Emwi Ne Idinmwiamẹ Demu

1. Vbọ ya ima rẹn wẹẹ, “imamwaemwi nọ dekaẹn idinmwiamẹ” wa kakabọ ru ekpataki?

TE ẸKO wa sẹ ima ọyẹnmwẹ vbe emwa gha dinmwiamẹ! Wẹ kue rẹn wẹẹ, ọyẹnmwẹ vbenian ẹre ọ wa vbe gha sẹ etẹn vbe iko nokaro ne Ivbi Otu e Kristi na si egbe koko vbe ẹghẹ ọghe avbe uko? Emwa ni bun dinmwiamẹ vbe ẹdẹrriọ, a vbe ya ọta guan, vbe ọta nii, a keghi rhan otọ emwi ne idinmwiamẹ gele demu. (Iwinna 2:​38, 40, 41) Ukọ ighẹ e Pọl khare wẹẹ, “imamwaemwi nọ dekaẹn idinmwiamẹ” rre usun “emwi ne ima ka ruẹ vbe ẹghẹ okaro vbekpa Kristi.” (Hib 6:​1, 2) Ọrheyerriọ, te ọ ye khẹke ne ima ye rẹn otọ ọre ẹse. Vbọzẹ?

2. Vbọzẹ nọ na gele khẹke ne ima rẹn otọ emwi ne idinmwiamẹ demu?

² Zẹvbe ne ẹyotọ nọ wegbe ya owa deziẹn, ma gha vbe rẹn otọ emwi ne idinmwiamẹ demu, ọ ghi ya amuẹtinyan ọghe ima wegbe. Ọ gha khọnrẹn we ima ma he dinmwiamẹ ra ọ kpẹẹ re ne ima ghi dinmwiamẹ, te ọ wa khẹke ne ima rẹn otọ emwi ne idinmwiamẹ demu. Rhunmwuda ọni, vbe ako iruẹmwi na, ma gha rhie ewanniẹn ye avbe inọta na: Vbọ re idinmwiamẹ? Vbe a ya dinmwiamẹ hẹ? Vbọzẹ ne ima na dinmwiamẹ vbe eni ọghe Erha, ọghe Ọmọ kevbe ọghe orhiọn nọhuanrẹn?

EMWI NE IDINMWIAMẸ DEMU

3. De emwi ne idinmwiamẹ demu?

³ U gha dinmwiamẹ te u rhie ẹre ma vbe idagbo wẹẹ, u yaeyi emwi hia ne u ruẹ re vbekpa e Jehova kevbe Jesu Kristi, u roro iro fi uyinmwẹ werriẹ, u ru afiwerriẹ nọ khẹke ne u mieke na sẹtin ga e Jehova, u rẹnrẹn wẹẹ, e Jesu Kristi ẹre Jehova ya miẹn ima fan, u na vbe na erhunmwu gie Jehova ya gi ẹre rẹn wẹẹ, ahoo ọghẹe ẹre u khian ghi gha ru vbe otu ọghẹe. U gha ghi ya egbuẹ fiohan ne Jehova nẹ, u na vbe dinmwiamẹ, ọ rhie ma wẹẹ, u rre odẹ nọ rrie arrọọ ọghe etẹbitẹ.

4. De emwi nọ demu vbe a gha dinmwi ọmwa ye uwu amẹ? (Vbe ya ghee efoto.)

⁴ Ọmwa ghaa dinmwiamẹ, egbe ẹre hia ẹre a dinmwi ye uwu amẹ, a ghi vbe muẹn ladian,a te ọna yevbe na miẹn wẹẹ, te nene ọmwa ka wu, a na ree ẹre, a na ghi huẹn ọnrẹn kpaegbe. (Yae taa Kọlọse 2:12.) Te idinmwiamẹ rhie ẹre ma, afiwerriẹ ne u he ru vbe ẹdagbọn ruẹ. Odẹ vbo? A gha dinmwi ruẹ ye uwu amẹ, te u rhie ẹre ma wẹẹ, u i ghi mwẹ obọ vbe avbe emwi ne u ka gha ru nọ ma gua ilele ọghe Jehova ro. U gha ghi ladian vbe uwu amẹ nii, te u rhie ẹre ma wẹẹ, ahoo ọghe Jehova ẹre u khian ghi mu karo vbe ẹdagbọn ruẹ.

5. De vbene iwinna ne u ru nian, ne u ya mu egbe ye otọ khẹ idinmwiamẹ, ya yevbe iwinna ne Noa ru vbe ọ kan okọ? (1 Pita 3:​18-21)

⁵ Tie 1 Pita 3:​18-21. A gha sẹtin ya iwinna ne u ru nian, ne u ya mu egbe ye otọ khẹ idinmwiamẹ, ya gie iwinna ne Noa ru vbe ọ kan okọ. Adeghẹ te u da suẹn gha ruẹ vbekpa e Jehova, ọ sẹtin yevbe na miẹn wẹẹ, ẹ i re iwinna nekherhe ẹre u khian ru vbene u te sẹtin dinmwiamẹ, ọ sẹtin kue yevbe na ghee iwinna nọkhua ne Noa ru vbe ọ kan okọ. Esa rrọọ ne u khian ya ru iwinna vbenian ra? Ẹẹn, esa wa rrọọ! Vbe ima gu kha vberriọ? Muẹn roro iwinna ne Noa ru. Osanobua ẹre ọ tama e Noa vbene ọ khian ya kan okọ nii hẹ, e Noa na gele lele emwi ne Osanobua tama rẹn zẹẹ, ne okọ nii mieke na miẹn iran fan vbe okpamẹ nii gha rhọọ. Rhunmwuda ne Noa na mu ẹtin yan e Jehova, kevbe nọ na vbe gha họn ẹmwẹ nẹẹn, e Jehova keghi ru iyobọ nẹẹn ya sẹtin kan okọ nii. Vbe na ghee Noa, u gha vbe sẹtin “ru emwi hia ne Osanobua tama [ruẹ].”​—Gẹn 6:22.

6. De vbene idinmwiamẹ gha ya miẹn ima fan hẹ?

⁶ Vbe ebe 1 Pita 3:​21, ukọ ighẹ e Pita keghi kha wẹẹ, idinmwiamẹ ẹre ọ “miẹn [ima] fan.” Ọghe ne ẹmwata, ma rẹnrẹn we na wa dinmwi ọmwa ye amẹ kẹkan ma wa sẹ nọ gha miẹn ọnrẹn fan; ra nọ gha kpe orukhọ ọghẹe kua. Sokpan, esagiẹn ne Jesu da kua ẹre ọ khian sẹtin kpe orukhọ ọghe ima kua. (1 Jọn 1:7) Vbọrhirhighayehẹ, idinmwiamẹ keghi re ọkpa vbe usun emwi nọ ghi ru ekpataki sẹ ne Jehova we ne ima ru, ọ keghi vbe “re erhunmwu ne [ima] na gie Osanobua, ne [ima] mieke na gha mwẹ ekhọe nọhuanrẹn.” Ẹghẹ nii, e Jehova ghi sẹtin ru emwi ne ima nọ rẹn vbe erhunmwu, rhunmwuda, ma ya ẹko rhiẹnrhiẹn ọnrẹn. Odẹ vberriọ ẹre idinmwiamẹ ya “miẹn [ima] fan,” ra ẹre ọ ya kie ẹkpotọ yọ ne ima ya gha rrọọ vbe etẹbitẹ.

VBENE A YA DINMWIAMẸ HẸ

7. Vbe a ya dinmwiamẹ hẹ?

⁷ Vbọ gberra na dinmwi ọmwa ye uwu amẹ, e Baibol ma mobọ guan kaẹn emwi ni bun vbekpa vbene a ya dinmwiamẹ hẹ. Ọrheyerriọ, e Baibol gi ima rẹn emwi nọ khẹke ne emwa ni khian dinmwiamẹ ru. Vbe igiemwi, avbe ilele ni rre Baibol ru iyobọ ne emwa ni khian dinmwiamẹ ya rẹn aro egbe nọ khẹke ne iran mu, kevbe emwi nọ khẹke ne emwa ni rrie ughe ru. (1 Kọr 14:40; 1 Tim 2:9) Vbe ẹdẹnẹrẹ, ediọn vbe iko ẹre ọ mobọ dinmwi ọmwa ye amẹ. Ọ ma khẹke na gha ghee ediọn ni ru iwinna na gidii. (1 Kọr 1:​14, 15) Vbe a ghaa dinmwi ọmwa ye amẹ, a i lele deghẹ emwa ni rre evba bun ra iran i bun.​—Iwinna 8:36.

8. De inọta eva na nọ emwa ni khian dinmwiamẹ, kevbe wẹẹ, vbọzẹ? (Iwinna 2:​38-42) (Vbe ya ghee efoto.)

⁸ E Baibol gi ima rẹn wẹẹ, te ọ khẹke ne ima ya “unu [ima] ya ta ẹmwẹ amuẹtinyan nii vbe idagbo, [nọ gha miẹn ima] fan.” (Rom 10:​9, 10; ghee study note nọ khare wẹẹ, “publicly declare.”) Rhunmwuda ọni, te ọ wa gele deyọ wẹẹ, ma ta ẹmwẹ amuẹtinyan ọghe ima vbe idagbo vbe ẹdẹ ne ima dinmwiamẹ, rhunmwuda, ọ keghi rre usun emwi nọ gha ya ima miẹn fan! Ọna ẹre ọ si ẹre na na nọ emwa ni khian dinmwiamẹ ọta eva. Nokaro ọre wẹẹ, “Wa roro iro fi uyinmwẹ werriẹ nẹ ra? Wa ya egbe fiohan ne Jehova nẹ ra? Wa vbe mu ẹtin yan e Jesu zẹvbe ọmwa ne Jehova loo ro ya miẹn emwa nagbọn fan ra?” Emwi ne inọta nokaro na mobọ demu ọre emwi ne ọmwa nii he ru nọ mieke na sẹtin gbegba nọ gha dinmwiamẹ, emwi vbenian ẹre Pita vbe tama emwa ne iran ru vbe ugie Pẹntikọst. Inọta nogieva ọre wẹẹ, “Wa vbe rẹn wẹẹ, wa gha ghi dinmwiamẹ nẹ, ọkpa vbe Avbe Osẹe Jehova ẹre uwa ghi khin ra?” Emwi ne inọta na demu ọre emwi ne ọmwa gha ru nọ ya rhie ẹre ma wẹẹ, te irẹn khian gha lele adia nọ ke obọ otu e Jehova rre, kevbe wẹẹ, te irẹn khian deba etẹn ni rre uhunmwu otagbọn hia gha ga e Jehova vbene Ivbi Otu e Kristi ni ghaa rrọọ vbe ẹghẹ nẹdẹ vbe ru ẹre. (Tie Iwinna 2:​38-42.) Adeghẹ ẹẹn ọre ewanniẹn ne dọmwadẹ iran ya ekhọe hia rhie ye inọta eva na, ọ rhie ma wẹẹ, iran gbegba nọ gha dinmwiamẹ.

9. De emwi nọ khẹke ne emwa hia ru ne Osanobua mieke na miẹn iran yi?

⁹ Uhiẹn vbene u te dinmwiamẹ, a sẹtin miẹn wẹẹ, ọmwa esi ẹre u ghaa khin, kevbe wẹẹ, u ma gha mwẹ obọ vbe orukhọ nọ wegbe. A sẹtin vbe miẹn wẹẹ, Osẹe Jehova ẹre evbibiẹ ruẹ khin, iran ẹre ọ ru iyobọ nuẹn ya do hoẹmwẹ e Jehova. Nọnaghiyerriọ, esa rrọọ ne u ya roro iro fi uyinmwẹ werriẹ, ne u vbe dinmwiamẹ, ne Osanobua mieke na miẹn ruẹ yi ra? Ẹẹn. Te ọ khẹke ne ima rẹn wẹẹ, emwa orukhọ ẹre ima hia khin, orukhọ na ẹre ọ ya ima khian oghian Osanobua. (Psm 51:5) Vbọrhirhighayehẹ, vbe ima ghi do rẹn e Jehova nẹ, ahoo ọghẹe ẹre ima ghi mu karo vbe ẹdagbọn ima. Ma gha ghi ru ọna nẹ, te ọ khẹke ne ima roro iro fi uyinmwẹ werriẹ, ma ghi vbe kie werriegbe vbe orukhọ ne ima te ru, ma ghi suẹn gha ru emwi nọ ya ẹko rhiẹnrhiẹn Erha ima nọ rre ẹrinmwi. Ẹghẹ nii, ma ghi sẹtin dinmwiamẹ.​—Iwinna 3:19.

10. De emwi nọ khẹke ne u ru adeghẹ u ka dinmwiamẹ vbe ugamwẹ ọvbehe?

¹⁰ Adeghẹ u ka dinmwiamẹ nẹ vbe ugamwẹ ọvbehe, te ọ ye khẹke ne u dinmwiamẹ zẹvbe Osẹe Jehova. Vbọzẹ? Rhunmwuda, vbe ẹghẹ ne u na ka dinmwiamẹ, u ma rẹn ẹmwata vbekpa e Jehova kevbe Jesu Kristi. Vbe deba ọni, ọ gha khọnrẹn we u ka ya egbuẹ fiohan ne Osanobua vbe erhunmwu, u ma ka rẹn otọ emwi ne ahoo ọghẹe gele demu vbe u ru eyan nii. Vbe ukọ ighẹ e Pọl miẹn ikpia eso vbe Ẹfisọs ni ka dinmwiamẹ nẹ, sokpan ni ma gele rẹn otọ imamwaemwi ọghe Ivbi Otu e Kristi, ọ na ru emwamwa na ya dọlegbe dinmwi iran ye amẹ.b (Iwinna 19:​1-5) Erriọ ẹre ọ vbe ye vbe ẹdẹnẹrẹ, idinmwiamẹ ne Osanobua kpasẹ yi, ọre nọ hẹnhẹn egbe yan irẹnmwi nọ gbae ọghe Osanobua.

“VBE ENI ỌGHE ERHA, ỌGHE ỌMỌ KEVBE ỌGHE ORHIỌN NỌHUANRẸN”

11. Vbe a yae kha na dinmwiamẹ “vbe eni ọghe Erha, ọghe Ọmọ kevbe ọghe orhiọn nọhuanrẹn”? (Matiu 28:​18-20)

¹¹ Jesu khare we na gha dinmwi emwa ye amẹ “vbe eni ọghe Erha, ọghe Ọmọ kevbe ọghe orhiọn nọhuanrẹn.” (Tie Matiu 28:​18-20.) Vbe ọ ya ọna kha? Vbe Baibol, a ghaa guan kaẹn “eni” ọmwa, emwi na mobọ yae kha ọre aro ọmwa ne ọmwa nii khin. Ọ sẹtin vbe gha re ukpo ne ọmwa nii na zẹ ra asẹ nọ mwẹ. Rhunmwuda ọni, ma gha ru emwi “vbe eni” ọmwa ra eni emwi, ọ rhie ma wẹẹ, ma rẹn ukpo ne ọmwa nii na zẹ kevbe asẹ nọ mwẹ. (Yae taa Matiu 10:41; ghee study note nọ khare wẹẹ, “because he is a prophet.”) Gi ima guan kaẹn vbene ima khian ya rẹn asẹ ne Erha kevbe Ọmọ mwẹ, kevbe iyobọ ne orhiọn nọhuanrẹn ọghe Osanobua ye.

12. Vbe ima ya dinmwiamẹ hẹ vbe eni Erha? (Arhie Maan 4:11) (Vbe ya ghee efoto.)

¹² Vbe eni Erha. Ma rẹnrẹn wẹẹ, e Jehova ọre Erha ima nọ rre ẹrinmwi, ra ọmwa nọ rhie arrọọ ne ima. Irẹn ọre Osa ne oghodua, kevbe Ayi nọ yi emwi hia. (Tie Arhie Maan 4:11.) Ma vbe rẹn wẹẹ, irẹn ọre Osa nọ họn erhunmwu, ma vbe ya ọghọ vbe ute so unu ye eni ẹnrẹn vbe ima ghaa na erhunmwu kevbe vbe ima ghaa ta ẹmwẹ ọnrẹn ma emwa ọvbehe. (Psm 65:2) Ọrheyerriọ, ọ ye mwẹ emwi ọvbehe nọ demu na dinmwiamẹ vbe eni Erha. Emwa ne Pita ghaa gu guan vbe ugie Pẹntikọst ka rẹn e Jehova nẹ, sokpan te ọ khẹke ne iran rẹn wẹẹ, e Jehova ẹre ọ khian rhie arrọọ ọghe etẹbitẹ ne emwa nagbọn lekpa e Jesu Kristi.​—Rom 5:8.

13. Vbe ima ya dinmwiamẹ hẹ vbe eni Ọmọ? (Vbe ya ghee efoto.)

¹³ Vbe eni Ọmọ. Ma rẹnrẹn wẹẹ, Jesu Kristi ọre ukpọmọkpa ọghe Osanobua. Jesu ọre “odẹ,” ọni nọ wẹẹ, irẹn ẹre ọ zẹe ighẹ ima gha sẹtin gu Osanobua ru ọse. (Jọn 14:6) Jesu ẹre ọ vbe miẹn ima fan, uwu ọghẹe ẹre ọ vbe zẹe ighẹ ima gha sẹtin gha rrọọ vbe etẹbitẹ. Ọna ẹre ọ si ẹre ne ima na lele ukpowẹ ọghe Jesu vbe ẹdẹgbegbe, ẹ i wa re vbe ima gha dinmwiamẹ nẹ ọkpa. (1 Jọn 2:6) Nọnaghiyerriọ, ekhọe hia ẹre ima ya kporhu vbene Jesu vbe ru ẹre, ma i vbe gi emwi rhọkpa mu idobo ye ima egbe. (Luk 4:43) Ma kue mu egbe ne ima ya zin egbe ukpokpo nọ ke obọ eghian rre, rhunmwuda ne ima na ga e Jehova. (2 Tim 3:12) Ma rhie ọghọ ne Jesu zẹvbe “uhunmwuta ọghe iko,” rhunmwuda ọni, ma keghi lele adia ọghe emwa ne irẹn zẹ nọ gha mu asanikaro vbe uwu iko, kevbe ni vbe gbaroghe erhuanegbe ẹre.​—Ẹfis 4:​8, 11, 12; 5:23.

14. (a) Vbe ima ya dinmwiamẹ hẹ vbe eni orhiọn nọhuanrẹn? (Vbe ya ghee efoto.) (b) De odẹ ọvbehe ne etẹn na hannọ zẹ ya dinmwiamẹ? (Ya ghee ẹkpẹti nọ khare wẹẹ, “Odẹ Ughughan Ne Etẹn Na Hannọ Zẹ Ya Dinmwiamẹ.”)

¹⁴ Vbe eni orhiọn nọhuanrẹn. Ma keghi do rẹn ẹmwata vbekpa orhiọn nọhuanrẹn. Ẹ i re ọmwa, ẹ i vbe re ọkpa vbe Osa Ne Agbeha, sokpan, ọ keghi re ẹtin ne Osanobua loo. Ma na vbe do rẹn wẹẹ, orhiọn nọhuanrẹn ẹre ọ dia avbe akhasẹ kevbe emwa ni gbẹn e Baibol, rhunmwuda ọni, ẹghẹ hia ẹre ima ya tie Baibol, erriọ ẹre ima vbe ya rhie owẹ lele emwi ni rre uwu ẹre. (2 Pit 1:​20, 21) Ma keghi vbe hia vbe odẹ ke odẹ ne ima ghẹ ru orukhọ nọ wegbe, rhunmwuda ma gha ru vberriọ orhiọn nọhuanrẹn ọghe Osanobua i khian ghi gha gu ima rrọọ, vbe deba ọni, orhiọn nọhuanrẹn i khian ghi gha dia iko vbene ọ te khẹke.​—Ẹfis 4:30.

15. Vbọ khẹke ne ima ru?

¹⁵ Adeghẹ Ovbi Otu e Kristi nọ dinmwiamẹ nẹ ẹre u khin, hia ne u rẹn otọ “imamwaemwi nọ dekaẹn idinmwiamẹ,”c u ghi vbe hia ne u muẹn sẹ eyan ne u yan rẹn vbe u ya egbuẹ fiohan ne Jehova kevbe vbe u dinmwiamẹ. Sokpan, adeghẹ u ma na he ye dinmwiamẹ ghi vbo? Ọ mwẹ emwi nọ si ruẹ obọ ghee iyeke ra? Vbe ako iruẹmwi nọ ghi lele ọna, ma gha guan kaẹn emwi ne u gha ru ne u mieke na sẹtin gbegba nọ gha dinmwiamẹ.