Wẹ Mu Egbe Khẹ Ọlọghọmwa Nọ Gha Sẹtin De Rre Vbe U Gha Dinmwiamẹ Nẹ Ra?

1-2. De emwi eso ne ima gha sẹtin ru ya mu egbe khẹ ọlọghọmwa eso nọ gha sẹtin de rre vbe ima gha la odẹ ẹmwata nẹ? Ru igiemwi yọ.

MA WA rẹn wẹẹ, ẹ i mwẹ ma ma werriẹ aro daa ọlọghọmwa vbe agbọn Esu na. Ẹ i khabe ne Jesu na tama erhuanegbe ẹre wẹẹ: “Ẹ i mwẹ na ghẹ miẹn avbe okuta ni rrua ọmwa owẹ.” (Mat 18:7) Vbene ima na mwẹ ọna vbe ekhọe, te ọ khẹke ne ima rẹn wẹẹ, ma gha werriẹ aro daa ọlọghọmwa, uhiẹn etẹn ima sẹtin kue ru emwi nọ gha sọnnọ ima.

² Vbe igiemwi, ẹghẹ hia ẹre a ya rhie igiọdu ne eguọmwadia e Jehova ne iran mu egbe khẹ odekun ẹrhia nọ gha sẹtin sunu vbe eke ne iran ye. Vbe ima ya ru ọna hẹ? Vbe okaro, te ọ khẹke ne ima hia ne ima rẹn aro odekun ẹrhia nọ gha sẹtin sunu vbe ẹdogbo ne ima ye. Katekate deghẹ a na miẹn wẹẹ, te ima da wa sẹ ẹdogbo nii. Iyeke ọni, ma ghi ru emwamwa emwi ne ima khian ru ya mu egbe ye otọ. (Itan 21:5) Erriọ ẹre ọ vbe ye, te ọ vbe khẹke ne ima rẹn ọlọghọmwa eso ne ima gha sẹtin werriẹ aro daa vbe ima gha la odẹ ẹmwata nẹ, ma ghi vbe mu egbe ye otọ, a i rẹn deghẹ ọlọghọmwa vberriọ na de rre. Ma gha ru vberriọ, ma ghi sẹtin zin egbe, ma i khian vbe khian rree ne Jehova. (Psm 17:5) Nọnaghiyerriọ, gi ima guan kaẹn ọlọghọmwa eha nọ gha sẹtin de rre, kevbe vbene ima khian ya sẹtin mu egbe khẹ ọre hẹ.a

ỌTẸN GHA RU EMWI NỌ SỌNNỌ RUẸ

3. De ọlọghọmwa ne ima gha sẹtin werriẹ aro daa vbe uwu iko?

³ U ye yerre ẹghẹ okaro ne u ya yo iko ọghe Avbe Osẹe Jehova ra? Te u wa bẹghe ẹre wẹẹ, iran hoẹmwẹ egbe ẹsẹsẹmwẹse. Ọna ẹre ọ ya ruẹ yayi wẹẹ, u miẹn odẹ ẹmwata nẹ ra? (Jọn 13:35; Kọl 3:12) Erriọ ẹre ọ wa gha ye ne Blanca.b Vbọrhirhighayehẹ, ọ mwẹ emwi nọ sunu vbe ọ ghi dinmwiamẹ nẹ. Ọ khare wẹẹ: “Ọtẹn nokhuo ọkpa keghi ya obọ atosi mu mwẹ. I na vbe do rẹn wẹẹ, ọ ta emwa ọvbehe ọtakhọ. A gha tama mwẹ wẹẹ, egbe emwi vbenian gha sunu, I i yayi; rhunmwuda I rẹnrẹn wẹẹ, Avbe Osẹe Jehova wa hia ne iran gha re emwa ọfunmwegbe kevbe emwa ni ya obọ esi mu emwa ọvbehe.” Ẹmwata nọ rrọọ ọre wẹẹ, etẹn wa hia ne iran gha mwẹ uyinmwẹ ni khẹke Ivbi Otu e Kristi sokpan, ọ ma gba ne iran fo. (Ẹfis 4:​23, 24; 1 Jọn 1:8) Rhunmwuda ọni, ugbẹnso ọtẹn sẹtin ta emwi ra ọ sẹtin ru emwi nọ sọnnọ ruẹ. (Jems 3:8) Nọ ya da ọmwa ọre wẹẹ, emwi vbenian ya emwa eso sẹ e Jehova rae nẹ.

4. Vbọ khian ru iyobọ ne ima ya sẹtin yabọ etẹn vbe iran gha ru emwi nọ sọnnọ ima? (Ẹfisọs 4:32)

⁴ De emwi ne u gha sẹtin ru nian nọ gha ru iyobọ nuẹn adeghẹ ọtẹn na ru emwi nọ sọnnọ ruẹ? Hia ne u gha lele ibude nọ rre ebe Ẹfisọs 4:32. (Tie ẹre.) Adeghẹ u na hia ne u gha mwẹ itohan kevbe ekhọe agiẹngiẹn, ọ gha ru iyobọ nuẹn ya sẹtin gha gu emwa rrọọ vbe uwu ọfunmwegbe. Gi ẹre gha re emwi nọ gua ruẹ obọ ro ne u gha ya ekhọe hia yabọ emwa ọvbehe vbe iran gha ru ruẹ khọọ. De emwi nọ gha ru iyobọ nuẹn ya sẹtin gha ru vberriọ? Yerre wẹẹ, ẹ i re avbiẹ inugba ẹre u rinmwian e Jehova nọ yabọ ruẹ, ọ ghi gele ya ekhọe hia ru vberriọ. (Mat 6:12) U gha gele gbọyẹmwẹ ye vbene Jehova ya ya ekhọe hia yabọ ruẹ, ẹ i khian gha lọghọ ruẹ ne u yabọ emwa ọvbehe.

5. De ibude nọ rre Baibol nọ gha ru iyobọ ne ima vbe ọmwa gha ru emwi nọ sọnnọ ima? (Itan 19:11) (Vbe ya ghee avbe efoto.)

⁵ Tie Itan 19:11. E Baibol gi ima rẹn wẹẹ, ma ghaa re ọmwa nọ wan,c ma i khian rherhe gha mu ohu. Ibude na ẹre ọ ru iyobọ ne Rima, ọ ma he kpẹẹ gbe ne ọtẹn na dinmwiamẹ. Ọ khare wẹẹ: “Ẹghẹ ke ẹghẹ ne etẹn ya ru emwi nọ sọnnọ mwẹ, I ghi ya ye emwi nọ rre ebe Itan 19:11 rre. I ghi muẹn roro vbene emwi ye iran hẹ kevbe vbene a ya koko iran waan, I ghi vbe hia ne I rẹn evbọzẹe ne iran na ru emwi ne iran ru. I vbe hia ne imẹ vbe iran gba winna vbe ikporhu. Ọna wa ru iyobọ mẹ ya gele rẹn iran sayọ.” Emwi esi ẹre ọtẹn na wa ru. Hia ne u rẹn etẹn ni rre iko sayọ nian. Ọna gha ru iyobọ nuẹn ya sẹtin gha yabọ iran vbe iran gha ru emwi nọ sọnnọ ruẹ.

6. Vbọ khian ru iyobọ ne ima ya sẹtin gu etẹn gha rrọọ vbe uwu ọfunmwegbe?

⁶ De emwi ne u gha sẹtin ru ne u mieke na gu obọ etẹn ni rre iko? Zẹvbe ne u ya hia ne u rẹn etẹn sayọ, hia ne u rhie aro tua uyinmwẹ esi ne iran mwẹ. (Yae taa Itan 10:12; Rom 12:10; Fil 2:​2, 3) Gi ima guan kaẹn vbene ọna ya ru iyobọ ne ọtẹn nokpia ọkpa na tie ẹre Mark, nọ da dinmwiamẹ. Zẹvbe nọ ya gu etẹn vbe iko mu obọ, ọ na do gha bẹghe ako eso ne iran i na hia. Vbọ ru iyobọ ne Mark ne ọna ma na gbe amuẹtinyan ọghẹe mu otọ? Ọ khare wẹẹ: “I keghi do bẹghe ẹre wẹẹ, abakuru ne etẹn ru ma sẹ emwi rhọkpa vbe a gha yae taa ọghe emwa ni rre uwu agbọn. Ọna keghi ya mwẹ rẹn wẹẹ, ọ ma khẹke ne I gha rhie aro tua eke ne etẹn na vburriẹ. Nọnaghiyerriọ, uyinmwẹ esi ne iran mwẹ ẹre I ghi rhie aro tua.” U gha lele igiemwi ọghe ọtẹn na, wẹ gha vbe sẹtin gu etẹn gha rrọọ vbe uwu ọfunmwegbe.

ADEGHẸ EMWI ESO NE U SẸRAE NA GHA DA RUẸ

7. De emwi nọ gha sẹtin ya emwi ne ima sẹrae vbe agbọn Esu na gha da ima?

⁷ Vbe u da wa miẹn odẹ ẹmwata, ẹ i mwẹ ọ ma gha gbe ruẹ otiti wẹẹ, u i ghi re ọkpa vbe agbọn Esu na. U sẹtin gha roro ẹre wẹẹ, ‘A vbe miẹn ọmwa nọ gha gbe I ma rẹn we irẹn kpa hin agbọn Esu rre ra?’ Sokpan, edanmwẹ gha ghi de rre, emwi eso ne u te sẹrae vbe agbọn Esu vbe u suẹn gha ga e Jehova sẹtin do gha da ruẹ. (Yae taa Nọmbas 11:​4-6.) Vbe igiemwi, a sẹtin miẹn wẹẹ, etẹn eso sẹ iwinna nọ ya emwa họn usi iran rre rae, rhunmwuda nọ na gbe iran ẹghẹ. Nọ ne etẹn eso, avbe ọse iran ne kankankan keghi sẹ iran rae rhunmwuda ne iran na suẹn gha ruẹ e Baibol. Eso vbe rrọọ ni ban uyinmwẹ eso ni gua iran obọ ro nẹi yẹẹ Osanobua, ne iran te sọyẹnmwẹ ọnrẹn. Ọ ma zẹdẹ khẹke ne emwi ne ima ka sẹrae nẹ vbe agbọn Esu do ya ima sẹ e Jehova rae! De emwi ne u gha ru nian, nọ gha ru iyobọ nuẹn ne egbe emwi vbenian ghẹ mieke na sunu daa ruẹ?

8. Vbe ima miẹn ruẹ vbe obọ Ebraham vbe Sera?

⁸ E Baibol guan kaẹn eguọmwadia e Jehova eso ni gha te sẹtin suẹn gha gbe I ma rẹn ye emwi eso ne iran sẹrae. Vbe igiemwi, Ebraham vbe Sera keghi họn ẹmwẹ ne Jehova, iran na kpa hin Ọr ne okpẹvbo ne mose mose rre, ibọkpọ ẹre iran ghi gha dia. (Hib 11:​8, 9) Ọghe ne ẹmwata, a sẹtin miẹn we iran ghaa muẹn roro vbe ugbẹnso vbene Ọr fu iran egbe rre hẹ. Sokpan “akpawẹ te iran ye gha mu ẹmwẹ eke ne iran ke kpa roro” kevbe emwi ne iran sẹrae, egbọre iran gha te werriegbe. Nọghayayerriọ, iran keghi rhie aro tua afiangbe ne iran khian miẹn vbe odaro.​—Hib 11:​15, 16.

9. De aro ne Pọl ya gha ghee avbe emwi nọ sẹrae? (Filipai 3:​7, 8, 13)

⁹ Ukọ ighẹ e Pọl keghi ru afiwerriẹ ne gẹdẹgbẹ vbe ẹdagbọn ọnrẹn nọ mieke na sẹtin ga e Jehova. Vbene ọ te khian Ovbi Otu e Kristi, e Gameliẹl ne okpọmwa nọ re ọmamwaemwi, ẹre ọ ma e Pọl Uhi ọghe Ivbi e Ju. (Iwinna 22:3) Ẹkpotọ te wa kie ne Pọl nọ ya gha rre ukpo nọ hin usi vbe ugamwẹ Ivbi e Ju. (Gal 1:​13, 14) Sokpan, vbe ọ ghi miẹn iyẹn nọ maan yi nẹ, ọ keghi sẹ ena hia rae. Te emwi wa gha rhiẹnrhiẹn vbe ọ ghi khian Ovbi Otu e Kristi nẹ ra? Hiehie. A gbe ẹre, a muẹn ye eghan, uhiẹn, emwa rẹn na kue gha khuiwu ẹre. (2 Kọr 11:​23-26) Akpawẹ edanmwẹ nọ ghaa ye ẹre ọ rhie aro tua, kevbe wẹẹ, ọ ghaa ya vbene emwi ye ẹre hẹ taa vbene emwi ka gha ye, ọ sẹtin do gha roro ẹre wẹẹ, ẹghẹ ne irẹn ma na he khian Ovbi Otu e Kristi ẹre agbọn na maan irẹn sẹ. Nọghayayerriọ, e Pọl keghi rhie aro tua ẹkpotọ nọkhua nọ kie nẹẹn nọ ya gha re ọrhuanegbe Jesu kevbe afiangbe nọ khẹ irẹn vbe odaro. Te Pọl wa ya ekhọe hia yayi wẹẹ, avbe afiangbe na kakabọ sẹ emwi hia ne irẹn sẹrae!​—Tie Filipai 3:​7, 8, 13.

10. De emwi nọ khẹke ne ima gha mu roro vbe ẹghẹ hia? (Mak 10:​29, 30) (Vbe ya ghee avbe efoto.)

¹⁰ Vbe ima miẹn ruẹ vbe ọna? Adeghẹ emwi eso ne u sẹrae ne u mieke na sẹtin do gha re Ovbi Otu e Kristi na gha da ruẹ vbe orhiọn, hia ne u yerre evbọzẹe ne u na ka sẹ avbe emwi nii rae. (Asan 7:10) U sẹtin ya emwi ne u sẹrae ya taa afiangbe ne u miẹn nian vbe odẹ ẹmwata. Vbe igiemwi, te u ghi sikẹ e Jehova sayọ. (Itan 3:32) Te etẹn ni rre uwu iko ghi yevbe ẹgbẹe ruẹ. (Tie Mak 10:​29, 30.) Afiangbe nọkhua wa vbe khẹ ruẹ vbe odaro! (Aiz 65:​21-23) Adeghẹ u na rhie aro tua afiangbe ne u miẹn rhunmwuda ne u na ga e Jehova, emwi ne u sẹrae i khian ghi gha da ruẹ vbe orhiọn.

11. Vbua miẹn ruẹ vbe obọ Ọtẹn Nokhuo Rosemary?

¹¹ Ọ mwẹ ọtẹn nokhuo ọkpa na tie ẹre Rosemary, odẹ ukpo 50 ẹre ọ ghaa ye vbe ọ dinmwiamẹ. Gi ima guan kaẹn emwi nọ ru iyobọ ne ọtẹn nokhuo na nọ ma na gha gbe I ma rẹn rhunmwuda emwi eso nọ sẹrae nọ mieke na do ga e Jehova. Ọ khare wẹẹ: “Vbe I da la odẹ ẹmwata na, ọ kegha da mwẹ we I ma ghi gha ru Emwi Ukpo, rhunmwuda, ẹghẹ ne imẹ vbe ẹgbẹe mwẹ te ya gha sọyẹnmwẹ egbe ẹre nọ. Ẹghẹ nii, ẹre ima ya gha ya emwi ne egbe. Ibiẹka ni rrọọ ghi tota lẹga emwi ne ebo tie ẹre Christmas tree ne emwa ya te owa vbe ẹghẹ Emwi Ukpo, iran ghi gha ghọghọ zẹvbe ne iran ya fannọ emwi na ya ne iran. Te ena hia wa gha sẹ mwẹ ọyẹnmwẹ.” Vbọ ghi ru iyobọ ne ọtẹn na? E Rosemary khare wẹẹ: “I keghi hia ne I gha ru emwi ọvbehe nọ gha rhie ihe Emwi Ukpo. Vbe ukpo ukpo I ghi mwamwa ẹdẹ ọkpa ne imẹ vbe ẹgbẹe mwẹ hia gha ya si egbe koko ne ima sọyẹnmwẹ egbe, I ghi ya emwi ne iran, I ghi vbe gi iran rẹn evbọzẹe ne I na hoẹmwẹ dọmwadẹ iran.” Sokpan, ọ vbe gha mwẹ ọlọghọmwa ọvbehe ne Rosemary vbe miẹn. Ọ khare wẹẹ: “Vbe I la odẹ ẹmwata na, avbe ọse ne I ghaa mwẹ keghi sẹ mwẹ rae. Ugbẹnso, I gha mu ẹmwẹ iran roro, ọ ghi wa gha da mwẹ, ọ na yevbe na miẹn wẹẹ, imẹ ọkpa ẹre ọ rrọọ.”d Vbọ ghi ru iyobọ nẹẹn? Ọ na ghi hia nọ gha gu etẹn nikhuo ughughan winna vbe ikporhu. Ọ khare wẹẹ: “Ọna keghi ru iyobọ mẹ ya do gha mwẹ avbe ọse ọvbehe ne I hoẹmwẹ ọnrẹn, I i ya ẹmwẹ iran ku hiehie.” Vbua miẹn ruẹ vbe obọ ọtẹn nokhuo na? Ọ sẹtin gha da ruẹ we u i ghi ru emwi eso ne u te ka sọyẹnmwẹ ọnrẹn vbene u te do rẹn odẹ ẹmwata na, sokpan u gha wa sẹtin ya emwi nọ maan rhie ihe ẹre. (Fil 4:​8, 9) U ghi vbe yerre wẹẹ: Adeghẹ u na rhikhan mu e Jehova, u gha miẹn afiangbe nọ sẹ emwi ke emwi ne u sẹrae.

ADEGHẸ EMWA ỌVBEHE NA SẸ E JEHOVA RAE

12. De emwi eso nọ sunu vbe uwu iko nọ gha sẹtin ya egbe wọọ ima?

¹² Vbe u miẹn odẹ ẹmwata na, ẹ i mwẹ u ma gha ghọghọ wẹẹ, u i khian ghi gha re ọkpa vbe agbọn Esu na kevbe wẹẹ, ọkpa vbe usun emwa ni ma emwa ẹmwata, ni vbe hia ne iran gha ru emwi esi ẹre u ghi khin. (Aiz 65:14) Ọrheyerriọ emwa eso vbe uwu iko sẹtin ru orukhọ nọ wegbe. A sẹtin kue rhie eso hin iko rre. (1 Kọr 5:13) Gi ima guan kaẹn vbene egbe emwi vbenian ya ya egbe wọọ ọtẹn nokhuo ọkpa na tie ẹre Samar. Ọ khare wẹẹ: “Vbe ọ ma he kpẹẹ ne I dinmwiamẹ, ọdiọn ọkpa vbe iko ne I ye keghi ru orukhọ nọ wegbe, a na rhie ẹre hin iko rre. Emwi nọ sunu na te ya mwẹ do gha gbawawẹ deghẹ azẹ nọ khẹke ẹre I ru, rhunmwuda a gha tama mwẹ wẹẹ, ọdiọn gha sẹtin ru orukhọ ghee Jehova I i yayi, te ọ wa da etẹn hia ni rre iko.” Ẹmwata nọ wẹẹ, te ọ khẹke ne ima gele yayi wẹẹ, etẹn ima hoẹmwẹ e Jehova kevbe we iran hoo ne iran rhikhan muẹn. (1 Kọr 13:​4, 7) Sokpan, ọ keghi re emwi nọ da ọmwa wẹẹ, ukpo ukpo a sẹtin rhie etẹn eso hin iko rre. Ọna sẹtin wa da ima sẹ ugboloko adeghẹ a na miẹn wẹẹ, ọmwa nọ kakabọ sikẹ ima, ra ọmwa ne ima te hoo ne ima ya egbe taa ẹre ọ ghi do sẹ e Jehova rae.

13. De emwi ne ima gha sẹtin ru nian nọ gha ru iyobọ ne ima adeghẹ ọmwa nọ sikẹ ima na sẹ e Jehova rae?

¹³ De emwi ne u gha sẹtin ru nian nọ gha ru iyobọ nuẹn adeghẹ ọmwa nọ sikẹ ruẹ na sẹ e Jehova rae? Hia ne u ye gha ru emwi nọ gha ya ruẹ sikẹ e Jehova sayọ. (Jems 4:8) Yerre wẹẹ, dọmwadẹ ọghẹe ẹre ọ rrie agbọn ọnrẹn; wẹ tobọ ruẹ ẹre ọ yan we u gha ga e Jehova sẹ ufomwẹ. Vbe igiemwi, agharhemiẹn wẹẹ, te ima ga e Jehova kugbe zẹvbe ẹgbẹe vbe uwu iko, te ọ wa ye ru ekpataki ne ima tobọ ima gha na erhunmwu, ne ima vbe gha tie Baibol ne egbe ima.​—Psm 1:2; 62:8.

14. Vbe ima miẹn ruẹ vbe obọ ukọ ighẹ e Pita? (Jọn 6:​66-68)

¹⁴ Ma gha wa miẹn emwi ruẹ vbe obọ ukọ ighẹ e Pita vbe ẹghẹ ne erhuanegbe Jesu ni bun ya sẹ e Jesu rae. A sẹtin miẹn wẹẹ, e Pita ma vbe rẹn otọ emwi eso ne Jesu tae. Sokpan yẹrẹro emwi ne Pita ta vbe ebe Jọn 6:​66-68. (Tie ẹre.) Ne Pita gha te ya rhie aro tua emwi ne iran nikẹre ghaa ru, ọ na rhie aro tua imamwaemwi ẹmwata nọ ruẹ re vbe obọ e Jesu. Ọna ẹre ọ ru iyobọ ne Pita ya sẹtin mudia ẹse. Erriọ ẹre ọ vbe ye vbe ẹdẹnẹrẹ, ọ ma khẹke ne ima gi emwi ne emwa ọvbehe ru ya ima gha gbawawẹ deghẹ odẹ ẹmwata ẹre ima gele ye. Dobọ mu ẹmwata! E Samar, na ka guan kaẹn ban khare wẹẹ, “Ẹghẹ hia ẹre I ya ye egbe mwẹ ẹre rre wẹẹ, rhunmwuda wẹẹ, orhunmwu ọkpa ru orukhọ nọ wegbe vbe uwu iko ma rhie ma wẹẹ, etẹn nikẹre wa vbe ru orukhọ nọ wegbe ra wẹẹ, emwi na ma ima re vbe iko ma gba.”

15. Vbua miẹn ruẹ vbe igiemwi ọghe Emily?

¹⁵ Gi ima guan kaẹn igiemwi ọghe ọtẹn nokhuo ọkpa na tie ẹre Emily. Ọ ghi rre uzọla ọkpa ne Emily dinmwiamẹ, iyẹe keghi kpa sẹ iran rae, a na rhie ẹre hin iko rre. Emily khare wẹẹ: “A na tama mwẹ vbe imina wẹẹ, egbe emwi vbenian gha sẹtin sunu, I i yayi. Ọna ọre ọlọghọmwa nọ ghi wegbe sẹ ne I he miẹn, te ẹmwẹ iye mwẹ wa da mwẹ.” De emwi nọ ghi ru iyobọ ne Emily? Ọ khare wẹẹ: “Erha mwẹ kevbe etẹn ni rre iko wa ru iyobọ mẹ. Te etẹn ni rre iko ghi do yevbe na ghee ẹgbẹe mwẹ. A i miẹn ọmwa nọ fo na, te emwa hia wa werriẹ aro daa ọlọghọmwa. Ọna ẹre ọ si ẹre nọ na kakabọ ru ekpataki na sikẹ egbe vbe iko, na vbe gha rhie igiọdu ne egbe.” (1 Pit 5:9) Ọ ma khẹke ne emwi gha lọghọ nẹ, u ke suẹn gha sikẹ etẹn ni rre iko. Hia ne u sikẹ iran nian. Odẹ vberriọ, adeghẹ ọlọghọmwa na de rre, etẹn ghi sẹtin ru iyobọ nuẹn.

16. Vbọ khẹke ne ima gha yerre? (Vbe ya ghee efoto.)

¹⁶ U ghi vbe yerre wẹẹ, emwa ne Jehova hoẹmwẹ ọnrẹn ẹre ọ gbe hin ọkhọ rre. (Hib 12:6) Ọ hoo ne emwa hia na rhie hin iko rre werriegbe bu irẹn gha dee. (2 Pit 3:9) Rhunmwuda ọni, adeghẹ a na rhie ọmwa nọ sikẹ ruẹ hin uwu iko rre, gha mwẹ ilẹkẹtin wẹẹ, ediọn gha hia vbe odẹ ke odẹ ne iran ru iyobọ ne ọmwa nii ya dọlegbe bu e Jehova gha dee.​—2 Tim 2:​24, 25.

17. De ilẹkẹtin ne ima mwẹ?

¹⁷ Ma guan kaẹn ọlọghọmwa eso ne u gha sẹtin werriẹ aro daa vbe u gha dinmwiamẹ. Agharhemiẹn wẹẹ, ẹ i khian gha khuẹrhẹ, esa i rrọọ ne u khian ya gha mu ohan. Emwi wa bun ne u gha ru nian nọ gha ru iyobọ nuẹn. Ghẹ vbe mianmian wẹẹ, e Jehova gha ru iyobọ nuẹn ya rhikhan muẹn. Ọ ka ru iyobọ nuẹn nẹ, ọ vbe hoo ne irẹn gha ru iyobọ nuẹn khian vbe etẹbitẹ! (1 Pit 5:10) Ọ gha rhie ẹtin nuẹn ne u mieke na sẹtin zin egbe ọlọghọmwa ne u rhirhi gha werriẹ aro daa. Adeghẹ u na kue ne Jehova ye gha ru iyobọ nuẹn, ọlọghọmwa rhọkpa i rrọọ nọ gha sẹtin si ruẹ hin odẹ ẹmwata rre!​—Psm 119:165; Rom 8:​38, 39.