Ọta Ne Emwa Nọ

De ẹghẹ ne avbe agbẹnvbo khian ya kha wẹẹ, “ọfunmwegbe kevbe agbẹkunsotọ”?

Zẹvbe ne ima rhan otọ re vbe uhunmwuta nọ khare wẹẹ, “Ọta Ne Emwa Nọ” nọ ladian vbe ebe Owa Ọkhẹa vbọ ma he kpẹẹ gbe na, e Jehova gha rhie ẹre ye ekhoẹ ọghe “igho igbe nii” (nọ re arriọba emwa nagbọn hia) ne iran “ru emwi ne irẹn hoo,” ọni ọre ne iran rhie ẹtin kevbe asẹ ọghe iran ne “aranmwẹ oha nọ baa” nọ re United Nations. A vbe tie aranmwẹ oha na “amazẹ ọghe aranmwẹ oha nokaro.” (Arhie 13:​14, 15; 17:​3, 16, 17) Iyeke ọni, “igho igbe nii” kevbe aranmwẹ oha na da rhie ẹtin na ghi wabọ ugamwẹ ohoghe hia hin otagbọn na rre. A gha ghi guọghọ ugamwẹ ohoghe nẹ ra vbene a te guọghọ ugamwẹ ohoghe ẹre avbe agbẹnvbo khian na kha wẹẹ, “ọfunmwegbe kevbe agbẹnkunsotọ” ra?b​—1 Tẹs 5:3.

Ọghe ne ẹmwata, ma ma wa rẹn ẹghẹ ne avbe agbẹnvbo khian ya kha wẹẹ, “ọfunmwegbe kevbe agbẹkunsotọ.” Adeghẹ ima rẹn ẹghẹ nọ khin, esa i khian gha rrọọ ne ima gha bodẹ. Sokpan, ẹghẹ hia ẹre Jesu ya gha tama erhuanegbe ẹre ne iran “gha bodẹ.” (Mat 24:42; 25:13; 26:41) Gi ima gele zẹ iro yan ẹmwẹ akhasẹ ne ukọ ighẹ e Pọl tae vbe elẹta nọ gbẹn gie etẹn ni rre Tẹsalonaica.

E Pọl khare wẹẹ: “Ẹghẹ ke ẹghẹ ne emwa khian ya gha kha wẹẹ, ‘Ọfunmwegbe kevbe agbẹkunsotọ!’ ọfuan ọghe udomwurri ghi rhurhẹ yan iran vbe ọwara ọkpa.” (1 Tẹs 5:​2, 3) Odẹ ne ima ka ya rhan otọ ẹmwẹ akhasẹ na vbe ebe ọghe ima ọre wẹẹ, vbene orueghe nọkhua te wa suẹn ẹre iran khian na kha wẹẹ, “ọfunmwegbe kevbe agbẹkunsotọ,” ẹghẹ na ẹre a khian vbe ya guọghọ e Babilọn Nọkhua nọ re ugamwẹ ohoghe hia. Ma ka kha wẹẹ, ọna ọre ama nokiekie nọ khian rhie ẹre ma wẹẹ, te orueghe nọkhua khian ghi wa suẹn.

Vbọrhirhighayehẹ, ma ghi mu ukpa mu uwerhẹn ghee ẹre, ma na do bẹghe ẹre wẹẹ, odẹ ọvbehe kpataki rrọọ ne ima gha ya sẹtin rhan otọ ẹmwẹ akhasẹ na. Ọ gha kẹ, iyeke vbe a gha ghi guọghọ ugamwẹ ohoghe hia nẹ, ẹre iran khian na gha kha wẹẹ, “ọfunmwegbe kevbe agbẹkunsotọ.” Vbe ima gu kha vberriọ? Gi ima rhie ewanniẹn ye inọta eso.

Ke otọ gha dee, de vbene ugamwẹ ohoghe ya mwẹ obọ vbe okuo hẹ? E Baibol khare wẹẹ: “A keghi miẹn esagiẹn ọghe . . . emwa hia na he gbelua vbe uhunmwu otagbọn [vbe obọ “igbiragia ne oghogho nii,” e Babilọn Nọkhua]. “ (Arhie 17:​1, 5; 18:24) Ke otọ gha dee ẹre igbiragia ne oghogho nii ke rhie obọ ye ẹmwẹ okuo, iran wa vbe mwẹ obọ vbe ẹti vbe olighi nọ miẹn emwa ni bun uhunmwu vbe uhunmwu otagbọn hia. Rhunmwuda ọni, okuo kevbe olighi ẹre a rẹn ọnrẹn yi, ẹ i re ọfunmwegbe kevbe agbẹkunsotọ. Nọnaghiyerriọ, a sẹtin miẹn wẹẹ, a gha ghi guọghọ e Babilọn Nọkhua nẹ ẹre avbe agbẹnvbo khian na kha wẹẹ, “ọfunmwegbe kevbe agbẹkunsotọ.” Sokpan ma ma wa rẹn.

Iran gha ghi kha wẹẹ, “ọfunmwegbe kevbe agbẹkunsotọ,” de emwi nọ khian ghi sunu? E Pọl khare wẹẹ: “Ọfuan ọghe udomwurri ghi rhurhẹ yan iran vbe ọwara ọkpa.” (1 Tẹs 5:3) E study note nọ rre ako na khare wẹẹ: “Ẹmwẹ ne Pọl tae na rhie ẹre ma wẹẹ, vbe iran gha da wa suẹn gha kha wẹẹ, ‘ọfunmwegbe kevbe agbẹkunsotọ,’ ẹre a khian ya fuẹn emwa ni ta ẹmwẹ na. Udomwurri ẹre ọ khian ya sunu, iran i khian vbe miẹn uhunmwu.” Adeghẹ arriọba emwa nagbọn na suẹn gha kha wẹẹ, “ọfunmwegbe kevbe agbẹkunsotọ,” vbe a gha ghi guọghọ e Babilọn nọkhua nẹ; a ghi fuẹn avbe agbẹnvbo nii hia rua vbe udomwurri.

Avbe emwi nọ khian sunu na gha kpa eguọmwadia e Jehova odin ra? E Pọl khare wẹẹ: “Etẹn, wa i rre uwu ebiebi, rhunmwuda ọni, ọ ma khẹke ne ẹdẹrriọ do uwa mu, vbene ẹdẹ wan yan avbe oyi vbe udomwurri.” (1 Tẹs 5:4) Muẹn roro: Adeghẹ iran na suẹn gha kha wẹẹ, “ọfunmwegbe kevbe agbẹkunsotọ” vbe a gha ghi guọghọ e Babilọn Nọkhua nẹ, emwa ọghe Jehova ghi rẹn wẹẹ, vbe nẹi khian ghi kpẹẹ gbe, a gha guọghọ avbe agbẹnvbo rua. Vbọrhirhighayehẹ, nọ ne avbe agbẹnvbo, te oguọghua ọghe iran khian rre vbe udomwurri vbe na ghee oyi.

Emwi ne ima rẹnrẹn ọre wẹẹ, vbe nẹi khian ghi kpẹẹ gbe, “igho igbe nii” kevbe aranmwẹ oha nii na rhie ẹtin kevbe asẹ na gha guọghọ ugamwẹ ohoghe hia. Ọna ẹre ọ khian gha re omuhẹn ọghe orueghe nọkhua. Ma vbe rẹn wẹẹ, ọ mwẹ ẹghẹ ne avbe agbẹnvbo khian ya kha wẹẹ, “ọfunmwegbe kevbe agbẹkunsotọ.” De ẹghẹ ne ọna khian ya sunu? Zẹvbe ne ima tae ẹre sin, ẹghẹ nokaro ne ọna gha ya sẹtin sunu ọre: Vbe na te guọghọ ugamwẹ ohoghe rua. Ẹghẹ ọvbehe ne ọna gha ya sẹtin sunu ọre vbe arriọba emwa nagbọn gha guọghọ ugamwẹ ohoghe rua nẹ. Ọ gha sẹ ẹghẹ nii, ma gha bẹghe vbene ena hia khian ya sunu hẹ. Ẹmwẹ akhasẹ ni rre Baibol ghaa sẹ, ra vbe ọ gha sẹ nẹ ẹre a na mobọ rẹn otọ re fo.​—Yae taa Jọn 12:16.

Vbe nọ ghi te sẹ ẹghẹ nii, emwi nọ ru ekpataki nọ khẹke ne ima rhie aro tua ọre ne ima sẹtin gha ya ẹkoata ga e Jehova, ẹ i re ẹghẹ na khian ya kha wẹẹ, “ọfunmwegbe kevbe agbẹkunsotọ.” Te ọ khẹke ne “ima khẹ ye egbe, ne ima vbe gha mwẹ ẹwaẹn,” ne ima mieke na mu egbe ye otọ khẹ emwi nọ khian sunu vbe odaro.​—1 Tẹs 5:6.