Avbe Ọbuohiẹn

1 E Jọshua ghi wu nẹ, Ivbi Izrẹl na nọ e Jehova wẹẹ: “Gha nọ vbe uwu ima, nọ khian ka ya gu Ivbi e Kenan khọn?” 2 E Jehova na wanniẹn iran wẹẹ: “E Juda ẹre ọ khian ka gha khian. I gha mu otọ nii ye ọre obọ.”* 3 Ẹre Ivbi e Juda na tama Ivbi e Simiọn ne etẹn iran wẹẹ: “Wa lele ima gha rrie otọ na ghae ne ima, na ya gu Ivbi e Kenan gbinna. Iyeke ọni, ma ghi vbe lele uwa gha rrie otọ na ghae ne uwa.” Ẹre Ivbi e Simiọn na ghi lele iran.

4 Ivbi e Juda na gha khian, e Jehova na viọ Ivbi e Kenan kevbe Ivbi e Pẹriz ye iran obọ, iran na khọnmiotọ yan ikpia arriaisẹn igbe (10,000) vbe otọ e Bizẹk. 5 Iran na miẹn Adonai-bizẹk vbe otọ e Bizẹk, iran na gu ẹre gbinna vba, iran na vbe khọnmiotọ yan Ivbi e Kenan kevbe Ivbi e Pẹriz. 6 Adonai-bizẹk ghi lẹẹ, iran na zẹ ọre khu; iran ghi muẹn, iran na giagia ẹre ikpianbọ nogie kevbe ikpianwẹ nogie kua. 7 Ẹre Adonai-bizẹk na ghi kha wẹẹ: “Ọba ekigbesiyenẹ (70), ne I giagia ẹre ikpianbọ nogie kevbe ikpianwẹ nogie kua, ẹre ọ rhọ iku evbare vbe ototọ etebu mwẹ. Emwi ne I ru iran re, ẹre Osanobua vbe ru mwẹ re na.” Iyeke ọni, iran na muẹn gha die Jerusalẹm, evba nii ẹre ọ na ghi wu.

8 Deba ọni, Ivbi e Juda keghi ya gu emwa ni rre Jerusalẹm gbinna, iran na khọn e Jerusalẹm mu otọ; iran na ya umozo gbele emwa hia ni rrọọ rua, iran na vbe mu erhẹn yọ. 9 Iyeke ọni, Ivbi e Juda na ya gu Ivbi e Kenan ni rre ikinkin ne oke ye khọn, iran na vbe ya gu iran ni rre ikinkin ọghe Nẹgẹb kevbe ikinkin ọghe Shẹfila khọn. 10 Ẹre Ivbi e Juda na mu okuo gie Ivbi e Kenan ni ghaa rre Hẹbrọn (e Kiriat-aba ẹre a ka gha tie Hẹbrọn), iran na gbe Shishai, Ahaiman, kevbe Talmai rua.

11 Iran ghi ke evba kpa, iran na ya gu emwa ni rre Dibiẹ khọn. (E Kiriat-sifa ẹre a ka gha tie Dibiẹ.) 12 Ẹre Kelẹb na ghi kha wẹẹ: “Ọmwaikọmwa nọ sẹtin mu okuo gha rrie Kiriat-sifa, ọ na vbe khọn rẹn mu otọ, I gha rhie Aksa ne ovbi mwẹ nokhuo nẹẹn, nọ gha re ọvbokhan rẹn.” 13 Ọtniẹl ne ovbi e Kinaz ne ọtiẹn e Kelẹb nekherhe, keghi khọn ẹvbo nii mu otọ. Ẹre Kelẹb na rhie Aksa ne ovbi ẹre nokhuo nẹẹn, nọ gha re ọvbokhan rẹn. 14 Aksa ghi rrie owa, ọ na gha kpikpi ọdafẹn ọnrẹn nọ tama erha irẹn nọ mu otọ nẹẹn. Ẹre Aksa na tuorre vbe ekẹtẹkẹtẹ.* Erhae na ghi nọ rẹn wẹẹ: “Vbua hoo ne I ru nuẹn?” 15 Ẹre Aksa na tama rẹn wẹẹ: “Lahọ mu otọ ọvbehe mẹ. Rhunmwuda, odẹ ahọ* ẹre u na ka mu otọ mẹ; vbe mu e Gọlọt-meim* mẹ.” Ẹre ọ na mu e Gọlọt Nọ Ke Odukhunmwu kevbe Gọlọt Nọ Ke Otọ nẹẹn.

16 Ivbi e Jẹtro ne Ovbi e Kẹni, nọ ghaa re erha ọvbokhan e Mozis, keghi ke ẹvbo udin* kpa, iran vbe Ivbi e Juda na gha die ato ọghe Juda, vbe odẹ ahọ* ọghe Erad. Iran vbe emwa ni ka rre evba na ghi gba gha rrọọ. 17 Sokpan, Ivbi e Juda kevbe Ivbi e Simiọn ne etẹn iran, na ye gha khian, iran na mu okuo gie Ivbi e Kenan ni ghaa rre Zifat, iran na fuẹn ẹvbo nii rua. Iran na ghi gha tie ẹvbo nii e Họma.* 18 Iyeke ọni, Ivbi e Juda keghi khọnmiotọ yan e Gaza, Ashkẹlọn, kevbe Ẹkrọn, deba avbe ikinkin ni lẹga iran. 19 E Jehova kegha gu Ivbi e Juda rrọọ, iran na ya ikinkin ne oke ye khian ọghe iran. Sokpan, iran ma sẹtin khulo emwa ni ghaa rre otọ nọ rriẹ kua, rhunmwuda, iran ghaa mwẹ avbe ikẹkẹ okuo ni mwẹ umozo nọ taẹn vbe owẹ.* 20 Iran keghi mu e Hẹbrọn ne Kelẹb zẹvbe ne Mozis yan rẹn. Ẹre Kelẹb na ghi khulo ivbi e Enak eha hin evba rre.

21 Sokpan, Ivbi e Bẹnjamin ma khulo Ivbi e Jibọs ni ghaa rre Jerusalẹm ladian. Rhunmwuda ọni, Ivbi e Bẹnjamin kevbe Ivbi e Jibọs, ẹre ọ ghi gba rre Jerusalẹm do fi ẹdẹnẹrẹ.

22 Vbe uwu ẹghẹ na kha na, igiowa ọghe Josẹf keghi ya gu emwa ni rre Bẹtẹl gbinna, e Jehova keghi vbe mudia ne iran. 23 Igiowa ọghe Josẹf na ya ba otọ e Bẹtẹl ghee (e Lọz ẹre a ka gha tie Bẹtẹl). 24 Emwa ni ya ba ẹvbo nii ghee, keghi miẹn okpia ọkpa nọ ghaa ke ẹvbo nii ladian. Ẹre iran na tama rẹn wẹẹ: “Lahọ, ma ima odẹ na la la ẹvbo na, u gha ru vberriọ, ma gha tohan ruẹ.”* 25 Ẹre okpia nii na ghi ma iran odẹ na la la ẹvbo nii, iran na ya umozo gbele emwa hia ni rre ẹvbo nii rua, sokpan, iran na sẹ okpia nii kevbe ẹgbẹe ọre rae. 26 Okpia nii na gha rrie ẹvbo ọghe Ivbi e Hẹt, ọ na ya bu ẹvbo ye evba, ọ na gha tie nene ẹvbo e Lọz. E Lọz ẹre a ye tie ẹvbo nii do fi ẹdẹnẹrẹ.

27 Ivbi e Manasẹ ma ya e Bẹt-shi-an kevbe avbe ẹvbo ni lẹga ẹre khian ọghe iran, deba e Te-anak kevbe avbe ẹvbo ni lẹga ẹre, emwa ni rre Dọ kevbe avbe ẹvbo ni lẹga ẹre, emwa ni rre Ibli-am kevbe avbe ẹvbo ni lẹga ẹre, kevbe emwa ni rre Mẹgido kevbe avbe ẹvbo ni lẹga ẹre. Ivbi e Kenan keghi ze vbe udu, iran ma kpa hin ẹvbo nii rre. 28 Ivbi Izrẹl ghi wegbe sẹ vbene iran ka ye, iran na suẹn gha ya Ivbi e Kenan ru iwinna nọ wegbe. Sokpan, Ivbi Izrẹl ma khulo Ivbi e Kenan hia kua.

29 Ivbi Ifrem ma vbe khulo Ivbi e Kenan ni ghaa rre Giza ladian. Iran na ye gha rre uwu ẹbu Ivbi Ifrem vbe Giza.

30 Ivbi e Zẹbulọn ma khulo emwa ni ghaa rre Kitrọn kevbe emwa ni ghaa rre Nehalọl ladian. Ivbi e Kenan na ye gha rre uwu ẹbu Ivbi e Zẹbulọn, Ivbi e Zẹbulọn na gha ya iran ru iwinna nọ wegbe.

31 Ivbi Asha ma khulo emwa ni ghaa rre Ako ladian, kevbe iran ni ghaa rre Saidọn, Alab, Akzib, e Hẹlba, Efik, kevbe Rihọb. 32 Ivbi Asha na ye gha rre uwu ẹbu Ivbi e Kenan ni ghaa rre otọ nii, rhunmwuda, iran ma khulo iran ladian.

33 Ivbi e Naftalai ma khulo emwa ni ghaa rre Bẹt-shimẹsh kevbe Bẹt-enat ladian, sokpan, iran na ye gha rre uwu ẹbu Ivbi e Kenan ni ghaa rre otọ nii. Ivbi e Naftalai na do gha ya emwa ni rre Bẹt-shimẹsh kevbe Bẹt-enat ru iwinna nọ wegbe.

34 Ivbi Amọri ma kue ne Ivbi e Dan gha rrie otọ nọ rriẹ, rhunmwuda ọni, Ivbi e Dan na do gha rre ikinkin ne oke ye. 35 Ivbi Amọri keghi ze vbe udu, iran na ye gha rre Oke Hirẹs, Aijalọn, kevbe She-albim. Sokpan, igiowa e Josẹf ghi wegbe sẹ vbene iran ka ye,* iran na do gha ya Ivbi Amọri ru iwinna nọ wegbe. 36 Otọ ọghe Ivbi Amọri keghi ke Akrabim kpa, vbe a ghaa gbe oke rrie odukhunmwu, otọ nii na vbe ke Sila kpa, ya sẹ ikinkin ne oke ye vbe odukhunmwu.