Gha Hia Ne U Mieke Na Gbegba Nọ Gha Dinmwiamẹ

1. (a) De ere ne ima lae miẹn adeghẹ ima na dinmwiamẹ? (b) Vbe ima khian zẹ iro yan vbe ako iruẹmwi na?

U YA egbuẹ fiohan ne Jehova nẹ, ne u vbe dinmwiamẹ ra? Adeghẹ erriọ ẹre nọ, ọ rhie ma wẹẹ, u nọ Osanobua nẹ nọ ru iyobọ nuẹn ya gha mwẹ ekhọe nọhuanrẹn. (1 Pit 3:21) Odẹ vberriọ te u rhie igiemwi esi ye otọ ne avbe igbama kevbe emwa ọgbọn ni rre iko ruẹ. Azẹ nọ ghi maan sẹ, ẹre u wa ru! Sokpan adeghẹ a na miẹn wẹẹ, u ma he ye dinmwiamẹ ghi vbo? Vbe nai na gbawawẹ, ma rẹnrẹn wẹẹ, u hoẹmwẹ e Jehova kevbe wẹẹ, u hoo ne u ru ahoo ọghẹe. U vbe rẹn wẹẹ, te ọ khẹke ne u dinmwiamẹ ne Jehova mieke na ya orukhọ ruẹ bọ ruẹ kevbe nọ vbe miẹn ruẹ yi. (Iwinna 2:​38-40) Sokpan, ọ sẹtin ye gha lọghọ ruẹ ne u do dinmwiamẹ. Vbọ khian ru iyobọ nuẹn? Vbe ako iruẹmwi na, ma gha guan kaẹn (1) emwi nọ si ẹre ne emwa eso na si egbe ghee iyeke vbọ gha de ọghe idinmwiamẹ, (2) emwi nọ si ẹre nọ na khẹke ne ima kọe ye orhiọn wẹẹ, kherhe ẹre ọ ghi kẹ ne agbọn Esu na sẹ ufomwẹ, kevbe (3) ere ne ima gha lae miẹn adeghẹ ima na dinmwiamẹ vbene ima i na si obọ ghee iyeke.

EVBỌZẸE NE EMWA ESO NA SI EGBE GHEE IYEKE

2. Vbọzẹ ne emwa eso na si egbe ghee iyeke vbọ gha de ọghe idinmwiamẹ?

² Ohan nọ mu emwa eso ẹre ọ si ẹre ne iran ma na he ye dinmwiamẹ. Vbe igiemwi, agharhemiẹn wẹẹ, iran hoo ne iran ga e Jehova, iran keghi mu ohan we iran i khian sẹtin ru emwi nọ gha ya ẹko rhiẹnrhiẹn ọnrẹn. Adeghẹ u na gha mwẹ egbe iziro vbenian, hia ne u tie ako eso nọ gha ya ruẹ rẹn wẹẹ, e Jehova ma ya aro yọ wẹẹ, u gha sẹtin gha ru emwi nọ yẹẹ ọre vbe ẹghẹ hia, kevbe wẹẹ, ọ wa ya ẹko rhiẹnrhiẹn ọnrẹn vbe ọ gha bẹghe ẹre we u hia vbene ẹtin ruẹ sẹ. (Psm 103:​13, 14; Kọl 3:23) Adeghẹ u na gha mu ohan wẹẹ, emwa gha zẹ ruẹ kpokpo, na erhunmwu ne Jehova ru iyobọ nuẹn ya gha mwẹ ilẹkẹtin vbe na ghee ọsian ọkpa nọ khare wẹẹ: “E Jehova gu mwẹ rrọọ, ohan i khian mu mwẹ. De emwi ne ọmwa gha sẹtin ru mwẹ re?”​—Psm 118:6.

3. De emwi ọvbehe nọ si ẹre ne emwa eso na si egbe ghee iyeke vbọ gha de ọghe idinmwiamẹ? (Vbe ya ghee efoto .)

³ Emwa eso rrọọ ni hoẹmwẹ e Jehova sokpan, iran ye si egbe ne iran ya dinmwiamẹ, rhunmwuda iran roro ẹre wẹẹ, emwi ni bun ye rrọọ ne iran ma he ruẹ. Te ọ khẹke ne u wa rẹn emwi hia ni rre uwu e Baibol u ke dinmwiamẹ ra? Gia guan kaẹn igiemwi ọkpa nọ rre Baibol. Vbe asọn ọkpa, e Jehova keghi ru ẹre ne ugbohiotọ sunu vbe eghan na mu ukọ ighẹ e Pọl vbe Sailas yi, nọ ya fan iran vbe eghan, rhunmwuda emwi nọ sunu na, ẹkpotọ keghi kie ne iran ya kporhu ma eseghan nọ ghaa rre evba kevbe ẹgbẹe ọre. Ọ khọ wẹẹ, okpia nii vbe ẹgbẹe ọre gha wa rẹn wẹẹ, emwi ọyunnuan ẹre ọ sunu na. Vbe deba ọni, iran gha wa miẹn emwi kpataki ruẹ vbọ. Rhunmwuda ọni, iran keghi “dinmwiamẹ, vbene iran ma na si obọ ẹgogo ghee iyeke.” (Iwinna 16:​25-33) Adeghẹ u rẹn e Jehova, u ya ekhọe hia hoẹmwẹ ọnrẹn, u rẹn imamwaemwi na ka wa ruẹ vbe Baibol, u vbe roro iro fi uyinmwẹ werriẹ nẹ, kevbe wẹẹ, u mu egbe ne u ya gha ya ilele ọghẹe ru emwi vbe ẹdagbọn ruẹ, ọ rhie ma we u gbegba nọ gha dinmwiamẹ.​—Mak 12:30.

4. De emwi eso nọ si ẹre ne emwa eso ma na he ye dinmwiamẹ? (Vbe ya ghee efoto.)

⁴ Eso te hoo ne iran ru emwi nọ gha yẹẹ Osanobua, sokpan iran roro ẹre wẹẹ, iran i khian sẹtin ru afiwerriẹ nọ khẹke ne iran ru. Ọghe ne ẹmwata, vbene ima te ru azẹ nọ rhirhi gha khin, te ọ khẹke ne ima ka muẹn roro nẹ deghẹ emwi ne ima gha sẹtin ru nọ. (Luk 14:​27-30) Sokpan nọ ne emwa eso, emwi nọ kpokpo iran vbe orhiọn ọre emwi eso ne iran khian sẹrae ne iran mieke na sẹtin do ga Osanobua. Ọna ọre emwi nọ sunu daa ọvbokhan okhuo ọkpa na tie ẹre Candace. Te ọ ye kherhe vbe ọ ruẹ re vbekpa e Jehova, sokpan ọ ma gha rhie emwi nọ ruẹ ye uyinmwẹ. Vbe ọ ghi waan fo nẹ, ọ na dọlegbe suẹn gha ruẹ e Baibol. Ọ khare wẹẹ: “I te rẹn emwi nọ khẹke ne I ru ne I ya ya ẹko rhiẹnrhiẹn e Jehova, sokpan, ọ ma gu mwẹ na sẹ emwi eso ne I ru nẹi yẹẹ e Jehova rae. I rẹnrẹn wẹẹ, ọna gha wa lọghọ mwẹ.” Eso vbe mu ohan wẹẹ, iran i khian sẹtin gha yin vbe odẹ nọ khẹke Ivbi Otu e Kristi ni dinmwiamẹ nẹ. Iran mu ohan wẹẹ, vbe iran gha ghi dinmwiamẹ nẹ, iran na ru orukhọ nọ wegbe, a sẹtin rhie iran hin iko rre. Adeghẹ emwi vbenian ẹre ọ si ẹre ne u ma na he ye dinmwiamẹ, vbọ khẹke ne u ru?

5. De emwi nọ khẹke ne u rhie aro tua vbe u gha bẹghe ẹre wẹẹ, u si egbe ne u ya dinmwiamẹ? (Matiu 13:​44-46)

⁵ Ma gha khian dẹ emwi vbe ẹki, ẹ i wa re igho ne ima khian ya dẹ emwi nii ẹre ima ghee, ma vbe roro ẹre deghẹ emwi nii maan ra deghẹ ọ mwẹ esa nọ ye ne ima. Adeghẹ emwi nọ gele maan wa nọ, sokpan ọ na ro, ẹgiẹgiẹ ma wa ya dẹ ọre. Erriọ ẹre ọ vbe ye, ma ghaa roro ẹre deghẹ ọ khẹke ne ima dinmwiamẹ, ẹ i re afiwerriẹ ne ima khian ru ne ima mieke na sẹtin dinmwiamẹ ẹre ima khian wa rhie aro tua, te ọ khẹke ne ima rhie aro tua afiangbe ne ima khian miẹn vbe ima gha gu e Jehova ru ọse. Ọ mwẹ erre eva ne Jesu zẹ nọ rhan otọ uhunmwu ẹmwẹ ne ima hoo ne ima rhie ladian mwa. (Tie Matiu 13:​44-46.) Vbe dọmwadẹ erre ne Jesu zẹ, okpia ọkpa ghi miẹn emwi ighobioye, ọ na ya ekhọe hia khiẹn emwi hia nọ mwẹ nọ mieke na sẹtin dẹ ọre. Wẹ vbe miẹn emwi ighobioye nẹ, ọni ọre iyẹn nọ maan ọghe Arriọba Osanobua. Adeghẹ ọ na gha lọghọ ruẹ ne u ru afiwerriẹ nọ khẹke ne u mieke na sẹtin dinmwiamẹ, u ghi hia ne u muẹn roro erre eva ne Jesu zẹ. U sẹtin nọ egbuẹ wẹẹ: ‘Mẹ gele yayi wẹẹ, emwi ighobioye ẹre odẹ ẹmwata gele khin ra? Mẹ ya aro nọ ghaan ghee ẹkpotọ nọ kie mẹ ya gha re ọsie Jehova ra, I vbe gbọyẹmwẹ ye emwi hia ne Jehova we irẹn khian ru mẹ vbe odaro kevbe etẹn nọ ya ru mwẹ ẹse ra?’ Ewanniẹn ne u rhirhi rhie ye avbe inọta na, ẹre ọ khian ya ruẹ rẹn deghẹ u gha hia ne u gbọyẹmwẹ ye odẹ ẹmwata na sayọ, ra te u khian gualọ otọ emwi nọ si ruẹ ghee iyeke ne u ma na he ye dinmwiamẹ.

6. Vbọ khian ru iyobọ ne ima ya gha mwẹ ekhọe nọ maan?

⁶ Vbe erre ọghe ọmwa nọ kọ emwiokọ, e Jesu keghi guan kaẹn emwi ni gha sẹtin si emwa ghee iyeke vbe iran gha miẹn odẹ ẹmwata yi nẹ. Ọrheyerriọ, e Jesu vbe rẹn wẹẹ, emwa ni mwẹ “ekhọe esi kevbe ekhọe nọ maan” gha miẹn iyẹn nọ maan yi, iran ghi vbe zẹ owẹ lele emwi ne iran ruẹ. (Luk 8:​5-15) Sokpan, adeghẹ u gbawawẹ deghẹ u gele mwẹ “ekhọe esi kevbe ekhọe nọ maan,” ghẹ gi egbe wọọ ruẹ. Osanobua gha ru iyobọ nuẹn ya gha mwẹ “ekhọe ọgbọn,” nọ gha sẹtin ya ruẹ gha lele uhi ọghẹe. Rinmwian e Jehova nọ ru iyobọ nuẹn ne ẹmwata gha yẹẹ ruẹ kevbe ne u sẹtin gha rhie emwi ne u ruẹ ye uyinmwẹ.​—Ẹzik 18:31; 36:26.

7-8. Vbọzẹ ne igbama eso ma na he ye dinmwiamẹ? (Vbe ya ghee efoto.)

⁷ Igbama eso ni hoẹmwẹ e Jehova ma he dinmwiamẹ rhunmwuda emwi ne emwa ọvbehe ru. Vbe igiemwi, emwa ni bu emwa ude vbe esuku sẹtin ya ivbi esuku eso gha ghee ẹre wẹẹ, uyinmwẹ eso ma de emwi nọ rhiae, ya sẹ egbe uyinmwẹ eso nẹi ya ẹko rhiẹnrhiẹn e Jehova. Adia vbenian sẹtin zẹ ẹbe. (Psm 1:​1, 2; Itan 7:​1-5) Vbọrhirhighayehẹ, u gha sẹtin lẹẹ ne ifi na adeghẹ u na lele igiemwi ọghe ọsian nọ tama e Jehova wẹẹ: “I rẹn otọ emwi sẹ iran hia ni ma mwẹ emwi, rhunmwuda, te I mu igiodẹ ruẹ roro.”​—Psm 119:99.

⁸ Iyẹn nọ sẹ obọ rhie ẹre ma wẹẹ, emwi ne evbibiẹ emọ eso ni re Osẹe Jehova ru, ẹre ọ si ẹre ne ivbi iran ma na he dinmwiamẹ. Iwinna nọ wa mu evbibiẹ emọ vbenian ọre ne ivbi iran yo owa ebe ne iran mieke na do gha mwẹ iwinna nọ maan, ra a sẹtin vbe miẹn wẹẹ, iran ma ru iyobọ ne ivbi iran ya fian okhuo ne egbe iran vbe ugamwẹ e Jehova. Adeghẹ u na gha roro ẹre wẹẹ, evbibiẹ ruẹ i ru iyobọ nuẹn ya gha mwẹ alaghodaro vbe ugamwẹ e Jehova ghi vbo? Hia ne u gu iran guan vbekpa ẹre? Gha mwẹ ilẹkẹtin wẹẹ, a i miẹn ọmwa ne Jehova i khian sẹtin gu ru ọse, ọ gha khọnrẹn nọ gha re ọvbokhan.​—Itan 20:11.

9. Vbọzẹ ne emwa eso ma na he ye dinmwiamẹ?

⁹ Emwa eso ni te sẹ ni gha dinmwiamẹ keghi si egbe rhunmwuda emwi ne ihua iran ru, iran sẹtin kue gha hoo ne iran mudia khẹ ọmwa ọvbehe, ne iran mieke na gba dinmwiamẹ. Vbe igiemwi, iran sẹtin gha mwẹ ọnrẹn vbe orhiọn wẹẹ, iran vbe ọse iran ra ọmwa iran vbe uwu ẹgbẹe gha koko dinmwiamẹ. Awua i rrọọ adeghẹ uwẹ vbe ọmwa ne u hoẹmwẹ ọnrẹn na gba dinmwiamẹ vbe ẹdẹ ọkpa, sokpan ọna gele sẹ nọ gha si ruẹ ghee iyeke ra? U ghi yerre wẹẹ, dọmwadẹ ọghẹe ẹre ọ khian ya egbe ẹre fiohan ne Jehova. Ẹ i re emwi ne emwa ọvbehe ru ẹre ọ khian tae deghẹ u gha dinmwiamẹ, dọmwadẹ ọghẹe ẹre ọ rrie agbọn ọnrẹn.​—Rom 14:12.

EVBỌZẸE NỌ NA KHẸKE NE U GHA YERRE WẸẸ UFOMWẸ AGBỌN NA SIKẸ OTỌ NẸ

10. De emwi ọvbehe nọ si ẹre ne emwa eso ma na he ye dinmwiamẹ?

¹⁰ Vbọ gberra avbe emwi ne ima he sunu yi, emwi ọvbehe nọ ya emwa si egbe ne iran ya dinmwiamẹ ọre ne iran na roro ẹre wẹẹ, ọ gha ye kpẹẹ agbọn na ke sẹ ufomwẹ. Sokpan iziro vbenian gba ra? E Jesu ya obọ sekhae ne erhuanegbe ẹre wẹẹ: “Uwa mu egbe yotọ, rhunmwuda, ẹghẹ ne uwa ma te ya aro yi, ẹre Ovbi ọmwa khian ya rre.”​—Luk 12:40.

11. Zẹvbe nọ rre ebe Psalm 119:​60, de aro ne ima khian ghi ya gha ghee uhi e Jehova vbe ima gha gele rẹn e Jehova nẹ?

¹¹ Ahoẹmwọmwa ne ima mwẹ ne Jehova ẹre ọ gua ima kpa ya ya egbe fiohan nẹẹn. Vbene ima ya rẹn e Jehova erriọ ẹre ima ya hoẹmwẹ ọnrẹn sayọ, ẹghẹ nii, uhi ẹre ghi gha yẹẹ ima, ma ghi vbe gha zẹ owẹ lelẹe. (Tie Psalm 119:60.) Ukọ ighẹ e Jems vbe guan kaẹn emwi ọvbehe nọ si ẹre nọ na ru ekpataki ne ima rherhe gha lele adia nọ ke obọ e Jehova rre: Ọni ọre wẹẹ, ma rhọkpa ma rẹn ẹdẹ nọ gha gbe akhuẹ. Rhunmwuda ọni, wa gi ima gha ru “emwi nọ khẹke” vbe ẹdẹgbegbe, ọni ọre emwi ne Jehova hoo ne ima ru.​—Jems 4:​13-17.

12. De emwi ne ima miẹn ruẹ vbe erre ne Jesu zẹ ọghe emwa ni winna vbe ugbo e vaẹn?

¹² Erre ne Jesu zẹ, nọ dekaẹn emwa ni khian winna vbe ugbo e vaẹn vbe vbo? E Jesu ma sie vbe kha wẹẹ, igho ọkpa ẹre a khian ha ne emwa ni winna vbe ughaẹdẹ ọkpa kevbe emwa ni ya ẹdẹ ohoho winna ra? Erriọ ẹre ọ tae. Sokpan, de emwi nọ si ẹre ne emwa ni winna vbe ughaẹdẹ ọkpa ma na rherhe suẹn iwinna. Iran khare wẹẹ: “Ma ma miẹn ọmwa nọ viọ ima vbe iwinna.” Ẹ i re obẹrure ẹre iran khin, iran te gualọ iwinna sokpan iran ma miẹn ọmwa nọ viọ iran ye iwinna. Vbe a ghi tie iran, vbobọvbobọ nii ẹre iran ya suẹn iwinna. (Mat 20:​1-16) Vbe ẹdẹnẹrẹ, Jesu vbe tie ima ne ima do gha re erhuanegbe ẹre kevbe ne ima do kporhu iyẹn nọ maan ọghe Arriọba. Vbobọvbobọ ẹre ọ khẹke ne ima ya ru emwi ne Jesu we ne ima ru.

13. Vbe ima miẹn ruẹ vbe okha ọghe amwẹ e Lọt?

¹³ Emwa eso keghi si egbe ne iran ya ru afiwerriẹ nọ khẹke rhunmwuda iran roro ẹre wẹẹ, vbene agbọn na te sẹ ufomwẹ iran gha ru vberriọ, sokpan ẹmwata nọ rrọọ ọre wẹẹ, vbene u ya si egbe, erriọ ẹre ọ khian ya gha lọghọ sayọ ne u sẹtin ru afiwerriẹ nọ khẹke. Ọna ẹre ọ si ẹre ne Jesu na ya obọ sekhae ne erhuanegbe ẹre wẹẹ: “Wa ye amwẹ e Lọt rre.” (Luk 17:​31-35) Amwẹ e Lọt rẹnrẹn wẹẹ, kherhe ẹre ọ ghi kẹ ne Jehova guọghọ e Sọdọm vbe Gomorra; sokpan, ọ khọ we iwinna emwi ewe nọ mwẹ ẹre ọ muẹn sẹrriọ wẹẹ, ọ ma hoo nọ sẹrae. (Gẹn 19:​23-26) Okha ọghe okhuo na ya ima rẹn wẹẹ, urho ọghe imiẹnfan i khian wa kie ye otọ vbe etẹbitẹ. Ọ gha sẹ ẹghẹ ne Jehova mwamwa yọ, ẹkpotọ i khian ghi kie ne emwa ya fi werriẹ.​—Luk 13:​24, 25.

14. Vbọzẹ nọ na khẹke ne ima rhie aro tua vbene ẹmwẹ akhasẹ ni rre Baibol ya sẹ hẹ?

¹⁴ Emwi ni sunu vbe agbọn na vbe ẹdẹgbegbe rhie ẹre ma wẹẹ, emwi ne Baibol we ọ khian gha sunu vbe ẹdẹ okiekie wa gele sunu. Ọ gha khọnrẹn wẹẹ, avbe emwi na ma he wa suẹn gha sunu vbe ẹdogbo ne u ye, ugbẹnvbe a miẹn we ọ sunu vbe ihe ọvbehe, te ọ khẹke nọ gua ruẹ kpa ya gha hoo ne u dinmwiamẹ. Vbe igiemwi, gi ima ghee emwi ne ukọ ighẹ e Pita tama etẹn ni ghaa rrọọ vbe ẹghẹ nẹdẹ. Ọ keghi tama iran, ne iran “khẹ ye egbe,” ra ne iran “ghẹ vbiẹ,” rhunmwuda “ufomwẹ ọghe emwi hia sotọ fo nẹ.” (1 Pit 4:7; ftn.) “Ufomwẹ” nọ ghaa guan kaẹn ọre ẹghẹ na khian ya guọghọ e Jerusalẹm kevbe ọgua Osa nọ rrọọ. Eke ne emwa ne Pita gbẹn elẹta na gie ghaa ye kakabọ gha rree ne Jerusalẹm, rhunmwuda ọni, iran i khian gha rre Jerusalẹm vbe a gha khian guọghọe rua. (1 Pit 1:1) Sokpan, iran gha bẹghe ẹre wẹẹ, a gele guọghọ e Jerusalẹm zẹvbe na tae ye otọ, iran ghi gele do gha mwẹ ilẹkẹtin wẹẹ, e Jehova gha mu eyan ẹnrẹn hia sẹ. Erriọ ẹre ọ vbe ye, zẹvbe ne u ya bẹghe ẹmwẹ akhasẹ ni sẹ vbe ẹdẹnẹrẹ, u ghi do gha hoo ne u hia vbe odẹ ke odẹ ne u dinmwiamẹ.

15. Vbe ima khian ya mu egbe khẹ ẹdẹ ọghe Jehova hẹ? (2 Pita 3:​10-13)

¹⁵ Vbe elẹta nogieva ne Pita gbẹn, ọ keghi guan kaẹn aro nọ khẹke ne ima ya gha ghee ẹdẹ ibuohiẹn ọghe Jehova. Nọ ne Ivbi Otu e Kristi ni ghaa rrọọ vbe ẹghẹ nẹdẹ, te ẹdẹ ọghe Jehova wa ye gha rree vbe aro iran; ọrheyerriọ ukọ ighẹ e Pita keghi tama iran ne iran “rhie ẹre ye ekhọe,” ra ne iran gha “hoo nọ rherhe rre.” (Tie 2 Pita 3:​10-13; ftn.) Ma gha mu egbe ye otọ, ma na vbe gha hoo ne ẹdẹrriọ rherhe rre, te ima rhie ẹre ma wẹẹ, ma rhie ẹre ye ekhọe. Adeghẹ ima na hia ne ima “gha mwẹ uyinmwẹ nọhuanrẹn, [ma na] vbe gha yin vbe odẹ nọ gha rhie ẹre ma wẹẹ, emwa ni rhiegbe ye ugamwẹ Osanobua ẹre [ima] khin,” te ima rhie ẹre ma wẹẹ, ma hoo ne ẹdẹ ọghe Jehova rherhe rre. Muẹn roro vbene ẹko khian gha rhiẹnrhiẹn e Jehova hẹ vbe u gha “rhiegbe ye ugamwẹ” ọnrẹn! Ọ gha wa vbe ya ẹko rhiẹnrhiẹn ọnrẹn deghẹ u na ya egbuẹ fiohan nẹẹn, u na vbe dinmwiamẹ.

AFIANGBE NE U GHA MIẸN DEGHẸ U NA DINMWIAMẸ NIAN

16. De ẹghẹ nọ khẹke ne u ya dinmwiamẹ? (2 Kọrint 6:​1, 2) (Vbe ya ghee avbe efoto.)

¹⁶ Ẹghẹ na ẹre ọ wa ya khẹke ne u dinmwiamẹ. (Tie 2 Kọrint 6:​1, 2.) Ovbi Ẹtiopia nọ ghaa re ọghẹrriẹnoguan ne Filip miẹn vbe odẹ keghi bẹghe ẹre wẹẹ, te ọ khẹke ne irẹn dinmwiamẹ vbobọvbobọ. Vbe ọ ghi rẹn otọ emwi na ghaa ma ẹre re, ọ na vbe bẹghe ẹre wẹẹ, ẹkpotọ kie ne irẹn ya dinmwiamẹ, ọ ma gha kha wẹẹ: ‘I gha hoo ne I ka ye ruẹ sayọ. Ma gha ye miẹn ẹzẹ ọvbehe vbe odaro.’ Nọghayayerriọ, ọ keghi tama e Filip wẹẹ, “Gu mwẹ wa dinmwiamẹ nian. Vbọ ghi da mwẹ obọ yi?” (Iwinna 8:​26, 27, 35-39) U miẹn igiemwi esi nọ rhie ye otọ! Okpia na ghi dinmwiamẹ nẹ, “ọ na gha ghọghọ khian.”

17. De ilẹkẹtin ne ima mwẹ?

¹⁷ Adeghẹ u na gha si egbe ne u ya dinmwiamẹ, gha mwẹ ilẹkẹtin wẹẹ, e Jehova hoo nọ ru iyobọ nuẹn, ne u mieke na do gha re ọsiọre. (Rom 2:4) Ọ gha sẹtin ru iyobọ nuẹn adeghẹ ohan na gha mu ruẹ, adeghẹ emwi eso na gha kpokpo ruẹ vbe orhiọn, ra adeghẹ ọ mwẹ emwi ọvbehe nọ si ẹre ne u ma na he ye dinmwiamẹ. U gha dinmwiamẹ nẹ, u do gha mwẹ ekhọe nọ hianrẹn, ẹghẹ nii, u ghi do bẹghe ẹre wẹẹ, u i ghi mwẹ emwi ne u ya “emwi ni rre iyeke” ru. (Fil 3:​8, 13) U ghi do rhie aro tua “emwi ni rre odaro,” ọni ọre emwi ne Jehova we irẹn khian ru ne emwa ni ya egbe fiohan nẹẹn kevbe ni dinmwiamẹ.​—Iwinna 3:19.