Avbe Ọbuohiẹn

18 Ivbi Izrẹl ma gha mwẹ ọba vbe ẹghẹ nii. Uniẹn e Dan kegha gualọ otọ ne iran khian dia, rhunmwuda, do fi ẹghẹ nii, otọ na ghae ne iran vbe ikinkin ọghe dọmwadẹ uniẹn ọghe Izrẹl, ma he sẹ iran obọ.

2 Ivbi e Dan keghi gie ikpia eso vbe ẹgbẹe iran, ne iran ya ba otọ nii ghee, ne iran vbe khian lele uwu ẹre. Ikpia ne iran gie kegha re emwa ni gbegba, ni ke Zora kevbe Ẹshtaọl rre. Iran na tama iran wẹẹ: “Wa gha khian, ne uwa lele otọ nii hia.” Iran ghi sẹ owa e Maika vbe ikinkin ne oke ye vbe Ifrem, iran na vbiẹ evba ne ẹdẹ gbe. 3 Vbene iran te sẹ owa e Maika, iran na họn urhu igbama okpia nii ne Ovbi e Livai,* ẹre iran na bu ẹre, iran na nọ rẹn wẹẹ: “De ọmwa nọ we ne u gha die emwa? Vbua gualọ mwa? De emwi ne u ru mwa?” 4 Ọ na tama iran emwi hia ne Maika ru nẹẹn, ọ na vbe kha wẹẹ: “Te ọ rhie mwẹ ne I gha re ohẹn ọghẹe.” 5 Ẹre iran na tama rẹn wẹẹ: “Lahọ, gu ima nọ Osanobua deghẹ emwi gha dunna ne ima vbe okhian na.” 6 Ohẹn nii na tama iran wẹẹ: “Wa gha khian vbe ọfunmwegbe. E Jehova gu uwa rrọọ vbe okhian na.”

7 Ẹre ikpia isẹn nii na kpa, iran na gha rrie Leish. Iran ghi sẹ evba, iran na bẹghe ẹre wẹẹ emwa ni rre evba ma ya egbe kọ agbẹnvbo rhọkpa, vbene Ivbi e Saidọn vbe ye. Te orhiọn iran wa sẹ otọ, ohan ma vbe gha mu iran wẹẹ, a gha do gu iran khọn. Ọmwa rhọkpa nọ ya obọ atosi mu emwa, ma vbe gha kpokpo iran vbe otọ nii. Ehe ne iran ghaa ye, wa gha rree ne Ivbi e Saidọn, iran ma vbe gha gu emwa ọvbehe mu obọ.

8 Ikpia isẹn nii ghi werriegbe bu etẹn iran vbe Zora kevbe Ẹshtaọl, etẹn iran na nọ iran wẹẹ: “Vbe uwa ghi khian hẹ?” 9 Ẹre iran na wẹẹ: “Gia ya gu iran khọn, rhunmwuda, otọ ọghe iran wa maan ẹsẹse. Vbọzẹ ne uwa na si egbe ghee iyeke yi? Wa ghẹ mu ẹghẹ rhia, wa zẹgiẹ ya ya otọ nii khian ọghe uwa. 10 Wa gha sẹ evba, wa gha bẹghe ẹre wẹẹ, te orhiọn emwa ni rre evba wa sẹ otọ, otọ ọghe iran wa vbe kpọlọ. Osanobua mu ẹvbo nii ye uwa obọ nẹ, a i miẹn emwi ọkpa na gualọ vbe agbọn na, nẹi rre otọ nii.”

11 Ẹre ikpia iyisẹn ehan (600) ni viọ emwi igbinna mwẹ, ni vbe ke uniẹn e Dan rre, na ke Zora kevbe Ẹshtaọl kpa. 12 Iran na ke evba gbe oke gha rrie Kiriat-jiẹrim nọ rre otọ e Juda, iran na bu agọ ye evba. Rhunmwuda ọni, e Mehanẹ-dan,* ẹre a ghi do gha tie eke ne iran bu agọ yi vbe odẹ orrie* ọghe Kiriat-jiẹrim, do fi ẹdẹnẹrẹ. 13 Iran na ke evba gha rrie ikinkin ne oke ye vbe Ifrem, iran na do sẹ owa e Maika.

14 Ẹre ikpia isẹn ni ya ba otọ e Leish ghee na tama etẹn iran wẹẹ: “Wa kue rẹn wẹẹ, avbe amazẹ etẹrafim,* ẹfọd,* amazẹ na kaa re, kevbe amazẹ na ya ematọn ru* rre avbe owa na? Wa zẹ iro emwi ne uwa gha ru.” 15 Ẹre iran na mudia vbe evba, iyeke ọni, iran na gha rrie ehe ne igbama okpia nii, nọ re Ovbi e Livai ghaa ye vbe owa e Maika, iran na nọ rẹn vbene emwi hia ye hẹ. 16 Na kha na, ikpia iyisẹn ehan (600) ni ke uniẹn e Dan rre, ni vbe viọ emwi igbinna mwẹ, keghi mudia ye onurho. 17 Ikpia isẹn ni ya ba otọ nii ghee keghi la owa, ne iran ya viọ amazẹ na kaa re nii, ẹfọd,* avbe amazẹ etẹrafim,* kevbe amazẹ na ya ematọn ru.* (Nene ohẹn kevbe ikpia iyisẹn ehan [600], ni viọ emwi igbinna mwẹ keghi mudia ye onurho.) 18 Iran keghi la owa e Maika, iran na viọ amazẹ na kaa re nii, ẹfọd,* avbe amazẹ etẹrafim,* kevbe amazẹ na ya ematọn ru.* Ẹre ohẹn nii na ghi nọ iran wẹẹ: “Vbe uwa ru na?” 19 Sokpan, iran na tama rẹn wẹẹ: “Gia họn ẹmwẹ. Ya obọ gue unu ruẹ ne u lele ima, ne u do gha re ọbude ọghe ima* kevbe ohẹn. De nọ maan sẹ vbọ? Ne u gha re ohẹn vbe owa orhunmwu ọkpa nọ ra, ra ne u gha re ohẹn ne uniẹn ọkpa vbe Izrẹl, ne ẹgbẹe ni bun ye?” 20 Ẹmwẹ ne iran tama ohẹn na keghi yẹẹ ọre, ẹre ọ na mu enene ẹfọd,* avbe amazẹ etẹrafim,* kevbe amazẹ na kaa re, ọ na lele iran kpa.

21 Iran na fi egbe werriegbe, iran na kpa. Iran na viọ ibiẹka, emwirri kevbe avbe emwi ighobioye ke odaro. 22 Iran ghi kpa nẹ vbe owa e Maika, vbe iran ghi khian buan nẹ kherhe, ikpia ni rre avbe owa ni sikẹ owa e Maika keghi si egbe koko, iran na zẹ iran khu. Vbe okiekie, iran na do vba ikpia nii, ni ke uniẹn e Dan rre. 23 Iran ghi go tie Ivbi e Dan, Ivbi e Dan na fi egbe werriegbe, iran na nọ e Maika wẹẹ: “Vbọ khin? Vbọzẹ ne u na viọ emwa ni bun lele egbe gha dee?” 24 Ẹre ọ na tama iran wẹẹ: “Wa viọ avbe ẹbọ mwẹ, wa vbe rhie ohẹn mwẹ lele egbe. De emwi ọvbehe ne I ghi mwẹ? Ẹre uwa na ye miẹn unu ne uwa ya nọ mwẹ wẹẹ, ‘Vbọ khin?’” 25 Ẹre Ivbi e Dan na tama rẹn wẹẹ: “Ghẹ ghi vannọ mu ima; vbe ẹ i re erriọ, ikpia ne ohu rherhe mu sẹtin do gu ruẹ gbinna, ẹghẹ nii, wẹ vbe igiowa ruẹ ghi wulo.” 26 Ẹre Ivbi e Dan na kpa; e Maika ghi miẹn wẹẹ iran wegbe sẹ irẹn, ọ na fi egbe werriegbe, ọ na gha rrie owa.

27 Iran ghi viọ avbe ẹbọ ọghe Maika, iran na vbe rhie ohẹn ọghẹe lele egbe, iyeke ọni, iran na gha rrie Leish. Te orhiọn emwa ni rre Leish wa sẹ otọ, ohan ma vbe gha mu iran wẹẹ, a gha do gu iran khọn. Iran na ya umozo gbele emwa ni rre Leish rua, iran na vbe giẹn ọnrẹn sẹ otọ. 28 Ọmwa rhọkpa ma sẹtin rre do ru iyobọ ne iran, rhunmwuda, te ẹvbo nii wa gha rree ne Saidọn, iya* ọghe Bẹt-rihọb ẹre ọ ghaa ye, iran ma vbe gha gu emwa ọvbehe mu obọ. Ivbi e Dan keghi werriegbe bu ẹvbo nii, iran na ghi gha rre evba. 29 Deba ọni, iran na do gha tie ẹvbo nii e Dan. E Dan ẹre ọ ghaa re eni erha iran; ovbi Izrẹl ghaa nọ. Sokpan, e Leish ẹre a ka gha tie ẹvbo nii. 30 Iyeke ọni, Ivbi e Dan keghi mu amazẹ na kaa re nii ye ihe ọkpa, ne iran mieke na gha gae. E Jonatan ne ovbi e Gẹshọm, ne ovbi e Mozis, kevbe ivbi ẹre na do gha re ohẹn ọghe uniẹn e Dan, ya sẹ ẹdẹ na viọ emwa ni rre ẹvbo nii gha rrie imu. 31 Iran keghi mu amazẹ na kaa re ọghe Maika ye ihe ọkpa, iran na gha gae, vbe uwu ẹghẹ ne owa ọghe Osa ọghe ẹmwata ya gha rre Shailo.