Avbe Ọbuohiẹn

21 Ivbi Izrẹl keghi yan vbe Mizpa wẹẹ: “Ma rhọkpa i kue ne Ovbi e Bẹnjamin rhọkpa rhie ovbi ima nokhuo rọnmwẹ.” 2 Ẹre Ivbi Izrẹl na gha die Bẹtẹl, iran na tota ye evba vbe odaro Osa ọghe ẹmwata, ya sẹ ẹghẹ ota; iran na gha khiẹ, iran na vbe gha viẹ eve orriara. 3 Iran na wẹẹ: “Eo Jehova ne Osa ọghe Izrẹl, vbọzẹ ne emwi vbenian na sunu vbe otọ Izrẹl? Vbọzẹ ne uniẹn ọkpa gha na gbẹro vbe otọ Izrẹl vbe ẹdẹnẹrẹ?” 4 Iran na kpaegbe vbe owiẹ fioro vbe ẹdẹ nọ lele ẹre, iran na gbe aka ye evba, ne iran mieke na yae zọ ese na giẹn rẹn kevbe ese ọfunmwegbe.

5 Iyeke ọni, Ivbi Izrẹl na nọ wẹẹ: “De uniẹn ọghe Izrẹl nọ ma deba ima si egbe koko vbe odaro e Jehova?” Rhunmwuda, te iran wa yan wẹẹ, ọmwaikọmwa nọ ma do deba iran si egbe koko vbe odaro e Jehova vbe Mizpa, te a khian gbe ẹre rua. 6 Emwi nọ sunu daa Ivbi e Bẹnjamin keghi kakabọ da Ivbi Izrẹl ne etẹn iran. Iran na ghi kha wẹẹ: “Uniẹn ọkpa gbẹro vbe otọ Izrẹl vbe ẹrẹna. 7 De eke ne ima khian na ghi miẹn ikhuo ne ima gha viọ ne Ivbi e Bẹnjamin ni ghi kẹ, ugbẹnvbe a miẹn wẹẹ, ma ya eni e Jehova yan nẹ wẹẹ, ma i khian kue ne Ivbi e Bẹnjamin rhọkpa rhie ivbi ima nikhuo rọnmwẹ?”

8 Iran na ghi nọ wẹẹ: “De uniẹn ọghe Izrẹl nọ ma deba ima si egbe koko vbe odaro e Jehova vbe Mizpa?” Iran na do bẹghe ẹre wẹẹ, ọmwa rhọkpa ma ke Jebẹsh-giliẹd gha die agọ ne iran na si egbe koko. 9 A ghi ka emwa hia ni rre evba, a na do bẹghe ẹre wẹẹ, ọmwa rhọkpa nọ ke Jebẹsh-giliẹd rre ma gha rre evba. 10 Rhunmwuda ọni, emwa ni si egbe koko na gie ikpia arriaisẹn iweva (12,000) ni ghi wegbe sẹ gha rrie evba. Iran na tama iran wẹẹ: “Wa ya ya umozo gbele emwa ni rre Jebẹsh-giliẹd rua, ya sẹ egbe ikhuo kevbe ibiẹka. 11 Emwi ne uwa gha ru na khin: Wa gbele ikpia hia rua, kevbe ikhuo hia ni ghi rẹn okpia nẹ.” 12 Iran keghi miẹn ibiẹka ikhuo iyisẹn vbe ihe enẹ (400) ni ma he rẹn okpia, vbe uwu ẹbu emwa ni ghaa rre Jebẹsh-giliẹd. Ẹre iran na viọ iran gha die agọ nọ rre Shailo, vbe otọ e Kenan.

13 Iyeke ọni, emwa hia ni si egbe koko na gie uhunmwu gie Ivbi e Bẹnjamin ni ghaa rre eke ne okuta e Rimọn ye, iran na wẹẹ iran hoo ne iran ru adọlọ. 14 Rhunmwuda ọni, Ivbi e Bẹnjamin na ghi werriegbe gha die ẹvbo iran. Ivbi Izrẹl na viọ ibiẹka ikhuo ne iran viọ ke Jebẹsh-giliẹd rre ne Ivbi e Bẹnjamin, sokpan, ọ ma gba iran obọ. 15 Emwi nọ sunu daa Ivbi e Bẹnjamin gele wa da Ivbi Izrẹl, rhunmwuda, e Jehova wannọ uniẹn e Bẹnjamin hin uwu ẹbu uniẹn ọghe Izrẹl nikẹre rre nẹ. 16 Ediọn ni rre uwu ẹbu Ivbi Izrẹl ni si egbe koko keghi kha wẹẹ: “De eke ne ima khian ghi na miẹn ikhuo ne ima gha viọ ne Ivbi e Bẹnjamin ni ghi kẹ, ugbẹnvbe a miẹn wẹẹ, a gbele ikhuo hia ni rre uniẹn e Bẹnjamin rua nẹ?” 17 Eso vbe uwu iran na wẹẹ: “Ọ ma khẹke ne uniẹn ọkpa wa gbẹro vbe otọ Izrẹl, rhunmwuda ọni, te ọ khẹke ne Ivbi e Bẹnjamin ye gha rre otọ ne iran re vbe ukhu. 18 Sokpan, ma i khian sẹtin viọ ivbi ima nikhuo ne iran, rhunmwuda, Ivbi Izrẹl tie ihẹn yọ nẹ wẹẹ: ‘Ọkhọ gha rruan ọmwa nọ rhirhi rhie ovbi ẹre nokhuo ne Ovbi e Bẹnjamin, nọ gha re ọvbokhan rẹn.’”

19 Ẹre iran na ghi kha wẹẹ: “Ọ mwẹ ugie na do ya rhie uyi gie Jehova vbe ukpukpo vbe Shailo. Uwu ẹkpo e Bẹtẹl kevbe Lẹbona ẹre Shailo ye. Ọni ọre odẹ ekẹn* vbe ukpo nọ ke Bẹtẹl rrie Shikẹm.” 20 Ẹre iran na tama Ivbi e Bẹnjamin wẹẹ: “Wa ya lẹre ye avbe ugbo evaẹn.* 21 Wa gha miẹn wẹẹ, ibiẹka ikhuo ni rre Shailo ladian do gha gbe,* dọmwadẹ ọghẹe vbe uwu uwa ghi ladian vbe ehe ne uwa lẹre yi vbe avbe ugbo evaẹn* nii, wa ghi ya ẹtin vbe iwegbe munọ eso vbe uwu avbe ibiẹka ikhuo nii, iran ghi do gha re ọvbokhan uwa, iyeke ọni, wa ghi gha die otọ e Bẹnjamin. 22 Deghẹ erha iran ra etẹn iran nikpia na ghi rre do gui ma ima, ma ghi tama iran wẹẹ, ‘Wa lahọ, wa tohan ima rhunmwuda Ivbi e Bẹnjamin. Ikhuo ne ima munọ vbe okuo ma gba iran obọ. Ma rẹnrẹn wẹẹ, wa i khian ya ekhọe obọ uwa viọ ivbi uwa nikhuo ne iran zẹvbe amwẹ, ne uwa ghẹ do rriabe.’”

23 Ivbi e Bẹnjamin na gele ru vberriọ. Dọmwadẹ iran na rhie ọkpọkpa vbe uwu avbe ibiẹka ikhuo ni ghaa gbe. Iyeke ọni, iran na gha rrie otọ ne iran re vbe ukhu. Iran na werriegbe ya bu ẹvbo iran, iran na ghi gha rre evba.

24 Ẹghẹ nii, Ivbi Izrẹl na ghi kpa vbe evba nii rre, dọmwadẹ ọghẹe na bu ẹgbẹe ọre kevbe emwa ne iran gba ke uniẹn ọkpa rre. Erriọ ẹre dọmwadẹ ọghẹe ghi ya kpa gha rrie otọ nọ re vbe ukhu.

25 Ivbi Izrẹl ma gha mwẹ ọba vbe ẹghẹ nii. Dọmwadẹ ọghẹe na gha ru emwi nọ rhirhi khọn rẹn.*