Ya Egbe Taa Obedaia​—Gha Mwẹ Imuohan Osanobua

Obedaia ẹre ọ ghaa gbaroghe igiowa ọghe Ọba ighẹ Ehab. Ọba nọ mwẹ ekhọe dan ẹre Ehab ghaa khin, ọ na vbe kie ẹkpotọ yọ ne Ivbi Izrẹl gha ga e Bel. Ọrheyerriọ, “ke ẹghẹ ọvbokhan gha dee,” ẹre Obedaia ya gha mu ohan e Jehova. (1 Ọba 18:​1-13) Vbe Oloi ighẹ e Jezibẹl ghi we na gbele avbe akhasẹ ọghe Jehova hia rua, Obedaia keghi rhie udinmwẹ ma, ọ na zẹ emwi ru. Adeghẹ a na mu Obedaia mu ọkpa vbe uwu avbe akhasẹ na, uhunmwu ẹnrẹn ẹre ọ khian ya tae, sokpan Obedaia ma gi ohan muẹn, ọ na viọ akhasẹ 100 lẹre, ọ na gha viọ evbare gie iran agharhemiẹn wẹẹ, ukhunmwu ghaa fi! Ẹ i mwẹ Obedaia ma gha baba egbe, ne avbe akhasẹ ni bun ni ga Ọba ighẹ Ehab kevbe Oloi ighẹ e Jezibẹl ghẹ mieke na bẹghe ẹre. Ọna ya ima rẹn wẹẹ, emwi ne Obedaia ru na ma zẹdẹ gha khuẹrhẹ.​—1 Ọba 18:19.

Vbe ima miẹn ruẹ vbe obọ Obedaia? Agharhemiẹn wẹẹ, Obedaia ghaa mu ohan Ehab, imuohan nọ mwẹ ne Jehova ẹre ọ sẹre. Ọna ẹre ọ si ẹre nọ na rhie uhunmwu mwẹ atata obọ nọ mieke na sẹtin gbogba ga etiọnrẹn. Adeghẹ a na mu awua ye iwinna ima vbe ẹvbo ne ima ye, te ọ khẹke ne ima gha mwẹ imuohan ọghe Jehova. Ọna ẹre ọ khian ru iyobọ ne ima ya sẹtin ru iyobọ ne etẹn ima na zẹ kpokpo.