Avbe Ọbuohiẹn

20 Rhunmwuda ọni, Ivbi Izrẹl hia ni rre Dan ya sẹ e Biẹ-shiba kevbe otọ e Giliẹd na ladian, iran hia na si egbe koko, iran na vbe ku obọ kugbe* vbe Mizpa, vbe odaro e Jehova. 2 Ẹre avbe ọkaolotu ọghe Ivbi Izrẹl, ọni ọre, avbe ọkaolotu ọghe uniẹn ọghe Izrẹl hia, na gha die eke ne emwa ọghe Osanobua na si egbe koko; ehia kegha re ivbiyokuo arriaisẹn iyisẹn vbe ihe enẹ (400,000), ni viọ umozo mwẹ.

3 Ivbi e Bẹnjamin keghi họn wẹẹ Ivbi Izrẹl gbe oke gha rrie Mizpa.

Ẹre Ivbi Izrẹl na wẹẹ: “De vbene emwi nọ wegbe vbenian ya sunu hẹ? Tama ima.” 4 Ovbi e Livai nii, nọ re ọdafẹn okhuo nii na gbua, na wanniẹn iran wẹẹ: “Te imẹ vbe egbakhian mwẹ ghaa die Gibia nọ rre otọ ọghe uniẹn e Bẹnjamin, ne ima vbiẹ evba ne ẹdẹ gbe. 5 Ẹre emwa* ni rre Gibia na gha dee vbe asọn, iran na lẹga owa ne ima ye. Mẹ ẹre iran khian te do gbua, sokpan, iran na mu egbakhian mwẹ yagha, ọ na wu. 6 Ẹre I na mu ikun egbakhian mwẹ, I na giagiae, I na vbe viọ abọ ọkpọkpa gha rrie dọmwadẹ ikinkin vbe otọ Izrẹl, rhunmwuda, emwi ekhue kevbe emwi awua, ẹre iran ru vbe otọ Izrẹl. 7 Nian, wa ne Ivbi Izrẹl, wa zẹ iro yọ, ne uwa ta emwi na gha ru.”

8 Iyeke ọni, iran hia na kpaegbe uhukpa,* iran na wẹẹ: “Ọmwa rhọkpa i rrọọ vbe uwu ima, nọ gha werriegbe gha rrie owa ẹre, ra ibọkpọ ẹre. 9 Emwi ne ima gha ru e Gibia re na khin: Ma gha yan uta ya zẹ emwa ni gha ya gu iran khọn. 10 Ma gha viọ ikpia igbe (10) vbe uwu iyisẹn (100) vbe uniẹn ọghe Izrẹl hia, ma ghi vbe viọ iyisẹn (100) vbe uwu arriaisẹn (1,000), kevbe arriaisẹn (1,000) vbe uwu arriaisẹn igbe (10,000), ne iran gha viọ evbare gie ivbiyokuo, ne iran mieke na rri Ivbi e Gibia ni rre otọ e Bẹnjamin oya, ye emwi awua ne iran ru vbe otọ Izrẹl.” 11 Ẹre ivbiyokuo ọghe Izrẹl hia na si egbe koko, iran na ku obọ kugbe,* ne iran ya gu emwa ni rre ẹvbo nii khọn.

12 Iyeke ọni, uniẹn ọghe Izrẹl hia nikẹre na gie emwa eso bu ikpia hia ni rre uniẹn e Bẹnjamin, iran na wẹẹ: “Vbe ọna vbe khun emwi dan, nọ sunu vbe otọ ọghe uwa? 13 Nian, wa viọ ikpia nii, ni ma rẹn enegbe ni rre Gibia ladian, ne ima gbele iran rua, na mieke na rhie emwi nẹi maan hin otọ Izrẹl rre.” Sokpan, Ivbi e Bẹnjamin ma zẹyọ Ivbi Izrẹl ne etẹn iran re.

14 Ẹre Ivbi e Bẹnjamin na ladian vbe avbe ẹvbo iran, iran na si egbe koko, iran na gha rrie Gibia ne iran ya gu Ivbi Izrẹl gbinna. 15 Vbe ẹdẹrriọ, Ivbi e Bẹnjamin keghi hannọ ivbiyokuo arriaisẹn enẹ i rrọọ vbe ọgban (26,000) vbe avbe ẹvbo iran. Gberra ivbiyokuo na, iran na vbe hannọ ikpia iyisẹn vbe ihe ihinrọn (700) vbe Gibia, ni gua khọn okuo. 16 Ikpia iyisẹn vbe ihe ihinrọn (700) ni loo agobọ ghaa rre uwu ẹbu ivbiyokuo na. Dọmwadẹ iran gha sẹtin ya umọvọn kọn emwi nọ ye wẹnrẹn vbe na ghee ikpẹ eto, vbe nẹi na baeku.

17 Vbọ gberra Ivbi e Bẹnjamin, Ivbi Izrẹl nikẹre keghi hannọ ivbiyokuo arriaisẹn iyisẹn vbe ihe enẹ (400,000) ni viọ umozo mwẹ; dọmwadẹ iran wa vbe gua khọn okuo. 18 Ivbi Izrẹl keghi gbe oke gha rrie Bẹtẹl, ne iran ya nọ Osanobua emwi ne iran gha ru. Iran ghi sẹ evba, iran na wẹẹ: “De uniẹn nọ gha mu asanikaro vbe okuo na ne ima khian ya gu Ivbi e Bẹnjamin khọn?” E Jehova na wanniẹn iran wẹẹ: “Uniẹn e Juda ẹre ọ khian mu asanikaro.”

19 Vbe owiẹ vbe ẹdẹ nọ lele ẹre, Ivbi Izrẹl na mu egbe, iran na ya bu agọ ye ọkpẹn e Gibia, ne iran mieke na gu iran khọn.

20 Ivbi Izrẹl na ladian ne iran ya gu Ivbi e Bẹnjamin khọn; iran na mwamwa egbe ye ẹbu ughughan vbe ọkpẹn e Gibia, ne iran mieke na gu iran khọn. 21 Ẹre Ivbi e Bẹnjamin na ke Gibia ladian, iran keghi gbele Ivbi Izrẹl arriaisẹn eva yan ugie (22,000) vbe ẹdẹrriọ. 22 Vbọrhirhighayehẹ, ivbiyokuo ọghe Izrẹl ma gi ohan mu iran. Iran na werriegbe ya mwamwa egbe ye ẹbu ughughan, vbe eke ne iran na khọn vbe ẹdẹ nokaro. 23 Ẹre Ivbi Izrẹl na* gha rrie Bẹtẹl, iran ghi sẹ evba, iran na gha viẹ vbe odaro e Jehova ya sẹ ẹghẹ ota, iran na vbe nọ e Jehova wẹẹ: “Ne ima werriegbe ya gu Ivbi e Bẹnjamin ne etẹn ima khọn ra?” Ẹre Jehova na tama iran wẹẹ: “Ẹẹn, wa ya gu iran khọn.”

24 Rhunmwuda ọni, Ivbi Izrẹl na sikẹ eke ne Ivbi e Bẹnjamin ye, vbe ẹdẹ nogie eva. 25 Ẹre Ivbi e Bẹnjamin na ke Gibia ladian ya vba iran vbe ẹdẹ nogie eva; iran na werriegbe gbele Ivbi Izrẹl arriaisẹn eva i rrọọ vbe ugie (18,000), ni viọ umozo mwẹ. 26 Rhunmwuda ọni, Ivbi Izrẹl hia na gbe oke gha rrie Bẹtẹl. Iran ghi sẹ evba, iran na tota vbe odaro e Jehova, iran na gha khiẹ, iran na vbe mu awẹ ya sẹ ẹghẹ ota vbe ẹdẹrriọ. Iran na zọ ese na giẹn rẹn kevbe ese ọfunmwegbe gie Jehova. 27 Iyeke ọni, Ivbi Izrẹl na nọ e Jehova emwi ne iran gha ru, rhunmwuda, evba nii ẹre ẹkpẹti ile ọghe Osa ọghe ẹmwata ghaa ye vbe ẹghẹ nii. 28 E Finihas ne ovbi Ẹlieza, ne ovbi Erọn ẹre ọ ghaa ru iwinna ohẹn vbe odaro ẹkpẹti ile vbe ẹghẹ nii. Iran na nọ wẹẹ: “Ne ima werriegbe ya gu Ivbi e Bẹnjamin ne etẹn ima khọn ra, ra ne ima ghẹ yo?” E Jehova na wanniẹn iran wẹẹ: “Wa gha khian, rhunmwuda, I gha viọ iran ye uwa obọ vbe akhuẹ.” 29 Ẹre Ivbi Izrẹl na viọ ikpia eso lẹga e Gibia, sokpan, te ikpia nii lẹre.

30 Ivbi Izrẹl na ya gu Ivbi e Bẹnjamin khọn vbe ikpẹdẹ nogie eha; iran na mwamwa egbe ye ẹbu ughughan vbe ọkpẹn e Gibia, zẹvbe ne iran ka ru ẹre. 31 Ivbi e Bẹnjamin na ladian ne iran ya vba ivbiyokuo Izrẹl. Vbene iran ya gha sikẹ Ivbi Izrẹl, erriọ ẹre iran ya gha khian rree ne ẹvbo iran. Iran na suẹn gha gbele Ivbi Izrẹl eso lele odẹ na la yo e Bẹtẹl kevbe na la yo e Gibia, zẹvbe ne iran ka ru ẹre dee yi. Odẹ Ivbi Izrẹl ọgban (30), ẹre ọ wulo lele odẹ. 32 Ẹre Ivbi e Bẹnjamin na wẹẹ: “Obọ ima vbe ke ukhunmwu ne iran nẹ, zẹvbe nọ ghaa ye vbe ima ka gu iran gbinna.” Sokpan, Ivbi Izrẹl na kha wẹẹ: “Wa gi ima lẹẹ ne iran, ne iran mieke na ladian vbe ẹvbo iran gha die ukpo.” 33 Ẹre Ivbi Izrẹl hia na ladian vbe ehe ughughan ne iran ghaa ye, iran na mwamwa egbe ye ẹbu ughughan vbe Bel-tema. Ivbi Izrẹl ni lẹre ye ikinkin e Gibia na ladian vbe ehe ne iran lẹre yi. 34 Ikpia arriaisẹn igbe (10,000) na zẹ vbe otọ Izrẹl hia kegha die odaro e Gibia, nene okuo na gha yọn. Sokpan, Ivbi e Bẹnjamin ma rẹn wẹẹ obọ gha rherhe vba iran.

35 E Jehova keghi viọ Ivbi e Bẹnjamin ye Ivbi Izrẹl obọ. Ivbi e Bẹnjamin ni viọ umozo mwẹ, ne Ivbi Izrẹl gbele vbe ẹdẹrriọ kegha re iyisẹn yan arriaisẹn isẹn yan ugie (25,100).

36 Vbọrhirhighayehẹ, Ivbi e Bẹnjamin kegha roro ẹre wẹẹ, obọ iran gha ke ukhunmwu ne Ivbi Izrẹl, rhunmwuda ne Ivbi Izrẹl na lẹẹ ne iran. Sokpan, te Ivbi Izrẹl ghaa lẹẹ, rhunmwuda, iran mu ẹtin yan ivbiyokuo ni lẹre ye ọkpẹn e Gibia. 37 Ivbiyokuo ni lẹre nii, na zẹgiẹ ladian, iran na mu uhunmwu daa e Gibia. Iran na ghae egbe lele ehe hia vbe ẹvbo nii, iran na vbe ya umozo gbele emwa hia ni rrọọ rua.

38 Ivbi Izrẹl ka tama ivbiyokuo ni lẹre ye ọkpẹn ẹvbo nii nẹ wẹẹ, obọ iran gha vba emwa ni rre ẹvbo nii nẹ, iran ghi ru ẹre ne ighogho gha ke ẹvbo nii yo iso, nọ gha re ama ne iran.

39 Ivbi Izrẹl ghi fi egbe werriegbe ne iran lẹẹ vbe okuo nii, Ivbi e Bẹnjamin na suẹn gha gbele iran; odẹ Ivbi Izrẹl ọgban (30), ẹre iran gbele. Ivbi e Bẹnjamin na ghi kha wẹẹ: “Obọ ima vbe ke ukhunmwu ne iran nẹ, zẹvbe nọ ghaa ye vbe ima ka gu iran khọn.” 40 Sokpan, ighogho ne iran wẹẹ ọ khian gha re ama ne iran, kegha ke ẹvbo nii yo iso, nene ighogho na yevbe na ghee orrẹ. Ivbi e Bẹnjamin ghi gbaro ghee iyeke, iran na bẹghe ẹre wẹẹ ẹvbo iran wa giẹn, erhẹn vbe ke ẹvbo iran yo iso. 41 Ẹre Ivbi Izrẹl na fi egbe werriegbe, ohan na suẹn gha mu Ivbi e Bẹnjamin, rhunmwuda, iran bẹghe ẹre wẹẹ, obọ vba iran nẹ. 42 Rhunmwuda ọni, Ivbi e Bẹnjamin na lẹẹ ne Ivbi Izrẹl, iran na mu uhunmwu daa ato, sokpan, Ivbi Izrẹl na zẹ iran khu; ikpia ni ghaa ke ẹvbo ni rre ikinkin nii ladian, na deba Ivbi Izrẹl gha gbele iran rua. 43 Iran na lẹga ikinkin ne Ivbi e Bẹnjamin ghaa ye, iran na gha khu iran khian vbene iran ma na hẹwẹ. Iran na khọn iran mu otọ* vbe odaro e Gibia vbe odẹ ekẹn.* 44 Vbe okiekie, Ivbi e Bẹnjamin arriaisẹn eva i rrọọ vbe ugie (18,000) na wulo. Ivbiyokuo ni wegbe, ẹre ehia ghaa khin.

45 Ivbi e Bẹnjamin na fi egbe werriegbe, iran na lẹẹ gha rrie eke ne okuta e Rimọn ye vbe uwu ato. Ivbi Izrẹl keghi gbele Ivbi e Bẹnjamin arriaisẹn vbe ihe isẹn (5,000) lele odẹ. Iran na khu iran ya sẹ e Gaidọm; iran na vbe gbele Ivbi e Bẹnjamin arriaisẹn eva (2,000) ọvbehe rua. 46 Ivbi e Bẹnjamin hia ni viọ umozo mwẹ, ni wulo vbe ẹdẹrriọ kegha re arriaisẹn vbe ihe isẹn yan ugie (25,000). Ivbiyokuo ni wegbe ẹre iran hia ghaa khin. 47 Sokpan, Ivbi e Bẹnjamin iyisẹn vbe ihe ehan (600) na lẹẹ gha rrie eke ne okuta e Rimọn ye vbe uwu ato. Uki enẹ ẹre iran gbe vba.

48 Ivbi Izrẹl na werriegbe, ne iran ya gu Ivbi e Bẹnjamin nikẹre khọn, iran na vbe ya umozo gbele emwa hia ni ghaa rre avbe ẹvbo nii. Iran keghi gbele emwa nagbọn kevbe emwirri hia ni ghi kẹ vbe ẹvbo nii rua. Iran na vbe giẹn avbe ẹvbo nii hia sẹ otọ.