Avbe Ọbuohiẹn

3 Ena ọre avbe agbẹnvbo ne Jehova sẹrae ye otọ nii, ne iran mieke na danmwẹ Ivbi Izrẹl hia ni ma he gu Ivbi e Kenan khọn okuo ẹdẹ 2 (te Osanobua ru ẹre vberriọ, ne orre ọghe Ivbi Izrẹl ni dee, ni ma rẹn vbene okuo ye hẹ, mieke na rẹn vbene ọ ye hẹ): 3 ọkaolotu isẹn ọghe Ivbi e Filistia, Ivbi e Kenan hia, Ivbi e Saidọn, Ivbi e Hivi ni rre Oke Lẹbanọn, ke Oke Bel-hẹmọn ya sẹ e Libo-hemat.* 4 Te a ya ọna danmwẹ Ivbi Izrẹl ghee, deghẹ iran gha lele uhi ne Jehova loo e Mozis ya gbe ne avbe erha iran. 5 Rhunmwuda ọni, Ivbi Izrẹl na do gha rre uwu ẹbu Ivbi e Kenan, Ivbi e Hẹt, Ivbi Amọri, Ivbi e Pẹriz, Ivbi e Hivi, kevbe Ivbi e Jibọs. 6 Ivbi Izrẹl kegha viọ ivbi iran nikhuo rọnmwẹ, iran na vbe gha viọ ivbi iran nikhuo ne avbe agbẹnvbo na rọnmwẹ. Ivbi Izrẹl na ghi suẹn gha ga avbe ẹbọ ọghe iran.

7 Ivbi Izrẹl na do gha ru emwi nọ sọnnọ e Jehova, iran na mianmian e Jehova ne Osa ọghe iran, iran na gha ga avbe amazẹ ọghe Bel, kevbe avbe erhan ẹbọ.* 8 Rhunmwuda ọni, ohu Ivbi Izrẹl keghi mu e Jehova, ẹre ọ na ghi viọ iran ye obọ e Kushan-rishateim, ne ọba e Mẹsopotemia.* Ukpo erẹnrẹn, ẹre Ivbi Izrẹl ya ga e Kushan-rishateim. 9 Ivbi Izrẹl ghi tu tie Jehova nọ ru iyobọ ne iran, e Jehova na gie Ọtniẹl ne ovbi e Kinaz, ne ọtiẹn e Kelẹb nekherhe, nọ ya miẹn iran fan. 10 Orhiọn ọghe Jehova keghi hin yan rẹn, ọ na do gha re ọbuohiẹn ọghe Izrẹl. Ọ ghi ya khọn okuo, e Jehova keghi mu e Kushan-rishateim ne ọba e Mẹsopotemia* ye ọre obọ, obọ ọre na ghi ke ukhunmwu nẹẹn. 11 A ma ghi gha khọn okuo vbe ẹvbo nii,* vbe ukpo iyeva (40) nọ ghi lele ẹre. Iyeke ọni, Ọtniẹl ne ovbi e Kinaz keghi wu.

12 Ivbi Izrẹl keghi werriegbe suẹn gha ru emwi nọ sọnnọ e Jehova. Ẹre Jehova na ghi gi obọ Ẹglọn, ne ọba e Moab ke ukhunmwu ne iran, rhunmwuda ne iran na gha ru emwi nọ sọnnọ e Jehova. 13 Deba ọni, ọ na ru ẹre ne Ivbi Amọn kevbe Ivbi Amalẹk ya gu Ivbi Izrẹl khọn. Iran na mu okuo gie Ivbi Izrẹl, iran na vbe khọnmiotọ yan ẹvbo udin.* 14 Ukpo eva i rrọọ vbe ugie (18), ẹre Ivbi Izrẹl ya ga Ẹglọn ne ọba e Moab. 15 Ẹre Ivbi Izrẹl na ghi tu tie Jehova nọ ru iyobọ ne iran, e Jehova keghi gie Ihọd ne ovbi e Gira nọ ke uniẹn e Bẹnjamin rre, nọ ya miẹn iran fan; agobọ ẹre Ihọd ghaa khin. Ẹghẹ eso ghi gberra, Ivbi Izrẹl na viọ emwi ihako eso ne Ihọd, nọ viọ gie Ẹglọn ne ọba e Moab. 16 Na kha na, Ihọd keghi dunmwu agbada nọ mwẹ unu eva; utanmwẹ ọghe nene agbada kegha re ibata ọkpa vbe ukhiọnmwẹ,* ọ na gbalọe ginna ekuawẹ ọre nọ rre obọ erha ọmwa, ọ na ya ukpọn nọ yọe gue ẹre. 17 Ọ na ghi viọ ihako nii gie Ẹglọn ne ọba e Moab. Ọmwa nọ kakabọ kpọlọ egbe, ẹre Ẹglọn ghaa khin.

18 Ihọd ghi viọ emwi ihako nii ne Ẹglọn nẹ, irẹn vbe emwa ni gu ẹre viọ emwi ihako nii rre keghi kpa.* 19 Sokpan, ọ ghi sẹ eke ne avbe amazẹ na kaa re ye* vbe Gilgal, irẹn ọkpa na werriegbe bu Ẹglọn, ọ na tama rẹn wẹẹ: “Umogun, ọ mwẹ emwi oro ne I khian tama ruẹ.” Ẹre Ẹglọn ne ọba na ghi kha wẹẹ: “Wa rhie ẹghẹ ne ima!”* Rhunmwuda ọni, eguọmwadia ẹre hia na ladian. 20 Ẹre Ihọd na bu Ẹglọn gha rrie eke nọ furre, ne irẹn ọkpa tota yi vbe ughugha nọ rre uhunmwu owa ẹre. Ihọd na wẹẹ: “Osanobua gie mwẹ uhunmwu guẹ.” Ẹre Ẹglọn na kpaegbe vbe ẹkete* ọghẹe. 21 Ẹre Ihọd na ya agobọ yuo agbada ladian vbe ekuawẹ ọre nọ rre obọ erha ọmwa, ọ na ziẹn ọnrẹn ye ọre ẹko. 22 Te agbada nii wa la uwu ẹko ẹre fo, ya sẹ uze ẹre. Ẹvbi nọ rre ọre ẹko na gue nene agbada, rhunmwuda, ọ ma si ẹre ladian, isan na vbe ladian vbe eke na so agbada nii yi.* 23 Ihọd keghi ladian vbe ughugha nii*, ọ na bi avbe ẹkhu ni rrọọ gbe, ọ na vbe khui ẹre. 24 Ọ ghi kpa nẹ, eguọmwadia Ẹglọn na werriegbe gha dee, iran na do vba wẹẹ, a khui avbe ẹkhu ọghe ughugha nọ rre uhunmwu owa. Ẹre iran na wẹẹ: “Egbọre te ọ yo egbowa* vbe ughugha nọ furre nọ ke uwu ẹre.” 25 Iran ghi zẹ khẹ, egbe na wọọ iran.* Sokpan, iran ghi miẹn wẹẹ ọba ma kie avbe ẹkhu ọghe ughugha nii nọ rre uhunmwu owa, iran na ya rhie isanhẹn, iran na kie ẹre. Iran ghi kie avbe ẹkhu nii, iran na bẹghe ẹre wẹẹ, ọba iran lovbiẹ ye otọ lọlọlọ, ọ wu nẹ.

26 Ihọd keghi lẹẹ fua vbe uwu ẹghẹ ne iran ya gha roro emwi ne iran khian ru, ọ na la ehe ne avbe amazẹ na kaa re ye,* ọ na do sẹ e Sẹ-aira vbe egbe hẹnnẹdẹn. 27 Ọ ghi sẹ ikinkin ne oke ye vbe Ifrem, ọ na kpee okpe.* Ivbi Izrẹl na ladian, iran na tuorre vbe ikinkin ne oke ye; irẹn ẹre ọ ghaa su iran khian. 28 Ẹre ọ na ghi tama iran wẹẹ: “Wa lele mwẹ, rhunmwuda, e Jehova viọ Ivbi e Moab ne eghian uwa ye uwa obọ nẹ.” Ẹre iran na lele ẹre, iran na viọ ivbiyokuo eso ye avbe ehe ni ma dinmwi gbe vbe Ẹzẹ e Jọdan, ne Ivbi e Moab ghẹ mieke na sẹtin lẹẹ. Iran ma kue ne ọmwa rhọkpa fian ẹzẹ nii rra. 29 Vbe ẹghẹ nii, iran keghi gbele Ivbi e Moab ni re odẹ arriaisẹn igbe (10,000), ehia kegha re ikpia ni mwẹ ẹtin kevbe ni wegbe; ọkpa ma vbe miẹn uhunmwu vbọ. 30 Erriọ ẹre obọ Ivbi Izrẹl ghi ya ke ukhunmwu ne Ivbi e Moab vbe ẹdẹrriọ; a ma ghi khọn okuo vbe ẹvbo nii, vbe ukpo iyenẹ (80).

31 Ọbuohiẹn nọ ghi lele ẹre kegha re Shamga, ne ovbi Enat, nọ ya ukpokpo nọ mwẹ ukpẹ na ya su ẹmila, gbele Ivbi e Filistia iyisẹn vbe ihe ehan (600); te irẹn wa vbe miẹn Ivbi Izrẹl fan.