Ọta Ne Emwa Nọ
De emwi ne Jehova “hoo,” nọ khian rhie ye arriọba emwa nagbọn ekhọe vbe nẹi khian ghi kpẹẹ gbe?
Ebe Arhie Maan 17:16, 17 ghi guan kaẹn vbene orueghe nọkhua khian ya suẹn hẹ, ọ na wẹẹ: “Igho igbe nii ne u bẹghe kevbe aranmwẹ oha nii, ghi do gha khẹko igbiragia nii, iran ghi fuẹn ọnrẹn rua, iran ghi vbe bannọ ọnrẹn ruan, iran ghi rri efun egbe ẹre, iran ghi ya erhẹn giẹn ọnrẹn ruan fẹfẹfẹ. Rhunmwuda, Osanobua ẹre ọ rhie ẹre ye iran ekhọe, ne iran ru emwi ne irẹn hoo, nọ vbe re emwi nọ rre iran hia ekhọe; ọni nọ wẹẹ, ne iran mu arriọba ọghe iran ne aranmwẹ oha nii.” Vbe ẹghẹ nọ gberra avbe ebe ọghe ima khare wẹẹ, emwi ne Jehova “hoo” nọ khian rhie ye arriọba emwa nagbọn ekhọe ọre ne iran guọghọ ugamwẹ ohoghe hia.
Vbọrhirhighayehẹ, ma ru afiwerriẹ ye ako na. Emwi ne Jehova “hoo,” nọ khian rhie ye arriọba emwa nagbọn ekhọe ọre wẹẹ, “ne iran mu arriọba ọghe iran ne aranmwẹ oha nii.” Ma gha zẹ iro yan inọta eso nọ gha ru iyobọ ne ima ya rẹn vbene ọna khian ya sẹ hẹ.
De emwa na guan kaẹn vbe ẹmwẹ akhasẹ na? “Igbiragia nii” ẹre ọ vbe re “Babilọn Nọkhua”; nọ mudia ye ihe ugamwẹ ohoghe hia. “Aranmwẹ oha nọ baa” mudia ye ihe otu nọ kha wẹẹ, iran gha ru ẹre ne ọfunmwegbe gha rre agbọn, ukpo 1919 ẹre a mu otu na gbọọ, a na gha tie ẹre League of Nations sokpan, United Nations ẹre a ghi tie ẹre nian. (Arhie 17:3-5) “Igho igbe nii” mudia ye ihe arriọba emwa nagbọn hia ni ye aranmwẹ oha nii ike.
De vbene igbiragia nii kevbe aranmwẹ oha nọ baa nii ya gu egbe mu obọ hẹ? Ke otọ gha dee, ẹre igbiragia nii ke “tota yan” aranmwẹ oha nii, ọ na gha fiangbe ẹre, ọ na vbe gha hia nọ gha dia ẹre nọ gha ru emwi nọ gualọ.
De emwi nọ khian sunu daa igbiragia nii? Te aranmwẹ oha nii kevbe igho igbe nii khian “gha khẹko igbiragia nii.” Rhunmwuda ọni, iran ghi viọ emwi hia nọ mwẹ, iran ghi vbe zẹ efa ye ọre egbe ne emwa mieke na rẹn emwi dan nọ ru. Iran ghi ru emwi ne Jehova gualọ, ọni nọ wẹẹ, iran ghi guọghọe rua vbe nai khian na ghi dọlegbe miẹn ọnrẹn. (Arhie 17:1; 18:8) Erriọ ẹre ugamwẹ ohoghe hia khian ya sẹ ufomwẹ. Sokpan, vbene ọna te sunu e Jehova gha rhie ẹre ye arriọba emwa nagbọn ekhọe ne iran ru emwi ne iran ma he ka ru ẹdẹ ke obọ ne iran ya suẹn gha kha.
De emwi ne Jehova khian rhie ye iran ekhọe ne iran ru? Ọ gha rhie “emwi ne irẹn hoo” ye ekhọe ọghe igho igbe nii, ọni ọre wẹẹ, ne iran “rhie ẹtin kevbe asẹ ọghe iran, ne aranmwẹ oha [nọ baa] nii”—nọ re United Nations. (Arhie 17:13) Gele muẹn roro emwi ne ọna demu. Arriọba emwa nagbọn ẹre ọ khian tobọ iran rhie ẹtin kevbe asẹ ọghe iran ne aranmwẹ oha nii ra? Ẹo! Ẹmwẹ akhasẹ na gi ima rẹn wẹẹ, Osanobua ẹre ọ khian rhie ẹre ye iran ekhọe ne iran ru vberriọ. (Itan 21:1; yae taa Aizaia 44:28.) Kherhe kherhe ẹre ọna khian ya sunu ra? Ẹo! Udomwurri ẹre ọ khian ya sunu. Ẹghẹ nii, aranmwẹ oha nii ghi wabọ ugamwẹ ohoghe hia rua.
De emwi nọ khian ghi sunu vbe odaro? Esa i rrọọ ne ima khian ya gha gualọ iyẹn nọ khian rhie ẹre ma wẹẹ, arriọba fẹko ye United Nations ike. Nọghayayerriọ, emwi nọ khẹke ne ima ya aro yi ọre wẹẹ: Vbe udomwurri e Jehova gha rhie ẹre ye arriọba emwa nagbọn ekhọe ne iran rhie ẹtin iran ne aranmwẹ oha nii. Ọna gha sunu ma ghi rẹn wẹẹ, te orueghe nọkhua khian ghi suẹn. Vbene ọ te sẹ ẹghẹ nii, “wa gi ima khẹ ye egbe, ne ima vbe gha mwẹ ẹwaẹn” rhunmwuda afiwerriẹ ni bun gha rherhe rhiegbe ma!—1 Tẹs 5:6.