Avbe Ọbuohiẹn
2 Ẹre odibo e Jehova na ke Gilgal gha rrie Bokim, ọ na wẹẹ: “Mẹ ẹre ọ viọ uwa ladian vbe otọ Igipt, gha rrie otọ ne I yan rẹn wẹẹ, I gha mu ne avbe erha uwa odede. Deba ọni, I na vbe kha wẹẹ, ‘I i khian rhie owẹ gberra ile ne I gu uwa ta. 2 Wa ghẹ gu emwa ni rre otọ na ta ile; wa ghi guọghọ avbe aka ne iran na zọ ese.’ Sokpan, wa ma họn ẹmwẹ mẹ. Vbọzẹ ne uwa ma na họn ẹmwẹ mẹ? 3 Ọni ẹre ọ si ẹre ne I na vbe kha wẹẹ, ‘I i khian khulo iran hin ehe ne uwa ye rre, te iran khian gha yevbe ifi ne uwa, wa ghi vbe gha hoo ne uwa gha ga avbe ẹbọ ọghe iran.’”
4 Odibo e Jehova ghi ta ẹmwẹ na ma Ivbi Izrẹl hia nẹ, iran na viẹ egbe rua, urhu iran na gha la. 5 Iran na ghi gha tie evba nii e Bokim,* iran na vbe zọ ese gie Jehova vbe evba.
6 E Jọshua ghi tama Ivbi Izrẹl ne iran gha khian, dọmwadẹ ọghẹe keghi kpa, ne iran ya ya otọ na ghae sẹ iran obọ khian ọghe iran. 7 Ivbi Izrẹl na ye gha ga e Jehova, vbe ẹghẹ ne Jọshua ya gha rre agbọn, kevbe ẹghẹ ne ediọn hia ni ghaa rrọọ vbe Jọshua ghi wu nẹ ya gha rre agbọn. Avbe ediọn na bẹghe iwinna ọyunnuan nikhua hia, ne Jehova ru ne Ivbi Izrẹl. 8 Iyeke ọni, e Jọshua ne ovbi e Nọn, ne ọguọmwadia e Jehova, keghi wu vbe ọ rre ukpo igbe yan iyisẹn (110). 9 Ẹre iran na ghi ree ẹre ye ikinkin na na mu otọ nẹẹn vbe Timnat-hirẹs, nọ rre ikinkin ne oke ye vbe Ifrem, vbe odẹ okuọ* ọghe Oke Ge-ash. 10 Orre nii hia keghi wulo, iyeke ọni, orre ọvbehe na do gha rrọọ, ni ma rẹn e Jehova ra emwi nọ ru ne Ivbi Izrẹl.
11 Rhunmwuda ọni, Ivbi Izrẹl na do gha ru emwi nọ sọnnọ e Jehova, iran na vbe gha ga avbe amazẹ ọghe Bel. 12 Iran na fi iyeke gbe Jehova, ne Osa ọghe avbe erha iran, nọ viọ iran ke otọ Igipt ladian. Iran na suẹn gha ga avbe ẹbọ ọghe emwa ni lẹga iran, iran na gha ya uhunmwu rhanmwẹ otọ ne iran; te iran wa gele ya ohu mu e Jehova. 13 Iran na fi iyeke gbe Jehova, iran na ya gha ga avbe amazẹ ọghe Bel kevbe Ashtorẹt. 14 Ohu Ivbi Izrẹl na do gha mu e Jehova, ẹre ọ na viọ iran ye obọ emwa ni fu emwa emwi viọ, iran na gha ya ẹtin vbe iwegbe viọ iran emwi. Ọ na viọ Ivbi Izrẹl ye obọ eghian ni lẹga iran, iran ma ghi sẹtin gha khọnmiotọ yan eghian ọghe iran. 15 E Jehova kegha werriẹ aro nọ khọọ daa iran, vbe ehe ke ehe ne iran yo, ọ na gha si ọlọghọmwa ye iran egbe, zẹvbe ne Jehova ka tama iran, zẹvbe ne Jehova ka vbe yan ma iran, iran na do gha rre uwu ọlọghọmwa nọkhua. 16 Rhunmwuda ọni, e Jehova ghi vbe zẹ avbe ọbuohiẹn, ni gha miẹn iran fan, vbe obọ emwa ni ghaa ya ẹtin vbe iwegbe fu iran emwi viọ.
17 Sokpan, iran keghi zẹ utun vbe ehọ, uhiẹn, iran ma rhie ẹmwẹ ne avbe ọbuohiẹn nii ghaa tama iran. Iran na gha ga avbe ẹbọ ughughan,* iran na vbe gha ya uhunmwu rhanmwẹ otọ ne iran. Ọ ma he sẹ inu ẹghẹ nọ khin, iran na lahin odẹ ne avbe erha iran odede ghaa la khian rre, ọni ọre avbe erha iran odede ni ghaa lele uhi ọghe Jehova. Te iran wa lughaẹn ne avbe erha iran odede. 18 Ẹghẹ ke ẹghẹ ne Jehova ya gie ọbuohiẹn bu iran, e Jehova ghi gu ọbuohiẹn nii gha rrọọ, ọ ghi vbe miẹn Ivbi Izrẹl fan vbe obọ eghian ọghe iran, vbe uwu ẹghẹ ne ọbuohiẹn nii ya rre agbọn; e Jehova kegha tohan Ivbi Izrẹl, vbe ọ gha miẹn vbene iran khiẹ hẹ, rhunmwuda emwa ni ghaa rri iran oya, kevbe emwa ni ghaa ya obọ atosi mu iran.
19 Sokpan, ọbuohiẹn nii gha ghi wu, iran ghi werriegbe suẹn gha ru emwi dan. Emwi dan ne iran ru ghi kue khọọ sẹ ọghe avbe erha iran, iran ghi gha ga avbe ẹbọ ọvbehe, iran ghi vbe gha ya uhunmwu rhanmwẹ otọ ne iran. Iran ma ban emwi dan ne iran ghaa ru, kevbe uyinmwẹ isọtẹ ne iran ghaa yin. 20 Vbe okiekie, ohu Ivbi Izrẹl keghi kakabọ mu e Jehova, ọ na ghi kha wẹẹ: “Rhunmwuda ne agbẹnvbo na, na rhie owẹ gberra ile ne I gu avbe erha iran odede ta, kevbe wẹẹ, iran ma vbe họn ẹmwẹ mẹ, 21 I i khian khu agbẹnvbo rhọkpa ne Jọshua sẹrae vbene ọ te wu hin eke ne iran ye rre. 22 Te I ya ọna danmwẹ Ivbi Izrẹl ghee, ne I mieke na rẹn deghẹ iran gha lele odẹ mwẹ, vbene avbe erha iran ru ẹre. Mẹ ọre Jehova.” 23 Rhunmwuda ọni, e Jehova keghi sẹ emwa ni rre avbe agbẹnvbo na rae, ne iran ye gha rre otọ nii. Ọ ma khulo iran kua vbobọvbobọ, ọ ma vbe viọ iran ye Jọshua obọ.