹmwẹ ima ẹsẹsẹmwẹse. Te oghẹn ne gbii ghi wa muan yọ muan yọ, rhunmwuda, emwa ni bun vbe uhunmwu otagbọn hia wa bii la otu e Jehova. (Aiz 60:22; Zẹk 8:23) Ma rẹnrẹn wẹẹ, ẹghẹ hia ẹre Jehova ya mu eyan rẹn sẹ. Vbe nẹi khian ghi kpẹẹ gbe, ọ gha do guọghọ e Setan kevbe emwa hia ni deba ẹre ya ohoghe mu agbọn na rhia. Vbe na ghee Devid, erhunmwu ọghe urhomwẹ ne ima na ọre: “Uwa rho e Jehova ne Osanobua, . . . irẹn ọkpa kẹkan, ẹre ọ ru avbe emwi ọyunnuan na hia. Uwa rho eni ẹnrẹn nọ mwẹ uyi ẹdẹdẹmwẹdẹ. Te uyi ẹre gha gba otọ agbọn hia.”​—Psm 72:​18, 19.