Avbe Ọbuohiẹn

19 Vbe ẹghẹ ne Ivbi Izrẹl ma na gha mwẹ ọba, Ovbi e Livai ọkpa nọ ghaa rre ehe nọ khian fua vbe ikinkin ne oke ye vbe Ifrem, keghi ya rhie egbakhian ọkpa vbe Bẹtlẹhẹm vbe otọ e Juda, zẹvbe ọvbokhan rẹn. 2 Sokpan, nene egbakhian na suẹn gha ghẹẹ, ọ na sẹ ọdafẹn ọnrẹn rae, ọ na gha rrie owa erhae vbe Bẹtlẹhẹm nọ rre otọ e Juda. Ọ na ya gbe uki enẹ vba. 3 Ẹre ọdafẹn ọnrẹn na ya gualọe, nọ mieke na rhẹrhẹ ọre nọ gha die owa; ọ na rhie ọguọmwadia ẹre nokpia lele egbe, kevbe ekẹtẹkẹtẹ eva. Ọ ghi sẹ e Bẹtlẹhẹm, nene okhuo na rhie ẹre la owa erhae. Erhae ghi miẹn ọnrẹn, ọ na wa gha ghọghọ. 4 Ẹre orruan rẹn, ọni ọre erha okhuo nii, na tama rẹn nọ tota ke iran la ikpẹdẹ eha; iran na gha re, iran na gha da, ọ na vbiẹ evba ne ẹdẹ gbe.

5 Iran ghi rhiọrre vbe owiẹ fioro ne iran kpa vbe ikpẹdẹ nogienẹ, erha okhuo nii na tama orruan rẹn wẹẹ: “Rri evbare, ne u miẹn orhiọn ya la odẹ. Iyeke ọni, wa sẹtin kpa.” 6 Ẹre iran na tota, iran na gba rri evbare, iran na vbe gba da ayọn; iyeke ọni, erha enene okhuo na tama okpia nii wẹẹ: “Lahọ, vbiẹ emwa ne ẹdẹ gbe, ne u vbe sọyẹnmwẹ egbuẹ.”* 7 Okpia nii ghi kpaegbe nọ kpa, erha ọvbokhan rẹn na suẹn gha rinmwiaẹn, ẹre ọ na ghi vbiẹ evba ne ẹdẹ gbe.

8 Ọ ghi rre ikpẹdẹ nogie isẹn, ọ na kpaegbe vbe owiẹ fioro nọ kpa, ẹre erha okhuo nii na tama rẹn wẹẹ: “Lahọ, rri evbare, ne u miẹn orhiọn ya la odẹ.” Iran na gha ru ghẹrẹghẹrẹghẹrẹ, iran na rri evbare ya sẹ odẹ ẹghẹ ota. 9 Okpia nii ghi kpaegbe nọ rhie egbakhian ọghẹe kevbe ọguọmwadia ẹre kpa, erha enene okhuo na tama rẹn wẹẹ: “Ghee ẹre! Te ẹghẹ ota khian ghi sẹ. Lahọ, wa vbiẹ emwa ne ẹdẹ gbe. Te ebi khian ghi ro. Vbiẹ emwa ne ẹdẹ gbe, ne u sọyẹnmwẹ egbuẹ. U ghi rhiọrre vbe owiẹ fioro vbe akhuẹ, ne u gha rrie owa.”* 10 Vbọrhirhighayehẹ, okpia nii ma ghi hoo nọ werriegbe vbiẹ owa orruan rẹn, ẹre ọ na kpaegbe, ọ na mu okhian gha rrie Jibọs, ọni ọre Jerusalẹm. Ọ na rhie egbakhian ọghẹe kevbe ọguọmwadia ẹre lele egbe, deba ekẹtẹkẹtẹ eva na gbalọ emwi na tota yi ye ọre iyeke.

11 Te ebi khian ghi ro, vbe iran sẹ ọkpẹn e Jibọs. Ẹre ọguọmwadia ẹre na ghi tama rẹn wẹẹ: “Ma i ghi wa mudia vbe ẹvbo Ivbi e Jibọs na, ne ima vbiẹ emwa ne ẹdẹ gbe?” 12 Sokpan, arowa ẹre na tama rẹn wẹẹ: “Ọ ma khẹke ne ima vbiẹ ẹvbo emwa nẹi re Ivbi Izrẹl. Gi ima gha rrie Gibia.” 13 Ẹre ọ na tama ọguọmwadia ẹre wẹẹ: “Gi ima tua owẹ ye okhian, ne ima mieke na vbiẹ e Gibia ra e Rema ne ẹdẹ gbe.” 14 Ẹre iran na ye gha khian; iran ghi rre ọkpẹn e Gibia nọ rre otọ ọghe uniẹn e Bẹnjamin, ebi na suẹn gha ro.

15 Iran ghi sẹ e Gibia, iran na laọ, ne iran vbiẹ evba ne ẹdẹ gbe. Iran na ya tota ye adesẹ orere ẹvbo nii, sokpan, iran ma miẹn ọmwa rhọkpa nọ viọ iran la owa. 16 Ẹghẹ ghi khian buan nẹ vbe ota nii, ediọnmwa ọkpa kegha dee vbe ọ ghi winna fo nẹ vbe ugbo. Ikinkin ne oke ye vbe Ifrem ẹre ọ ke rre, e Gibia ẹre ọ ghaa ye; sokpan, Ivbi e Bẹnjamin, ẹre ọ ghaa rre ẹvbo nii. 17 Ediọnmwa nii ghi miẹn okpia nii nọ rrie ehe vbe adesẹ orere ẹvbo nii, ọ na nọ rẹn wẹẹ: “Vbua rrie, vbua ke dee?” 18 Ẹre okpia nii na wanniẹn ọnrẹn wẹẹ: “Te ima ke Bẹtlẹhẹm nọ rre Juda rrie ihe ọkpa nọ khian fua vbe ikinkin ne oke ye vbe Ifrem, ẹvbo nọ rre ehe nọ khian fua nii ẹre I ke rre. E Bẹtlẹhẹm nọ rre Juda, ẹre I ye sin; owa e Jehova ẹre I ghi rrie na,* sokpan, I ma miẹn ọmwa rhọkpa nọ rhie mwẹ la owa. 19 Ma mwẹ evbare kevbe irunmwu ne ekẹtẹkẹtẹ ọghe ima khian re; mẹ, egbakhian mwẹ kevbe ọguọmwadia mwẹ vbe mwẹ evbare kevbe ayọn. Emwi hia ne ima khian loo gue ima.” 20 Sokpan, ediọnmwa nii na tama rẹn wẹẹ: “Ọfunmwegbe gu ruẹ rrọọ! I gha kpemehe emwi ke emwi ne uwa gha loo. Sokpan, wa lahọ, wa ghẹ vbiẹ adesẹ orere ẹvbo na ne ẹdẹ gbe.” 21 Ẹre ọ na viọ iran gha rrie owa, ọ na vbe rhie evbare* ne avbe ekẹtẹkẹtẹ ọghe iran. Iyeke ọni, iran na kpe owẹ, iran na re, iran na vbe da.

22 Vbe uwu ẹghẹ ne iran ya gha sọyẹnmwẹ egbe, ikpia eso ni ma rẹn enegbe keghi lẹga owa nii, iran na gha ya obọ gbe ẹkhu, iran na gha tama ediọnmwa nọ yan owa nii wẹẹ: “Rhie okpia ne u rhie gha die owa ban ladian, ne ima gu ẹre ru emwi ọdọ vbe amwẹ.” 23 Ẹre ediọnmwa nọ yan owa nii na ghi ladian ya tama iran wẹẹ: “Etẹn mwẹ, wa ghẹ yin uyinmwẹ dan vbenian. Wa lahọ, orhunmwuyẹn nọ do dia owa mwẹ ya ẹre okpia na khin. Wa ghẹ ru emwi ekhue vbenian. 24 Ovbi mwẹ nokhuo nọ ma he rẹn okpia, kevbe egbakhian ọghe okpia na rre emwa. Gu mwẹ viọ iran ladian, ne uwa ru iran emwi oya, deghẹ erriọ uwa gualọe yi.* Sokpan, wa ghẹ ru okpia na emwi ekhue vbenian.”

25 Sokpan, ikpia nii ma danmwehọ ediọnmwa nii, ẹre okpia nii na dobọ mu egbakhian rẹn, ọ na rhie ẹre gie iran vbe orere. Iran na muẹn yagha, iran na vbe ru ẹre emwi oya, iran ma vbe dobọ yi, ẹdẹ te do gbe. Vbene ẹdẹ te wan, iran na we nọ kpa. 26 Ọ ghi rre owiẹ fioro, nene okhuo na gha die owa okpia nii, evba nii ẹre arowa ẹre ghaa ye. Ọ ghi sẹ evba, ọ na de gbe otọ vbe onurho, ọ na gha rre evba, a ghi te miẹn wẹẹ ẹdẹ wan rẹn. 27 Arowa ẹre ghi kpaegbe vbe owiẹ, ọ na kie ẹkhu ni rre owa nii nọ mieke na ladian, nọ werriegbe suẹn okhian. Sokpan, ọ keghi miẹn egbakhian rẹn vbe otọ, ọ lovbiẹ ye eke na la la owa, ọ vbe viọ obọ ye onurho ọghe nene owa. 28 Ẹre arowa ẹre na tama rẹn wẹẹ: “Kpaegbe; gia kpa.” Sokpan, ọ ma khuẹnniẹn ọnrẹn. Ẹre ọ na ghi mu enene okhuo ye ekẹtẹkẹtẹ ọghẹe, ọ na zẹ odẹ owa.

29 Ọ ghi sẹ owa, ọ na ya erọ* giagia ikun egbakhian rẹn ye ihe iweva (12), ọ na viọ abọ ọkpọkpa vbọ gha rrie ikinkin ọghe dọmwadẹ uniẹn ọghe Izrẹl. 30 Emwa hia ni miẹn ọnrẹn keghi kha wẹẹ: “Emwi vbenian ma he sunu ẹdẹ. A ma he vbe miẹn egbe ọna ẹdẹ, ke ne Ivbi Izrẹl ya la ladian vbe otọ Igipt do fi ẹdẹnẹrẹ. Wa muẹn roro, wa zẹ iro yan rẹn, ne uwa tama ima emwi ne ima gha ru.”